ຂໍກະແຈສູ່ການປົກປ້ອງທາງວິນຍານ
ໂດຍ ປະທານບອຍ ເຄ ແພ໊ກເກີ
ປະທານສະພາອັກຄະສາວົກສິບສອງ
ຄວາມສະຫງົບສຸກສາມາດຕິດຢູ່ໃນຈິດໃຈຂອງແຕ່ລະຄົນທີ່ເພິ່ງອາໄສພຣະຄຳພີ ແລະ ເປີດຄຳສັນຍາຂອງການປົກປ້ອງ ແລະ ການໄຖ່ ທີ່ຖືກສອນໄວ້ຢູ່ໃນນັ້ນ.
ເມື່ອບໍ່ດົນມານີ້, ຂ້າພະເຈົ້າໄດ້ດຳເນີນພິທີຜະນຶກໃຫ້ແກ່ຄູ່ໜຸ່ມສາວໃນພຣະວິຫານ. ຄູ່ສາມີພັນລະຍານັ້ນໄດ້ຮັກສາຕົວເອງໃຫ້ມີຄຸນຄ່າທີ່ຈະມາເຖິງວັນອັນປະເສີດນັ້ນ ເມື່ອບຸດ ແລະ ທິດາອອກຈາກບ້ານຂອງຄວາມໜຸ່ມນ້ອຍຂອງເຂົາເຈົ້າ ແລະ ກາຍເປັນສາມີ ແລະ ພັນລະຍາ. ໃນໂອກາດອັນສັກສິດນີ້, ເຂົາເຈົ້າບໍລິສຸດ ແລະ ສະອາດ. ອີກບໍ່ດົນເຂົາເຈົ້າຈະເລີ່ມລ້ຽງດູລູກໆຂອງເຂົາເຈົ້າເອງ, ສອດຄ່ອງກັບແບບແຜນທີ່ພຣະບິດາໃນສະຫວັນໄດ້ຈັດຕັ້ງໄວ້. ຄວາມສຸກຂອງເຂົາເຈົ້າ, ແລະ ຄວາມສຸກຂອງຄົນລຸ້ນຕໍ່ໄປ ກໍຂຶ້ນຢູ່ການດຳລົງຊີວິດຕາມມາດຕະຖານທີ່ພຣະຜູ້ຊ່ອຍໃຫ້ລອດໄດ້ຈັດຕັ້ງຂຶ້ນ ແລະ ຖືກອະທິບາຍຢູ່ໃນພຣະຄຳພີຂອງພຣະອົງ.
ພໍ່ແມ່ທັງຫລາຍໃນວັນເວລານີ້ກໍຄິດຖ້າຫາກວ່າຍັງມີບ່ອນທີ່ປອດໄພຢູ່ບໍທີ່ຈະລ້ຽງດູລູກໆ. ຍັງ ມີ ບ່ອນທີ່ປອດໄພຢູ່. ມັນເປັນບ້ານບ່ອນທີ່ມີຫລັກທຳພຣະກິດຕິຄຸນເປັນຈຸດໃຈກາງ. ໃນສາດສະໜາຈັກ ເຮົາເອົາໃຈໃສ່ຄອບຄົວ, ແລະ ເຮົາແນະນຳພໍ່ແມ່ຕະຫລອດທົ່ວໂລກໃຫ້ລ້ຽງດູລູກໆຂອງເຂົາເຈົ້າໃນຄວາມຊອບທຳ.
ອັກຄະສາວົກໂປນໄດ້ພະຍາກອນ ແລະ ເຕືອນວ່າ “ໃນຍຸກສຸດທ້າຍຈະເກີດຄວາມລຳບາກຢ່າງຮ້າຍແຮງ.
“ຄົນທັງຫລາຍຈະເຫັນແກ່ຕົວ, ຮັກເງິນຄຳ, ອວດອົ່ງ, ຈອງຫອງ; ເຂົາຈະເວົ້າຕໍ່ສູ້ພຣະເຈົ້າ ແລະ ກະບົດຕໍ່ພໍ່ແມ່, ເຂົາຈະເນລະຄຸນ, ທັງບໍ່ນັບຖືພຣະເຈົ້າ ແລະ ສິ່ງສັກສິດ.
