ກອງປະຊຸມໃຫຍ່ສາມັນ: ເພີ່ມຄວາມເຂັ້ມແຂງໃຫ້ແກ່ສັດທາ ແລະ ປະຈັກພະຍານ
ໂດຍ ແອວເດີ ໂຣເບີດ ດີ ແຮວສ໌
ແຫ່ງສະພາອັກຄະສາວົກສິບສອງ
ເຮົາຕ້ອງການກອງປະຊຸມໃຫຍ່ສາມັນຫລາຍແທ້ໆ! ຜ່ານກອງປະຊຸມ ສັດທາຂອງເຮົາຈະເຂັ້ມແຂງຂຶ້ນ ແລະ ປະຈັກພະຍານຂອງເຮົາກໍຈະເລິກຊຶ້ງຂຶ້ນ.
ຂໍຂອບໃຈ, ປະທານມອນສັນ, ສຳລັບຄຳສອນ ແລະ ຕົວຢ່າງ ແຫ່ງການຮັບໃຊ້ເໝືອນດັ່ງພຣະຄຣິດຂອງທ່ານ ແລະ ສຳລັບການມອບໝາຍຂອງທ່ານໃຫ້ພວກເຮົາທຸກຄົນເປັນຜູ້ສອນສາດສະໜາ. ພວກເຮົາອະທິຖານເພື່ອທ່ານຢູ່ສະເໝີ.
ໃນຍຸກສະໄໝຂອງເຮົາ, ພຣະຜູ້ຊ່ອຍໃຫ້ລອດ ພຣະເຢຊູຄຣິດໄດ້ອ້າງເຖິງການເຕົ້າໂຮມໄພ່ພົນວ່າເປັນ ກອງປະຊຸມໃຫຍ່ສາມັນ ຂອງພຣະອົງ.1
ບໍ່ວ່າເຮົາຈະອາໄສຢູ່ໃສກໍຕາມໃນໂລກນີ້, ບໍ່ວ່າເຮົາຈະຮັບຊົມຮັບຟັງການຖ່າຍທອດນີ້ຜ່ານວິທີໃດກໍຕາມ, ຂ້າພະເຈົ້າເປັນພະຍານວ່າ ເຮົາໄດ້ມາເຕົ້າໂຮມກັນໃນກອງປະຊຸມ ຂອງພຣະອົງ. ຂ້າພະເຈົ້າເປັນພະຍານອີກວ່າ ເຮົາຈະໄດ້ຍິນພຣະຄຳຂອງພຣະອົງ, ເພາະພຣະອົງໄດ້ກ່າວວ່າ, ບໍ່ວ່າຈະຜ່ານສຸລະສຽງຂອງພຣະອົງ ຫລື ຜ່ານສຽງຂອງຜູ້ຮັບໃຊ້ຂອງພຣະອົງ, ມັນກໍເໝືອນກັນ.2
ກອງປະຊຸມໄດ້ເປັນພາກສ່ວນຂອງສາດສະໜາຈັກທີ່ແທ້ຈິງຂອງພຣະເຢຊູຄຣິດສະເໝີມາ. ອາດາມໄດ້ເຕົ້າໂຮມລູກຫລານຂອງເພິ່ນ ແລະ ໄດ້ພະຍາກອນເຖິງສິ່ງຈະມາເຖິງ. ໂມເຊໄດ້ເຕົ້າໂຮມລູກຫລານຂອງອິດສະລາເອນ ແລະ ໄດ້ສອນເຂົາເຈົ້າເຖິງພຣະບັນຍັດທີ່ເພິ່ນໄດ້ຮັບ. ພຣະຜູ້ຊ່ອຍໃຫ້ລອດໄດ້ສອນຝູງຊົນທີ່ໄດ້ເຕົ້າໂຮມກັນ ທັງໃນແຜ່ນດິນສັກສິດ ແລະ ໃນທະວີບອາເມຣິກາ. ເປໂຕໄດ້ເຕົ້າໂຮມຜູ້ຄົນທີ່ເຊື່ອໃນກຸງເຢຣູຊາເລັມ. ກອງປະຊຸມໃຫຍ່ສາມັນຄັ້ງທຳອິດໃນຍຸກສຸດທ້າຍກໍໄດ້ເລີ່ມຕົ້ນພຽງແຕ່ສອງເດືອນຫລັງຈາກສາດສະໜາຈັກຖືກຈັດຕັ້ງຂຶ້ນ ແລະ ກອງປະຊຸມໃຫຍ່ສາມັນກໍໄດ້ຖືກຈັດຂຶ້ນແບບນີ້ຈົນເຖິງວັນເວລານີ້.
