1 Ā ināianei, e aku teina aroha, kua pānui au i ēnei mea e mōhio pea ana koutou e pā ana ki ngā kawenata a te Ariki kua kawenatatia e ia ki te whare o Iharaira—

2 Kua kōrero nei ia ki ngā Hūrai, mā te māngai o ana poropiti tapu, mai i te tīmatanga pū anō heke iho nei, mai i tētahi whakatipuranga ki tētahi whakatipuranga, tae atu ana ki te wā e whakahokia ai rātou ki te hāhi pono me te kāhui o te Atua; hei te wā e huihuia ai rātou ki tō rātou kāinga ki ngā whenua tuku iho, ā, ka whakatūria i runga i ō rātou whenua whakaari.

3 Nana, e aku teina aroha, e kōrero ana au i ēnei mea ki a koutou e hari ai koutou, me te hiki ake i ō koutou upoko āke tonu atu, nā ngā manaakitanga ka whakatau iho te Ariki te Atua i runga i ō tamariki.

4 Nā, e mōhio ana au he nui tā koutou rapu, te tokomaha o koutou, kia mōhio ai ki ngā mea e haere mai nei; nā reira e mōhio nei au e mōhio ana koutou ka memeha atu ō tātou kikokiko, ā, ka mate; hei aha koa, i roto i ō tātou tīnana ka kite tātou i te Atua.

5 Āe rā, e mōhio nei au e mōhio ana koutou ka whakaatu atu ia i a ia anō ki te hunga kei Hiruharama, i te wāhi i ahu mai ai tātou; nā te mea e tika ana me pēnā i waenganui i a rātou; nā te mea e tika pū ana mā te kaihanga nui kia tuku ai i a ia anō hei mea e taea nei e ngā tāngata i te kikokiko, ā, kia mate anō mō ngā tāngata katoa, nā, kia meinga ai ngā tāngata katoa hei mea e taea nei e ia.

6 Nā, kua pā te mate ki runga i ngā tāngata katoa, kia tutuki ai i te mahere aroha o te Kaihanga nui, me puta mai he mana aranga, ā, me puta mai anō te aranga ki te tangata nā runga i te takanga; ā, i puta mai te takanga i te hara; ā, nā te mea i meinga ai te tangata hei mea taka kua hātepea atu rātou i te aroaro o te Ariki.

7 Nā reira, me tika pū ia hei whakamārietanga mutunga kore—ki te kore hei whakamārietanga mutunga kore kua kore tēnei pokenga e huri ai hei pokenga korenga. Nā reira, ko te whakawākanga tuatahitanga i tau ai ki runga i te tangata he mea tau iho mō tētahi wā mutunga kore. Ā, me i pērā, kua takoto iho tēnei kikokiko kia pirau ai, kia horo ai ki tōna whaea oneone, nōhea e ara anō.

8 Anō te mātauranga o te Atua, tana atawhai me tōna aroha noa! Nana rā, mehemea e kore te kikokiko e ara anō e tika ana kia meinga ai ō tātou wairua hei mea e taea nei ki tērā anahera i taka iho mai i te aroaro o te Atua Ora Tonu, ā, ka meinga he rēwera, nōhea e ara anō.

9 Ā, ka meinga rawa ō tātou wairua kia rite ki a ia, ā, ka meinga tātou hei rēwera, he anahera ki tētahi rēwera, kia kōpania atu i te aroaro o tō tātou Atua, ā, kia noho tonu atu ki te matua o ngā rūkahu, i te hinapōuri, pērā ki a ia; āe rā, ki taua mea nāna ō tātou mātua tuatahi i māminga, e whakapanoni ia i a ia anō hei anahera mārama, ā, ka whakaohoohongia ake ngā tamariki a te tangata ki ngā whakahaeretanga muna o te kōhuru me ērā atu mahinga muna katoa o te pōuritanga.

