Sección 117
Rrevelasiõ oñemeʼẽvaʼekue José Smith upe Proféta rupive, Far West, Misuri-pe, julio 8, 1838-pe, William Marks, Newel K. Whitney ha Oliver Granger rembiaporãnguéra hiʼag̃uiva reheguáre.
1–9, Ñandejára rembiguaikuéra ndoipotaitereírivaʼerã umi mbaʼe yvyʼarigua, upéicha “mbaʼépa umi mbaʼerepy Ñandejárape g̃uarã?”; 10–16, Ohejavaʼerã hikuái hiʼánga michĩva, ha ijehasaʼasykuéra imarangatúta Ñandejárape g̃uarã.
1 Añetehápe péicha heʼi Ñandejára, che rembiguái William Marks, ha avei che rembiguái Newel K. Whitney-pe, pyaʼe tomohenda hikuái iñemuhakuéra ha toho Kirtland retãgui, Che, Ñandejára, ambou jey mboyve nievekuéra ko yvy ári.
2 Topáy ha topuʼã hikuái, ha tosẽ ohaʼarõʼỹre, Che, Ñandejára, amandágui.
3 Upévare, ohaʼarõramo hikuái, ndohoporãmoʼãi chupekuéra.
4 Toñearrepenti hikuái opa iñangaipakuéragui ha opa imbaʼepotapýgui che renondépe, heʼi Ñandejára; upéicha, mbaʼépa umi mbaʼerepy chéve g̃uarã?, heʼi Ñandejára.
5 Toñemeʼẽ umi mbaʼerepy Kirtland-pegua ojepagapa hag̃ua umi ojedevéva, heʼi Ñandejára. Pemeʼẽ, heʼi Ñandejára, ha pe hembýva, topyta pende pópe, heʼi Ñandejára.
6 Ha, ndaguerekóipa Che umi guyra yvagagua, ha umi pira yguasugua, ha mymbakuéra yvytygua? Ndajapóipa Che ko yvy? Ha nasãmbyhýipa Che opa tetãnguéra yvy arigua ehérsito destíno?
7 Upévare, ndajapomoʼãipa Che umi tenda nandi tahoky, taʼipoty ha tahiʼa hetaite? Heʼi Ñandejára.
8 Ndahetáipa tenda Adán-ondi-Ahmán yvytykuérape, ha Olaha Shinehah yvy ipehápe, térã upe yvy Adán oiko haguépe, peipotaite hag̃ua upe ndahaʼeivéva peteĩ gótaguinte, ha napemombaʼéi hag̃ua umi imbaʼeguasuvéva?
9 Upévare, pejupi koʼápe che tavayguakuéra retãme, héẽ, Sion-pe.
10 Taijeroviarekóke che rembiguái William Marks mbovymi mbaʼe ári, ha oisãmbyhýta heta mbaʼe ári. Topresidi haʼe che tavayguakuéra mbytépe Far West távape, ha tojehovasa che tavayguakuéra jehovasa reheve.
11 Tahiʼotĩ che rembiguái Newel K. Whitney pe vánda nikolaítagui ha opa umi hembiapokyʼa ñemíre, ha opa hiʼánga michĩvare che renondépe, heʼi Ñandejára, ha tojupi Adán-Ondi-Ahman retãme, ha tahaʼe peteĩ obispo che tavayguakuérape g̃uarã, heʼi Ñandejára, ndahaʼéiva térapente ha katu hempiapópe, heʼi Ñandejára.
12 Ha avei, Che haʼe peẽme, chemanduʼaha che rembiguái Oliver Granger-re; péina ápe, añetehápe Che haʼe chupe, héra oñeñongatutaha manduʼa marangatúpe, ñemoñareatýgui ñemoñareatýpe akói ha tapiaite g̃uarã, heʼi Ñandejára.
13 Upévare, toñehaʼã mbarete che tupao Primera Presidencia rredensiõre, heʼi Ñandejára; ha hoʼa vove, haʼe opuʼã jeýta, ijehasaʼasy imarangatuvétagui chéve g̃uarã hemimonoʼõranguégui, heʼi Ñandejára.
14 Upévare, pyaʼe tojupi koʼápe, Sion retãme; ha hiʼárape oikóta chugui mbaʼevendeha che rérape, che tavayguakuéra ñeimeporãrã, heʼi Ñandejára.
15 Upévare, ani avave tapicha ojapoʼi che rembiguái Oliver Granger-pe, ha katu tohupyty che tavayguakuéra jehovasa akói ha tapiaite g̃uarã.
16 Ha avei, añetehápe Che haʼe peẽme, taimanduʼa opa che rembiguaikuéra Kirtland retãmegua Ñandejára Itupãre, ha avei che rógare, oñongatu ha oñangareko marangatu hag̃ua upéva, ha che árape omosẽ hag̃ua umi pirapire myengoviahárape, heʼi Ñandejára. Taupéicha. Amén.