ພະລັງສ່ວນຕົວຜ່ານການຊົດໃຊ້ຂອງພຣະເຢຊູຄຣິດ

ໂດຍ ແອວເດີ ຣິເຈີດ ຈີ ສະກາດ

ແຫ່ງສະພາອັກຄະສາວົກສິບສອງ

ຜ່ານການຊົດໃຊ້ຂອງພຣະເຢຊູຄຣິດ, ເຮົາແຕ່ລະຄົນສາມາດຖືກຊຳລະໃຫ້ສະອາດ ແລະ ພາລະໜັກຂອງການກະບົດຂອງເຮົາຈະຖືກຍົກອອກໄປ.

ເມື່ອບໍ່ດົນມານີ້, ຂ້າພະເຈົ້າໄດ້ຮັບພອນທີ່ໄດ້ພົບເຍົາວະຊົນທີ່ໜ້າປະທັບໃຈຫລາຍກຸ່ມໜຶ່ງ ຈາກລັດໄອດາໂຮ. ຍິງໜຸ່ມບໍລິສຸດຄົນໜຶ່ງໄດ້ຖາມຂ້າພະເຈົ້າວ່າ ແມ່ນຫຍັງຄືສິ່ງທີ່ຂ້າພະເຈົ້າຮູ້ສຶກວ່າສຳຄັນທີ່ສຸດທີ່ເຂົາເຈົ້າຄວນເຮັດໃນຊີວິດຂອງເຂົາເຈົ້າໃນເວລານີ້. ຂ້າພະເຈົ້າໄດ້ແນະນຳເຂົາເຈົ້າໃຫ້ຮຽນຮູ້ທີ່ຈະຮັບຮູ້ອຳນາດຂອງການຊົດໃຊ້ຂອງພຣະເຢຊູຄຣິດໃນຊີວິດຂອງເຂົາເຈົ້າ. ມື້ນີ້ຂ້າພະເຈົ້າຈະອະທິບາຍເຖິງດ້ານໜຶ່ງຂອງອຳນາດນັ້ນ, ຊຶ່ງເປັນພະລັງສ່ວນຕົວທີ່ເຮົາສາມາດໄດ້ຮັບ ຜ່ານການຊົດໃຊ້ຂອງພຣະເຢຊູຄຣິດ.

ໃນພຣະຄຳພີມໍມອນ ເຮົາໄດ້ອ່ານເຖິງ ອຳໂມນ ແລະ ອ້າຍນ້ອງຂອງລາວ ທີ່ສອນພຣະກິດຕິຄຸນຂອງພຣະເຢຊູຄຣິດໃຫ້ “ຄົນປ່າ ແລະ ແຂງກະດ້າງ ແລະ ປ່າເຖື່ອນ.”¹ ຫລາຍຄົນໄດ້ປ່ຽນໃຈເຫລື້ອມໃສ ແລະ ໄດ້ເລືອກທີ່ຈະປະຖິ້ມການປະພຶດທີ່ເປັນບາບຂອງເຂົາເຈົ້າໄປ. ການປ່ຽນໃຈເຫລື້ອມໃສຂອງເຂົາເຈົ້ານັ້ນສົມບູນຄົບຖ້ວນແທ້ ຈົນວ່າເຂົາເຈົ້າໄດ້ຝັງອາວຸດຂອງເຂົາເຈົ້າ ແລະ ໄດ້ເຮັດພັນທະສັນຍາກັບພຣະຜູ້ເປັນເຈົ້າວ່າເຂົາເຈົ້າຈະບໍ່ໃຊ້ມັນອີກ.²

ຕໍ່ມາ, ພີ່ນ້ອງຂອງເຂົາເຈົ້າທັງຫລາຍທີ່ບໍ່ໄດ້ປ່ຽນໃຈເຫລື້ອມໃສ ໄດ້ຂຶ້ນມາໂຈມຕີເຂົາເຈົ້າ ແລະ ໄດ້ເລີ່ມຂ້າເຂົາເຈົ້າ. ຜູ້ຄົນທີ່ຄົນຊື່ສັດບັດນີ້ ໄດ້ເລືອກທີ່ຈະຍອມຕາຍດ້ວຍດາບ ແທນທີ່ຈະສ່ຽງສູນເສຍຊີວິດທາງວິນຍານຂອງເຂົາເຈົ້າ ໂດຍການໃຊ້ອາວຸດອີກ. ຕົວຢ່າງທີ່ຊອບທຳຂອງເຂົາເຈົ້າໄດ້ຊ່ອຍແມ່ນແຕ່ອີກຫລາຍຄົນມາປ່ຽນໃຈເຫລື້ອມໃສ ແລະ ໄດ້ປະວາງອາວຸດແຫ່ງການກະບົດຂອງເຂົາເຈົ້າ.³

