¿Mba’épa nde ere?

Elder W. Craig Zwick rupive

Setentagua

Ajerure peẽme, poriahuverekópe umi pende rapicha ohasáva rehe, pejapo hağua ko porandu: “¿Mba’épa nde ere?”.

Ojapo cuarenta y un año, ajupihague peteĩ kamiõ semirremolke asientope orekóva cinco eje, che rembireko porãite Jan ndive, ha Scotty ore mitãra’y. Rogueraháta hína peteĩ karga pohýi orekóva material oñemopu’ã hağua óga heta estado rupi.

Umi árape ndaiporiva’ekue mba’eve he’íva ojepuruva’erãha cinturón de segurida ni mitãme ğuarã asiento; che rembireko ogueraha ijyva’ári ore mitãra’y rohayhuetéva. Che ahechakuaava’erãmo’ã kuri py’apy ha’e oñandúva he’írõguare: “Yvatete piko ñaime pe yvýgui”.

Roguejývo pe histórico [tape po’i] Donner Pass rupi peteĩ parte pe tape ibajadahápe, pe kamiõ cabina henyhẽ tatatĩgui pya’e ha ñeha’arõ’ỹme; ndaikatúi rohecha porã ha ore pytuho.

Umi semirremolque ipohýivape, pe freno añónte ndaikatúi omombegue pya’e pe kamiõ. Añeha’ã ajejoko pya’e aiporúvo pe freno kompresiõ rehegua ha pe caja velocidad-rehegua.

Ajávo pe tape yképe, ha katu ropytaite mboyve, che rembireko oipe’a pe cabina rokẽ ha opo okápe pe mitãmi ijyva’ári. Che ama’ẽ hesekuéra ojapajeréivo pe yvýre ikatu’ỹre mba’eve ajapo.

Amombytamívo pe kamiõ, pya’e asẽ pe cabina otĩmbopávagui, añani hatã umi ita ha ñana mbytére, ha añañua chupekuéra. Jan jyva ha kodo huguy’imi, ha katu vy’arã ha’e ha pe ore mitãra’y oikove. Añañua’atã chupekuéra pe yvytĩmbo osẽvo pe tape ykégui.

Ojehasávo chehegui py’aperere ha che pytujey rire, ha’e “¿Mba’e piko oike ne’akãme? ¿Ndereikuaái piko ipeligrosoiteha rejapo upéva? ¡Haimete ningo pemano!”.

Omaña che rehe, hesaývo pe hova itanimbupávape, ha he’i chéve peteĩ mba’e opokóva che korasõre ha ko’ágã peve ahendúva che apysápe: “A salvasente ningo ñane membýpe”.

Upe jave aikuaa ha’e oimo’ãhague pe motor hendypa kuri hína ha okyhyje pe kamiõ okaputaha ha romanota. Upevére, che aikuaákuri ha’eha peteĩ mba’evai eléctrico-nte, ipeligrósova, ha katu ndaha’éi orejukátava. Amaña pe che rembireko porãitére, oipichy mbeguemíva pe ore mitãra’y akã, ha aporandu chejupe mba’éichagua kuñápa ojapóne péichagua mba’e kyhyje’ỹetépe.

Pe mba’e ikatúkuri ijetu’uve emocionalmente pe motor eléctrico oñembyai añetévagui. Mba’eporãra, roñe’ẽ’ỹ pukumi rire oñondive—mokõivéva roimo’ãvo peteĩva ikulpaha—amo ipahápe ro’e ojupe umi temiandu oĩva pe pochy roñandúva guýpe. Umi temiandu rokompartíva mborayhu ha py’apy rorekóva rupi ojuehe ndohejái pe mba’evai oikova’ekue ohundi ore matrimonio porãite.

Pablo ohekombo’e: “Mba’evéichagua ñe’ẽ pohýi tosẽ pendejurúgui, térã katu pe iporãva [añónte] ha [omombaretéva], ome’ẽ hağua grasia umi ohendúvape” (Efesios 4:29). Umi iñe’ẽ ipu hesakã.