“ເຂົາຈະຂາດມະນຸດສະທຳ, ຂາດເມດຕາຈິດ, ມັກກ່າວຮ້າຍປ້າຍສີ, ມັກຄວາມຮຸນແຮງ, ມີໃຈໂຫດຮ້າຍສາມານ, ແລະ ກຽດຊັງການກະທຳດີ,
“ເຂົາຈະທໍລະຍົດ, ດື້ດ້ານ, ແລະ ຈອງຫອງພອງຕົວ; ຮັກຄວາມມ່ວນຊື່ນຫລາຍກວ່າຮັກພຣະເຈົ້າ;
“ເຂົາຈະເປັນຄົນເຊື່ອຖືແຕ່ພາຍນອກ, ສ່ວນລິດອຳນາດແຫ່ງຄວາມເຊື່ອອັນແທ້ຈິງນັ້ນ ເຂົາກໍປະຕິເສດເສຍ.”1
ໂປນໄດ້ພະຍາກອນອີກວ່າ, “ຄົນຮ້າຍກາດ ແລະ ຄົນໜ້າໄວ້ຫລັງຫລອກກໍຈະຊົ່ວໜັກນັບມື້ໂດຍລໍ້ລວງຄົນອື່ນໃຫ້ຫລົງ ແລະ ຕົນເອງກໍຖືກລໍ້ລວງ.”2
ຂໍ້ພຣະຄຳພີເຫລົ່ານີ້ໃຊ້ໄດ້ເປັນການຕັກເຕືອນ, ສະແດງໃຫ້ເຫັນແບບແຜນທີ່ຕ້ອງຫລີກລ້ຽງ. ເຮົາຕ້ອງລະມັດລະວັງ ແລະ ພາກພຽນສະເໝີ. ເຮົາສາມາດທົບທວນແຕ່ລະຂໍ້ຂອງການພະຍາກອນເຫລົ່ານີ້ ແລະ ຢືນຢັນວ່າແຕ່ລະຢ່າງນີ້ມີຢູ່ ແລະ ເປັນເຫດຜົນທີ່ຈະຕ້ອງກັງວົນໃນໂລກທຸກໆວັນນີ້:
ຄວາມລຳບາກຢ່າງຮ້າຍແຮງ—ມີຢູ່. ເຮົາມີຊີວິດຢູ່ໃນວັນເວລາທີ່ອັນຕະລາຍ.
ຮັກເງິນຄຳ, ອວດອົ່ງ, ຈອງຫອງ—ທັງໝົດນີ້ແມ່ນຢູ່ໃນບັນດາພວກເຮົາ.
ເຂົາຈະເວົ້າຕໍ່ສູ້ພຣະເຈົ້າ ແລະ ກະບົດຕໍ່ພໍ່ແມ່, ເຂົາຈະເນລະຄຸນ, ທັງບໍ່ນັບຖືພຣະເຈົ້າ ແລະ ສິ່ງສັກສິດ, ເຂົາຈະຂາດມະນຸດສະທຳ—ທັງໝົດນີ້ແມ່ນມີຢູ່ຢ່າງຫລວງຫລາຍໃນເວລານີ້.
ຂາດເມດຕາຈິດ, ມັກກ່າວຮ້າຍປ້າຍສີ, ແລະ ອື່ນໆ—ທົງໝົດສາມາດຢືນຢັນເປັນຫລັກຖານໄດ້ວ່າມີຢູ່ອ້ອມຂ້າງເຮົາຢ່າງຫລວງຫລາຍ.