ຜ່ານອຳໂມນ, ພຣະຜູ້ເປັນເຈົ້າໄດ້ນຳເຂົາເຈົ້າໄປສູ່ບ່ອນຫລົບໄພໃນບັນດາຊາວນີໄຟ, ແລະ ເຂົາເຈົ້າໄດ້ກາຍເປັນທີ່ຮູ້ກັນວ່າ ຜູ້ຄົນຂອງອຳໂມນ.⁴ ຊາວນີໄຟໄດ້ປົກປ້ອງເຂົາເຈົ້າເປັນເວລາຫລາຍປີ, ແຕ່ໃນທີ່ສຸດກອງທັບຊາວນີໄຟໄດ້ເລີ່ມອ່ອນເພຍລົງ, ແລະ ຈຳເປັນຕ້ອງການການເສີມກຳລັງຫລາຍແທ້ໆ.⁵

ຜູ້ຄົນຂອງອຳໂມນໄດ້ຄົງຢູ່ໃນເວລາທີ່ສຳຄັນຫລາຍແທ້ໆໃນຊີວິດທາງວິນຍານຂອງເຂົາເຈົ້າ. ເຂົາເຈົ້າໄດ້ຊື່ສັດຕໍ່ພັນທະສັນຍາທີ່ຈະບໍ່ໃຊ້ອາວຸດອີກ. ແຕ່ເຂົາເຈົ້າໄດ້ເຂົ້າໃຈວ່າບັນດາພໍ່ມີໜ້າທີ່ຮັບຜິດຊອບທີ່ຈະຈັດຫາການປົກປ້ອງໃຫ້ແກ່ຄອບຄົວຂອງເຂົາເຈົ້າ.⁶ ຄວາມຕ້ອງການນັ້ນໃຫຍ່ໂຕພໍທີ່ຈະໄດ້ຮັບຄວາມພິຈາລະນາເຖິງການເຮັດຜິດພັນທະສັນຍາຂອງເຂົາເຈົ້າ.⁷

ຮີລາມັນ, ຜູ້ນຳໃນຖານະປະໂລຫິດທີ່ສະຫລາດ, ໄດ້ຮູ້ວ່າການຝ່າຝືນພັນທະສັນຍາກັບພຣະຜູ້ເປັນເຈົ້າຈະບໍ່ໄດ້ຮັບຂໍ້ແກ້ຕົວ. ພຣະອົງໄດ້ສະເໜີທາງເລືອກອື່ນທີ່ດົນໃຈ. ພຣະອົງໄດ້ເຕືອນເຂົາເຈົ້າວ່າລູກຊາຍຂອງເຂົາເຈົ້າບໍ່ເຄີຍໄດ້ເຮັດຜິດບາບອັນດຽວກັນ ແລະ ສະນັ້ນກໍບໍ່ຈຳເປັນທີ່ຈະເຮັດພັນທະສັນຍາອັນດຽວກັນນັ້ນ.⁸ ເຖິງແມ່ນວ່າລູກຊາຍຂອງເຂົາເຈົ້າຍັງໜຸ່ມນ້ອຍຫລາຍ, ພວກເຂົາຍັງແຂງແຮງທາງຮ່າງກາຍ ແລະ ສຳຄັນໄປກວ່ານັ້ນ, ພວກເຂົາມີຄຸນນະທຳ ແລະ ບໍລິສຸດ. ລູກຊາຍເຫລົ່ານັ້ນໄດ້ຮັບກຳລັງໂດຍສັດທາຂອງແມ່ຂອງພວກເຂົາ.⁹ ພາຍໃຕ້ການຊີ້ນຳຂອງສາດສະດາຜູ້ນຳ, ຊາຍໜຸ່ມເຫລົ່ານີ້ ກໍໄດ້ເຂົ້າຮັບໜ້າທີ່ແທນພໍ່ໆຂອງພວກເຂົາ ໃນການປົກປ້ອງຄອບຄົວ ແລະ ບ້ານເຮືອນຂອງພວກເຂົາ.¹⁰