10 Anō te nui o te pai o tō tātou Atua, e whakarite ana i tētahi huarahi hei putanga atu i te kapohanga o tēnei taniwhā weriweri; āe rā, ko taua taniwhā, o te mate me te ao rēwera, e huaina nei ahau ko te matenga o te tinana me te matenga hoki o te wairua.

11 Ā, nā te huarahi whakaora a te Atua, te Mea Tapu o Iharaira, tēnei mate, koia kua kōrero nei au, koia he mea mau poto, ka tukuna ake ōna mate; ko taua mate ko te rua kōiwi.

12 Ā, ko tēnei mate kua kōrero nei au, koia te matenga ā-wairua, ka tukuna ake ōna mate; ko taua matenga ā-wairua ko te ao rēwera; nā reira, me tuku ake e te mate, e te ao rēwera ō rāua mate, ā, me tuku ake e te ao rēwera ōna wairua herehere, ā, me tuku ake e te rua kōiwi ōna tinana herehere, ā, ka whakahokia ngā tinana me ngā wairua o ngā tāngata tētahi ki tētahi; ā, he mea nā te mana o te aranga mai o te Mea Tapu o Iharaira.

13 Anō te nui o tā te Atua mahere; Nā te mea hei tērā atu ringaringa, me tuku ake e te pararaiha o te Atua i ngā wairua o te hunga tika, ā, ko te rua kōiwi te tinana o te hunga tika; ā, ka whakahokia te wairua me te tinana ki a ia anō, ā, ka meinga ngā tāngata katoa kia piraukore, kia matekore, ā, he wairua ora rātou, e mau ana ki tētahi tino mōhiotanga pēnei i a tātou i te kikokiko, hāunga ia he tino tika rawa atu tō tātou mātauranga.

14 Nā reira, ka mau tātou ki tētahi tino mōhiotanga o ō tātou kaniawhea, me ō tātou pokenga, me ō tātou tahangatanga; ā, ka mau te hunga tika ki tētahi mōhiotanga o ō rātou haringa, me ō rātou tika, e kākahuria ana ki te pokekore, āe rā, ki te kahu pū anō o te tika.

15 Ā ka pahawa ake, nā, ina pahure atu ngā tāngata katoa i tēnei mate tuatahi ki te ora, nā konā kua meinga he mea matekore, me puta rātou ki mua i te nohonga-whakawā o te Mea Tapu o Iharaira; ā, hei reira puta mai ai ko te whakawākanga, kātahi rātou me whakawā e ai ki te whakawākanga tapu a te Atua.

16 Ā, e tika pū ana, e ora ana te Ariki, nā, kua kōrerohia ia e te Ariki te Atua, ā, ko tana kupu mau tonu, koia e kore rawa e pahure atu, nā, ko rātou e tika ana ka tika tonu, ā, ko rātou e poke ana ka poke tonu; nā reira, ko rātou e poke ana ko te rēwera me ana anahera; ā, ka haere atu rātou ki roto i te ahi mura tonu, kua whakaritea mō rātou; ā, ko tō rātou whakamamaetanga ānō nei he roto ahi whānāriki, ko tōna mura e kake ake ana āke tonu atu, ā, kāore ōna mutunga.

17 Anō te nui o te tika o tō tātou Atua! Nā te mea ka mahia katoatia ana kupu, ā, kua puta whakamua atu i tōna māngai, ā, me ea tana ture.

18 Engari, nana, ko te hunga tika, ko te hunga tapu o te Mea Tapu o Iharaira, ko rātou kua whakapono ki roto i te Mea Tapu o Iharaira, ko rātou kua whakamanawanui ki ngā rīpeka o te ao, ā, kua whakahāweatia tōna whakamā, ka whiwhi rātou i te kīngitanga o te Atua, kua whakaritea nei mō rātou i te orokohanganga o te ao, ā, ka toitū tō rātou hari āke tonu atu.

