Tajyrakuéra konveniogua
Presidente Henry B. Eyring rupive
Primer Consejero Primera Presidencia-gua
Pe tape jajagarrava’erã ñande guatápe jahajeývo ñande Ru Yvagaguápe…oñemarka umi konvénio marangatúre jajapóva Tupã ndive.
Ko pyharépe ñañemo’arandúkuri pu’aka ijespirituálvape; ajerure umi ñe’ẽ he’iva’ekue ko’ã hermana líderva toike pene korasõme oikehaguéicha che korasõme.
Kóva ha’e peteĩ aty oikótava hese momandu’a; oñe’invitákuri opavave tupaogua kuñáme, ocho año rire tenonde gotyo, oñembyaty hağua ñanendive ko pyharépe. Heta ñandekuéra ñañembo’ékuri pe Espíritu Santo oĩ hağua ñanendive ha oñeme’ẽma ñandéve upe jehovasa ñahendúvo ko’ã hermana ñe’ẽ ha ñahendúvo pe purahéi porãite. Ajerure pe Espíritu toĩnte ohóvo ñanendive ha’e’aja peẽme ñe’ẽ kyre’ỹmi ha testimónio ambojoaju hağua umi oje’emava’ekue ndive, ha atestifika hağuaite umi oje’eva’ekue ko’ápe ha’eha pe Ñandejára oipotava’ekue ñahendu.
Añe’ẽta ko pyharépe pe tape—oñemyesakã porãitéva ko árape—jajagarrava’erã ñande guatápe jahajeývo Ñande Ru Yvagagua rendápe. Upe tape oñemarka umi konvénio marangatúre jajapóva Tupã ndive. Añe’ẽta penendive pe vy’a oguerúva jajapo ha ñakumplíramo umi konvénio, ha ñaipytyvõramo ambuekuérape okumpli hağua.
Oĩ pende apytépe oñemongarairamóva ha nda’aréiva oñeme’ẽhague chupe pe don del Espíritu Santo poñemoĩ rupive; upe mandu’a oĩgueteri pende pype. Ambuéva katu aréma oñemongaraihague, upévare pe mandu’a peñanduva’ekue pejapóramoguare umi konvénio michĩve; ha katu oĩ umi temiandu akóinte oujeýva pehendu jave pe Santa Cena ñembo’ekuéra.
Ndaipóri mokõi tapicha ñande apytépe oguerekóva peteĩchagua mandu’a upe ára jajaporamoguare kovénio bautismal ha oñeme’ẽrõguare ñandéve pe don del Espíritu Santo; ha katu opavave ñañandu Tupã guerohory ha ñañandu ñame’ẽseha perdón ha jahupytyseha perdón, ha ñañandu avei jajaposeveha pe oĩporãva.
Umi temiandu oğuahe penekorasõme mbaretéreheve, odependéva hetave, mba’éichapa umi tapicha penderayhúva penembosako’iva’ekue. Aha’arõ umi pende apytépe oñemongarairamóva oreko jehovasa oguapývo hína isýndive; ha upéicharamo, ikatu peme’ẽ chupe aguyje pukavymíme ko’áğaite. Chemandu’a temiandu vy’a ha aguyje aguerekova’ekue aguapyrõguare che sy kupépe aútope rohojeývo ore rógape añemongarai rire Filadelfia, Pensilvania-pe.
Che sy chembosako’iporãva’ekue ajapo hağua upe konvénio ha opa umi uperiregua; ha’e ijeroviava’ekue kóva ko Ñandejára rembipotáre:
“Ha avei, oĩramo sy ha túva orekóva mitã Sion-pe térã oimeraẽva ijestaca oñemopu’ãva’ekuépe, ha nombo’éiva chupekuéra pe doctrina de arrepentimiento, pe Cristore jerovia, Tupã oikovéva Ra’y, pe bautismo ha pe don del Espíritu Santo poñemoĩ rupive, ombotývo ocho año, pe pekado ho’áta isy ha itúvakuéra akã ári.
“Kóva ha’étagui peteĩ ley umi oikóva Sión-pe, térã oimeraẽ ijestaca oñemopu’ãva’ekuépe.
“Ha imembykuéra oñemongaraíta oñerredimi hağua ipekadokuéragui ombotývove ocho año, ha oñeme’ẽta chupekuéra [pe Espíritu Santo] poñemoĩ rupive”1.