ກອງປະຊຸມເຫລົ່ານີ້ແມ່ນຖືກຈັດຂຶ້ນພາຍໃຕ້ການຊີ້ນຳຂອງພຣະຜູ້ເປັນເຈົ້າສະເໝີມາ, ໄດ້ຮັບການນຳພາໂດຍພຣະວິນຍານຂອງພຣະອົງ.3 ພວກເຮົາໄດ້ຮັບມອບໝາຍໃຫ້ກ່າວໃນຫົວຂໍ້ໃດໜຶ່ງໂດຍສະເພາະຕາມທີ່ ພຣະອົງ ປະສົງໃຫ້ເຮົາກ່າວ. ຫລາຍໆອາທິດ ແລະ ເດືອນ, ສ່ວນຫລາຍແລ້ວຜ່ານຄ່ຳຄືນທີ່ໄດ້ນອນນ້ອຍ, ພວກເຮົາລໍຖ້າພຣະຜູ້ເປັນເຈົ້າ. ຜ່ານການຖືສິນອົດເຂົ້າ, ການອະທິຖານ, ການສຶກສາ, ແລະ ການໄຕ່ຕອງ, ພວກເຮົາຮຽນຮູ້ຂ່າວສານທີ່ພຣະອົງປະສົງໃຫ້ເຮົາກ່າວ.
ບາງຄົນອາດຖາມວ່າ, “ເປັນຫຍັງການດົນໃຈນັ້ນຈຶ່ງບໍ່ມາເຖິງຢ່າງງ່າຍໆ ແລະ ວ່ອງໄວກວ່ານີ້ແດ່?” ພຣະຜູ້ເປັນເຈົ້າໄດ້ສອນ ອໍລິເວີ ຄາວເດີຣີ ວ່າ, ເພິ່ນຕ້ອງສຶກສາໄຕ່ຕອງໃນຄວາມຄິດຂອງເພິ່ນ; ເມື່ອນັ້ນເພິ່ນຈະຕ້ອງຖາມພຣະອົງຫາກວ່າມັນຖືກຕ້ອງ.4 ຂ່າວສານຂອງກອງປະຊຸມຈະມາສູ່ເຮົາ ຫລັງຈາກການກະກຽມທີ່ເຕັມໄປດ້ວຍການອະທິຖານ, ຜ່ານພຣະວິນຍານບໍລິສຸດ.
ຫລັກທຳນີ້ກໍຈິງສຳລັບສະມາຊິກຂອງສາດສະໜາຈັກທຸກໆຄົນ ຂະນະທີ່ເຮົາຕຽມເຂົ້າຮ່ວມກອງປະຊຸມໃນຫວອດ, ສະເຕກ, ແລະ ກອງປະຊຸມໃຫຍ່ສາມັນຕ່າງໆ. ເຮົາສຶກສາໄຕ່ຕອງໃນຄວາມຄິດຂອງເຮົາ ສິ່ງທີ່ເຮົາຕ້ອງການ ແລະ ປາດຖະໜາຈາກພຣະບິດາເທິງສະຫວັນ, ແລະ ເຮົາອະທິຖານເພື່ອຈະເຂົ້າໃຈ ແລະ ນຳໃຊ້ສິ່ງທີ່ເຮົາຖືກສອນມາ. ເມື່ອເຖິງເວລາຂອງກອງປະຊຸມມາເຖິງ, ເຮົາສະລະກິດຈະກຳອື່ນໆ, ແລະ “ປະຖິ້ມສິ່ງຂອງທາງໂລກ ເພື່ອຈະສະແຫວງຫາສິ່ງຂອງທາງໂລກທີ່ດີກວ່າ.”5 ແລ້ວເຮົາຈະເຕົ້າໂຮມຄອບຄົວຂອງເຮົາມາຮັບຟັງພຣະຄຳຂອງພຣະຜູ້ເປັນເຈົ້າ, ດັ່ງທີ່ຜູ້ຄົນຂອງກະສັດເບັນຢາມິນໄດ້ເຮັດ.6
ເດັກນ້ອຍ ແລະ ຊາວໜຸ່ມມັກຈະມີສ່ວນຮ່ວມໃນກອງປະຊຸມ. ພວກເຮົາຈະເຮັດຜິດໜັກຖ້າເຮົາຖືວ່າກອງປະຊຸມນັ້ນເປັນສິ່ງທີ່ພວກເຂົາຈະບໍ່ເຂົ້າໃຈທັງທາງສະຕິປັນຍາ ແລະ ທາງວິນຍານ. ຕໍ່ພວກເຈົ້າ ສະມາຊິກໜຸ່ມໃນສາດສະໜາຈັກ, ຂ້າພະເຈົ້າສັນຍາວ່າ ຖ້າພວກເຈົ້າຈະຮັບຟັງ, ພວກເຈົ້າຈະຮູ້ສຶກວ່າພຣະວິນຍານຈະພອງໂຕພາຍໃນຈິດໃຈພວກເຈົ້າ. ພຣະຜູ້ເປັນເຈົ້າຈະບອກພວກເຈົ້າເຖິງສິ່ງທີ່ພຣະອົງປະສົງໃຫ້ພວກເຈົ້າເຮັດໃນຊີວິດຂອງພວກເຈົ້າ.