19 Anō te nui o te aroha o te Atua, te Mea Tapu o Iharaira! Nā te mea e whakaputaina ana āna hunga tapu i taua taniwhā weriweri, te rēwera, me te mate, me te ao rēwera, me taua roto ahi whānāriki, koia te whakamamaetanga mutunga kore.

20 Anō te nui o te tapu o te Atua! Nā te mea e mōhio ana ia i ngā mea katoa, kāore he mea kotahi, engari e mōhio ana ia.

21 Ā, ka haere mai ia ki tēnei ao kia whakaora ai i ngā tāngata katoa mehemea ka whakarongo rātou ki tōna reo; nana rā, ka mamae ia i ngā mamae o ngā tāngata katoa, āe rā, ko ngā mamae o ia tangata, o ia tangata, tāne mai, wahine mai, me ngā tamariki, ko rātou nō te whānau o Ārama.

22 Ā, ka mamae pēnei ia kia tau ai te aranga ki runga i ngā tāngata katoa, kia tū katoa ai i mua i tōna aroaro hei te rā whakawā nui.

23 Ā, e whakahau ana i ngā tāngata katoa kia rīpenetā ai rātou, kia rūmakina i tōna ingoa, e mau ana ki tētahi tino whakapono ki roto i te Mea Tapu o Iharaira, e kore rānei rātou e whakaorangia i roto i te kīngitanga o te Atua.

24 Ā, ki te kore rātou e rīpenetā me te whakapono i tōna ingoa, me te rūmaki i tōna ingoa, me te ū tonu ki te mutunga, ka pāpunitia rātou; nā te mea kua kōrerotia nei ia e te Ariki te Atua, te Mea Tapu o Iharaira.

25 Nā reira, kua homai ia i tētahi ture; ā, ki te kore he ture kua homai nei kāore he whakawhiunga; ā, ki te kore he whakawhiunga kāore he whakahēnga; ā, ki te kore he whakahēnga ka whai tikanga ngā arohatanga o te Mea Tapu o Iharaira ki runga i a rātou, nā te whakamārietanga; nā te mea e whakaorangia nei rātou e tōna mana.

26 Nā, mā te whakamārietanga e ea ai ngā tono o tōna tika ki runga i te hunga katoa kāore i hoatu ai te ture ki a rātou, nā konei rātou e whakaorangia ai i taua taniwhā weriweri, i te mate me te ao rēwera, me te rēwera, me te roto ahi whānāriki, koia ko te whakamamaetanga mutunga kore; ā, ka whakahokia rātou ki taua Atua nāna rātou i whakaueue hā, koia ko te Mea Tapu o Iharaira.

27 Engari auē te mate mō te tangata kua hoatu nei te ture ki a ia, āe rā, mō te tangata i a ia ngā whakahaunga katoa a te Atua, pērā ki a tātou, kātahi ērā ka takahia, me te moumou i ngā rā o tōna poropeihana, nā te mea he weriweri tōna āhuatanga!

28 Anō te mahere tinihanga o te mea kino! Anō te horihori, me te hangahanga, me te kuaretanga o te tangata! Ina ākona rātou ka pōhēhē he whaimōhio, ā, kāore rātou e whakarongo ki ngā kōrero tohutohu a te Atua, nā te mea ka whakatahangia, e pōhēhē ana nō rātou anō te mōhiotanga, nā reira, he kuare tō rātou whaimōhiotanga, ā, kāore ōna painga mō rātou. Ā, ka mate rātou.

29 Engari he pai kia ākona ai ki te whakarongo rātou ki ngā kōrero tohutohu a te Atua.

30 Engari auē te mate mō te hunga whairawa e ai ki ngā mea o te ao. Nā te mea rā he whairawa rātou, e whakahāwea ana rātou i te hunga rawakore, ā, e whakatoi ana rātou i te hunga ngākau māhaki, ā, e whai ana ō rātou ngākau i ō rātou taonga; nā reira, ko tō rātou taonga tō rātou atua. Ā nana, ka ngaro atu ō rātou taonga me rātou anō hoki.

