Pe generasiõ jeiporavopyre

Randall L. Ridd rupive

Segundo Consejero Hombres Jóvenes Presidencia General-gua

Pejeiporavopyre pejapo hağua Hembiapo ko’ã árape Ha’e ojeroviágui peiporavo porãtaha.

Mitãrusukuéra, pehendunera’e peẽ ha’eha pe “linaje jeiporavopyréva”, ha péva he’ise Tupã pendeiporavo ha penembosako’i peju hağua ko yvy’ape ári ko árape peteĩ tembiapo guasurã; che aikuaa upeichaha. Ko ka’arúpe añe’ẽse peẽme pe “generasiõ jeiporavopyréicha”, ndaipórigui historia apytépe ojehosavahague yvypórape hetaite mba’e oiporavokuaáva reheve. Hetave mba’e jaiporavokuaáva he’ise hetave oportunida, ha hetave oportunida he’ise hetave katupyry jajapo hağua pe iporãva ha, ñembyasyrã, pe ivaíva avei. Aguerovia Tupã penembou hague ápe ko árape Ha’e ojeroviágui pehecha porãtaha hetaite mba’e ikatúva ojeiporavo apytégui.

Pe 1974-pe, Presidente Spencer W. Kimball he’iva’ekue, “Che aguerovia Ñandejára omoĩseha ñande pópe umi investigasiõ ñande, tekove imba’eguasu’ỹva, apéna ikatúva jahecha” (“When the World Will Be Converted”, Ensign, octubre de 1974, pág. 10).

Ha péicha ojapókuri! Peẽ pekakuaa hína peteĩ tuichavéva tembiporu mba’eporãra reheve yvyporakuéra historia-pe: pe internet, oúva heta mba’e jaiporakuaáva ndive. Upevére, hetaitégui mba’e jaiporavokuaáva ogueru avei pe responsabilida heseguáva. Oheja jaike pe iporãvape ha upéicha avei opa mba’evai ikatúva ome’ẽpe. Pe internet rupi pehupytykuaa heta mba’e porã ára mbykýpe térã pepytakuaa peneñapytĩmbýpe hetaite mba’ereípe oiporuvaíva pene tiempo ha omokangýtava katupyry peguerekóva. Peteĩ clic penekuãme pejuhukuaa oimeraẽ mba’e pene korasõ oipotáva. Ha péva ha’e pe clave: mba’épa oipota pene korasõ? Mba’épa peguerohoryve? Moõpa pendegueraháta umi peipotáva?

Pendemandu’áke Tupã “ome’ẽha yvyporakuérape ha’ekuéra oipotaháicha” (Alma 29:4) ha ha’e “[ohusgataha] yvyporakuérape hembiapokuére, pe ikorasõkuéra oipotávare” (D. y C. 137:9; tojehecha avei Alma 41:3).

Elder Bruce R. McConkie he’iva’ekue: “Añetépe, ñaimo’ãramo jepe, pelibro de la vida ha’e peteĩ jehaipyre yvyporakuéra rembiapokue ojehaíva hetére. … Péva he’ise opa jepy’amongeta, opa ñe’ẽ ha opa tembiapo oreko peteĩ [efecto] yvypóra retére; opa umíva oheja imarka, ha Pe Hi’eternova omoñe’ẽkuaa hasy’ỹme oñemoñe’ẽháicha peteĩ kuatiañe’ẽ” (Doctrina Mormona, 2da. edición, 1966, pág. 97).

Pe internet ohai avei umi mba’e peipotáva, ojehecháva umi jeheka ha clic rupive. Oĩ hetaiterei oha’arõva ome’ẽ hağua umi peipotáva. Pehekávo internet rupi, peẽ peheja pypore: umi pejéva, moõpa peime, mboy árapa pepyta upépe, ha umi mba’e peguerohorýva. Upéicha pe internet ojapo peteĩ ciberperfil pendehegui; ha péicha, peteĩ “ciber libro pende rekovégui”. Ñande rekoveguáicha, pe internet ome’ẽ me’ẽvéta peẽme umi pehekávagui; umi peipotáva ipotĩramo, pe internet ikatu penemopu’ã, ombohasy’ỹvévo peẽme pejapo hağua tembiapo porã, ha katu añete avei pejapo hağua umi ivaíva.