¿Mba’e piko he’ise peẽme ğuarã ko frase “Mba’evéichagua ñe’ẽ pohýi”? Opavave ñande pochy sapy’a py’a; umi pochy ñande ñañandúva ha ambue oñandúva. Jahecháma oĩha tapicha ipochyvaitéva opavave renondépe; jahecha ha’erõ peteĩ mba’e “okapuvaicha” umi ojehugahápe deporte, umi político-kuéra apytépe ha jepe ñande rogaitépe avei.

Sapy’a umi mitã oñe’ẽ ituvakuéra ohayhúvape kũ haĩmbéva kysepukupeicha. Umi omendáva, ohasa rire heta mba’e ikunu’ũ ha iporãva, osẽ pe hapégui ha ojahéi ojuehe ha osapukái ojupe. Opavave ñandekuéra, ha’éramo jepe peteĩ ñande rayhúva Túva Yvagagua konveniogua ra’ykuéra, heta ára ñambyasy jahusga pya’ehague ñembotuichápe ja’évo ñanerekopotĩveha, ha jaiporu ñe’ẽ pohýi jaikuaa mboyve pe ambue tapicha oñandúva hína. Opavave jaguerekova’ekue oportunida jaikuaa hağua mba’éichapa umi ñe’ẽ pohýi ikatu ombojere peteĩ mba’evai ñehundípe.

Peteĩ kuatia Primera Presidencia ohaiva’ekue he’i péicha tesakãme: “Pe Jesucristo evangelio ñanembo’e jahayhu hağua ha ñañe’ẽ hağua opavave tapichápe mborayhu ha torýpe, jepe ñambotovéramo pe he’íva” (Kuatiahai Primera Presidencia, 10 de enero 2014-pe). ¡Tuichaitéva mandu’arã ñande ikatuha ha ñañemongeta memeva’erãha oñondive yvypóraicha, ko’ýte jahechágui ko mundo heta hendáicha!

Proverbios ohaiva’ekue ñanembo’e: “Pe ñe’ẽ vevúi oipe’a pochy, ha pe ñe’ẽ pohýi katu omopu’ãve pe pochy” (Proverbios 15:1). Pe “ñe’ẽ vevúi” ha’e peteĩ ñembohavái arandu, umi ñe’ẽ oñehekombo’éva peteĩ korasõ imirĩvagui. Kóva nde’iséi araka’eve nañañe’ẽmo’ãiha tesakãme ni ndajajoavymo’ãiha umi doctrina añeteguávare. Umi ñe’ẽ novãiva pe he’ívape ikatu ivevúi pe espíritupe ğuarã.

Mormón Kuatiañe’ẽ oreko peteĩ techaukarã mba’éichapa ñañe’ẽva’erã torýpe, oikóva avei oĩramo joavy umi omendáva apytépe. Oñemondojey kuri Jerusalén-pe Saríah ha Lehi membykuérape oheka hağua umi plancha bronce-guigua ha ndojerevéi hikuái. Saríah oimo’ãkuri ikatuha omano hikuái; ha ipochyeterei ha otopase mávape okulpa hağua.

Pehendu ko relato mba’éichapa Nefi, ita’ýra, ohechákuri: “[Che sy] oimo’ãgui ha’e romanohague tave’ỹme, ha avei heta okaguai che ru rehe, ha’eha yvypóra ohechapukúva: Nde oreguenohẽ ñande yvy jehejapyrégui, ha che membykuéra ndaiporivéima ha ñande ñamanóta tave’ỹme” (1 Nefi 5:2).

Ko’áğa, jahechami mba’épa Saríah okalkulanera’e. Ojepy’apy umi imemby oikovaiséva ohojeyhaguére pe tenda oje’ehaguépe iména ojejukataha. Ha avei ohejákuri hóga porãite ha iñangirũnguéra peteĩ óga karpaguigua rehe peteĩ tave’ ỹ mombyrýpe oĩmegueterei imemby hağuaicha. Pe okyhyjeve jave, ha’ete Saríah opóva kyhyje’ỹme, ndaha’éi jepy’amongeta’ỹme—peteĩ kamiõ yvate oku’éva hínagui omo’ã hağua pe hogayguakuéra. He’i iménape jepy’apy oĩporãva ñe’ẽ pochýpe, py’ahetápe ha jeja’ópe; umi ñe’ẽ opa yvypóra ha’etevaicha oiporúva mba’eve’ỹrõguáicha.

