1 Añetehápe, péicha heʼi ndéve Ñandejára, che rembiguái José Smith, upe taʼýra, ha avei che rembiguaikuéra Sidney Rigdon ha Hyrum Smith-pe, ha umi haʼéva ne konsehéro ha oñehenóitavape tenondeve;

2 Ha avei ndéve, che rembiguái Edward Partridge, ha ne konseherokuérape;

3 Ha avei che rembiguaikuéra ijeroviarekóvape che tupao sumo konsehogua Sion-pe, péicha oñehenóitagui, ha opa elder-kuéra ha tavayguakuéra che Jesucristo Tupao Santokuéra Ára Pahapeguápe, isarambíva opa múndore;

4 Péicha oñehenóitagui che tupao umi ára pahápe, haʼéva, Jesucristo Tupao Santokuéra Ára Pahapegua.

5 Añetehápe Che haʼe opavavépe: Pepuʼã ha pejajái, pende resape haʼe hag̃ua peteĩ mbaʼerechaukaha opa tetãnguérape;

6 Ha ñembyaty Sion retãme ha ijestakakuérape haʼe hag̃ua ñemoʼã ha ñeñongatuha upe aravai ha ñekoʼõigui, oñeñohẽ vove ñembojeheʼaʼỹre opa pe yvy ári.

7 Tahaʼe, upe táva Far West, peteĩ yvy imarangatu ha oñekonsagravaʼekue chéve g̃uarã; ha oñehenóitava santísima, imarangatúgui ko yvy peñemboʼyha.

8 Upévare, Che amanda peẽme pemopuʼã hag̃ua peteĩ óga chéve g̃uarã, che santokuéra ñembyatyrã, chetupãitũ hag̃ua hikuái.

9 Toñeñepyrũ ko tembiapo, ha umi iñemopyenda, ha peteĩ tembiapo ñembosakoʼi, ko arahaku oúvape;

10 Ha toñeñepyrũ irundy ára julio oúvape, ha upe ára guive tenonderã tombaʼapo che tavayguakuéra jesarekópe, omopuʼã hag̃ua peteĩ óga che rérape;

11 Ha peteĩ arýpe ko ára guive, toñepyrũ jey hikuái omoĩ che róga ñemopyenda.

12 Péicha tombaʼapo hikuái jesarekópe upe ára guive tenonderã ojapopa peve, pe ita pyenda guive técho peve, ndaiporivéi peve mbaʼeve ojejapopaʼỹva.

13 Añetehápe Che haʼe peẽme, anivéma odeve che rembiguái José ni che rembiguái Sidney, ni che rembiguái Hyrum, oñemopuʼã hag̃ua peteĩ óga che rérape;

14 Ha katu tojejapo peteĩ óga che rérape, modélo Che ahechaukátava chupekuérape oĩháicha.

15 Ha che tavayguakuéra nomopuʼãirõ oĩháicha apopyrépe Che ahechaukátava ipresidensiape, namog̃uahẽporamoʼãi ipoguikuéra.

16 Ha katu che tavayguakuéra omopuʼãramo apopyrépe oĩháicha Che ahechaukátava ipresidensiape, haʼéva, che rembiguái José ha ikonseherokuéra, upérõ amog̃uahẽporãta che tavayguakuéra pógui.

17 Ha avei, añetehápe Che haʼe peẽme, che aipota pyaʼe toñemopuʼã upe Far West táva, che santokuéra ñembyaty rupive;

18 Ha toñemeʼẽ avei ambuekuéra tenda estákaramo umi tenda jerereguápe, ojehechaukataháicha che rembiguái José-pe sapyʼapyʼa.

19 Ha péina ápe, Che aiméta hendive, ha Che asantifikáta chupe tavayguakuéra renondépe; Che ameʼẽgui chupe ko rréino ha ministeriokuéra lláve. Taupéicha. Amén.