Elder Neal A. Maxwell he’i kóicha:

“Pe jaipota meméva ha’e, upe rire, pe oikótava ñandehegui ha pe oñeme’ẽtava ñandéve pe eternidápe. …

“...Ñambo’e ha ñahekombo’eramo añoite, umi mba’e jaipotáva ha’éta ñandéve ğuarã peteĩ mba’eporã ha’erangue peteĩ mba’evai!” (tojehecha “Según nuestros deseos” Liahona, enero de 1997, págs. 21, 23).

Che hermanokuéra penemitãva, napeñeha’ãiramo pehekombo’e umi mba’e peipotáva, ko mundo penembo’éta. Opa ára ko mundo oñeha’ãmbaite ohechauka hağua peẽme umi peipotáva, pejapo clic pépe, pehuga péva, pemoñe’ẽ térã pehecha péva. Amo ipahápe, peẽ ningo peiporavova’erã. Peguereko ningo sãsojeiporavorã, ha’éva pu’aka ndaha’éi pejapo hağuante umi peipotáva, ha katu avei penemoporãve, penemopotĩve, ha penderupivétava. Pe sãsojeiporavorã ha’e pu’aka peguerekóva ha’e hağua máva, opa mba’e peiporavóva pene moaguĩ térã pene momombyryvéta pe pendehegui oñeha’arõvagui oiko; opa click imba’eguasu. Akóinte peñeporandu: Moõ gotyopa chegueraháta ko mba’e ajapótava?”.Pemoarandu katupyry perekóva pehecha mombyryve hağua pe ko’áğaite oikóvagui.

Pe aña ipu’akase pene sãsojeiporavorã rehe omboguata hağua pende rekove. Ha’e oikuaa ipu’akakuaaha pende rehe teko jepokuaavaípe. Umi peẽ pejapóva he’i pe tecnología ome’ẽtaha peẽme mbarete térã peneñapytĩtaha.

Peheja tame’ẽ peẽme cuatro principio poipytyvõ hağua, peẽ generasiõ jeiporavopyre, pehekombo’e hağua umi peipotáva ha peisambyhy hağua pe tecnología jeporu.

Peteĩha: Hasy’ỹvéta peiporavo hağua umi pejapótava peikuaáramo mávapa peẽ ha’e añetehápe.

Areko peteĩ anguirũ oikuaava’ekue ijehegui upe añetegua. Ita’ýra okakuaava’ekue Evangelio-pe, ha katu ha’etévaicha oñedesatináva espiritualmente; py’ỹi orrechasa jepi oportunida oipuru hağua pe sacerdocio. Ituvakuéra ombyasy ha’e he’irõguare ndojapomo’ãiha pe misión. Che anguirũ oñembo’e hese ipy’aite guive oha’arõme omoambue pe ikorasõ, ha katu iñeha’arõ opa pe ta’ýra he’ívo omendataha. Pe túva ojerure’asy ita’ýrape oporandu hağua pe bendición patriarchal rehe. Ipahápe, pe ta’ýra he’i ojapotaha, ha katu he’i jey jey ohechaseha pe patriarca-pe hi’año.

Oujeývo, pe bendición rire, tuicha ipy’aryrýi. Osẽ okápe ikichiha ndive, oñe’ẽ hağua hendive año. Pe túva oja pe ventanáre ha ohecha mokoĩvéva pe kuña ha kuimba’e pyahu omokãvo ojupe hesay.

Upe rire, pe ta’ýra he’i itúvape mba’épa ojehura’e. Tuicha py’aryrýipe, he’i chupe pe jehovasa aja ohecha’imihague mávapa ha’eraka’e pe mundo premortal-pe. Ohecha py’aguasu ha jerovia mbarete ha’e orekova’ekue omokyre’ỹ hağua ambue tapichakuérape osegui hağua Cristo-pe. Oikuaámavo mávapa ha’eraka’e añetehápe, ¿mba’éicha piko he’íta ndojapomo’ãiha peteĩ misiõ?

Mitãrusukuéra, penemandu’áke mavaitépa peẽ ha’e; penemandu’áke peguerekoha pe sacerdocio marangatu; péva penemokyre’ỹta peiporavo hağua mba’e iporãva peipurúvo pe internet ha opa pende rekove aja.

