Ojejerure po ha korasõkuéra oñembopya’e hağua pe tembiapo

Linda K. Burton rupive

Presidenta Sociedad de Socorro-pegua

Imágen – Ta’anga

Ikatu ñaikuave’ẽ ñande po pytyvõrã ha peteĩ korasõ ñambopya’e hağua pe Túva Yvagagua rembiapo hechapyrãva.

Che hermana-kuéra, ¡ore pohayhueterei! Pehechávo pe video iporãitéva, ¿pehechápiko pende po ojepysóva peipytyvõ hağua mávape upe konvenio rapére? Ajepy’amonguetákuri hína peteĩ mitãkuña’i Primaria-guáre hérava Brynn peteĩnte ipóva; ha upevére, oiporu ohovasa hağua ifamilia ha hi’ãngirũkuérape, ha’éva Santo de los Ultimos Dias térã ambue religión-gua. ¿Na’iporãi piko ha’e? ¡Ha peẽ avei! Hermanakuéra, ikatu ñaikuave’ẽ ñandepo pytyvõrã ha peteĩ korasõ ñambopya’eve hağua pe Túva Yvagagua rembiapo hechapyrãva.

Umi ñanehermana escritura-pegua ijeroviaháicha—Eva, Sara, María ha heta ambuekuéra— oikuaava’ekue mávapa ha’ekuéra ha maerãpa ou hikuái yvy’ape ári, Brynn oikuaa ha’eha Tupã rajy¹.Ñande ikatu avei jaikuaa ñande legado divino Tupã rajy ojehayhúvaicha ha pe tembiapo tekotevẽva Ha’e oguerekóva ñande jajapo hağua.

Pe Salvador ombo’eva’ekue: “Ojaposéva pe ha’e oipotáva oikuaáta…pe doctrina”². ¿Mba’e tekotevẽ jaikuaa ha jajapo “peteĩ árape…[ikatu hağua] Hendive jaiko?”³. Ikatu jaikuaave pe karia’y ipirapire hetávagui oporanduva’ekue Jesús-pe mba’épa ikatu ojapo ohupity hağua pe vida eterna.

Jesús ombohovái chupe: “…reikeséramo pe tekovépe, neñe’ẽrendu umi tembiapoukapýre”.

Pe karia’y oporandu chupe mávarepa iñe’ẽrenduva’erã, ha Jesús omomandu’a chupe heta umi Diez Mandamientos-re opavave ñande jaikuaaporãva.

Pe karia’y ombohovái: “Opaite ko’ãvare cheñe’ẽrendúkuri che mitãrusuguive. ¿Mba’e piko aikotevẽve”?

Jesús he’i: “Neporãmbaséramo, tereho, evende pe erekóva ha eme’ẽ imboriahúvape, ha erekóta mba’ehepy yvágape; ha eju, chesegui”⁴.

Jesus ohenói chupe oike hağua Hembiapópe: peteĩ temimbo’e rembiapo. Ñane rembiapo upéicha avei. Ñande “[jahejava’erã] umi mba’e ko yvy’arigua…[jajoaju] [ñane] konveniokuérare”⁵ ha jaju Cristo-pe ha jasegui chupe. ¡Péva ha’e temimbo’ekuéra ojapóva!

Ha katu hermana-kuéra, ani ñañeanduvai pe Salvador he’ihaguére pe karia’y ipirapirehetávape iporãmbava’erãha. Pe ñe’ẽ porãmba kóva ko ñemombe’úpe oñembohasa peteĩ griego ñe’ẽgui he’iséva “oĩmbáva”. Ñañeha’ãramo jajapo opa mba’e ikatúva jaguata tenonde hağua pe konvénio rapére, ñaĩmbave ha ñaneporãmbave kóva ko tekovépe.

Pe karia’y ipirapirehetávaicha Jesús árape, sapy’ánte ñañandu ñanekangyseha terã jagueviseha ñaimo’ãgui ndaikatumo’ãiha jajapo ñaneaño. ¡Ha ñaimeporã! Ndaikatúi jajapo umi mba’e hasy ojejeruréva ñandéve jajapo hağua pytyvõ’ỹre. Pe pytyvõ ou Jesucristo expiasiõ rupi, pe Espíritu Santo sambyhy ha umi ambue tapichakuéra po pytyvõ rupive.