Che sy ojapókuri chupe otokáva; ombosako’iva’ekue imembykuérape ñe’ẽ reheve ojoguáva Alma he’iva’ekuépe, ojehaiháicha Mormón Kuatiañe’ẽme:
“Ha ojehu he’i chupekuéra: Péina ápe, Mormón ykuéra (upéicha oñehenóigui); ha peikeséramo Tupã redil-pe ha peñehenói itavayguakuéra, ha peguerahase ojupe pene mba’e pohyikuéra ivevúi hağua;
“Heẽ, ha penerasẽséramo umi hasẽva ndive; heẽ, ha pemoangapyhyse umi oikotevẽvape angapyhy, ha ha’eséramo Tupã testígo opa ára, ha opa mba’épe, ha opa tenda peimehápe, jepe ñemano meve, peñerredimi hağua Tupãre, ha pejeipapa hağua umi jeikovejey peteĩha rehegua ndive, peguereko hağua tekove opave’ỹva;
“ko’áğa ha’e peẽme, péva ha’éramo pene korasõ oipotáva, mba’ére piko napeñemongaraimo’ãi Ñandejára rérape, testimónioramo henondépe pejapohague peteĩ konvénio hendive, peservitaha chupe ha peneñe’ẽrendutaha hembiapoukapykuérare, ha’e oñohẽve hağua ijespíritu pende ári?
“Ha ko’áğa,umi tavayguakuéra ohendúvo ko’ã ñe’ẽ, ojepopete hikuái vy’águi, ha he’i: Péva ha’e ore korasõ oipotáva.”2.
Ikatu oime ndapejepopetéi pehendurõguare peteĩha jave pe ñehenói pejapo hağua pe konvénio del bautismo, ha katu peñandúnera’e añetépe pe Salvador mborayhu ha pembo’eseveha ambue tapichápe hérape. Ikatu ha’e “añetépe”, umi temiandu oĩ atãgui opa Túva Yvagagua rajykuéra korasõme; kóva ha’e pe divino legado Ha’e ome’ẽva’ekue peẽme.
Ha’etevoi penembo’eva’ekue peju mboyve yvy’ape ári; penepytyvõ peikuaa ha pentende hağua peguerekotaha teko’asy, py’ara’ã ha oportunidad ojeporavo porãva peẽme ğuarãnte. Peikuaava’ekue ñande Ru oguerekoha peteĩ plan vy’a rehegua penepytyvõtava pehasa hağua umi py’ara’ã kyhyje’ỹme, ha peẽ peipytyvõtaha ambue tapichápe ohasa hağua ipy’ara’ãnguéra. Upe plan oñemarka umi konvénio ojejapóvare Tupã ndive.
Jaguereko sãso jaiporavo hağua ñakumplítapa umi konvenio térã nahániri. Sa’imi Itajyrakuéra apytépe oguereko oportunidad ko tekovépe oikuaávo jepe umi konvéniogui. Peẽ ha’e umi sa’imi ojeiporavóva; peẽ, hermana-kuéra ojehayhuetéva, maymáva peẽ, ha’e peteĩ tajýra upe konvéniope.
Pe Túva Yvagagua penembo’eva’ekue, penereñói mboyve, umi tembiasa perekótava pehejarõguare chupe ha peju ko yvy’ári. Peñehekombo’eakue pe tape pehojey hağua hendápe hasytaha. Ha’e oikuaava’ekue hasyetereitaha pejapo pende guata pytyvõ’ỹre.
Peẽ peguereko jehovasa ndaha’éi pejuhuntehague mba’éicha ikatu pejapo umi konvénio ko tekovépe, ha katu avei peguerekoha pende jerére ambue tapicha penepytyvõtava; umíva peẽichagua, ha’éva avei ñande Ru Yvagagua konvénio rajykuéra.
Ko pyharépe, opavave peñandúkuri jehovasa peimeha Tupã rajykuéra ndive, oĩva avei konvénio guýpe penepytyvõ ha penesambyhy hağua, oprometehaguéicha hikuái ojapotaha. Ahechava’ekue peẽ pehechahaguéicha avei, umi konveniogua hermana okumplíramo péva pe kompromiso ome’ẽ hağua angapyhy ha pytyvõ, ha ojapo hikuái upéva pukavýpe.
Chemandu’a pe hermana Ruby Haight pukavy’asýre. Ha’eva’ekue Elder David B. Haight rembireko, miembro Quórum Doce-pegua upéramo. Ipyahúpe, ha’e oserviva’ekue presidenteramo Estaca Palo Alto, California-pe. Oñembo’e ha ojepy’apými umi mitakuña clase de Damita ibarriogua rehe.
Presidente Haigh oñandu inspirasiõ ojerure hağua obispope tohenói Ruby Haight-pe ha’e hağua umi mitãkunã mbo’ehára. Ha’e oikuaákuri ha’etaha peteĩ Tupã testígo omopu’ãtava, ome’ẽtava angapyhy ha ohayhútava mitãkuñakuéra upe claseguápe.