31 Ā, auē te mate mō te turi e kore nei e rongo; nā te mea ka ngaro rātou.

32 Auē te mate mō te hunga kāpō e kore nei e kite; nā te mea ka ngaro rātou anō hoki.

33 Auē te mate mō te hunga ngākau kokoti kore, nā te mea ka patua rātou e tō rātou mōhiotanga ki ō rātou hara a te rā whakamutunga.

34 Auē te mate mō te kairūkahu, nā te mea ka makaia iho ia ki te ao rēwera.

35 Auē te mate mō te kaikōhuru e kōhuru mārire ana, nā te mea ka mate ia.

36 Auē te mate mō te hunga e pūremu ana, nā te mea ka makaia iho rātou ki te ao rēwera.

37 Āe rā, auē te mate mō te hunga e koropiko ana ki ngā whakapakoko, nā te mea ka kaingākau te rēwera o ngā rēwera i a rātou.

38 Ā, hei whakakapi, auē te mate mō te hunga e mate i roto i ō rātou hara; nā te mea ka hoki atu rātou ki te Atua, ā, ka kitea tōna kanohi, ā, ka noho tonu i roto i ō rātou hara.

39 Auē, e aku teina aroha, kia mahara i te weriweritanga o te hara ki taua Atua Tapu, ā, ki te weriweritanga hoki o te tuku ki ngā whakawainga a te mea tinihanga. Kia mahara, ki te anga ngā whakaaro ki tō te kikokiko ko te mate, ā, ki te anga ngā whakaaro ki tō te wairua ko te oranga tonutanga.

40 Auē, e aku teina aroha, kia whai taringa mai ki aku kupu. Kia mahara ki te nui o te Mea Tapu o Iharaira. Kaua e kī he pakeke āku kua kōrero atu nei ki a koutou; nā te mea ki te pērā koutou, ka taunu atu ki te pono; nā te mea kua kōrero au i ngā kupu a tō Kaihanga. E mōhio ana au he pakeke ngā kupu pono ki ngā pokenga katoa; engari kāore te hunga tika e wehi i ērā, nā te mea e aroha nei rātou ki te pono, ā, kāore e tūoioihia ana.

41 Mō konei, e aku teina aroha, haere mai ki te Ariki, te Mea Tapu. Kia mahara he tika ōna huarahi. Nana, he whāiti te huarahi mō te tangata, engari e takoto tōtika ana ki mua i a ia, ā, ko te Mea Tapu o Iharaira te kaitiaki o te kēti; ā, kāore e tonoa ana he pononga i reira; ā, kāore he huarahi kē atu hāunga ia mā te kēti; nā te mea tē taea ia te nukarau, nā te mea ko te Ariki te Atua tōna ingoa.

42 Ā, ko ia e pātōtō ai, ka huakina e ia ki a ia; me te hunga whaimōhio, me te hunga ākona, me te hunga e whairawa ana, kua neke ake nā ō rātou akoranga, me ō rātou whaimōhioranga, me ō rātou whairawatanga—āe rā, ko rātou te hunga e whakahāweatia ana e ia; ā, ki te kore rātou e maka atu i ēnei mea, me te whakatau iho he kuare rātou i te aroaro o te Atua, me te heke iho ki te hōhonutanga o te whakaiti, kua kore e huakina e ia ki a rātou.

43 Engari ka hunaia ngā mea a te hunga whaimōhio me te hunga whaiwhakaaro i a rātou āke tonu atu—āe rā, ko taua haringa kua whakaritea nei mō te hunga tapu.

44 Auē, e aku teina aroha, kia mahara i aku kupu. Nana, ka unuhia e au aku kākahu, ā, ka ruiruia ēnā i mua i a koe; E inoi ana au ki te Atua o tōku whakaoranga, kia tirohia au e tōna karu kimihanga-whānui; nā reira, ka mōhio koutou a te rā whakamutunga, ina whakawākia ngā tāngata katoa mō ā rātou mahinga, nā, i kitea ai e te Atua o Iharaira, nāku ō koutou hara i ruirui iho i tōku wairua, ā, e tū pīata ana au ki mua i a ia, ā, kua makere nei ō koutou toto i ahau.