ໂມໂຣໄນກໍໄດ້ກ່າວເຖິງຄວາມຊົ່ວຮ້າຍໃນວັນເວລາຂອງເຮົາເມື່ອເພິ່ນໄດ້ເຕືອນວ່າ:
“ເມື່ອທ່ານເຫັນສິ່ງເຫລົ່ານີ້ເກີດຂຶ້ນໃນບັນດາພວກທ່ານ … ທ່ານຄວນຈະຕື່ນຂຶ້ນສູ່ຄວາມເຂົ້າໃຈເຖິງສະພາບອັນເປັນຕາຢ້ານຂອງທ່ານ. …
“ສະນັ້ນ, ຂ້າພະເຈົ້າໂມໂຣໄນຈຶ່ງໄດ້ຮັບບັນຊາໃຫ້ຂຽນເລື່ອງເຫລົ່ານີ້ ເພື່ອຄວາມຊົ່ວຕ່າງໆຈະໄດ້ໝົດໄປ, ແລະວ່າເວລາຈະມາຮອດ ຊຶ່ງຊາຕານຈະບໍ່ມີອຳນາດເໜືອຫົວໃຈຂອງລູກຫລານມະນຸດ, ມີແຕ່ເຂົາຈະຖືກຊັກຈູງໃຫ້ເຮັດແຕ່ຄວາມດີຕະຫລອດໄປ, ເພື່ອເຂົາຈະໄດ້ມາຫາອ່າງນ້ຳແຫ່ງຄວາມຊອບທຳທັງປວງ ແລະ ລອດ.”3
ຄຳບັນຍາຍທີ່ໂປນ ແລະ ໂມໂຣໄນໃຫ້ໄວ້ເຖິງວັນເວລາຂອງເຮົາແມ່ນຖືກຕ້ອງແນ່ນອນ ຈົນວ່າຈະປະຕິເສດບໍ່ໄດ້. ສຳລັບຫລາຍໆຄົນ ມັນອາດຈະເປັນສິ່ງທີ່ເປັນຕາຫ່ວງແທ້, ແມ່ນແຕ່ໜ້າທໍ້ຖອຍໃຈ. ເຖິງຢ່າງໃດກໍຕາມ, ເມື່ອເຮົາຄິດເຖິງອະນາຄົດ, ຂ້າພະເຈົ້າຍັງເຕັມໄປດ້ວຍຄວາມຮູ້ສຶກເຖິງການເບິ່ງໂລກໃນແງ່ດີ.
ໃນການເປີດເຜີຍຂອງໂປນ, ນອກເໜືອໄປຈາກລາຍຊື່ຂອງການທ້າທາຍ ແລະ ບັນຫາທັງຫລາຍ, ເພິ່ນຍັງບອກເຮົາເຖິງສິ່ງທີ່ເຮົາສາມາດເຮັດໄດ້ ເພື່ອຈະປົກປ້ອງຕົວເຮົາເອງ:
ແຕ່ສຳລັບເຈົ້າ ຈົ່ງສືບຕໍ່ດຳລົງຢູ່ໃນຄວາມຈິງຊຶ່ງເຈົ້າໄດ້ຮຽນຮູ້ມາ ແລະ ເຊື່ອຢ່າງໝັ້ນຄົງ. ເຈົ້າກໍຮູ້ແລ້ວວ່າເຈົ້າໄດ້ຮຽນຮູ້ມາຈາກຜູ້ໃດ;
ແທ້ຈິງແລ້ວ ເຈົ້າໄດ້ຮຽນຮູ້ພຣະຄຳພີອັນສັກສິດຕັ້ງແຕ່ຄາວເຈົ້າຍັງນ້ອຍພຸ້ນ, ຊຶ່ງສາມາດໃຫ້ເຈົ້າມີປັນຍາທີ່ນຳໄປເຖິງຄວາມພົ້ນໂດຍທາງຄວາມເຊື່ອໃນພຣະເຢຊູຄຣິດ.”4
ພຣະຄຳພີບອກເຮົາເຖິງຂໍກະແຈສູ່ການປົກປ້ອງທາງວິນຍານ. ມັນບັນຈຸຄຳສອນ ແລະ ກົດ ແລະ ພິທີການທີ່ຈະນຳລູກຂອງພຣະເຈົ້າແຕ່ລະຄົນໄປສູ່ປະຈັກພະຍານເຖິງພຣະເຢຊູຄຣິດ ວ່າເປັນພຣະຜູ້ຊ່ອຍໃຫ້ລອດ ແລະ ພຣະຜູ້ໄຖ່ຂອງເຂົາເຈົ້າ.
ດ້ວຍການກະກຽມເປັນເວລາຫລາຍປີ, ໄດ້ມີວຽກງານໜັກທີ່ຈະຜະລິດພຣະຄຳພີຂຶ້ນມາເປັນຫລາຍໆພາສາດ້ວຍໝາຍເຫດທາງລຸ່ມໜ້າປຶ້ມ ແລະ ຂໍ້ອ້າງອີງຕ່າງໆ. ພວກເຮົາໄດ້ສະແຫວງຫາເພື່ອຈະເຮັດໃຫ້ມີບໍລິການຕໍ່ທຸກໆຄົນ ຜູ້ທີ່ປາດຖະໜາຢາກຮຽນຮູ້. ມັນສອນເຮົາເຖິງບ່ອນທີ່ຈະໄປ ແລະ ສິ່ງທີ່ຈະຕ້ອງເຮັດ. ມັນໃຫ້ເຮົາມີຄວາມຫວັງ ແລະ ຄວາມຮູ້.