ເຫດການທີ່ກ່ຽວພັນກັບການຕັດສິນໃຈທີ່ສຳຄັນນີ້ ສະແດງໃຫ້ເຫັນວ່າການຊົດໃຊ້ຂອງພຣະເຢຊູຄຣິດນຳພະລັງສ່ວນຕົວມາສູ່ຊີວິດຂອງລູກໆຂອງພຣະເຈົ້າແນວໃດ. ຂໍໃຫ້ພິຈາລະນາເຖິງຄວາມຮູ້ສຶກຂອງບັນດາພໍ່ເຫລົ່ານັ້ນດູ. ເຂົາເຈົ້າໄດ້ຮູ້ສຶກແນວໃດເມື່ອຮູ້ວ່າການກະທຳທີ່ກະບົດຂອງເຂົາເຈົ້າໃນອາດີດໄດ້ກີດຂວາງ ເຂົາເຈົ້າຈາກການປົກປ້ອງພັນລະຍາ ແລະ ລູກໆຂອງເຂົາເຈົ້າໃນເວລາທີ່ຈຳເປັນ. ໂດຍທີ່ຮູ້ວ່າສະຖານະການທີ່ລູກຊາຍຂອງເຂົາເຈົ້າໄດ້ປະເຊີນໜ້ານັ້ນຮ້າຍກາດພຽງໃດ, ເຂົາເຈົ້າຕ້ອງໄດ້ຮ້ອງໄຫ້ໃນໃຈແທ້ໆ. ຜູ້ເປັນພໍ່, ຕ້ອງປົກປ້ອງຄອບຄົວຂອງຕົນ, ບໍ່ແມ່ນຜູ້ເປັນລູກ!¹¹ ຄວາມເສົ້າສະຫລົດໃຈຂອງເຂົາເຈົ້າຕ້ອງຮຸນແຮງແນ່ນອນ.

ເປັນຫຍັງຜູ້ນຳໃນຖານະປະໂລຫິດທີ່ໄດ້ຮັບການດົນໃຈຈຶ່ງຢ້ານກົວການພິຈາລະນາຂອງເຂົາເຈົ້າທີ່ຈະຈັບເອົາອາວຸດຂອງພວກເຂົາຄືນມາໃຊ້, “ຢ້ານວ່າ … ພວກເຂົາຈະສູນເສຍຈິດວິນຍານຂອງພວກເຂົາໄປ”?¹² ພຣະຜູ້ເປັນເຈົ້າໄດ້ປະກາດວ່າ ຄົນທີ່ໄດ້ກັບໃຈຈາກບາບຂອງເຂົາຈະໄດ້ຮັບການໃຫ້ອະໄພ, ແລະ ພຣະຜູ້ເປັນເຈົ້າກໍບໍ່ຈື່ຈຳ [ບາບນັ້ນ] ອີກ.¹³ ພໍ່ທີ່ຊື່ສັດເຫລົ່ານີ້ໄດ້ກັບໃຈຈາກບາບຂອງເຂົາເຈົ້າດົນນານມາແລ້ວ ແລະ ຖືກຊຳລະໃຫ້ສະອາດແລ້ວ ຜ່ານການຊົດໃຊ້ຂອງພຣະເຢຊູຄຣິດ, ສະນັ້ນ, ເປັນຫຍັງເຂົາເຈົ້າຈຶ່ງຖືກແນະນຳວ່າບໍ່ໃຫ້ປົກປ້ອງຄອບຄົວຂອງເຂົາເຈົ້າ?