Pe hermana Haight ijedave 30 añokuéraipi umi mitãkuña ombo’évagui; upevére, cuarenta año ombo’e rire chupekuéra, ohechavovénte che rembirekópe, ha’eva’ekue peteĩva umi mitãkuña upe clasegua, oipyso chupe ipo, opukavými ha he’ími Kathy-pe: “!Che Damita!”. Che ahechavékuri peteĩ pukavymígui; añandúkuri pe imborayhu guasu peteĩ hermana rehe ohayhúva gueteri ha’eramoguáicha imemby tee. Ipukavymi ha imaitei hakuvy’asýva ou ohechágui peteĩ hermana ha Tupã rajy oĩgueteriha pe tape konvenioguápe ohojey hağua hógape.
Péicha avei, pe Túva Yvagagua opukavy peẽme ohechávo peipytyvõha peteĩva Itajýrape oho tenonde hağua pe konvenio rapére vida eterna gotyo; ha ovy’a opa ára peẽ peñeha’ã jave peiporavo pe oĩporãva. Ha’e ohecha, ndaha’éi pe mávantepa peẽ ha’e, ha katu avei pe mávapa ikatu peẽ ha’e.
Oiméne peguerekora’e sy térã túva ko yvy’ape ári opensáva peẽ ikatuha peneporãve umi peẽ pepensávagui ikatuha oiko pendehegui; che sy upeichava’ekue.
Pe che ndaikuaáiva’ekue che pyahurõguare ha’e pe che Ru Yvagagua, pende Ru Yvagagua, ohechaveha pe ta’ýra ha tajyrakuéra potencial, pe ñande, terã umi ñande sy yvy’arigua, jahechávagui ñandejehe; ha akóinte peñemotenondéramo pe tape pene potencial gotyo, Ha’e ovy’a; ha peẽ peñandu Ha’e omoporãha.
Ha’e ohecha pe mba’e marangatu opa itajýrakuéra ikatúva ojapo, toĩ oĩháme. Upéva omoĩ tuicha responsabilida pende ati’y ári; Ha’e oha’arõ pehecha opa tapicha peikuaavápe peteĩ Tupã ra’y ha rajýicha. Upévare ojerure ñandéve jahayhu hağua ñanderapichápe ñandejupéicha ha ñaperdona hağua chupe. Temiandu peẽ perekóva py’aporã ha perdón rehegua ambuekuéra rehe ha’e peteĩ legado divino oúva Chugui, peẽ ha’égui itajyrakuéra. Maymáva tapicha peikuaáva ha’e peteĩ ta’ýra ha tajýra Ha’e ohayhúva, ojejapova’ekue espíritu-pe.
Jajepy’amonguetávo upe tuicha hermanda rehe, umi ñapensáva ñande separaha, ndaiporivéi. Upéicha jahecha, umi hermana ijedavéva ha umi ipyahúva omombe’u ojupe temiandu orekóva oha’arõgui oñentende ha oñemboaje chupe. Tupã rajýicha, pejojoguave upe pejoavývagui.
Upéva upe techápe, umi mujeres jóvenes ohechava’erã pe Sociedad de Socorro-pe jeike ha’eha peteĩ oportunida chupekuéra ombotuichave hağua pe circulo umi hermana ijereregua oikuaátava, ohecharamótava ha ohayhútavape.
Upe katupyry jarekóva jahecha hağua mávapa ñande ikatu ha’e okakuaave ohóvo umi familia ha pe Primaria-pe. Ojehu umi noche de hogar ha umi Primaria Programa-pe. Umi mitã michĩvéva orrecibi inspirasiõ he’i hağua mba’e tuicha ha hechapyrãva, ojapohaguéicha hikuái pe Salvador ojorarõguare ikũnguéra ha ombo’e chupekuéra Ijeikovejey rire3.
Jepeve Satana orãirõ hína hermanakuérape eda pyahuvépe, Ñandejára ohupive hína umi hermanápe mba’e espíritu reheguávape. Upéicha jahecha, umi mujeres jóvenes ombo’e hína isykuérape oiporu hağua FamilySearch ojuhu hağua umi ijypykue réra ha osalva hağua chupekuéra. Oĩ mitãkuña che aikuaáva ohóva pyharevekue voi ojapo hağua ñemongarai omanova’ekue rehe templo-pe oñemokyre’ỹva pe Elías espíritu rupivénte.
Opa yvy’arigua misión-pe oñehenói hína umi hemana-pe oservi hağua líder-ramo. Ñandejára omoĩ tekotevẽ ipytyvõkuéragui opokópe hetave umi hermana korasõre ome’ẽ hağua servicio. Oĩ misión-gua presidente ohechava’ekue umi hermana misionera oguerekoveha pu’aka ombo’e hağua ha, péicha avei, ha’eha líder omopu’ãva hapichápe.