ເມື່ອຫລາຍໆປີກ່ອນ, ແອວເດີ ແອັສ ດິວເວີດ ຢັງ ແຫ່ງສາວົກເຈັດສິບໄດ້ສອນບົດຮຽນບົດໜຶ່ງໃຫ້ຂ້າພະເຈົ້າກ່ຽວກັບການອ່ານພຣະຄຳພີ. ມີສະເຕກໜຶ່ງທີ່ມີບັນຫາກັບຄວາມເຄັ່ງຄຽດ ແລະ ຄວາມຫຍຸ້ງຍາກໃນບັນດາສະມາຊິກ, ແລະ ຕ້ອງການຈະໄດ້ຮັບຄຳແນະນຳ.
ຂ້າພະເຈົ້າໄດ້ຖາມປະທານຢັງວ່າ, “ຂ້ອຍຄວນເວົ້າຫຍັງແດ່
ເພິ່ນໄດ້ຕອບຢ່າງລຽບງ່າຍວ່າ, “ບອກເຂົາເຈົ້າໃຫ້ອ່ານພຣະຄຳພີ.”
ຂ້າພະເຈົ້າໄດ້ຖາມວ່າ, “ພຣະຄຳພີໃດ?”
ເພິ່ນໄດ້ເວົ້າວ່າ, “ມັນບໍ່ສຳຄັນເລີຍ. ຍົກຕົວຢ່າງ, ບອກເຂົາເຈົ້າໃຫ້ເປີດພຣະຄຳພີມໍມອນ, ແລະ ເລີ່ມອ່ານ. ບໍ່ດົນຄວາມຮູ້ສຶກເຖິງຄວາມສະຫງົບ ແລະ ການດົນໃຈຈາມາສູ່, ແລະ ການແກ້ບັນຫາຈະເປີດເຜີຍເອົາເອງ.”
ເຮັດໃຫ້ການອ່ານພຣະຄຳພີເປັນພາກສ່ວນຂອງກິດຈະກຳປະຈຳວັນຂອງທ່ານ, ແລະ ພອນຕ່າງໆຈະເຂົ້າມາ. ໃນພຣະຄຳພີນັ້ນກໍມີສຸລະສຽງເຕືອນ, ແຕ່ຍັງມີການໃຫ້ກຳລັງໃຈຫລາຍນຳອີກ.
ຖ້າຫາກວ່າພາສາຂອງພຣະຄຳພີເບິ່ງຄືວ່າແປກໆສຳລັບທ່ານໃນຕອນຕົ້ນ, ອ່ານຕໍ່ໄປ. ອີກບໍ່ດົນທ່ານຈະມາຮັບຮູ້ເຖິງຄວາມສວຍງາມ ແລະ ອຳນາດທີ່ຈະພົບເຫັນຢູ່ໃນພຣະຄຳເຫລົ່ານັ້ນ.
ໂປໂລໄດ້ກ່າວວ່າ, “ພຣະຄຳພີທຸກຕອນໄດ້ຮັບການບັນດົນໃຈຈາກພຣະເຈົ້າ, ແລະ ເປັນປະໂຫຍດສຳລັບສັ່ງສອນຄວາມຈິງ, ຕິຕຽນວ່າກ່າວຜູ້ເຮັດຜິດ, ດັດແປງແກ້ໄຂຄວາມຜິດ, ແລະ ໃຫ້ຄຳແນະນຳສຳລັບການດຳເນີນຊີວິດໃນຄວາມຊອບທຳ.”5
ທ່ານສາມາດທົດລອງຄຳສັນຍານີ້ໄດ້ສຳລັບຕົວທ່ານເອງ.
ເຮົາມີຊີວິດຢູ່ໃນວັນເວລາທີ່ມີອັນຕະລາຍ; ເຖິງຢ່າງໃດກໍຕາມ, ເຮົາສາມາດພົບເຫັນຄວາມຫວັງ ແລະ ຄວາມສະຫງົບສຸກໄດ້ສຳລັບຕົວເຮົາເອງ ແລະ ຄອບຄົວຂອງເຮົາ. ຜູ້ທີ່ດຳລົງຊີວິດຢູ່ໃນຄວາມໂສກເສົ້າ, ຮູ້ສຶກສິ້ນຫວັງໃນຄວາມເປັນໄປໄດ້ຂອງເດັກທີ່ຖືກຊ່ອຍຊີວິດເອົາໄວ້ຈາກບ່ອນທີ່ໂລກໄດ້ນຳເຂົາໄປ, ຕ້ອງບໍ່ທໍ້ຖອຍ. “ຢ່າຊູ່ຢ້ານ, ພຽງແຕ່ເຊື່ອ.”6 ຄວາມຊອບທຳນັ້ນມີພະລັງຫລາຍກວ່າຄວາມຊົ່ວຮ້າຍ.