ມັນເປັນຄວາມຈິງທີ່ສຳຄັນທີ່ວ່າ ຜ່ານການຊົດໃຊ້ຂອງພຣະເຢຊູຄຣິດ, ເຮົາສາມາດໄດ້ຮັບການຊຳລະໃຫ້ສະອາດ. ເຮົາສາມາດກາຍເປັນຄົນບໍລິສຸດ ແລະ ສະອາດໄດ້. ແຕ່ເຖິງຢ່າງໃດກໍຕາມ, ບາງເທື່ອການເລືອກທີ່ບໍ່ດີຂອງເຮົາຈະປະໃຫ້ເຮົາຕົກຢູ່ກັບຜົນສະທ້ອນອັນຍາວນານ. ຂັ້ນຕອນທີ່ຈຳເປັນຢ່າງໜຶ່ງໃນການກັບໃຈທີ່ສົມບູນຄົບຖ້ວນແມ່ນຈະອົດທົນຕໍ່ຜົນສະທ້ອນທັງສັ້ນ ແລະ ຍາວນານຂອງບາບໃນອາດີດຂອງເຮົາ. ການເລືອກໃນອາດີດຂອງເຂົາເຈົ້າໄດ້ເຮັດໃຫ້ພໍ່ຊາວອຳໂມນນັ້ນຕົກຢູ່ໃນຄວາມປາດຖະໜາທັງຝ່າຍໂລກຫລາຍ ທີ່ຈະເຮັດໃຫ້ເຂົາເຈົ້າອ່ອນແອອີກຄັ້ງ ທີ່ຊາຕານຈະພະຍາຍາມໃຊ້ເພື່ອຜົນປະໂຫຍດຂອງມັນ.

ຊາຕານຈະພະຍາຍາມໃຊ້ຄວາມຊົງຈຳຂອງຄວາມຮູ້ສຶກຜິດແຕ່ກ່ອນມາຍົວະໃຫ້ເຮົາກັບໄປຢູ່ໃນອິດທິພົນຂອງມັນອີກ. ເຮົາຕ້ອງລະວັງຢູ່ສະເໝີເພື່ອຈະຫລີກລ້ຽງການລໍ້ລວງຂອງມັນ. ນີ້ໄດ້ເປັນສະພາບການຂອງບັນດາພໍ່ຊາວອຳໂມນທີ່ຊື່ສັດ. ແມ່ນແຕ່ການດຳລົງຊີວິດທີ່ຊື່ສັດເປັນເວລາຫລາຍປີ, ມັນຍັງສຳຄັນຫລາຍສຳລັບເຂົາເຈົ້າທີ່ຈະປົກປ້ອງຕົວເຂົາເຈົ້າເອງທາງຝ່າຍວິນຍານ ຈາກການດຶງດູດໄປສູ່ຄວາມຊົງຈຳເລື່ອງບາບໃນອາດີດ.

ໃນລະຫວ່າງການສູ້ຮົບຫລາຍເທື່ອ, ໂມໂຣໄນຫົວໜ້ານາຍທະຫານ ໄດ້ຊີ້ນຳການເສີມກຳລັງຂອງເມືອງທີ່ອ່ອນແອທີ່ສຸດ. “ລາວໄດ້ສັ່ງໃຫ້ພວກເຂົາສ້າງກຳແພງທີ່ເຮັດດ້ວຍທ່ອນໄມ້ຂຶ້ນຂ້າງໃນຂອງຄັນຄູ; ແລະ ພວກເຂົາໄດ້ຂຸດດິນທາໃສ່ກຳແພງທີ່ເຮັດດ້ວຍໄມ້ນັ້ນ … ຈົນວ່າພວກເຂົາໄດ້ເຮັດກຳແພງອ້ອມເມືອງອຸດົມສົມບູນໄວ້ໂດຍຮອບ … ມັນສູງຂຶ້ນຫລາຍດ້ວຍກຳແພງອັນແຂງແກ່ນທີ່ເຮັດດ້ວຍໄມ້ທ່ອນ ແລະ ດິນ.”¹⁴ ໂມໂຣໄນໄດ້ເຂົ້າໃຈຄວາມສຳຄັນຂອງການເສີມກຳລັງເຂດແດນທີ່ອ່ອນແອ ເພື່ອມັນຈະເຂັ້ມແຂງຂຶ້ນ.¹⁵

ພໍ່ຊາວອຳໂມນເຫລົ່ານີ້ກໍເໝືອນກັນ. ເຂົາເຈົ້າກໍຕ້ອງການການປົກປ້ອງທາງວິນຍານຫລາຍກວ່ານັ້ນມາປົກປ້ອງຊີວິດທີ່ຊອບທຳຂອງເຂົາເຈົ້າ ຈາກການປະພຶດທີ່ບໍ່ຊອບທຳໃນອາດີດຂອງເຂົາເຈົ້າ. ລູກຊາຍຂອງເຂົາເຈົ້າ, ຜູ້ທີ່ໄດ້ຮັບພອນດ້ວຍປະເພນີອັນຊອບທຳ, ບໍ່ໄດ້ຕົກຢູ່ໃນການລໍ້ລວງອັນດຽວກັນນັ້ນ. ພວກເຂົາສາມາດປົກປ້ອງຄອບຄົວຂອງພວກເຂົາໄດ້ ໂດຍບໍ່ຕ້ອງສ່ຽງຄວາມຜາສຸກທາງວິນຍານຂອງພວກເຂົາ.

