1 Ā ināianei, e Hākopa, ka kōrero au ki a koe: Ko koe taku mātāmua i ngā rā o ōku mamaetanga i te koraha. Ā nana, he nui ō mamaetanga me ō pōuritanga i tō taitamarikihanga, nā te tūkino a ō tuākana.

2 Hei aha koa, e Hākopa, e taku mātāmua i te koraha, e mōhio ana koe ki te inati o te Atua; ā, māna ō mamaetanga e whakatapu hei painga mōu.

3 Nā reira, ka manaakitia tō wairua, ā, ka noho hūmārie kōrua ko tō tuakana, a Nīwhai; ā, ka whakapaua ō rā i te mahi mō tō Atua. Nā reira, e mōhio ana ahau kua hokona koe, nā te tika o tō kaihoko; nā te mea kua kite nei koe hei te tutukitanga o te wā ka haere mai ia ki te kawe mai i te whakaoranga ki te tangata.

4 Ā, kua kite nei koe i tō tamarikihanga i tōna korōria; nā reira, e manaakitia nei koe pērā i a rātou te hunga e minitatia ai e ia i te kikokiko; nā te mea he ōrite te Wairua, inānahi, ināianei, āke, ake, ake. Ā, kua whakaritea te huarahi mai i te takanga a te tangata, ā, kāore he utu tō te whakaoranga.

5 Ā, kua whakaakona rawatia te tangata kia mōhio ai rātou ki te pai i te kino. Ā, kua tukuna te ture ki te tangata. Ā, mā te ture kāore te kikokiko e whakahara korehia; mā te ture rānei, ka hātepea atu ngā tāngata katoa; Āe rā, mā te ture māori i hātepea atu rātou; ā waihoki, mā te ture wairua ka hemo rātou i ērā e pai ana, ā, ka meinga he hinapōuri āke, ake, ake.

6 Nā reira, ka puta mai te whakaoranga i roto, mā roto hoki i te Mīhaia Tapu; nā te mea e kī ana ia i te aroha noa me te pono.

7 Nana, e tāpae ana ia i a ia anō hei patunga mō te hara, hei whakaea i te pūtake nui o te ture, ki te hunga katoa he ngākau marū, he wairua iro anō ōna; ā, kāore he hunga kē atu e taea ana e te pūtake nui o te ture te whakaea.

8 Nā reira, anō te hiranga nui kia whakamōhiotia atu ai ēnei mea ki ngā tangata whenua o te ao, kia mōhio ai rātou kore kau he kikokiko e āhei ana ki te noho i te aroaro o te Atua, hāunga mā roto i ngā mahi tika, me te aroha, me te atawhai o te Mīhaia Tapu, e whakatakotoria ana e ia tōna oranga e ai ki tō te kikokiko, ā, ka kapohia anōtia ia mā runga i te mana o te Wairua, nā, kia pahawa ake ai i a ia te aranga mai o te hunga mate, ko ia te tuatahi e ara ai.

9 Nā reira, ko ia te mātāmua ki te Atua, ina wawao ia mō ngā tamariki katoa a te tangata; ā, ka whakaorangia rātou e whakapono ai ki a ia.

10 Ā, nā te wawaotanga mō te katoa, ka haere mai ngā tāngata katoa ki te Atua; nā reira, e tū ana rātou i tōna aroaro, kia whakawākia ai e ia e ai ki te pono me te tapu kei roto nei i a ia. Nā reira, ko te pūtake nui o te ture kua homai nei e te Mea Tapu, tae atu ana ki te whakapānga i te whakawhiu kua whakarapangia nei, ko taua whakawhiu kua whakarapangia nei e tauaro ana ki te hari kua whakarapangia nei, kia whakaea ai te pūtake nui o te whakamārietanga—

11 Nā te mea me tika pū ia, kia tū ai he tauarotanga i ngā mea katoa. Ki te kore e pērā, e taku mātāmua i te koraha, tē taea te tika te whakaputa mai, te whakarihariha rānei, te tapu rānei, te hinapōuri rānei, te pai, te kino rānei. Nā reira, me tika pū ia kia pūhui tahi ai ngā mea katoa; nā reira, mehemea i tahatahi ai ia e tika ana kia mate tonu ai ia, kāore ōna ora, mate rānei, pirau rānei, pirau kore rānei, hari, hinapōuri rānei, whakaaro rānei, whakaaro kore rānei.

