Pe profeta José Smith

Elder Lawrence E. Corbridge rupive

Setentagua

Imágen – Ta’anga

Umi techauka oñeme’ẽva’ekue José Smith-pe omoañete ha’ehague peteĩ Tupã profeta.

Pe Primera Visión

Peteĩ mitãrusu omoñe’ẽ pe Biblia ha hesaho peteĩ escritura iporãrasávare; upe ára omoambuéta raka’e ko yvy’ape.

Oikuaase mba’e tupaópa ogueraháta chupe pe añetegua ha salvaciónpe. Oñeha’ãmbaite opa ambue mba’ekuéra ndive, ha ko’áğa oheka Bíbliape ha omoñe’ẽ ko’ã ñe’ẽ: “Ha oĩramo pende apytépe ndorekóiva arandukuaa, tojerure Tupãme, ome’ẽva opavavépe heta ha jeja’o’ỹme, ha oñeme’ẽta chupe”¹.

Ojepy’amongueta jey jey ko’ãvare, ha peteĩha tesakã mimbi oike pe pytũmbýpe. ¿Péva ha’e pe ñembohovái? ¿Péicha piko osẽta pe apañuãi ha pytũmbýgui? ¿Ikatú piko péichante; ñaporandu Tupãme ha Ha’e ombohováita? Amo ipahápe he’íma oporanduva’erãha Tupãme térã opytáta apañuãi ha pytũmbýpe.

Upevére, jepe oikuaaseterei, ndohói apúrope tenda kirirĩme ha oñembo’e japurápe. Oreko 14 áñonte, ha katu pe ikuaasépe, ndojapurái. Péva ndaha’emo’ãi ambue ñembo’énte; ohecha moõpa ohóta ha araka’épa oñeha’ãta ojapo ha oñembosako’i oñe’ẽ hağua Tupã ndive.

Péicha oğuahẽ pe ára, ha’e peteĩ ára neporã ha hesakãva pyharevekue, primavera ñepyrũmby 1820-pe². Oguata ha’eñomi peteĩ yvyraty kirirĩ ağuime umi yvyra opu’ãva hi’áripe. Oğuahẽ pe tenda oiporavova’ekuépe upe mboyve, oñesũ ha ohupi Tupãme umi mba’e ikorasõ oipotáva.

Omyesakãvo upe rire oikova’ekue, ha’e he’i:

“…ahecha peteĩ tesape puku, kuarahýgui ojajaivéva, che akã ariete; ha ko tesape oguejy ohóvo opyta peve che ári.

“…Opytávo che ári pe tesape, ahecha yvaterei che ári mokõi Tekovépe, pe imimbi ha igloria ikatu’ỹva ja’e. Peteĩva oñe’ẽ chéve, cherenóivo che réraipi, ha he’i, ohechaukávo pe ijykeregua: [José], Kóva ha’e che Ra’y Ahayhuetéva: ¡Ehendúchupe”!³

Ha veinticuatro áñonte uperire, José Smith ha ityvýra Hyrum omanotara’e pe upépe oñepyrũva’ekue rupi.

Oposición

José he’i orekóramo guare diecisiete año, peteĩ ángel he’ihague chupe “opa tetã apytépe…ojeporutaha [hé]ra mba’eporã ha mba’evairã…opa tavagua apytépe” ⁴. Upe profecía oñekumpligueteri ohóvo ko ára okakuaavépe ohóvo pe Iglesia de Jesucristo de los Santos de los Ultimos Días opa yvy’ape ári.

Pe oposicion, pe ñe’ẽvai ha pe joavy oho pe añetegua ndive. Akóinte ojehechaukáramo añetegua pe yvypóra propósito ha destínogui, oĩta pu’aka oñemoĩva hese. Ñañepyrũvo Adan ha Eva ndive pe Jardín de Edénpe, jahávo Cristo ministerio ndive, ha ko ñande ára peve, akóinte oĩta ñeha’ã ombotavy haĝua, oñehundi, oñeñemoĩ ha ani hağua ojejapo pe plan de vida.

Peheka yvypóra hetave oñemuñareiva’ekue mavave ambuégui; Pe oñemoñe’ẽjoavy, oñeñe’ẽreity, ojehayhu’ỹ, oñembohasa’asy, ojehejarei ha kurusúre ojehupiva’ekue; Pe oguejyva’ekue opa mba’e guýpe ha upépe pejuhúta pe añetegua, Tupa Ra’ýpe, opa yvypóra Salvador. ¿Mba’ére piko ndohejái chupe hikuái py’aguapýpe?

¿Mba’ére? Ha’égui Ha’e pe añetegua ha akóinte oĩta oposición pe añeteguáre.

Upéi, peheka peteĩ oguenohẽ’akue tesakãme ambue Jesucristo testamento ha ambue Escriturakuéra; peheka peteĩ ha’eakue tembiporu ojerestaurava’ekue rupi pe Evangelio paha ha pe Iglesia de Jesucristo ko yvy ári; peheka chupe ha pejuhúta ñe’ẽvai ijoja’ỹva. ¿Mba’ére ndojehejái chupe py’aguapýpe?

¿Mba’ére? Ha’e ombo’égui pe añetegua ha akóinte oĩta oposición pe añeteguáre.