Pe profeta Lehi ohechákuri kyhyje oĩva hembireko ñe’ẽ pochýpe; ha upéi ombohavái py’aguapýpe ñe’ẽ poriahuvereko rupi. Oñepyrũvo, he’i oikuaaha umi mba’e añeteha pe hembireko ohechaháicha: “Ha…che ru oñe’ẽ chupe, he’ívo: Che aikuaa ha’eha peteĩ yvypóra ohechapukúva,.. [ha katu] [apytava’erãmo’ã] Jeresalén-pe ha amano che joyke’ykuéra ndive” (1 Nefi 5:4).

Upéi iména ohecha umi kyhyje ha’e orekóva pe imembykuéra ñeĩmeporã rehe, pe Espíritu Santo otestifikágui chupe añetépe, ha he’i chupe:

“Ha péina ápe, ahupyty peteĩ yvy ñẽ’eme’ẽngue ha avy’a ko’ã mba’e rehe, ha che aikuaa Ñandejára oipe’ataha che ra’ykuéra Labán pógui…

“Ha ko’ãichagua ñe’ẽme che ru Lehi omoangapyhy che sýpe…. ore rehe” (1 Nefi 5:5–6).

Ko árape, oĩ tuicha tekotevẽ kuimba’e ha kuña omongakuaa hağua respeto ojuehe ombohasa hağua tuicha joavy oĩva ijerovia ha ijepokuaakuérape, ha pa’ũ pypuku oĩva ñemokyre’ỹ orekóva hikuáipe. Ndaikatúi jaikuaapa mba’épa oĩ pe tapicha akã ha ipy’ápe, ha ndaikatúi avei jaikuaapávo mba’eichaitépa opavave ohasa umi mba’evai ha jeipy’ara’ã.

Upevére, ¿mba’épa oikóta pe “ñe’ẽ pohýi” Pablo oñe’ẽvagui ñandetevoi ñaneñe’ẽme jahechaukáramo techakuaa umi ñande rapicha ohasáva rehe? Ahechakuaávo ñeimeporã’ỹ chete voi arekóva ha umi chekangyreko, ajerure peẽme, poriahuverekópe umi pende rapicha ohasáva rehe, peñensaja pejapo ko porandu: “¿Mba’épa nde ere?”.

¿Penemandu’a piko Ñandejára oipy’amondýirõ Samuel ha Saúl-pe ohenóirõguare peteĩ mitãrusu ovecha rerekuápe, David Belén-gua, ha’e hağua Israel-pegua rrey? Ñandejára he’i iprofetakuérape: “Jehová noma’ẽigui pe yvypóra oma’ẽvare, yvypóra oma’ẽgui pe oĩva hesa renondépe, Jehová katu oma’ẽ pe korasõ ryepy rehe” (1 Samuel 16:7).

Pe kamiõ cabina henyhẽroguare tatatĩgui, che rembireko ojapo py’aguasu ikatúvape omo’ã hağua ore mitãra’y. Che avei amo’ãségui chupe aporandu mba’érepa péicha ojapo. Techapyrãme, mba’everei kuri mávapa oĩ añetépe upérõ; pe imba’eguasúva upérõguare ha’ékuri roñohendu ha roikuaa mba’éichapa rohechara’e upe mba’e mokõivéva.

Ñaimeporãramo jahecha hağua ambue tapicha ohechaháicha omoambuéta pe “ñe’ẽ pohýi” “grasia oñeme’ẽvape”. Apóstol Pablo oikuaákuri upéva ha, ikatu avei, opavave ñande jahasa ko’ã mba’e. Ikatu naiñambuéi ni noñemyatyrõi pe mba’evai, ha katu pe mba’e tuichavéva ha’e pe grasia oñeme’ẽva ikatuha ñanemoambue.

Atestifika marangatúpe ikatuha “ñame’ẽ grasia” ñe’ẽ poriahuvereko rupive pe Espiritu Santo don, oñemongakuaáramo, péva oike ñanekorasõme jarekópe techakuaa umi ñande rapicha oñandúva ha ohasáva rehe; ha oheja ñandéve ñamoambue umi mba’evai tenda imarangatúvare. Atestifika peteĩ Salvador ñanderayhúvagui “oma’ẽva [ñane] korasõ rehe” ha omomba’éva umi ñañandúva. Jesucristo rérape. Amén.