Peteĩ hermana ijeroviáva nomendaiva otestifika pe, Expiasiõ rupive, ohupyty hague pu’aka oiporu hağua ipo ome’ẽva pytyvõ ha ikorasõ porã omongakuaa hağua cuatro mitã ohejava’ekue iñermana omanorõguare cáncer-gui. Upéva chemomandu’a mba’e élder Neal A.Maxwell he’iva’ekue: “Opa mba’e hasy’ỹva pe Tupao ojapova’erã ojejapopáma; ko’áğa guive, ha’éta peteĩ tembiasakue hasýva, ha ñane renda tembiguaiháicha ojepy’ara’ãta opaicharei”⁶. ¡Peẽ peñembouva’ekue ko yvy’ape ári kóva ko dispensación de los tiempos-pe máva peẽ ha’éva rupi ha pe mba’e peñembosako’iva’ekue pejapo hağua rupi! Jepeve Satanás ñanembotavyse mávapa ha’e ñande, ¡ñande añetehápe ha’e Jesucristo rembiguaikuéra!

Mormón ha’eva’ekue peteĩ Ñandejára remimbo’e añete oikova’ekue peteĩ ára “opa korasõ oñemohatãrõguare…Ha araka’eve ndaipóriva’ekue tuichaite tekoñaña opa Lehi ra’ykuéra apytépe”⁷. ¿Peikosépa ra’e peẽ upe árape? Jepeve upéicha, Mormón he’iva’ekue py’aguasúpe: “Péina ápe, che ha’e Jesucristo, pe Tupã Ra’y remimbo’e”⁸.

¿Ndapeguerohorýipa Mormónpe? Ha’e oikuaava’ekue mávapa ha’e ha mba’épa imisiõ, ha noñesamboykéi pe mba’evai ijerére oĩvare. Ha katu, ha’e ohecha pe iñehenói ha’eha peteĩ don⁹.

Pejepy’amonguetami pe jehovasa ha’éva ñañehenóivo ñame’ẽ hağua ñande don discipulado rehegua opa ára Ñandejárape, ñamombe’úvo ñe’ẽ ha tembiapópe: “Péina ápe, ¡che ha’e Jesucristo remimbo’e!”.

Chembopy’arory ñemonbe’u Presidente Boyd K. Packer he’iva’ekue peteĩ ñane hermana jahyhuetéva rehegua oñeñembohoryva’ekuére osegui haguére pe Profeta ñe’ẽ he’íva ñañongatuva’erãha umi tembi’u. Pe máva oñe’ẽvaiva’ekue hese he’i umi mba’e ivaitereívove, iliderkuéra ojeruretaha chupe okomparti hağua umi hembi’u ñeñongatupy ambue tapicha ndive. Mbohovái mbarete ha hasy’ỹva ha’e ome’ẽva temimbo’e añetévaicha ha’ékuri: “Arekóta katu mba’e akomparti hağua”¹⁰.

Ahayhu Tupaogua hermana-kuérape, imitã ha iğuaĝuimívape. Ahechákuri ipu’aka; ahechákuri ijerovia. Oguereko mba’e oikuave’ẽva’erã ha oĩ hikuái ñembosako’ípe oikuave’ẽ hağua. Ojapo kirirĩháme ha avavépe nomombe’úi, omoĩvo hesa pe Tupã ja’adorávare ha ndaha’éi ijupekuérare, ha ojepy’amongueta’ỹre oñeme’ẽtavare chupekuéra¹¹. ¡Péva ha’e temimbo’ekuéra ojapóva!

Ramõite aikuaákuri peteĩ mitãkunã Filipinas-gua ifamilia ndohovéiva pe Tupaópe ha’e orekoguive 7 año, ohejávo chupe hikuái oguata ha’eñomi pe Tupaópe peteĩ tape ivaívare opa semana. Omombe’u mba’éichapa 14 año orekoramoguare he’iva’ekue opytataha jeroviápe umi ikonvéniope ikatu hağua hekojoja omongakuaa hağua ifamiliakuéra uperireguápe peteĩ óga ojehovasáva umi sacerdocio pu’aka jehovasápe¹². Ñamombarete porã hağua peteĩ óga, ko’áğa téra uperireguáva, ñaneñe’erenduva’erã ñane konveniokuérare, umi promesa jajapova’ekue ojupe, ha Tupãme.

¡Péva ha’e temimbo’ekuéra ojapóva!

Peteĩ hermana japonesa ijeroviáva ha iména ovisitákuri ore misión Corea-pe. Ha’e noñe’ẽi coreano ha oñe’ẽ’imi inglés-pe, ha katu oguereko korasõ oĩporãva oiporu hağua umi don orekóva ha ipo oipytyvõva ojapo hağua Ñandejára rembiapo. ¡Péva ha’e temimbo’ekuéra ojapóva! Ombo’e misionero-kuérape ojapo hağua peteĩ mba’e hasy’ỹva kuatiaguigua: peteĩ juru ojepe’a ha oñembotýva. Upéi oiporu pe ñe’ẽ mbovymi inglés-pe oikuaáva ombo’e hağua misionero-kuérape “oipe’a hağua ijurukuéra” okomparti hağua pe Evangelio. Ha’e peteĩ mbo’epy araka’eve ndahesaraimo’ai hikuái ni che avei.