ເດັກນ້ອຍທີ່ໄດ້ຮັບການສອນຄວາມເຂົ້າໃຈເຖິງເລື່ອງພຣະຄຳພີແຕ່ເຂົາຍັງນ້ອຍ ຈະໄດ້ຮັບປະຈັກພະຍານເຖິງເສັ້ນທາງທີ່ພວກເຂົາຄວນເດີນຕາມ ແລະ ຈະຍຶດໝັ້ນຢູ່ໃນເສັ້ນທາງນັ້ນ. ຜູ້ທີ່ເດີນອອກນອກເສັ້ນທາງນັ້ນຈະມີຄວາມສາມາດທີ່ຈະກັບຄືນມາ ແລະ ດ້ວຍຄວາມຊ່ອຍເຫລືອ, ຈະສາມາດພົບເຫັນເສັ້ນທາງທີ່ຈະກັບຄືນມາ.
ລູກຊາຍຂອງໂມໄຊຢາໄດ້ຕໍ່ຕ້ານສາດສະໜາຈັກໃນໄລຍະໜຶ່ງ ແຕ່ຕໍ່ມາໄດ້ກັບໃຈ ແລະ ໄດ້ປະສົບການປ່ຽນແປງທີ່ຍິ່ງໃຫຍ່ຫລາຍ. ໃນໜັງສືຂອງແອວມາເຮົາອ່ານວ່າ, “ພວກລູກຊາຍຂອງໂມໄຊຢາເຫລົ່ານີ້ … ໄດ້ເຂັ້ມແຂງຂຶ້ນໃນຄວາມຮູ້ ແລະ ຄວາມຈິງ; ເພາະພວກເຂົາໄດ້ເປັນຄົນທີ່ມີຄວາມເຂົ້າໃຈທີ່ເລິກຊຶ້ງ ແລະ ພວກເຂົາໄດ້ຄົ້ນຄວ້າພຣະຄຳພີຢ່າງພາກພຽນ, ເພື່ອວ່າພວກເຂົາຈະຮູ້ພຣະຄຳຂອງພຣະເຈົ້າ.”7
ປະທານໂຈເຊັບ ແອັຟ ສະມິດ ໄດ້ມີອາຍຸຫ້າປີເມື່ອ ໄຮລຳ, ພໍ່ຂອງເພິ່ນ, ຖືກຂ້າຕາຍໃນຄຸກຄາດເທດ. ຕໍ່ຈາກນັ້ນ, ໂຈເຊັບໄດ້ຂ້າມທົ່ງພຽງໄປກັບແມ່ຂອງເພິ່ນທີ່ເປັນແມ່ໝ້າຍ.
ຕອນອາຍຸ 15 ປີ, ເພິ່ນຖືກເອີ້ນໃຫ້ໄປສອນສາດສະໜາທີ່ຮາວາຍ. ເພິ່ນໄດ້ຮູ້ສຶກວ່າຫລົງທາງ ແລະ ໂດຍດ່ຽວ ແລະ ໄດ້ກ່າວວ່າ: “ຂ້າພະເຈົ້າໜັກໃຈຫລາຍ. … ຂ້າພະເຈົ້າໄດ້ຮູ້ສຶກຄືກັບວ່າຂ້າພະເຈົ້າມີປົມດ້ອຍໃນສະພາບຂອງຄວາມຍາກລຳບາກຂອງຕົນ, ຂາດສະຕິປັນຍາ ແລະ ຄວາມຮູ້, ຍັງນ້ອຍຢູ່, ຈົນຂ້າພະເຈົ້າບໍ່ກ້າຫລຽວເບິ່ງໜ້າໃຜເລີຍ.”