Mokoĩha: Peñemoaguĩ pe pu’aka orekóvare

Pene po mbytépe peguereko heta sigloregua arandukuaa, ha pe imba’eguasuvéva, umi profetakuéra ñe’ẽ, Antiguo Testamento ára guive Presidente Thomas S. Monson peve. Ha katu ndapekarga py’ỹiramo pende teléfono, ndoikói, ha upéicha peñandu pekañyha ha ndaitatuiha peñemoaguĩ; ni pendeképe ndapehejamo’ãi karga’ỹre pende batería ni peteĩ ára.

Imba’eguasuháicha ñasẽ pe ñande rógagui opa ára pe teléfono celular kargádo reheve, imba’eguasuetereive jajekargapaite espiritualmente. Opa ára pekarga vove pe teléfono, pehecha péva peteĩ mandu’arãramo ha peñeporandu peñemoaguĩpa hína pe tuichave pu’aka espiritual orekóva rehe: pe ñembo’e ha escriturakuéra jehesa’ỹijo, mba’e pende kargátava inspirasiõ reheve pe Espíritu Santo rupive (tojehecha D. y C. 11:12--14). Upe pu’aka penepytyvõta peikuaa hağua Ñandejára ñe’ẽ ha hembipota pejapo hağua ára ha ára umi mba’e michĩ ha katu imba’eguasúva he’ítava moõgotyopa peho hína. Heta ñande jaheja oimerãe mba’e jajapóva ñamoñe’ẽ hağua peteĩ mensaje de texto, ¿nañamomba’eguasuveiva’erã piko umi Tupã mensaje? Ñesẽ upe pu’akágui ha’eva’erã peteĩ mba’e ni jajepy’amongeta’ỹha (tojehecha 2 Nefi 32:3).

Mbohapyha: Peguereko peteĩ teléfono inteligente nde’iséi pene inteligente-ha; arandúpe peiporúramo katu ikatu penemo inteligente.

Mitãpyahukuéra, ani pejapo vyrorei pene teléfono inteligente reheve. Opaitéva peikuaa mba’érepa añe’ẽ hína (tojehecha Mosíah 4:29). Hetaiterei hendáicha pe tecnología ikatu penemombia umi imba’eguasuvévagui. Peiko ko’ã ñe’ẽ he’iháicha: “Tapeĩme peĩháme peĩramo upépe”. Pemboguatáramo auto, tapemboguata; peĩmeramo clase-pe, pemoĩ pene akã pe clase rehe; peĩmeramo pene anguirũkuéra ndive, pejapysaka hesekuéra. Pe apytu’ũ ndaikatúi oĩ mokoĩ mba’épe peteĩ jave. Ojejapóramo heta mba’e oñondive ha’e, añetépe, ojeguerova jesareko peteĩ ha ambue mba’ére. Peteĩ proverbio ymaguare he’i, “Heta mba’e ojaposéva peteĩme, sa’i ojapo.”

Irundyha: Ñandejára ome’ẽ pe tecnología ohupyty hağua Ipropositokuéra

Pe propósito divino ko tecnología orekóva ha’e ñambopya’eve hağua tembiapo salvasiõ rehegua. Peẽ ha’égui pe generasiõ jeiporapyrepegua, peikuaa pe tecnología; peiporu pembopya’eve hağua pende guata ñemoporãmba gotyo. Oñeme’ẽgui peẽme heta jehovasa, peme’ẽva’erã avei (tojehecha “Tú me has dado muchas bendiciones, Dios”, Himnos, N° 137). Ñandejára oha’arõ peiporu ko’ã tembiporu pemboyvateve hağua pe hembiapo, pe komparti hağua pe Evangelio tuichavépe opa che generasiõgua ikatuvara’e ojepy’amongetare. Umi generasiõ ymaguare orekókuri pu’aka umi hóga ypypegua ha ijereregua rehe, peẽ katu peguereko pu’aka pe internet ha umi redes sociales rupive, peñemosarambi hağua pe frontera mbypýri ha pe mundo entérope.

Che atestifika kóva ha’eha Ñandejára Tupao. Peẽ pejeiporavopyre pemba’apo hağua ko Hembiapópe ko árape Ha’e ojeroviágui pejapotaha pe oĩporãva. Peẽ ha’e pe generasiõ jeiporavopyre. Jesucristo rérape. Amén.