ໃນກອງປະຊຸມເຮົາສາມາດໄດ້ຮັບພຣະຄຳຂອງພຣະຜູ້ເປັນເຈົ້າທີ່ມີໃຫ້ເຮົາແທ້ໆ. ສະມາຊິກຄົນໜຶ່ງໄດ້ເປັນພະຍານວ່າ: “ຂະນະທີ່ຂ້ານ້ອຍໄດ້ຟັງຄຳປາໄສຂອງທ່ານ, ຂ້ານ້ອຍໄດ້ປະທັບໃຈຫລາຍ. … ຄຳປາໄສຂອງທ່ານໄດ້ເປັນການເປີດເຜີຍສ່ວນຕົວທີ່ມາຈາກພຣະຜູ້ເປັນເຈົ້າທີ່ເຈາະຈົງໃຫ້ຄອບຄົວຂອງຂ້ານ້ອຍໂດຍກົງ. ຂ້ານ້ອຍບໍ່ເຄີຍໄດ້ຮັບຮູ້ການສະແດງຂອງພຣະວິນຍານທີ່ແຮງກ້າດັ່ງນີ້ມາກ່ອນໃນຊີວິດ ດັ່ງໃນນາທີນັ້ນ ເມື່ອພຣະວິນຍານບໍລິສຸດໄດ້ກ່າວຕໍ່ຂ້ານ້ອຍໂດຍກົງ.”
ອີກຄົນໜຶ່ງໄດ້ກ່າວວ່າ, “ຂ້ານ້ອຍບໍ່ເຄີຍຮູ້ສຶກຢ່າງເລິກຊຶ້ງມາກ່ອນວ່າຄຳປາໄສນັ້ນແມ່ນສຳລັບຂ້ານ້ອຍແທ້ໆ.”
ສິ່ງນີ້ເປັນໄປໄດ້ເພາະວ່າພຣະວິນຍານບໍລິສຸດຈະນຳເອົາພຣະຄຳຂອງພຣະຜູ້ເປັນເຈົ້າເຂົ້າໄປສູ່ຈິດໃຈຂອງເຮົາ ໃນວິທີທີ່ເຮົາຈະເຂົ້າໃຈມັນໄດ້.7 ເມື່ອຂ້າພະເຈົ້າບັນທຶກຂ່າວສານລະຫວ່າງກອງປະຊຸມ, ຂ້າພະເຈົ້າຈະບໍ່ຂຽນສິ່ງທີ່ຜູ້ກ່າວຄຳປາໄສກ່າວໂດຍສະເພາະ; ຂ້າພະເຈົ້າຈະຈົດການຊີ້ນຳທີ່ພຣະວິນຍານປະທານໃຫ້ຂ້າພະເຈົ້າຢ່າງເປັນສ່ວນຕົວ.
ສິ່ງທີ່ ຖືກກ່າວ ນັ້ນຈະບໍ່ສຳຄັນເທົ່າກັບສິ່ງທີ່ເຮົາ ໄດ້ຍິນ ແລະ ສິ່ງທີ່ເຮົາຮູ້ສຶກ.8 ເພາະເຫດນີ້ເຮົາຈຶ່ງຈະພະຍາຍາມຮັບຊົມຮັບຟັງກອງປະຊຸມໃນບັນຍາກາດບ່ອນທີ່ເຮົາຈະໄດ້ຍິນ, ໄດ້ຮູ້ສຶກເຖິງ ແລະ ເຂົ້າໃຈສຸລະສຽງອັນເບົາໆຂອງພຣະວິນຍານໄດ້ຢ່າງແຈ່ມແຈ້ງ.