Pehechami sapy’aite peẽ ha chéve ñañembo’ýramo umi hetaite ambue hermana ha hermano Itupaogua ndive, jahávo tenonderã py’aguasúpe, jajapóvo temimbo’ekuéra ojapóva: oservi ha oporohayhu pe Salvadorcha. ¿Mba’e he’ise peẽme taha’e Jesucristo remimbo’e?

Hetaiterei Jesucristo remimbo’ekuéra hekojojáva oiporuva’ekue umi chaleco ha camiseta Manos Mormonas que Ayudan oaceptava’ekue pe oportunida orekóva ome’ẽ hağua servicio temporal. Ha katu, oĩ ambue tape ikatuháicha jaservi temimbo’e hekojojávaicha. Peimo’ãmína chendive umi cartel ojeha’ítava hese “ojejerure pytyvõ” pe obra de salvación reheguápe:

Ojejerure sy ha túva omongakuaáva imembykuérape tesape ha añeteguápe
Ojejerure umi tajýra ha ta’ýra, hermana ha hermano, tia ha tio, prima ha primo, jarýi ha taita, ha anguirũkuéra añetegua ha’éva mbo’ehára ha oikuave’ẽva ipo pytyvõrã pe konvénio rapére.
Ojejerure yvyporakuéra ohendúva pe Espíritu Santo ñe’ẽmbegue ha ojapóva umi mba’e ohendúva
Ojejerure yvyporakuéra ovivíva pe Evangelio ára ha ára mba’e michĩ ha hasy’ỹháicha.
Ojejerure mba’apoharakuéra historia familiar ha templo-pegua ombojoajúva familia-kuérape ára opave’ỹvare.
Ojejerure misionero ha miembrokuéra omosarambíva umi “mba’e pyahu porã”: pe Jesucristo evangelio
Ojejerure pytyvõharakuéra ojuhu hağua umi osẽva’ekuépe tapeporãgui
Ojejerure yvyporakuéra iñe’ẽrendúva ikonveniokuérare opytahağua ñemova’ỹme odefendévo pe añetegua ha pe hustísia.
Ojejerure Ñandejára Jesucristo remimbo’ekuéra añeteguáva.

Ojapo heta año, pe élder M. Russel Ballard ojapohague peteĩ ñehenói mbarete ha ipuhatãva tupaogua hemana-kuérape he’írõguare:

“Ko ára ha pe ára Ñandejára oujeyvove mbytépe, Ha’e oikotevẽ kuñanguéra opa familia, opa barrio, opa comunida, ha opa tetãme oñeikuave’ẽva tekojojápe ha he’íva, iñe’ẽ ha hembiapo rupive: “Péina ápe aime; chemondo chéve”.

“Che ñeporandu ha’e: ‘¿Ha’étapa peẽ peteĩva umi kuña?’”¹³.

Aha’arõ opavave ikatu ñambohovái peteĩ “Heẽ!” ipuhatãvape. Ha ko’áğa ambopaha peteĩ Primaria-gua purahéi ñe’ẽ reheve:

[Tajyrakuéra] konveniogua ha’e ñande, peteĩ don ñaikuave’ẽtava jareko.
Pe Evangelio ñambo’éta jaikoveháicha.
Opa ñe’ẽ ha tembiapópe jatestifikáta:
Jaguerovia Cristo-pe ha Chupe jaservíta14.

Tembimbo’e añeteguáicha, aha’arõ ñaikuave’ẽ ñanekorasõ oĩporãva ha ñande po pytyvõrã ñambopya’eve hağua Hembiapo. Noimportái, Brynn-cha, jarekóramo peteĩ po añónte; noimportái nañaneporãmbái ni nañaĩmbairõ gueteri. Ñande ha’e temimbo’e hekojojáva ñame’ẽva ñande po ha ñañopytyvõva pe tapére. Ñane hermanda ojepyso opa generasiõ rupive umi hermana ijeroviáva ñanemboyvegua peve. Oñondivepa, hermanaicha ha jajoajúvo umi profeta, vidente ha revelador oikovéva ndive oguerekóva umi sacerdocio llave ojerrestaurava’ekue, ikatu jaguata joajúpe, temimbo’éicha, tembiguáicha ñande po ha korasõ oĩporãva reheve ñambopya’e hağua pe salvación rembiapo. Jajapóvo upéicha, ñande ha’éta pe Salvador-cha. Upévagui atestifika; Jesucristo rérape. Amén