45 Auē, e aku teina aroha, tahuri atu i ō koutou hara; ruiruia iho ngā mekameka o te mea e hiahia ana kia pūmau ai tana herehere i a koutou; haere mai ki te Atua koia te toka o tō koutou whakaoranga.

46 Whakaritea ō koutou wairua mō taua rā whaikorōria ina whakamahia te tika ki te hunga tika, ko te rā pū anō o te whakawākanga, kia kaua ai koutou e whakamaoko ai i te wehi weriweri; kia kaua ai koutou e mahara i ō koutou kaniawhea weriweri i runga i te tino tika, me te ākina ki te karanga: He tapu, he tapu ō whakawākanga, E te Ariki te Atua Kaha Rawa—engari e mōhio ana au i tōku kaniawhea; nāku tō ture i takahi, ā, nōku anō ōku hara; ā, kua whakamaua ahau e te rēwera, nā, he pārurenga au nā tana hinapōuri weriweri.

47 Engari nana, e aku teina, e tika ana kia whakaohongia ai koutou e ahau ki tētahi āhuatanga tūturu mō ēnei mea? Kua rakaraka ake au i ō koutou wairua mehemea kua mā ō koutou hinengaro? Kua mārama atu au ki a koutou e ai ki te māramatanga o te pono mehemea kua mawheto koutou i te hara?

48 Nana, mehemea kua tapu koutou kua kōrero atu ahau ki a koutou mō te tapu; engari nā te mea kāore koutou e tapu ana, me te titiro mai koutou ki ahau hei kaiako, kāore e kore me tika pū ia kia whakaako au i a koutou i ngā utu mō te hara.

49 Nana, e whakarihariha ana tōku wairua ki te hara, ā, e hari ana tōku ngākau i te tika; ā, ka whakamoemiti au i te ingoa tapu o tōku Atua.

50 Haere mai, e aku teina, ko ngā mea katoa e matewai ana, haere mai koutou ki ngā wai; ā, ko ia kāore āna moni, haere mai ki te hoko, ā, ki te kai; āe rā, haere mai ki te hoko waina me te miraka, kaua he moni, ā, kaua he utu.

51 Nā reira, kaua e whakapau moni mō ngā mea kāore ōna painga, kaua rānei tō koutou kaha mō taua mea kāore e taea te whakaea. Whakarongo rawa mai ki ahau, me te mahara i ngā kupu kua kōrero nei au; me te haere mai ki te Mea Tapu o Iharaira, me te kai i taua mea e kore nei e ngaro, e kore rānei e pokea, ā, tukuna ō koutou wairua kia hari ai i runga i te mōmonatanga.

52 Nana, e aku teina aroha, kia mahara i ngā kupu a tō koutou Atua; kia inoi tonu ki a ia i te awatea, me te tuku whakawhetai ki tōna ingoa tapu i te pō. Tukuna ō koutou ngākau kia hari ai.

53 Ā nana, anō te nui o ngā kawenata a te Ariki, ā, anō te nui o ana tapatuhanga iho ki ngā tamariki a te tangata; ā, nā tōna nui, me tōna atawhai me tōna aroha, kua whakaaria mai e ia ki a tātou kia kore ai ō tātou uri e whakangaromia katoatia, e ai ki tō te kikokiko, engari māna rātou e tiaki; ā, ka meinga rātou ngā whakatipuranga anamata he manga tika nō te whare o Iharaira.

54 Ā ināianei, e aku teina, kei te hiahia au kia kōrero tonu ki a koutou; engari hei āpōpō ka whakapuaki au i te toenga atu o aku kupu. Āmine.