ເຮົາຕ້ອງການກອງປະຊຸມໃຫຍ່ສາມັນຫລາຍແທ້ໆ! ຜ່ານກອງປະຊຸມ ສັດທາຂອງເຮົາຈະເຂັ້ມແຂງຂຶ້ນ ແລະ ປະຈັກພະຍານຂອງເຮົາກໍຈະເລິກຊຶ້ງຂຶ້ນ. ແລະ ເມື່ອເຮົາຖືກປ່ຽນໃຈເຫລື້ອມໃສແລ້ວ, ເຮົາຈະເສີມກຳລັງໃຫ້ກັນແລະກັນ ທີ່ຈະຍຶດໝັ້ນຢູ່ຢ່າງໝັ້ນຄົງເມື່ອເຮົາຖືກອ້ອມຮອບຢູ່ໂດຍສິ່ງຕໍ່ສູ້ ແລະ ລໍ້ລວງໃນວັນເວລາສຸດທ້າຍນີ້.9
ໃນຫລາຍສິບປີທີ່ຜ່ານມານີ້, ສ່ວນຫລາຍແລ້ວສາດສະໜາຈັກກໍບໍ່ໄດ້ປະສົບກັບຄວາມເຂົ້າໃຈຜິດ ແລະ ການຂົ່ມເຫັງຫລາຍດັ່ງທີ່ໄພ່ພົນໃນຕອນຕົ້ນໄດ້ປະສົບມາ. ມັນຈະບໍ່ເປັນແບບນີ້ສະເໝີໄປ. ຄົນທັງຫລາຍໃນໂລກນີ້ກຳລັງຫັນໜ້າໜີຈາກພຣະຜູ້ເປັນເຈົ້າໄວກວ່າ ແລະ ໄກກວ່າແຕ່ກ່ອນ. ຜູ້ກົງກັນຂ້າມ (ມານ) ກຳລັງໃຊ້ອຳນາດ ແລະ ອິດທິພົນຂອງມັນຢູ່ເທິງໂລກ. ເຮົາຊອມເບິ່ງ, ໄດ້ຍິນ, ອ່ານ, ສຶກສາ, ແລະ ແບ່ງປັນພຣະຄຳຂອງສາດສະດາເພື່ອຈະໄດ້ຮັບຄຳຕັກເຕືອນ ແລະ ຖືກປົກປ້ອງລ່ວງໜ້າ. ຍົກຕົວຢ່າງ, ເຮົາໄດ້ຮັບ “ຄອບຄົວ: ການປະກາດຕໍ່ໂລກ” ດົນນານກ່ອນທີ່ເຮົາໄດ້ມີການທ້າທາຍທີ່ຄອບຄົວກຳລັງປະເຊີນໜ້າຢູ່ດຽວນີ້. “ພຣະຄຣິດທີ່ຊົງພຣະຊົນຢູ່: ປະຈັກພະຍານຂອງບັນດາອັກຄະສາວົກ” ໄດ້ຖືກຕຽມໄວ້ກ່ອນເວລາທີ່ເຮົາຈະຕ້ອງການມັນຫລາຍທີ່ສຸດ.
ເຮົາອາດຈະບໍ່ຮູ້ເຖິງເຫດຜົນທັງໝົດວ່າເປັນຫຍັງສາດສະດາ ແລະ ຜູ່ກ່າວປາໄສຈຶ່ງກ່າວຫົວຂໍ້ໃດໜຶ່ງໂດຍສະເພາະໃນກອງປະຊຸມ, ແຕ່ພຣະຜູ້ເປັນເຈົ້າຊົງຮູ້. ປະທານແຮໂຣນ ບີ ລີ ໄດ້ສອນວ່າ: “ຄວາມປອດໄພພຽງຢ່າງດຽວທີ່ເຮົາໃນຖານະສະມາຊິກຂອງສາດສະໜາຈັກນີ້ມີຢູ່ກໍຄື … ທີ່ຈະເອົາໃຈໃສ່ພຣະຄຳ ແລະ ພຣະບັນຍັດທີ່ພຣະຜູ້ເປັນເຈົ້າຈະປະທານໃຫ້ຜ່ານສາດສະດາຂອງພຣະອົງ. … ຈະມີບາງສິ່ງບາງຢ່າງທີ່ຈະຕ້ອງໄດ້ໃຊ້ຄວາມອົດທົນ ແລະ ສັດທາ. ທ່ານອາດຈະບໍ່ມັກສິ່ງທີ່ມາຈາກເຈົ້າໜ້າທີ່ຂອງສາດສະໜາຈັກ. ມັນອາດຈະຂັດກັບຄວາມຄິດເຫັນ [ສ່ວນຕົວ] ຂອງທ່ານ. ມັນອາດຂັດກັບຄວາມຄິດເຫັນທາງສັງຄົມຂອງທ່ານ. ມັນອາດລົບກວນຊີວິດທາງສັງຄົມຂອງທ່ານ. ແຕ່ຖ້າຫາກທ່ານຮັບຟັງສິ່ງເຫລົ່ານີ້, ຄືວ່າມັນມາຈາກພຣະໂອດຂອງພຣະຜູ້ເປັນເຈົ້ານັ້ນເອງ, ດ້ວຍຄວາມອົດທົນ ແລະ ສັດທາ, ຄຳສັນຍາກໍຄືວ່າ ປະຕູນະລົກຈະເອົາຊະນະທ່ານບໍ່ໄດ້; … ແລະ ອົງພຣະຜູ້ເປັນເຈົ້າຈະກຳຈັດອຳນາດແຫ່ງຄວາມມືດໄປຈາກໜ້າທ່ານ, ແລະ ເຮັດໃຫ້ສະຫວັນສັ່ນສະເທືອນເພື່ອຄວາມດີຂອງທ່ານ ແລະ ລັດສະໝີພາບຂອງພຣະນາມຂອງພຣະອົງ (ເບິ່ງD&C 21:6).”10