ຂ່າວທີ່ປິຕິຍິນດີສຳລັບຄົນທີ່ປາດຖະໜາຈະກຳຈັດຜົນສະທ້ອນຂອງການເລືອກທີ່ບໍ່ດີໃນອາດີດກໍຄືວ່າ ພຣະຜູ້ເປັນເຈົ້າເຫັນຄວາມອ່ອນແອວ່າແຕກຕ່າງຈາກການກະບົດ. ພຣະຜູ້ເປັນເຈົ້າເຕືອນວ່າການກະບົດທີ່ຍັງບໍ່ໄດ້ກັບໃຈນັ້ນຈະນຳການລົງໂທດມາໃຫ້,¹⁶ ເມື່ອພຣະຜູ້ເປັນເຈົ້າກ່າວເຖິງຄວາມອ່ອນແອ, ມັນຈະມາດ້ວຍຄວາມເມດຕາສະເໝີ.¹⁷

ແນ່ນອນວ່າ ຈະມີການໂຍະຍານໃຫ້ ເພາະວ່າພໍ່ຊາວອຳໂມນຖືກສັ່ງສອນເຖິງປະເພນີທີ່ຜິດຂອງພໍ່ແມ່ຂອງເຂົາເຈົ້າ, ແຕ່ລູກໆຂອງພຣະບິດາໃນສະຫວັນທຸກຄົນມາສູ່ໂລກນີ້ພ້ອມດ້ວຍຄວາມສະຫວ່າງຂອງພຣະຄຣິດ. ບໍ່ວ່າເຫດການກະທຳບາບຂອງເຂົາເຈົ້າຈະເປັນອັນໃດກໍຕາມ, ຜົນສະທ້ອນກໍເປັນການພັດທະນາຄວາມອ່ອນແອທາງວິນຍານທີ່ຊາຕາມຈະພະຍາຍາມໃຊ້ເພື່ອທຳຮ້າຍເຂົາເຈົ້າ.

ດ້ວຍຄວາມເມດຕາ ເຂົາເຈົ້າໄດ້ຮັບການສັ່ງສອນເລື່ອງພຣະກິດຕິຄຸນ, ໄດ້ກັບໃຈ, ແລະ ຜ່ານການຊົດໃຊ້ຂອງພຣະເຢຊູຄຣິດ ໄດ້ກາຍມາເຂັ້ມແຂງຫລາຍຂຶ້ນທາງວິນຍານກວ່າການລໍ້ລວງຂອງຊາຕານ. ເຂົາເຈົ້າອາດບໍ່ໄດ້ຮູ້ສຶກເຖິງການລໍ້ລວງທີ່ຈະກັບຄືນໄປຫາອາດີດທີ່ໂຫດຮ້າຍຂອງເຂົາເຈົ້າ, ແຕ່ໂດຍການຕິດຕາມຜູ້ນຳສາດສະດາຂອງເຂົາເຈົ້າ, ເຂົາເຈົ້າບໍ່ໄດ້ຍອມຈຳນົນໃຫ້ຊາຕານມີໂອກາດ “[ກ່ອມ] ຈິດວິນຍານຂອງພວກເຂົາດັ່ງນີ້, ແລະ “[ພາ] ພວກເຂົາລົງໄປຫານະລົກຢ່າງລະມັດລະວັງ.”¹⁸ ການຊົດໃຊ້ຂອງພຣະຜູ້ຊ່ອຍໃຫ້ລອດບໍ່ພຽງແຕ່ຊຳລະເຂົາເຈົ້າໃຫ້ສະອາດເທົ່ານັ້ນ, ແຕ່ເປັນເພາະການເຊື່ອຟັງຂອງເຂົາເຈົ້າຕໍ່ຄຳແນະນຳຂອງຜູ້ນຳຖານະປະໂລຫິດຂອງເຂົາເຈົ້າ, ພຣະຜູ້ຊ່ອຍໃຫ້ລອດຈຶ່ງສາມາດປົກປ້ອງເຂົາເຈົ້າຈາກຄວາມອ່ອນແອຂອງເຂົາເຈົ້າ ແລະ ເຮັດໃຫ້ເຂົາເຈົ້າເຂັ້ມແຂງນຳອີກ. ຄຳໝັ້ນສັນຍາທີ່ຖ່ອມຕົນຕະຫລອດຊີວິດຂອງເຂົາເຈົ້າທີ່ຈະປະຖິ້ມບາບຂອງເຂົາເຈົ້ານັ້ນ ໄດ້ປົກປ້ອງຄອບຄົວຂອງເຂົາເຈົ້າຫລາຍກວ່າສິ່ງອື່ນໃດທີ່ເຂົາເຈົ້າສາມາເຮັດໄດ້ໃນສະໜາມຮົບ. ການຍອມຕົວຂອງເຂົາເຈົ້າບໍ່ໄດ້ເຮັດໃຫ້ເຂົາເຈົ້າບໍ່ໄດ້ຮັບພອນ. ມັນໄດ້ເຮັດໃຫ້ເຂົາເຈົ້າເຂັ້ມແຂງ ແລະ ໄດ້ເປັນພອນໃຫ້ແກ່ເຂົາເຈົ້າ ແລະ ເປັນພອນໃຫ້ແກ່ຄົນລຸ້ນຕໍ່ໆໄປ.