Taha’e misionera peservíva tiempo completo térã nahániriva, ikatu pesegui kunãnguéra imba’eguasúva techaukaha, ikatu hağua peguereko upéichagua katupyry pemombarete hağua pene matrimonio ha pendekatupyryve pemongakuaa hağua mitã ijoheipyréva.
Pejepy’amongueta Evare, opa oikovéva sy. Pe elder Russell M. Nelson he’iva’ekue Evare: “Ñande, opa yvypóraicha, jajehovasava’ekue tapiate ĝuarã pe Eva py’aguasu tuicha ha arandukuaa rupi. Ha’eraẽve ho’úgui pe yva, ha’e ojapova’ekue pe ojejapova’erã; ha Adán iñakãguapýkuri, ha ojapo avei upéicha”4.
Opa Eva membykuña oguereko pu’aka ome’ẽ hağua ifamíliape jehovasa Eva ome’ẽva’ekueichagua imembýpe. Ha’e iñimportanteitereiva’ekue oñemoĩ hağua familiakuéra ha upévare jaguereko ñemombe’u chupe ojejaporõguare: “Jajapo peteĩ pytyvõ porã kuimba’épe, naiporãigui pe kuimba’e oĩ ha’eño; upévare, jajapóta chupe ğuarã peteĩ pytyvõ porã”5.
Ndajaikuaái opa pytyvõ Eva ha’eva’ekue Adán ha hogayguakuérape ğuarã; ha katu jaikuaa peteĩ tuicha don ha’e ome’ẽva’ekue chupekuéra ha opavave peẽ ikúva avei peme’ẽ: oipytyvõva’ekue hogayguakuérape ohecha hağua hóga rape pe tape tenonderã ha’etevaicha vove hasyeterei. “Ha Eva, hembireko, ohendu opa ko’ã mba’e ha ovy’a, he’ívo: Ndaha’éi rire ñanerembiapovai rupi, araka’eve ndajarekoiva’erãmo’ã posterida, ni ndajaikuaáiva’eramo’ã ivaíva ni iporãva, ni pe ñanerredensiõ rehegua vy’a, ni pe vida eterna Tupã ome’ẽva opa iñe’ẽrendúvape”6.
Peẽ peguereko ijehemplo pesegui hağua.
Pe revelasiõ rupive, Eva oikuaava’ekue hóga rape ohojey hağua Tupãme. Oikuaava’ekue Jesucristo expiación rupive ikatuha jareko vida eterna ñanefamilia ndive. Oikuaaporãva’ekue, peẽ ikatuháicha peikuaaporã avei, iñe’ẽrendúramo ikonveniokuérare Tupã Yvagagua ndive, pe Redentor ha pe Espíritu Santo oipytyvõtaha chupe ha ifamíliape ogueropu’aka hağua oimeraẽ py’apy térã vy’a’ỹ ohasátava hikuái; ha’e oikuaákuri ikatuha ojerovia Hesekuéra.
“Ejerovia Jehováre opa nekorasõite guive, ha ani ejerovia ne’akãguapýre”.
“Opa nde rapére ehechakuaa chupe, ha ha’e oipysóta umi nde rape”7.
Aikuaa Eva ohasahague py’apy vy’a’ỹ, ha katu aikuaa avei ovy’ahague oikuaáre ha’e ha ifamilia ikatuha ohojey oikove Tupã ndive. Aikuaa heta peẽ peiméva ko’ápe ko árape pehasaha py’apy ha vy’a’ỹ. Aheja peẽme che jehovasa ikatu hağua, Evaicha, peñandu pe vy’a ha’e oñanduva’ekue iguatápe ohojeývo hógape.
Aguereko testimónio añete Tupã pe Túva oñangarekoha penderehe mborayhúpe; ohayhu mayma peẽkuérape; peẽ ha’e Itajyrakuéra konveniogua. Ha’e penderayhúgui, ome’ẽta peẽme pytyvõ peikotevẽva pendejupe ğuarã ha umi ambuévape peguata hağua yvate gotyo pe tapére pehojey hağua Hendápe.
Aikuaa pe Salvador ohepyme’ẽhague opa ñande pecado-kuérare ha pe Espíritu Santo otestifikaha pe añeteguáre. Peẽ peñandúkuri upe py’aguapy kóva ko atýpe. Aguereko peteĩ testimónio opaite llave ha’éva umi konvénio sagrado rehegua ojerrestaura hague; ñande profeta oikovéva, presidente Thomas S. Monson, oguereko ha oiporu ko’ãva. Aheja ko’ã ñe’ẽ angapyhy ha esperanza rehegua peẽme, Itajyrakuéra konveniogua ohayhuetéva; Jesucristo réra marangatúpe. Amén.