12 Nā reira, me tika i hangaia ai ia hei mea noa iho; nā reira kāore pū ōna take i te otinga o tōna hanganga. Nā reira, me tika tēnei mea e whakangaro ai i te mōhiotanga o te Atua me ōna take mau tonu, me te mana anō hoki, me te whakaaroha, me te tika o te Atua.

13 Ā, mēnā ka kī koutou kāore he ture, ka kī anō koutou kāore he hara. Mēnā ka kī koutou kāore he hara, ka kī koutou kāore he tika. Ā, mēnā kāore he tika, kāore he hari. Ā, mēnā kāore he tika, he hari rānei, kāore he whakawhiunga, he hinapōuri rānei. Ā, mēnā kāore ēnei mea, kāore hoki he Atua. Ā, mēnā kāore he Atua, kāore tātou, he ao rānei; nā te mea kua kore e taea tētahi mea te hanga, ki te mahi rānei, ki te whakamahia rānei; nā reira, kua memeha tika atu ngā mea katoa.

14 Ā ināianei, e aku tama, e kōrero ana ahau i ēnei mea ki a koutou hei painga, hei akoranga mō koutou; nā te mea he Atua pū anō, ā, nāna ngā mea katoa i hanga, ko ngā rangi me te whenua tahi, me ngā mea katoa kua ai i roto, ko ngā mea hei mahi me ngā mea hei whakamahia tahi anō.

15 Ā, kia pahawa ake anō ōna take mau tonu i te mutunga iho o te tangata, i muri iho i tana hanga i ō tātou mātua tuatahi, me ngā kararehe o te pārae, me ngā manu o te rangi, arā, ko ngā mea katoa kua hangaia nei, me tika pū ia kia tū ai he tauarotanga; ko te hua i rāhuitia pū anō e tauaro ana ki te rākau o te ora; he reka tētahi, ā, he kawa tērā atu.

16 Nā reira, kua hoatu e te Ariki te Atua ki te tangata e whiriwhiria ai mōna ake anō. Nā reira, kāore i taea e te tangata te whiriwhiri mōna ake anō hāunga pū ia kua whakawaia ia e tētahi, e tērā atu rānei.

17 Ā ko au, ko Rīhai, e ai ki ngā mea kua pānui nei ahau, me tika pū taku mōhio, tērā tētahi anahera o te Atua, e ai ki ērā kua tuhia nei, kua taka iho mai i te rangi; nā reira, i whakarēweratia ai ia, nā tana whai atu i ērā e kino nei i te aroaro o te Atua.

18 Ā, nā te mea i taka iho ia mai i te rangi, ā, kua meinga he pōuri āke, ake, ake, i whai atu anō ai ia i te whakapōuritanga o ngā tāngata katoa. Nā reira, i kī atu ia ki a Iwi, āe rā, ko taua nākahi onamata pū anō, koia te rēwera, te matua o ngā rūkahu katoa, nā reira i kī ai ia: E kai i te hua i rāhuitia ai, ā, e kore koe e mate, engari ka rite koe ki te Atua, e mōhio ana ki te pai me te kino.

19 Ā, i muri iho i te kainga a Ārama rāua ko Iwi i te hua i rāhuitia ai, ka panaia atu rāua ki waho i te kāri o Erene, ki te ngaki i te whenua.