ປະທານລີ ຮູ້ສິ່ງທີ່ເຮົາກຳລັງປະເຊີນໜ້າຢູ່ໃນວັນເວລາຂອງເຮົາໄດ້ແນວໃດ? ເພິ່ນຮູ້ ເພາະວ່າເພິ່ນໄດ້ເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ. ແລະ ຖ້າເຮົາຮັບຟັງ ແລະ ເຊື່ອຟັງສາດສະດາໃນເວລານີ້, ຮ່ວມທັງຜູ້ທີ່ຈະກ່າວຄຳປາໄສໃນກອງປະຊຸມນີ້ດ້ວຍ, ເຮົາຈະໄດ້ຮັບພະລັງ ແລະ ຖືກປົກປ້ອງ.
ພອນອັນຍິ່ງໃຫຍ່ຂອງກອງປະຊຸມໃຫຍ່ສາມັນຈະມາສູ່ເຮົາຫລັງຈາກກອງປະຊຸມສິ້ນສຸດລົງແລ້ວ. ຂໍໃຫ້ຈົດຈຳແບບແຜນທີ່ຖືກບັນທຶກໄວ້ເລື້ອຍໆໃນຂໍ້ພຣະຄຳພີວ່າ: ເຮົາມາເຕົ້າໂຮມກັນເພື່ອຮັບຟັງພຣະຄຳຂອງພຣະຜູ້ເປັນເຈົ້າ, ແລະແລ້ວເຮົາກັບຄືນບ້ານເຮືອນຂອງເຮົາເພື່ອໄປນຳໃຊ້ມັນ.
ຫລັງຈາກກະສັດເບັນຢາມິນໄດ້ສອນຜູ້ຄົນຂອງເພິ່ນ, “ເພິ່ນໄດ້ໃຫ້ຜູ້ຄົນເລີກລາກັນໄປ, ແລະ ທຸກຄົນໄດ້ໄປພ້ອມກັບຄອບຄົວເພື່ອໄປສູ່ບ້ານເຮືອນຂອງໃຜລາວ.”11 ໃນວັນເວລາຂອງເພິ່ນ, ກະສັດລິມໄຮກໍໄດ້ເຮັດແບບດຽວກັນ.12 ຫລັງຈາກໄດ້ສອນ ແລະ ປະຕິບັດຕໍ່ຜູ້ຄົນຢູ່ທີ່ພຣະວິຫານ ບາວທີຟູນ, ພຣະຜູ້ຊ່ອຍໃຫ້ລອດໄດ້ແນະນຳຜູ້ຄົນວ່າ, “ເຈົ້າຈົ່ງກັບໄປບ້ານຂອງເຈົ້າ, ແລະ ໄຕ່ຕອງເຖິງເລື່ອງທີ່ເຮົາໄດ້ກ່າວໄປນັ້ນ, ແລະ ທູນຖາມພຣະບິດາໃນພຣະນາມຂອງເຮົາ, ເພື່ອຈະໄດ້ເຂົ້າໃຈ ແລະ ຈົ່ງຕຽມຈິດໃຈໄວ້ສຳລັບມື້ອື່ນ, ແລະ ເຮົາຈະກັບມາຫາເຈົ້າອີກ.”13
ເຮົາຮັບເອົາຄຳເຊື້ອເຊີນຂອງພຣະຜູ້ຊ່ອຍໃຫ້ລອດເມື່ອເຮົາໄຕ່ຕອງ ແລະ ອະທິຖານເພື່ອຈະເຂົ້າໃຈສິ່ງທີ່ເຮົາໄດ້ຖືກສອນ ແລະ ແລ້ວກ້າວອອກໄປ ແລະ ປະຕິບັດຕາມພຣະປະສົງນັ້ນ. ຂໍໃຫ້ຈື່ຈຳຖ້ອຍຄຳຂອງປະທານສະເປັນເຊີ ດັບເບິນຢູ ຄິມໂບ ວ່າ: “ຂ້າພະເຈົ້າໄດ້ຕັດສິນໃຈແລ້ວວ່າ ເມື່ອຂ້າພະເຈົ້າກັບບ້ານຈາກກອງປະຊຸມໃຫຍ່ສາມັນນີ້ … ຍັງມີຫລາຍສິ່ງຫລາຍຢ່າງໃນຊີວິດຂອງຂ້າພະເຈົ້າທີ່ຂ້າພະເຈົ້າຈະສາມາດເຮັດໃຫ້ດີຂຶ້ນໄດ້. ຂ້າພະເຈົ້າໄດ້ບັນທຶກສິ່ງນັ້ນໄວ້ໃນໃຈ, ແລະ ຂ້າພະເຈົ້າຄາດຈະເລີ່ມເຮັດວຽກນັ້ນທັນທີທີ່ເຮົາປິດກອງປະຊຸມນີ້ເລີຍ.”14 ເມື່ອບໍ່ດົນມານີ້ ປະທານມອນສັນໄດ້ກ່າວວ່າ: “ຂ້າພະເຈົ້າຊຸກຍູ້ທ່ານໃຫ້ອ່ານຄຳປາໄສ … ແລະ ໃຫ້ໄຕ່ຕອງຂ່າວສານທີ່ຢູ່ໃນນັ້ນ. ຂ້າພະເຈົ້າໄດ້ພົບເຫັນໃນຊີວິດຂອງຂ້າພະເຈົ້າເອງວ່າ ຂ້າພະເຈົ້າຈະໄດ້ຮັບຜົນປະໂຫຍດຫລາຍກວ່າຈາກຄຳເທດສະໜາທີ່ດົນໃຈເຫລົ່ານີ້ ເມື່ອຂ້າພະເຈົ້າສຶກສາມັນໃຫ້ລະອຽດກວ່າ.”15
ນອກເໜືອໄປຈາກການເຊື້ອເຊີນເຮົາໃຫ້ສຶກສາພຣະຄຳພີເປັນສ່ວນຕົວ ແລະ ເປັນຄອບຄົວແລ້ວ, ພຣະບິດາເທິງສະຫວັນຍັງປະສົງໃຫ້ເຮົາສຶກສາ ແລະ ນຳໃຊ້ສິ່ງທີ່ເຮົາໄດ້ຮຽນຮູ້ຈາກກອງປະຊຸມໃຫຍ່ສາມັນເປັນປະຈຳນຳອີກ. ຂ້າພະເຈົ້າເປັນພະຍານວ່າຄົນທີ່ໄວ້ວາງໃນພຣະຜູ້ເປັນເຈົ້າຂອງເຂົາເຈົ້າ ແລະ ເຊື່ອຟັງຄຳແນະນຳດ້ວຍສັດທາຈະໄດ້ຮັບພະລັງຫລາຍຂຶ້ນ ເພື່ອຈະເປັນພອນໃຫ້ເຂົາເຈົ້າເອງ ແລະ ຄອບຄົວຂອງເຂົາເຈົ້າຕະຫລອດເຖິງຫລາຍໆລຸ້ນຄົນໃນອະນາຄົດ.
ພຣະບິດາເທິງສະຫວັນໄດ້ຈັດເສັ້ນທາງໃຫ້ແລ້ວ. ໃນກອງປະຊຸມນີ້, ຈຳນວນຄົນ 97 ເປີເຊັນໃນສາດສະໜາຈັກສາມາດໄດ້ຍິນຂ່າວສານເຫລົ່ານີ້ໄດ້ເປັນພາສາຂອງເຂົາເຈົ້າເອງ. ສະມາຊິກຫລາຍລ້ານຄົນໃນ 197 ປະເທດຈະຮັບຊົມກອງປະຊຸມນີ້ ໃນ 95 ພາສາ. ພາຍໃນສອງສາມວັນຂ່າວສານກໍຈະເລີ່ມມີໄວ້ໃຫ້ໃນອິນເຕີແນັດທີ່ LDS.org ເປັນພາສາອັງກິດ, ແລະ ພາຍໃນໜຶ່ງອາທິດ ກໍຈະມີໄວ້ໃຫ້ເປັນຈຳນວນ 52 ພາສາ. ດຽວນີ້ເຮົາຈະໄດ້ຮັບວາລະສານຂອງສາດສະໜາຈັກພາຍໃນສາມອາທິດຫລັງຈາກກອງປະຊຸມໃຫຍ່ສາມັນຈົບລົງ. ເຮົາບໍ່ຈຳເປັນຕ້ອງລໍຖ້າຄຳປາໄສນັ້ນໃຫ້ມາທາງໄປສະນີເປັນເວລາຫລາຍເດືອນ. ຜ່ານຄອມພິວເຕີ, ໂທລະສັບມືຖື, ຫລື ເຄື່ອງເອເລັກທຣອນນິກອື່ນໆ, ເຮົາສາມາດອ່ານ, ຟັງ, ເບິ່ງ, ແລະ ແບ່ງປັນຄຳສອນຂອງສາດສະດາໄດ້. ໃນເວລາໃດກໍຕາມ, ຢູ່ໃສກໍໄດ້, ເຮົາສາມາດຂະຫຍາຍຄວາມຮູ້ຂອງເຮົາ, ເພີ່ມຄວາມເຂັ້ມແຂງໃຫ້ແກ່ສັດທາ ແລະ ປະຈັກພະຍານຂອງເຮົາ, ປົກປ້ອງຄອບຄົວຂອງເຮົາ, ແລະ ນຳພາເຂົາເຈົ້າກັບຄືນບ້ານຢ່າງປອດໄພ.