ໃນບັ້ນທ້າຍຂອງເລື່ອງລາວນີ້ສະແດງໃຫ້ເຫັນວ່າຄວາມເມດຕາຂອງພຣະຜູ້ເປັນເຈົ້າໄດ້ເຮັດໃຫ້ “ສິ່ງທີ່ອ່ອນແອກັບມາເຂັ້ມແຂງ.”¹⁹ ພໍ່ຜູ້ຊື່ສັດເຫລົ່ານີ້ໄດ້ສົ່ງລູກຊາຍຂອງເຂົາເຈົ້າອອກໄປພາຍໃຕ້ການດູແລຂອງຮີລາມັນ. ເຖິງແມ່ນວ່າລູກຊາຍເຫລົ່ານັ້ນໄດ້ສູ້ຮົບຢ່າງດຸເດືອດ ບ່ອນທີ່ທຸກຄົນໄດ້ຮັບບາດເຈັບບາງຢ່າງ, ແຕ່ບໍ່ມີຄົນໃດເສຍຊີວິດໄປ.²⁰ ຊາຍໜຸ່ມເຫລົ່ານັ້ນໄດ້ເປັນແຫລ່ງທີ່ສຳຄັນຂອງພະລັງໃຫ້ແກ່ກອງທັບຂອງຊາວນີໄຟທີ່ເມື່ອຍລ້າ. ພວກເຂົາຊື່ສັດ ແລະ ເຂັ້ມແຂງຂຶ້ນຫລາຍກວ່າເກົ່າເມື່ອພວກເຂົາໄດ້ກັບບ້ານ. ຄອບຄົວຂອງພວກເຂົາໄດ້ຮັບພອນ, ໄດ້ຮັບການປົກປ້ອງ, ແລະ ໄດ້ເຂັ້ມແຂງຂຶ້ນ.²¹ ໃນວັນເວລາຂອງເຮົາ, ນັກສຶກສາພຣະຄຳພີມໍມອນທີ່ນັບບໍ່ຖ້ວນໄດ້ຮັບການເຊີດຊູຈາກຕົວຢ່າງຂອງລູກຊາຍທີ່ບໍລິສຸດ ແລະ ຊອບທຳເຫລົ່ານີ້.

ໃນຊີວິດຂອງເຮົາ ເຮົາແຕ່ລະຄົນເຄີຍໄດ້ເລືອກເຮັດສິ່ງທີ່ບໍ່ດີ. ເຮົາທຸກຄົນຕ້ອງການອຳນາດແຫ່ງການໄຖ່ຂອງການຊົດໃຊ້ຂອງພຣະເຢຊູຄຣິດຫລາຍທີ່ສຸດ. ເຮົາແຕ່ລະຄົນຕ້ອງກັບໃຈຈາກການກະບົດໃດໆກໍຕາມ. ພຣະຜູ້ເປັນເຈົ້າໄດ້ກ່າວວ່າ ພຣະອົງຈະເບິ່ງບາບດ້ວຍລະດັບການຍິນຍອມ ແມ່ນແຕ່ນ້ອຍທີ່ສຸດບໍ່ໄດ້.²² ພຣະອົງເຮັດບໍ່ໄດ້ເພາະວ່າພຣະອົງຮູ້ວ່າແມ່ນຫຍັງທີ່ຈຳເປັນເພື່ອວ່າເຮົາຈະກາຍເປັນເໝືອນດັ່ງພຣະອົງໄດ້.

