1 Kātahi au ka waiata ki taku tino-tau he waiata mō taku tau, e pā ana ki tana māra waina. He māra waina tō taku tino-tau i tētahi puke tino mōmona.

2 Ā, i taiapatia e ia, ā, i kohia atu ngā kōhatu o reira, ā, ka whakatōkia iho e ia ki te waina tino pai rawa atu, ā, ka hangaia tētahi pourewa i waenganui, ā, i hangaia anōtia e ia he whakapēhinga-waina i konā; ā, i tāria e ia kia whakatupuria mai ai he kerepe, ā, i whakatupuria mai ai he kerepe puihi.

3 Ā ināianei, E ngā kainoho o Hiruharama, me ngā tāne o Hura, whakawākia, tāku e inoi nei ki a koe, ko ahau me taku māra waina.

4 He aha kē atu hei mahi māku ki taku māra waina kāore anō au kia mahi? Nā reira, i taku tatarihanga atu kia whakatupuria he kerepe i whakatupuria he kerepe puihi.

5 Ā, tīmata ināianei; ka kōrero atu au ki a koutou he aha rā ia tāku ki taku māra waina—ka tango atu au i tō reira taiapa tātarāmoa, ā, ka kainga ake; ā, ka turaki au i tō reira pātū, ā, ka takahia iho;

6 Ā, māku ia e whakamōwai hei ururua; e kore ia e tapatapahia, e ngakia rānei; engari ka tupu ake he tātarāmoa me te tūmatakuru; māku anō ngā kapua e whakahau kia kaua e uaina he ua ki runga i a ia.

7 Nā, ko te māra waina o te Ariki o ngā Mano, ko te whare o Iharaira, ā, ko ngā tāne o Hura tana tupu āhuareka; ā, i tāria e ia te whakawākanga, ā nana, aupēhitanga; mō te tika, engari nana, he tangi auē.

8 Auē te mate mō te hunga e hono ana i tētahi whare ki tētahi whare, kia kore ai e taea he wāhi, kia whakanohoia ai rātou anake i waenganui i te whenua!

9 I ōku taringa, i kī ai te Ariki o ngā Mano, mō tētahi ponotanga ka mokemoke kau ngā whare maha, ā, he pā nui, he pā ātaahua kāore he kainoho.

10 Āe rā, kotahi te kauranga e puta ai i ngā eka tekau o te māra waina, ā, he epa anō e puta ai i te kākano o tētahi homa.

11 Auē te mate mō te hunga e maranga moata ake ai i te ata, kia whai atu ai rātou i te inu kaha, nā, e haere tonu ana ki te pō, ā, e mumura ana rātou i te waina!

12 Ā, kei ā rātou hākari anō hoki te hāpa, me te hatere, te timipera, te pūtōrino, me te waina; engari kāore ā rātou whakaarotanga ki te mahi a te Ariki, kāore he whakaarotanga rānei ki ngā mahinga o ōna ringaringa.

13 Nō reira, kua haere iho tōku iwi ki roto i te hereherenga, nā te mea kāore ō rātou mōhiotanga; ā, e matekai ana ō rātou tāngata mārohirohi, ā, kua maroke ake ō rātou tini i te matewai.

14 Nō reira, kua whakanui a te ao rēwera i a ia anō, kua huakina whānuitia tōna māngai; ā, ko tō rātou korōria, me ō rātou tini, me tō rātou whakahirahira, ā, ko ia e whakamanamana ana, ka heke iho ki roto i a ia.

15 Ā, ka kūmea iho te ware, ā, ka whakaitia te tangata kaha, ā, ka whakaitia ngā karu o te hunga whakahīhī.

16 Engari ka whakateiteihia te Ariki o ngā Mano i te whakawākanga, ā, ka whakatapua te Atua e tapu ana i te tika.

17 Hei konā ngā reme e kai ai i runga i tō rātou āhua, ā, ka kainga ngā wāhi ururua o ngā mea mōmona e te hunga tauhou.

18 Auē te mate mō te hunga e kumea ana te hē ki ngā aho horihori, me te hara ki te taura kāta;

19 E mea ana: Tukuna ia kia hohoro, kia wawe tana mahi, kia kitea ai e tātou; ā, tukuna te tohutohu a te Mea Tapu o Iharaira kia whakatata mai ai, ā, kia haere mai ai, e mōhio ai tātou ki a ia.

20 Auē te mate mō te hunga e kī ana he pai te kino, ā, he kino te pai, e whakataua ana te pōuritanga mō te māramatanga, me te māramatanga mō te pōuritanga, e whakataua ana te kawa mō te reka, me te reka mō te kawa!

21 Auē te mate mō te hunga matatau i ō rātou ake karu, ā, e whaimōhio ana i ō rātou ake tirohanga atu!

22 Auē te mate mō te hunga kaha ki te inu waina, me ngā tāngata kaha ki te whakaranu i te inu kaha;

23 E whakatau hē kore ana i te hunga whakarihariha mō te utu, me te muru atu i te tika o te hunga tika i a ia!

24 Nō reira, e rite ana ki tā te ahi horo i te kakau wīti, me tā te kāpura whakapau i te pāpapa, ko tō rātou aka he pirautanga, ā, ka rere ake ō rātou puāwai he rite ki te puehu; nā te mea kua makaia atu e rātou te ture o te Ariki o ngā Mano, ā, kua whakahāweatia te kupu a te Mea Tapu o Iharaira.

25 Nō reira, e tahutahu ana te riri o te Ariki ki tana iwi, ā, kua torona atu tōna ringa ki a rātou, ā, kua patua rātou; ā, i ngāueue ai ngā puke, i haehaea ō rātou tūpāpaku i waenganui i ngā tiriti. Nā tēnei katoa kāore i tāhuritia atu tōna riri, engari kei te torongia tonutia atu tōna ringa.

26 Ā, ka hāpai ake ia i tētahi kara ki ngā iwi i tawhiti, ā, ka whakahihī atu ia ki a rātou mai i te pito o te whenua; ā nana, ka haere wawe mai rātou i runga i te kakama; kua kore tētahi e ngenge, e tapepa rānei i waenganui i a rātou.

27 Kua kore tētahi e moeau, e moe rānei; kua kore rānei te whītiki o ō rātou hope e mawhetohia, e pakaru rānei ngā here o ō rātou hū;

28 Ka koi ā rātou pere, he piko anō ā rātou kōpere, ka whakaarohia ngā waewae o ō rātou hōiho he rite ki te kiripaka, ko ō rātou wīra he rite ki te āwhiowhio, ko ā rātou whēoroorotanga he rite ki tā te raiona.

29 Ka whēorooro rātou kia rite ai ki te kūao raiona; ka whēorooro rātou, ā, ka whakamau i te pārurenga, ā, ka haria paitia atu, ā, kua kore tētahi hei whakaora.

30 Ā, i taua rā ka whēorooro rātou ki a rātou kia rite ki te whēoroorotanga o te moana; ā, ki te titiro atu rātou ki te whenua, nana, ko te pōuritanga me te hinapōuri, ā, ka whakapōurihia te māramatanga i ngā rangi o reira.