ຈົນກວ່າເຮົາຈະພົບກັນອີກ
ໂດຍ ປະທານ ທອມມັສ ແອັສ ມອນສັນ
ຂໍໃຫ້ເຮົາຈົ່ງປະພຶດຕົນໃນທາງທີ່ດີຕໍ່ກັນແລະກັນ, ແລະ ຂໍໃຫ້ເຮົາຖືກພົບເຫັນວ່າຫຍຸ້ງຢູ່ກັບການເຮັດວຽກງານຂອງພຣະຜູ້ເປັນເຈົ້າ.
ອ້າຍເອື້ອຍນ້ອງທັງຫລາຍ, ຫົວໃຈຂອງຂ້າພະເຈົ້າເຕັມປ່ຽມ ເມື່ອມາເຖິງຕອນທ້າຍຂອງກອງປະຊຸມໃຫຍ່ສາມັນທີ່ດີເລີດຂອງສາດສະໜາຈັກ. ເຮົາໄດ້ຮັບການບຳລຸງລ້ຽງທາງວິນຍານ ໃນຂະນະທີ່ເຮົາໄດ້ຮັບຟັງຄຳແນະນຳ ແລະ ປະຈັກພະຍານຂອງຜູ້ທີ່ມີສ່ວນຮ່ວມໃນແຕ່ລະພາກ.
ເຮົາໄດ້ຮັບພອນຫລາຍທີ່ໄດ້ມາຮ່ວມກັນໃນກອງສູນກາງປະຊຸມໃຫຍ່ທີ່ສວຍງາມນີ້ ໃນຄວາມສະຫງົບ ແລະ ຄວາມປອດໄພ. ການຖ່າຍທອດຂອງເຮົາແມ່ນກວ້າງໄກຫລາຍທະວີບ ຫາຜູ້ຄົນໃນທຸກແຫ່ງຫົນ. ເຖິງແມ່ນພວກເຮົາຍັງຫ່າງໄກຈາກຫລາຍຄົນພວກທ່ານ, ແຕ່ພວກເຮົາກໍຮູ້ສຶກເຖິງວິນຍານຂອງທ່ານ.
ຕໍ່ບັນດາອ້າຍນ້ອງທີ່ໄດ້ຖືກປົດຈາກຕຳແໜ່ງຢູ່ໃນກອງປະຊຸມນີ້, ຂ້າພະເຈົ້າຂໍສະແດງຄວາມຂອບໃຈ ຢ່າງເລິກຊຶ້ງແທນທຸກຄົນໃນສາດສະໜາຈັກ ສຳລັບການຮັບໃຊ້ທີ່ອຸທິດຕົນຂອງທ່ານເປັນເວລາຫລາຍປີ. ຈຳນວນຜູ້ຄົນທີ່ໄດ້ຮັບພອນຈາກທ່ານແມ່ນເກີນກວ່າຈະນັບໄດ້ ເພາະການຮັບໃຊ້ຂອງທ່ານໃນວຽກງານຂອງພຣະຜູ້ເປັນເຈົ້າ.
ຂ້າພະເຈົ້າຂໍສະແດງຄວາມກະຕັນຍູຕໍ່ກຸ່ມນັກຮ້ອງແທໂບແນໂກ ແລະ ກຸ່ມນັກຮ້ອງອື່ນໆ ທີ່ມີສ່ວນຮ່ວມໃນກອງປະຊຸມນີ້. ເພງກໍມ່ວນອອນຊອນ ແລະ ເຮົາໄດ້ຮູ້ສຶກເຖິງພຣະວິນຍານໃນແຕ່ລະພາກ.
ຂ້າພະເຈົ້າຂໍຂອບໃຈສຳລັບຄຳອະທິຖານຂອງທ່ານເພື່ອຂ້າພະເຈົ້າ ແລະ ເພື່ອເຈົ້າໜ້າທີ່ຊັ້ນຜູ້ໃຫຍ່ຂອງສາດສະໜາຈັກ. ພວກເຮົາໄດ້ຮັບຄວາມເຂັ້ມແຂງຈາກການນັ້ນ.
ຂໍໃຫ້ສະຫວັນຈົ່ງຖອກເທພຣະພອນລົງມາເທິງທ່ານ. ຂໍໃຫ້ບ້ານເຮືອນຂອງທ່ານເຕັມໄປດ້ວຍຄວາມຮັກ ແລະ ຄວາມສຸພາບ ແລະ ເຕັມໄປດ້ວຍພຣະວິນຍານຂອງພຣະຜູ້ເປັນເຈົ້າ. ຂໍໃຫ້ທ່ານຈົ່ງບຳລຸງລ້ຽງປະຈັກພະຍານຂອງທ່ານກ່ຽວກັບພຣະກິດຕິຄຸນເປັນປະຈຳ, ເພື່ອວ່າມັນຈະປົກປ້ອງທ່ານຈາກຄວາມທຸກທໍລະມານຂອງຜູ້ປໍລະປັກ.
ບັດນີ້ກອງປະຊຸມຈະສິ້ນສຸດລົງແລ້ວ. ເມື່ອເຮົາກັບຄືນໄປບ້ານ, ຂໍໃຫ້ເຮົາຈົ່ງກັບໄປດ້ວຍຄວາມປອດໄພ. ຂໍໃຫ້ພຣະວິນຍານທີ່ເຮົາຮູ້ສຶກໃນຕອນນີ້ ສະຖິດຢູ່ກັບເຮົາ ເມື່ອເຮົາດຳເນີນຊີວິດໄປແຕ່ລະວັນ. ຂໍໃຫ້ເຮົາຈົ່ງປະພຶດຕົນໃນທາງທີ່ດີຕໍ່ກັນແລະກັນ, ແລະ ຂໍໃຫ້ເຮົາຖືກພົບເຫັນວ່າຫຍຸ້ງຢູ່ກັບການເຮັດວຽກງານຂອງພຣະຜູ້ເປັນເຈົ້າ.
ອ້າຍເອື້ອຍນ້ອງທັງຫລາຍ, ຂໍໃຫ້ພຣະເຈົ້າຈົ່ງອວຍພອນທ່ານ. ຂໍໃຫ້ຄຳສັນຍາແຫ່ງສັນຕິສຸກຂອງພຣະອົງຈົ່ງມາສູ່ທ່ານໃນຕອນນີ້ ແລະ ຕະຫລອດໄປດ້ວຍເທີ້ນ. ຂ້າພະເຈົ້າຂໍລາທ່ານໄປ ຈົນກວ່າເຮົາຈະພົບກັນອີກ ໃນຫົກເດືອນຂ້າງໜ້າ. ໃນພຣະນາມຂອງພຣະຜູ້ຊ່ອຍໃຫ້ລອດ, ແມ່ນແຕ່ພຣະເຢຊູຄຣິດ ອົງເປັນພຣະຜູ້ເປັນເຈົ້າ, ອາແມນ.