ຂະນະທີ່ຄິດໄຕ່ຕອງສະພາບການທີ່ຍາກລຳບາກຂອງເພິ່ນຢູ່ຄືນໜຶ່ງ, ໂຈເຊັບນ້ອຍໄດ້ຝັນວ່າເພິ່ນໄດ້ຢູ່ໃນການເດີນທາງ, ເດີນໄປຢ່າງໄວເທົ່າທີ່ເພິ່ນເຮັດໄດ້. ເພິ່ນໄດ້ຖືເອົາຫໍ່ນ້ອຍໆອັນໜຶ່ງໄປນຳ. ໃນທີ່ສຸດ, ເພິ່ນໄດ້ໄປເຖິງຜາສາດທີ່ງົດງາມແຫ່ງໜຶ່ງ ຊຶ່ງເປັນຈຸດໝາຍປາຍທາງຂອງເພິ່ນ. ເມື່ອເພິ່ນເຂົ້າໄປ, ເພິ່ນໄດ້ເຫັນປ້າຍນ້ອຍທີ່ອ່ານວ່າ, “ຫ້ອງນ້ຳ.” ເພິ່ນໄດ້ເຂົ້າໄປໄວໆ ແລະ ໄດ້ລ້າງຕົນຕົວ. ເພິ່ນໄດ້ເປີດຫໍ່ນ້ອຍໆນັ້ນ ແລະ ໄດ້ເຫັນເສື້ອຜ້າທີ່ສະອາດ. ເພິ່ນໄດ້ເວົ້າວ່າ, “ນັ້ນເປັນສິ່ງຂອງທ່ານ ຂ້າພະເຈົ້າບໍ່ໄດ້ເຫັນດົນນານມາແລ້ວ.” ເພິ່ນໄດ້ໃສ່ເສື້ອ ແລະ ຟ້າວເຂົ້າໄປສູ່ປະຕູຂອງຜາສາດ.
“ຂ້າພະເຈົ້າໄດ້ເຄາະປະຕູ,” ເພິ່ນໄດ້ເວົ້າ, “ແລະ ປະຕູກໍໄດ້ເປີດ, ແລະ ຊາຍຜູ້ທີ່ໄດ້ຢືນຢູ່ທີ່ປະຕູນັ້ນແມ່ນ ສາດສະດາໂຈເຊັບ ສະມິດ. ເພິ່ນໄດ້ຫລຽວເບິ່ງຂ້າພະເຈົ້າ ຮ້າຍນ້ອຍໜຶ່ງ, ແລະ ຄຳທຳອິດທີ່ເພິ່ນໄດ້ກ່າວນັ້ນຄື: ‘ໂຈເຊັບ, ເຈົ້າມາຊ້າ.’ ແຕ່ຂ້າພະເຈົ້າໄດ້ກ່າວດ້ວຍຄວາມໝັ້ນໃຈວ່າ:
“‘ແມ່ນແລ້ວ, ແຕ່ຂ້ານ້ອຍສະອາດ ຂ້ານ້ອຍສະອາດ!’”8
ແລະ ມັນກໍເປັນດັ່ງນັ້ນໄດ້ສຳລັບເຮົາແຕ່ລະຄົນ.
ຖ້າຫາກທ່ານໄດ້ເລີ່ມເດີນທາງໃນເສັ້ນທາງແຫ່ງສັດທາ ແລະ ຄວາມເຂັ້ມແຂງໃນສາດສະໜາຈັກ, ຂໍໃຫ້ຍຶດໝັ້ນຢູ່ໃນເສັ້ນທາງນັ້ນ ແລະ ຮັກສາພັນທະສັນຍາຂອງທ່ານ. ຂໍໃຫ້ກ້າວໄປໜ້າຈົນເຖິງເວລາທີ່ພຣະພອນຂອງພຣະຜູ້ເປັນເຈົ້າຈະມາສູ່ທ່ານ ແລະ ພຣະວິນຍານບໍລິສຸດຈະຖືກເປີດເຜີຍວ່າເປັນອິດທິພົນທີ່ມີພະລັງໃນຊີວິດຂອງທ່ານ.
ຖ້າຫາກທ່ານກຳລັງເດີນໄປໃນເສັ້ນທາງທີ່ກົງກັນຂ້າມກັບເສັ້ນທາງທີ່ຊີ້ບອກຢູ່ໃນພຣະຄຳພີ, ຂ້າພະເຈົ້າຂໍໃຫ້ທ່ານແນ່ໃຈໄດ້ວ່າຍັງມີທາງກັບຄືນມາຢູ່.
