1 Ā ināianei au, a Nīwhai, e whakamutu nei i taku poropititanga ki a koutou, e aku teina aroha. Ā, kāore e taea e au te tuhi hāunga he mea ruarua, koia he mea e mōhio nei au ka pahawa pū ake anō; kāore rānei e taea e au te tuhi atu i ngā kupu ruarua a taku teina a Hākopa.

2 Nā reira, kāti noa māku ngā mea kua oti nei i a au te tuhi, hāunga rā ia ngā kupu ruarua nei me kōrero nei e au e pā ana ki te whakaakoranga a te Karaiti; nā reira, ka mārama noa taku kōrero ki a koutou, e ai ki te māramatanga o taku poropititanga.

3 Nā te mea e kaingākau ana tōku wairua i te māramatanga; nā, nō tēnei āhuatanga e mahi ai te Ariki te Atua i waenganui i ngā tamariki a te tangata. Nā, ka tuku māramatanga te Ariki te Atua ki te hinengaro; nā, ka kōrero ia ki te tangata e ai ki tō rātou reo, tae atu ana ki tō rātou māramatanga.

4 Nā reira, e hiahia ana au kia mahara koutou kua kōrero au e pā ana ki taua poropiti kua whakaatu mai nei te Ariki ki ahau, nā, māna te Reme a te Atua e rumaki, ka murua atu nei i ngā hara o te ao.

5 Ā ināianei, mehemea te Reme a te Atua, e tapu ana ia, e whai take ana tana rumaki ki te wai, kia whakaea ai i ngā tika katoa, āna, e pēhea ake ana te nui o tō tātou whai take, e tapu kore ana, kia rumakina ai, āe rā, ki te wai pū anō!

6 Ā ināianei, ka ui atu au ki a koutou, e aku teina aroha, nā runga i te aha te Reme a te Atua i whakaea ai i ngā tika katoa i tana rumakitanga ki te wai?

7 Kāore koutou e mōhio ana i tapu ia? Engari ahakoa tōna tapu, ka whakaatu ia ki ngā tamariki a te tangata, nā, ka whakaiti ia i a ia anō i te aroaro o te Matua e ai ki tō te kikokiko, ā, ka whakaatuhia ki te Matua ka ngohengohe ia ki a ia i runga i te pupuri i ana whakahaunga.

8 Nā reira, i muri iho i tana rumakitanga ki te wai ka tau iho te Wairua Tapu ki runga i a ia i te āhua o tētahi kūkupa.

9 Waihoki rā, e whakaatu ana ki ngā tamariki a te tangata i te tōtika o te ara, me te whāiti o te kēti, mā konā rātou e kuhu ai, nāna nei te tauira i whakatauirahia ai i mua i a rātou.

10 Ā, i kī ake ia ki ngā tamariki a te tangata: Whai mai i ahau. Nā reira, e aku teina aroha, e taea ana rānei e tātou te whai atu i a Ihu hāunga tātou e hiahia ana ki te pupuri i ngā whakahaunga a te Matua?

11 Ā, i kī ake te Matua: E rīpenetā koutou, e rīpenetā koutou, me te rumaki i runga i te ingoa o taku Tama Aroha.

12 Waihoki, i pā mai te reo o te Tama ki ahau, e mea ana: Ko te tangata e rumakina ai i runga i tōku ingoa, ki a ia e tuku atu ai te Matua i te Wairua Tapu, pēnei i ahau; nā reira, whai mai i ahau, ā, mahia ngā mea kua kite nei koutou i ahau e mahi ana.

13 Nā reira, e aku teina aroha, e mōhio ana au ki te whai atu koutou i te Tama, i runga i te tino ngākau ū, tē arero rua, ā, tē tinihanga i te aroaro o te Atua, engari ki te ngākau pono, e rīpenetā ana i ō koutou hara, e whakaatuhia atu ana ki te Matua e hiahia ana koutou kia mau ai ki runga i a koutou te ingoa o te Karaiti, mā te rumakitanga—āe rā, mā te whai atu i tō koutou Ariki, ā, i tō koutou Atua ki roto i te wai, e ai ki tana kupu, nana, kātahi koutou ka whiwhi i te Wairua Tapu; āe rā, kātahi ka tae mai te rumakitanga o te ahi me te Wairua Tapu; kātahi ka taea e koutou te kōrero ki te arero anahera, me te hāmama i ngā whakamoemiti ki te Mea Tapu o Iharaira.