ຂ່າວສານຈາກກອງປະຊຸມນີ້ຈະຖືກຮວມເຂົ້າໄວ້ຢູ່ໃນຫລັກສູດການສອນຂອງເຍົາວະຊົນທາງອິນເຕີແນັດນຳອີກ. ພໍ່ແມ່ທັງຫລາຍ, ທ່ານສາມາດເຂົ້າເຖິງບົດຮຽນຂອງເຍົາວະຊົນສຳລັບຕົວທ່ານເອງໄດ້ຢູ່ທີ່ LDS.org. ຂໍໃຫ້ເຂົ້າໄປເບິ່ງສິ່ງທີ່ລູກໆຂອງທ່ານກຳລັງຮຽນຮູ້ຢູ່, ແລະ ເຮັດໃຫ້ມັນເປັນພາກສ່ວນຂອງການສຶກສາຂອງທ່ານເອງ, ໃນການສົນທະນາຂອງຄອບຄົວ, ການສັງສັນໃນຄອບຄົວ, ການປຶກສາໃນຄອບຄົວ, ແລະ ການສຳພາດສ່ວນຕົວກັບລູກແຕ່ລະຄົນຂອງທ່ານກ່ຽວກັບສິ່ງທີ່ເຂົາເຈົ້າຕ້ອງການຮຽນຮູ້ເປັນສ່ວນຕົວ.
ຂ້າພະເຈົ້າຊຸກຍູ້ສະມາຊິກທຸກຄົນໃຫ້ນຳໃຊ້ຊັບພະຍາກອນທີ່ຢູ່ໃນເວັບໄຊ້ ແລະ ແຫລ່ງທາງເຄື່ອງອີເລັກທຣອນນິກຂອງສາດສະໜາຈັກ. ສິ່ງເຫລົ່ານີ້ກໍຖືກພັດທະນາຢູ່ສະເໝີ ເພື່ອວ່າມັນຈະໃຊ້ໄດ້ງ່າຍຂຶ້ນ ແລະ ກ່ຽວພັນກັບຊີວິດຂອງເຮົາຫລາຍຂຶ້ນ. ຢູ່ໃນ LDS.org ທ່ານຈະພົບເຫັນຊັບພະຍາກອນທີ່ຈະຊ່ອຍໃຫ້ທ່ານຮຽນຮູ້ພຣະກິດຕິຄຸນ, ເພີ່ມຄວາມເຂັ້ມແຂງໃຫ້ບ້ານເຮືອນ ແລະ ຄອບຄົວຂອງທ່ານ, ແລະ ຮັບໃຊ້ໃນການເອີ້ນຂອງທ່ານ. ທ່ານກໍສາມາດຄົ້ນຫາບັນພະບຸລຸດທີ່ຕ້ອງການພິທີການທາງພຣະວິຫານ ແລະ ຊັບພະຍາກອນທີ່ຈະຊ່ອຍເຫລືອທ່ານໃນວຽກງານແຫ່ງຄວາມລອດນຳອີກ, ຮ່ວມທັງການແບ່ງປັນພຣະກິດຕິຄຸນ. ພໍ່ແມ່ສາມາດເປັນຜູ້ນຳທາງໃນການກະກຽມລູກໆຂອງເຂົາເຈົ້າສຳລັບການບັບຕິສະມາ, ຖານະປະໂລຫິດ, ການເຜີຍແຜ່ເຕັມເວລາ ແລະ ພຣະວິຫານ. ມັນສາມາດຊ່ອຍເຮົາໃຫ້ຍ່າງຢູ່ໃນເສັ້ນທາງຄັບ ແລະ ແຄບທີ່ນຳໄປສູ່ການໄດ້ຮັບພິທີການຂອງພຣະວິຫານ ແລະ ພັນທະສັນຍາ ແລະ ມີຄຸນຄ່າສຳລັບພອນແຫ່ງຊີວິດນິລັນດອນ.