ເຮົາຫລາຍຄົນໄດ້ປ່ອຍໃຫ້ຄວາມອ່ອນແອພັດທະນາໄປເປັນອຸປະນິໄສ. ຜ່ານການຊົດໃຊ້ຂອງພຣະເຢຊູຄຣິດ, ເຮົາ, ເໝືອນດັ່ງຊາວອຳໂມນ, ກໍສາມາດສ້າງການປ້ອງກັນທາງວິນຍານໄດ້ ລະຫວ່າງການປົກປ້ອງທາງຝ່າຍວິນຍານ ແລະ ຄວາມຜິດພາດໃດໆໃນອາດີດ ທີ່ຊາຕານຈະພະຍາຍາມເອົາມາໃຊ້. ການປົກປ້ອງທາງຝ່າຍວິນຍານທີ່ສ້າງຂຶ້ນອ້ອມຮອບພໍ່ຊາວອຳໂມນໄດ້ເປັນພອນ ແລະ ໄດ້ເຮັດໃຫ້ເຂົາເຈົ້າເອງເຂັ້ມແຂງ, ໄດ້ເປັນພອນໃຫ້ແກ່ຄອບຄົວ, ໃຫ້ປະເທດຊາດຂອງເຂົາເຈົ້າ, ແລະ ຄົນລຸ້ນໃນອະນາຄົດ. ສິ່ງດຽວກັນສາມາດເກີດຂຶ້ນໄດ້ສຳລັບເຮົາຄືກັນ.

ສະນັ້ນ ເຮົາຈະສ້າງການປົກປ້ອງນິລັນດອນເຫລົ່ານີ້ໄດ້ແນວໃດ? ຂັ້ນຕອນທຳອິດຕ້ອງເປັນການກັບໃຈຢ່າງຈິງໃຈ, ຮອບຄອບ, ແລະ ສົມບູນຄົບຖ້ວນ. ຜ່ານການຊົດໃຊ້ຂອງພຣະເຢຊູຄຣິດ, ເຮົາແຕ່ລະຄົນສາມາດຖືກຊຳລະໃຫ້ສະອາດ ແລະ ພາລະໜັກຂອງການກະບົດຂອງເຮົາຈະຖືກຍົກອອກໄປ. ຂໍຈົ່ງຈຳໄວ້ວ່າ, ການກັບໃຈນັ້ນບໍ່ໄດ້ເປັນການລົງໂທດ. ມັນເປັນເສັ້ນທາງແຫ່ງຄວາມຫວັງທີ່ນຳໄປສູ່ອະນາຄົດທີ່ຮຸ່ງໂລດ.

ພຣະບິດາໃນສະຫວັນໄດ້ຈັດເຄື່ອງມືທີ່ຈະຊ່ອຍສ້າງສິ່ງປ້ອງກັນລະຫວ່າງຄວາມອ່ອນແອຂອງເຮົາ ແລະ ຄວາມຊື່ສັດຂອງເຮົາ. ຂໍໃຫ້ພິຈາລະນາຄຳແນະນຳທີ່ຕໍ່ໄປນີ້:

ຈົ່ງເຮັດພັນທະສັນຍາ ແລະ ຮັບເອົາພິທີການຕ່າງໆສຳລັບຕົວທ່ານເອງ. ແລ້ວໃຫ້ຕັ້ງໃຈເຮັດວຽກຢ່າງແນ່ວແນ່ ແລະ ພາກພຽນເພື່ອຈະຈັດຫາພິທີການຕ່າງໆໃນພຣະວິຫານໃຫ້ບັນພະບຸລຸດຂອງທ່ານເອງ.
ແບ່ງປັນພຣະກິດຕິຄຸນກັບຜູ້ທີ່ບໍ່ເປັນສະມາຊິກ ຫລື ສະມາຊິກໃນຄອບຄົວ ຫລື ໝູ່ເພື່ອນຜູ້ທີ່ບໍ່ເຂັ້ມແຂງ. ການແບ່ງປັນຄວາມຈິງເຫລົ່ານີ້ສາມາດນຳຄວາມຕື່ນເຕັ້ນໃໝ່ມາສູ່ຊີວິດຂອງທ່ານໄດ້.
ຮັບໃຊ້ຢ່າງຊື່ສັດໃນການເອີ້ນຂອງທ່ານໃນສາດສະໜາຈັກ, ໂດຍສະເພາະໃນໜ້າທີ່ມອບໝາຍການສອນປະຈຳບ້ານ ແລະ ການຢ້ຽມສອນ. ຢ່າໃຫ້ມັນເປັນການສອນປະຈຳບ້ານ ຫລື ການຢ້ຽມສອນພຽງ 15 ນາທີແຕ່ລະເດືອນ. ແຕ່ຂໍໃຫ້ເອື້ອມອອກໄປຫາສະມາຊິກໃນຄອບຄົວແຕ່ລະຄົນ. ໃຫ້ຮູ້ຈັກເຂົາເຈົ້າຢ່າງເປັນສ່ວນຕົວ. ໃຫ້ເປັນເພື່ອນ. ຜ່ານການກະທຳທີ່ມີເມດຕາ, ຈົ່ງສະແດງໃຫ້ເຂົາເຈົ້າເຫັນວ່າທ່ານເປັນຫ່ວງເປັນໄຍເຂົາເຈົ້າແຕ່ລະຄົນຫລາຍຂະໜາດໃດ.
ສິ່ງທີ່ສຳຄັນສຸດຄື, ໃຫ້ຮັບໃຊ້ສະມາຊິກໃນຄອບຄົວຂອງທ່ານ. ເຮັດໃຫ້ຄວາມພັດທະນາທາງວິນຍານຂອງພັນລະຍາສາມີ ແລະ ລູກໆຂອງທ່ານເປັນຄວາມສຳຄັນລະດັບທີ່ສູງສຸດ. ໃຫ້ເອົາໃຈໃສ່ສິ່ງທີ່ທ່ານສາມາດເຮັດໄດ້ເພື່ອຊ່ອຍແຕ່ລະຄົນ. ໃຫ້ເວລາ ແລະ ຄວາມສົນໃຈຂອງທ່ານຢ່າງເຕັມໃຈ.

ໃນຄຳແນະນຳແຕ່ລະຂໍ້ນີ້, ມີຫົວຂໍ້ດຽວກັນດັ່ງເຊັ່ນ: ເຮັດໃຫ້ຊີວິດຂອງທ່ານເຕັມໄປດ້ວຍການຮັບໃຊ້ຄົນອື່ນ. ເມື່ອທ່ານເສຍຊີວິດຂອງທ່ານໃນການຮັບໃຊ້ລູກໆຂອງພຣະບິດາໃນສະຫວັນ,²³ ການລໍ້ລວງຂອງຊາຕານຈະສູນເສຍອຳນາດນັ້ນໃນຊີວິດຂອງທ່ານ.

ເພາະວ່າພຣະບິດາໃນສະຫວັນຮັກທ່ານຢ່າງເລິກຊຶ້ງ, ການຊົດໃຊ້ຂອງພຣະເຢຊູຄຣິດຈະເຮັດໃຫ້ຄວາມເຂັ້ມແຂງນັ້ນເປັນໄປໄດ້. ມັນຊ່າງເປັນສິ່ງທີ່ປະເສີດຫລາຍນໍ? ທ່ານຫລາຍຄົນເຄີຍໄດ້ຮູ້ສຶກເຖິງຄວາມໜັກໜ່ວງຂອງການເລືອກທີ່ບໍ່ດີ, ແລະ ທ່ານແຕ່ລະຄົນສາມາດຮູ້ສຶກເຖິງອຳນາດທີ່ດົນໃຈຂອງການໃຫ້ອະໄພຂອງພຣະຜູ້ເປັນເຈົ້າ, ຄວາມເມດຕາ, ແລະ ຄວາມເຂັ້ມແຂງ. ຂ້າພະເຈົ້າກໍໄດ້ຮູ້ສຶກສິ່ງນີ້, ແລະ ຂ້າພະເຈົ້າເປັນພະຍານວ່າ ມັນກໍມີໄວ້ໃຫ້ທ່ານແຕ່ລະຄົນ, ໃນພຣະນາມຂອງພຣະເຢຊູຄຣິດ, ອາແມນ.