14 Engari nana, e aku teina aroha, i pēnei te pātanga mai o te reo o te Tama ki ahau, e mea ana: Hei muri i tā koutou rīpenetātanga i ō koutou hara, me te whakaatu atu ki te Matua e hiahia ana koutou ki te pupuri i aku whakahaunga, mā te rumakitanga ki te wai, me te whiwhi i te rumakitanga o te ahi me te Wairua Tapu, me te āhei ki te kōrero ki tētahi arero hou, āe rā, ki te arero pū anō o ngā anahera, ka mutu, kātahi ka whakaparahakongia au, kua pai kē ake mō koutou mehemea kīhai koutou i mōhio ki ahau.

15 Ā, i rongo au i tētahi reo mai i te Matua, e mea ana: Āe rā, e tika ana, ā, e pono ana ngā kupu a taku Mea Aroha. Ko ia e ū ana ki te mutunga, ko ia anō e whakaorangia ai.

16 Ā ināianei, e aku teina aroha, nā konei au e mōhio ana ki te kore te tangata e ū ki te mutunga, i te whaitanga atu i te tauira a te Tama a te Atua e ora ana, tē taea ia te whakarauora.

17 Nā reira, mahia ngā mea kua kīa atu e au ki a koutou, nā, kua kite au ka mahia e tō koutou Ariki, ā, e tō koutou Kaihoko; nā te mea mō tēnei take kua whakaatuhia mai nei ēnā ki ahau, kia mōhio ai koutou i te kēti mā reira koutou kuhu ai. Nā te mea ko te kēti e kuhu ai koutou ko te rīpenetātanga me te rumakitanga ki te wai; kātahi ka puta mai tētahi murunga i ō koutou hara ki te ahi me te Wairua Tapu.

18 Kātahi koutou kei te ara tōtika whāiti e ārahina ana ki te oranga tonutanga; āe rā, kua kuhu atu koutou mā te kēti; kua mahi koutou e ai ki ngā whakahaunga a te Matua rāua ko te Tama; ā, kua whiwhi koutou i te Wairua Tapu, e whakaatuhia ana te Matua rāua ko te Tama, tae atu ana ki te whakaeatanga i tana whakaari kua meatia nei e ia, nā, ka whiwhi koutou mehemea ka kuhu atu koutou mā te huarahi.

19 Ā ināianei, e aku teina aroha, hei muri i tā koutou kuhutanga ki roto i tēnei ara tōtika whāiti, ka ui atu au mehemea kua oti ngā mea katoa? Nana, ko tāku ki a koutou, Kāo; kāore koutou i haere pēnei mai hāunga nā te kupu a te Karaiti me te whakapono kaha i a ia, e whakawhirinaki katoa ana ki runga i ngā mahi aroha ā te mea e kaha ana ki te whakaora.

20 Nā reira, me tāruke whakamua koutou i runga i te ngākau pūmau i roto i te Karaiti, e mau ana tētahi manako kānapanapa, me tētahi aroha ki te Atua me ngā tāngata katoa. Nā reira, mēnā ka tāruke whakamua, e hākari ana i runga i te kupu a te Karaiti, me te ū pono atu ki te mutunga, nana, ko te kupu tēnei a te Matua: Ka whiwhi koutou i te oranga tonutanga.

21 Ā ināianei, nana, e aku teina aroha, koinei te huarahi; ā, kāore he huarahi kē atu, he ingoa kē atu rānei kua tukuna i raro i te rangi mā reira taea ai te whakarauora i te tangata i roto i te kīngitanga o te Atua. Ā ināianei, nana, ko te whakaakoranga tēnei a te Karaiti, me te whakaakoranga pono anake a te Matua, a te Tama, me te Wairua Tapu, koia he Atua kotahi, kāore ōna mutunga. Āmine.