ພຣະເຢຊູຄຣິດໄດ້ຊີ້ບອກວິທີທາງທີ່ແຈ້ງຊັດດີເພື່ອເຮົາຈະກັບໃຈ ແລະ ເຫັນການປິ່ນປົວໃນຊີວິດຂອງເຮົາ. ການປິ່ນປົວສຳລັບຄວາມຜິດພາດທັງຫລາຍສາມາດພົນເຫັນໂດຍການສະແຫວງຫາການໃຫ້ອະໄພ ຜ່ານການອະທິຖານສ່ວນຕົວ. ເຖິງຢ່າງໃດກໍຕາມ, ຍັງມີຄວາມເຈັບປ່ວຍບາງຢ່າງ, ໂດຍສະເພາະຢ່າງທີ່ກ່ຽວພັນກັບການລ່ວງລະເມີດກົດທາງສິນທຳ, ຊຶ່ງຕ້ອງການການຊ່ອຍເຫລືອ ແລະ ການປິ່ນປົວຢ່າງແນ່ນອນຈາກນາຍແພດທາງວິນຍານ.
ເມື່ອຫລາຍປີກ່ອນ, ຍິ່ງສາວຄົນໜຶ່ງ ແລະ ພໍ່ທີ່ສູງອາຍຸຂອງນາງໄດ້ມາຫ້ອງການຂອງນາງ. ນາງໄດ້ພາພໍ່ມາເປັນໄລຍະທາງໄກຫລາຍກິໂລແມັດເພື່ອຈະໄດ້ພົບເຫັນຢາທີ່ຈະປິ່ນປົວຄວາມຮູ້ສຶກຜິດທີ່ລາວໄດ້ຮູ້ສຶກຢູ່. ຕອນເປັນບ່າວລາວໄດ້ເຮັດຜິດພາດຢ່າງຮ້າຍແຮງ, ແລະ ໃນຕອນອາຍຸແກ່ຄວາມຊົງຈຳໄດ້ກັບມາຫາລາວ. ລາວກຳຈັດຄວາມຮູ້ສຶກຜິດນັ້ນບໍ່ໄດ້. ລາວຈະກັບຄືນໄປ ແລະ ແກ້ໄຂບັນຫາໃນໄວໜຸ່ມຂອງລາວບໍ່ໄດ້ດ້ວຍຕົວລາວເອງ, ແຕ່ລາວສາມາດເລີ່ມຕົ້ນໃໝ່ໄດ້, ແລະ ດ້ວຍຄວາມຊ່ອຍເຫລືອ, ລຶບຄວາມຮູ້ສຶກຜິດທີ່ໄດ້ຕິດຢູ່ກັບລາວເປັນເວລາຫລາຍປີ.
ຂ້າພະເຈົ້າກະຕັນຍູວ່າໂດຍການສັ່ງສອນຫລັກທຳທີ່ມາຈາກພຣະຄຳພີມໍມອນໃຫ້ແກ່ລາວ ມັນໄດ້ເປັນຄືວ່ານ້ຳໜັກທີ່ຫລວງຫລາຍນັ້ນຖືກຍົກອອກໄປຈາກບ່າໄຫລ່ຂອງລາວ. ເມື່ອລາວ ແລະ ລູກສາວຂັບລົດກັບບ້ານໃນໄລຍະຫລາຍໆໄມນັ້ນ, ຊາຍແກ່ຄົນນັ້ນໄດ້ປະຖິ້ມການລ່ວງລະເມີດໃນອາດີດຂອງລາວໄປ.
ຖ້າຫາກທ່ານຈະ “ຕື່ນຂຶ້ນສູ່ຄວາມຮູ້ສຶກເຖິງສະພາບອັນເປັນຕາຢ້ານຂອງທ່ານ”9 ແລະ ຫວັງຈະກັບຄືນມາສູ່ສຸຂະພາບດີທາງວິນຍານ, ຂໍໃຫ້ໄປຫາອະທິການຂອງທ່ານ. ເພິ່ນຖືຂໍກະແຈ ແລະ ສາມາດຊ່ອຍທ່ານໄດ້ໃນເສັ້ນທາງແຫ່ງການກັບໃຈ.
