Sección 66
Rrevelasiõ oñemeʼẽvaʼekue José Smith, upe Proféta rupive, Hiram, Ohio-pe, octubre 29, 1831-pe. William E. McLellin, ojerurékuri Ñandejárape kirirĩháme, oikuaauka hag̃ua chupe, upe Proféta rupive, cinco ñeporandu ñembohovái, José Smith ndoikuaáiva. McLellin ojerurégui, Proféta oporandu Ñandejárape ha ohupyty ko rrevelasiõ.
1–4, Upe konvénio opaveʼỹva haʼe evanhélio plenitu; 5–8, Elder-kuéra omboʼe, otestifika ha ojepyʼamongetavaʼerã tavayguakuéra ndive; 9–13, Servicio jeroviareko ministerio-pe oasegura peteĩ tekove ijapyraʼỹva jehejapyre.
1 Péina ápe, péicha heʼi Ñandejára che rembiguái William E. McLellin-pe—Rejehovasapyréva nde, rehejágui ne rembiapovaikuéra, ha remog̃uahẽkuri umi che añetegua, heʼi Ñandejára, ne Rredentor, pe múndo Salvahára, jepeve opa umi ogueroviávape g̃uarã che réra.
2 Añetehápe Che haʼe ndéve, rejehovasapyréva nde, remog̃uahẽ haguére che konvénio opaveʼỹva, jepeve che evanhélio plenitu, oñembouvaʼekue yvypóra raʼykuérape, oikove hag̃ua ha oñemeʼẽ hag̃ua chupekuéra hendag̃ua umi glória ojehechaukátavape ára pahakuérape, proféta ha apóstol-kuéra ohai haguéicha ára ymaguarépe.
3 Añetehápe Che haʼe ndéve, che rembiguái William, nepotĩ, ha katu nanepotĩmbái; eñearrepentíke, péicha, koʼã mbaʼe ndaguerohorýivagui, heʼi Ñandejára, Haʼe ohechaukátagui ndéve umíva.
4 Ha koʼág̃a, añetehápe, Che, Ñandejára, ahechaukáta ndéve mbaʼépa Che aipota ndehegui, térã mbaʼépa haʼe che rembipota nderehegua.
5 Péina ápe, añetehápe Che haʼe ndéve, che rembipota haʼeha teremomarandu che evanhélio peteĩ tetãgui ambue tetãme, ha tavaguasúgui tavaguasúpe, héẽ, umi tenda jereregua noñemomarandúi haguépe.
6 Ani repyta heta ára ko tendápe; ha ani rejupi gueteri Sion retãme; ha katu pe ikatúva rembou, embou; upeichaʼỹramo, ani repensa umi ne mbaʼerepykuérare.
7 Tereho umi tetã kuarahyreiképe, etestifika opa tenda rupi mayma tavayguakuérape, umi isinagógape, reñomongetávo umi tavaygua ndive.
8 Toho nendive che rembiguái Samuel H. Smith, ani reheja chupe, ha emeʼẽ chupe ne ñehekomboʼekuéra; ha upe ijeroviarekóva, oñemombaretéta opa tendápe; ha, Che, Ñandejára, aháta penendive.
9 Emoĩ nde po umi hasýva ári, ha haʼekuéra okueráta. Ani reju, Che, Ñandejára, haʼe peve ndéve. Ehaʼarõkuaa jehasaʼasýpe. Ejerure, ha oñemeʼẽta ndéve; ehenói ha ojepeʼáta ndéve.
10 Ani rejepyʼapy heta mbaʼére. Eheja opa mbaʼe hekojojaʼỹva. Ani rejapo ñemoakãratĩ—peteĩ pyʼaraʼã nemyangekoivaʼekue.
11 Eñongatu koʼã ñeʼẽ, añetegua ha ijeroviarekógui; ha emagnifikáta nde oficio, ha hetápe rembyatýta Sion-pe, vyʼapavẽ opaveʼỹva purahéi reheve iñakã arikuéra.
12 Ejapo meme koʼã mbaʼe jepe ipaha peve, ha reguerekóta peteĩ jeikove ijapyraʼỹva koróna che Ru akatúape, henyhẽva grásia ha añeteguágui.
13 Añetehápe, péicha heʼi Ñandejára ne Tupã, ne Rredentor, jepeve Jesucristo. Amén.