20 Ā, kua whānau tamariki mai rāua; āe rā, ko te whānau pū anō o te ao katoa.

21 Ā, i whakaroahia ngā rā o ngā tamariki o te tangata, e ai ki te hiahia o te Atua, kia rīpenetā ai rātou i a rātou i te kikokiko; nā reira, i meinga iho tā rātou āhuatanga hei āhuatanga whakamātautau, ā, i whakaroahia tō rātou wā, e ai ki ngā whakahaunga i hoatu ai e te Ariki te Atua ki ngā tamariki a te tangata. Nā te mea, i tuku whakahaunga ai ia kia rīpenetā ai ngā tāngata katoa; nā te mea i whakaatu ai ki ngā tāngata katoa kua ngaro rātou, nō ngā hē o ō rātou mātua.

22 Ā ināianei, nana, mehemea kīhai a Arami i hē kua kore ia i taka, engari kua noho tonu ia i te kāri o Erene. Ā, ko ngā mea katoa kua oti nei te hanga me tika kua noho tonu i taua āhuatanga i muri iho nei i tōna hanganga; ā, me tika kua waiho tonu ērā mō āke tonu atu.

23 Ā, kua kore ā rāua tamariki; nā reira kua noho tonu rāua i tētahi āhuatanga hē kore, kāore ōna hari, nā te mea kāore rāua i mōhio ki te hinapōuri; kāore he mahi pai, nā te mea kāore rāua i mōhio ki te hara.

24 Engari nana, kua mahia ngā mea katoa i runga i tō te mōhiotanga o te mea e mōhio ana ki ngā mea katoa.

25 I taka ai a Ārama kia ai he tangata; ā, kua ai ngā tangata, e hari ai rātou.

26 Ā, ka haere mai te Mīhaia i te tutukitanga o te wā, kia hokona ai e ia ngā tamariki a te tangata i te takanga. Ā, nā te mea kua hokona rātou i te takanga kua meinga here kore rātou mō āke tonu atu, e mōhio ana ki te pai me te kino; kia mahi ai rātou mō rātou ake anō, ā, kia kaua rātou e whakamahia ai, hāunga ko te whakawhiunga a te ture hei te rā nui whakamutunga, e ai ki ngā whakahaunga kua homai nei e te Atua.

27 Nā reira, e herekore ana ngā tāngata e ai ki tō te kikokiko; ā, e homai ana ki a rātou ngā mea katoa e tika ana mā te tangata. Ā, e wātea ana rātou ki te whiriwhiri i te herekoretanga me te oranga tonutanga, mā roto i te Kaitakawaenga nui o ngā tāngata katoa, ki te whiriwhiri rānei i te hereherenga me te matenga, e ai ki te hereherenga me te kaha o te rēwera; nā te mea e whai ana ia kia hinapōuri ai ngā tāngata katoa pērā ki a ia anō.

28 Ā, ināianei, e aku tama, e hiahia ana ahau kia titiro ai koutou ki te Kaitakawaenga nui, me te whakarongo ki āna whakahaunga nui; me te ū ki āna kupu, me te whiriwhiri i te oranga tonutanga, e ai ki te hiahia o tana Wairua Tapu.

29 Ā, kia kaua e whirwhiri i te matenga tonutanga, e ai ki te hiahia o te kikokiko me te kino i roto nei, kua tuku kaha nei ia ki te wairua o te rēwera hei whakahereheretia, kia whakaraua iho koe ki te ao rēwera, kia tū ai ia hei kīngi i runga i a koutou i tōna kīngitanga.

30 Kua kōrero ahau i ēnei kupu ruarua ki a koutou katoa, e aku tama, i ngā rā whakamutunga o tōku whakamātautauranga; ā, kua whiriwhiri ahau i te wāhi pai, e ai ki ngā kupu a te poropiti. Ā, kāore he take kē atu hāunga ko te painga mau tonu o ō koutou wairua. Āmine.