ການກັບໃຈເປັນເລື່ອງຂອງສ່ວນບຸກຄົນ, ແລະ ການໃຫ້ອະໄພກໍເໝືອນກັນ. ພຣະຜູ້ເປັນເຈົ້າຮຽກຮ້ອງພຽງແຕ່ໃຫ້ຄົນເຮົາຫັນໜີຈາກບາບຂອງເຂົາເຈົ້າ, ແລະ “[ພຣະອົງ] ຈະໃຫ້ອະໄພຄວາມຊົ່ວຮ້າຍຂອງເຂົາທັງໝົດ, ແລະ … ຈະບໍ່ຈື່ຈຳບາບຂອງເຂົາອີກຕໍ່ໄປ.”10
ຂະນະທີ່ຂັ້ນຕອນຂອງການກັບໃຈນັ້ນສຳເລັດ, ທ່ານຈະໄດ້ມາເຂົ້າໃຈຄວາມໝາຍຂອງຄຳສັນຂອງເອຊາຢາກ່ຽວກັບການຊົດໃຊ້ວ່າ: “ຈົ່ງມາເຖີດ, ແລະ ເຮົາຈະໃຫ້ເຫດຜົນນຳກັນ, ພຣະຜູ້ເປັນເຈົ້າໄດ້ກ່າວ: ເຖິງແມ່ນວ່າບາບຂອງເຈົ້ານັ້ນແດງຊ້ຳ, ມັນຈະຂາວດັ່ງຫິມະ; ເຖິງແມ່ນມັນແດງເຂັ້ມ, ມັນຈະເປັນດັ່ງຂົນແກະ.”11
ສໍຖືກລຶບອອກຈາກກະດານໄດ້ສັນໃດ, ດ້ວຍການກັບໃຈທີ່ຈິງໃຈຜົນສະທ້ອນຂອງການລ່ວງລະເມີດກໍສາມາດຖືກລຶບອອກໄດ້ຜ່ານການຊົດໃຊ້ຂອງພຣະເຢຊູຄຣິດສັນນັ້ນ. ຄຳສັນຍານັ້ນແມ່ນກ່ຽວກັບທຸກໆສະພາບການ.
ພຣະກິດຕິຄຸນສອນເຮົາໃຫ້ມີຄວາມສຸກ, ໃຫ້ມີສັດທາແທນມີຄວາມຢ້ານກົວ, ໃຫ້ພົບເຫັນຄວາມຫວັງ ແລະ ເອົາຊະນະຄວາມສິ້ນຫວັງ, ໃຫ້ໜີໄປຈາກຄວາມມືດ ແລະ ຫັນໄປສູ່ຄວາມສະຫວ່າງຂອງພຣະກິດຕິຄຸນທີ່ເປັນນິດ.
ໂປໂລ ແລະ ຄົນອື່ນໆໄດ້ເຕືອນກ່ຽວກັບການທົດລອງໃນວັນເວລາຂອງເຮົາ ແລະ ວັນເວລາທີ່ຈະມາເຖິງ. ແຕ່ຄວາມສະຫງົບສຸກສາມາດຕິດຢູ່ໃນຈິດໃຈຂອງແຕ່ລະຄົນທີ່ອ້າງອີງພຣະຄຳພີ ແລະ ເປີດຄຳສັນຍາຂອງການປົກປ້ອງ ແລະ ການໄຖ່ ທີ່ຖືກສອນໄວ້ຢູ່ໃນນັ້ນ. ເຮົາຂໍເຊື້ອເຊີນທຸກຄົນໃຫ້ຫັນໄປຫາພຣະຜູ້ຊ່ອຍໃຫ້ລອດພຣະເຢຊູຄຣິດ, ຫັນໄປຫາຄຳສັ່ງສອນຂອງພຣະອົງທີ່ພົບເຫັນຢູ່ໃນພຣະຄຳພີເດີມ, ພຣະສັນຍາໃໝ່, ພຣະຄຳພີມໍມອນ, ພຣະຄຳພີ Doctrine and Covenants, ແລະ Pearl of Great Price.
ຂ້າພະເຈົ້າເປັນພະຍານເຖິງພຣະຄຳພີ ວ່າເປັນຂໍກະແຈສູ່ການປົກປ້ອງຂອງເຮົາທາງວິນຍານ. ຂ້າພະເຈົ້າຍັງເປັນພະຍານອີກ ເຖິງອຳນາດທີ່ປິ່ນປົວຂອງການຊົດໃຊ້ຂອງພຣະເຢຊູຄຣິດ, “ໂດຍທາງພຣະອົງຄົນທັງປວງຈະໄດ້ລອດ”12 ຈະຖືກຊ່ອຍໃຫ້ລອດ. ສາດສະໜາຈັກຂອງພຣະຜູ້ເປັນເຈົ້າຖືກສະຖາປະນາຂຶ້ນມາຢູ່ເທິງໂລກອີກແລ້ວ. ຂ້າພະເຈົ້າເປັນພະຍານເຖິງຄວາມຈິງຂອງພຣະກິດຕິຄຸນ. ຂ້າພະເຈົ້າເປັນພະຍານເຖິງພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.