ໃນກອງປະຊຸມຂອງເດືອນເມສາທີ່ຜ່ານມານີ້, ໃນກອງປະຊຸມຂອງຖານະປະໂລຫິດ, ຂ້າພະເຈົ້າໄດ້ເລົ່າເລື່ອງທີ່ພໍ່ຂອງຂ້າພະເຈົ້າໄດ້ແຕ້ມຮູບຂຸນເສິກ (ນັບຮົບ) ໃສ່ເກາະເຫລັກເພື່ອສອນຂ້າພະເຈົ້າກ່ຽວກັບການໃສ່ຍຸດທະພັນຄົບຊຸດຂອງພຣະເຈົ້າ ແລະ ການປົກປ້ອງທາງວິນຍານທີ່ມັນຈະນຳມາໃຫ້.
ຫລັງຈາກພາກປະຊຸມນັ້ນສິ້ນສຸດລົງ, ພໍ່ຄົນໜຶ່ງໄດ້ລາຍງານໃຫ້ຄອບຄົວຂອງລາວຮູ້ເຖິງສິ່ງທີ່ລາວໄດ້ຮຽນຮູ້. ໂດຍໄດ້ຮັບການດົນໃຈ, ທ້າວເຈສັນ ລູກຊາຍນ້ອຍຂອງເຂົາເຈົ້າໄດ້ເຂົ້າໄປຄົ້ນຫາ ແລະ ຮັບຟັງຂ່າວສານນັ້ນເອງ. ສອງສາມມື້ຕໍ່ໄປ ໃນການສັງສັນໃນຄອບຄົວ ລາວໄດ້ມາແບ່ງປັນບົດຮຽນທີ່ລາວໄດ້ຮຽນຮູ້ໃຫ້ກັບນ້ອງຊາຍ ແລະ ນ້ອງສາວຂອງລາວ. ນີ້ແມ່ນຮູບຂອງລາວ.
ຂ່າວສານທີ່ລຽບງ່າຍຈາກກອງປະຊຸມ, ທີ່ພຣະຜູ້ເປັນເຈົ້າໄດ້ດົນໃຈ, ທີ່ເດັກຄົນໜຶ່ງໄດ້ຮັບ, ກໍໄດ້ຖືກມາສອນໃຫ້ແກ່ຄອບຄົວໃນວິທີທາງທີ່ເປັນສ່ວນຕົວ ແລະ ມີພະລັງຫລາຍ. ຂ້າພະເຈົ້າມັກເຄື່ອງປ້ອງກັນເອິກແຫ່ງຄວາມຊອບທຳຂອງລາວ. ຂ້າພະເຈົ້າມັກໂລ່ແຫ່ງຄວາມເຊື່ອຂອງລາວ ເພື່ອຕ້ານທານກັບລູກສອນໄຟຂອງຜູ້ປໍລະປັກ. ສິ່ງເຫລົ່ານີ້ເປັນພອນທີ່ໄດ້ມາຈາກກອງປະຊຸມໃຫຍ່ສາມັນ.
ອ້າຍເອື້ອຍນ້ອງຂອງຂ້າພະເຈົ້າ, ຂ້າພະເຈົ້າເປັນພະຍານພິເສດວ່າ ອົງພຣະເຢຊູຄຣິດຊົງພຣະຊົນຢູ່ ແລະ ເປັນພຣະປະມຸກຂອງສາດສະໜາຈັກນີ້. ນີ້ແມ່ນກອງປະຊຸມໃຫຍ່ສາມັນ ຂອງພຣະອົງ. ຂ້າພະເຈົ້າໃຫ້ສັນຍາກັບທ່ານໃນພຣະນາມຂອງພຣະອົງວ່າ ຖ້າທ່ານອະທິຖານດ້ວຍຄວາມປາດຖະໜາທີ່ຈິງໃຈ ທີ່ຈະໄດ້ຍິນສຸລະສຽງຂອງພຣະບິດາເທິງສະຫວັນຂອງທ່ານ ໃນຂ່າວສານຈາກກອງປະຊຸມນີ້, ທ່ານຈະໄດ້ພົບເຫັນວ່າພຣະອົງໄດ້ກ່າວກັບທ່ານ ເພື່ອຊ່ອຍເຫລືອທ່ານ, ເພື່ອເສີມກຳລັງໃຫ້ທ່ານ, ແລະ ເພື່ອນຳພາທ່ານກັບບ້ານສູ່ທີ່ປະທັບຂອງພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.