Pe revelación ñeñohẽ

Umi revelación oñeme’ẽva’ekue José Smith-pe ohechauka ha’ehague ha’e peteĩ Tupã profeta. Jahechami umíva apytégui, jahecha oĩha pe tesape ha pe añetegua ojerrevelava’ekue ha’e rupive ojajáiva joavýpe umi jeguerovia oĩva’ekue ha’e oikove aja ha umi ñande árapegua ndive.

Tupã ha’e peteĩ tekove ha oje’exaltáva, peteĩ Túva Eterno; Ha’e niko ñande Ru.
Tupã pe Túva, Jesucristo ha pe Espíritu Santo ha’e tekove iñambuéva ojuehegui⁵.
Peẽ ndaha’éi yvypórante, peẽ ha’e Tupã ra’y, pe Padre Eterno, ha ikatu Ha’éichagua avei⁶ pejeroviáramo Ita’ýrare, peñe arrepenti, ha oñeme’ẽ peẽme umi ordenanza, ha oñeme’ẽ peẽme pe Espíritu Santo ha pepytáramo ipahaite peve⁷.
Pe Iglesia de Jesucristo ko árape ha’e peteĩchagua pe Iglesia Ha’e omoĩva’ekue Iministerio aja ko yvy’ári, profeta ha apostolkuéra reheve, umi sacerdocio Melquisedec ha levítico, umi élder, sumo sacerdote, diácono, maestro, obispo ha setenta; apaite ojehaiháicha Bíbliape.
Pe sacerdocio pu’aka ojepe’ava’ekue yvy ári pe Salvador ha Ijapostolkuéra omano rire, ha ojerrestaura jey ko ñande árape.
Pe revelación ndopái ha ygavakuéra ojepe’agueteri; Tupã oñe’ẽ profetakuérape ko árape ha oñe’ẽta peẽme ha chéve avei⁸.
Oĩve mba’e kóva ko tekove rire ha ndaha’éi pe yvága ha añaretãnte; oĩ grados de gloria, ha pe jajapóva ko tekovépe tuicha imba’eguasu⁹.
Jaguerovianterangue Cristope mba’eve apo’ỹre, “[ñampu’ã]va’erãmo’ã [Hese] gotyo opa jepy’amongueta”¹⁰, “[jajapo] opa mba’e [jajapóva] pe Ta’ýra rérape¹¹, “nanemandu’a hese tapiate, ha…ñañongatu hembiapoukapykuéra…[ikatu] hağua jareko tapiaite Ijespiritu [ñanendive]”¹².
Umi miles ha millones oikove ha omanóva oreko’ỹre pe Evangelio ha umi ordenanza tekotẽvéva salvacionrã noñehundíri. Cristo expiación rupive, “[ikatu] ojesalva hikuái, iñe’erendúramo umi ley ha ordenanza del Evangeliore”¹³ ojejapóva umi oikovéva ha omanóvape ğuarã¹⁴.
Nda’opa mba’éi oñepyrũ ñanereñoiramo guare; peẽ peikova’ekue yma Tupã ndive Ita’ýra ha tajýraicha ha peñembosako’iva’ekue ko tekove yvy’áriguape ğuarã¹⁵.
Pe ñemenda ha pe familia ndaha’éi yvypóra jepokuaa he’íva ñemano ñande pe’a peve. Oñemoĩva’ekue ha’e hağua opave’ỹva umi convenio ojejapóva rupi Tupã ndive. Pe familia ha’e techaukaha umi yvagápegua¹⁶.

Ha péva ha’e peteĩnte pe techauka ñeñohẽ oñeme’ẽva’ekue José Smith-pe. ¿Moõguipa ou ko’ã techauka oguerúva hetaite tesakã pe pytũmbýpe, ñemyesakã pe py’ahetápe, ha opy’amongueta ha omoĩporãva’ekue hetaite tekovépe? ¿Mba’e ikatuve, ha’e ojapontehague opaite ko’ãva ha’eñorei, térã oñeme’ẽhague chupe pytyvõ yvágagui? ¿Umi escritura oguenohẽakue ipu peteĩ yvypóra ñe’ẽicha térã umi ñe’ẽ Tupãgui ouvaicha?

Ñemohu’ã

Ndaipóri joavy pe mba’e José Smith ojapoakuégui, ha katu pe mba’éicha ojapo ha mba’érepa. Ha ndahetái jaiporavo hağua; ha’eakue peteĩ tekove japu térã peteĩ profeta; ojapo pe ojapoakue ijehegui térã oñeme’ẽ chupe yvágagui pytyvõ. Pema’ẽ umi techarãre, ha katu pema’ẽ opa umi techarãre, opa hekovére, nda’éi peteĩ hendánte. Ha katu imba’eguasuvéva, pejapo pe mitãrusu José ojapoaekue: “[pejerure] Tupãme, ome’ẽva opavavépe heta ha jeja’o’ỹme, ha [oñe][me’ẽta] peẽme”¹⁷. Péva ndaha’éi jaikaa hağuante añetegua pe Mormón Kuatiañe’ẽ ha José Smithgui; ha katu péva ha’e avei techauka jaseguiva’erã jaikuaa hağua añetegua opaite mba’égui¹⁸.

José Smith ha’eakue peteĩ Tupã profeta, ha’eháicha avei Thomas S. Monson ko árape. José Smith rupive umi rreino llave peteĩ jey “oñeme’ẽ yvypórape ko yvy ári, ha upégui pe evangelio isarambíta…pe ita oñeikytĩva ka’aguýpeicha, ndaha’éi pópe…omyenyhẽ peve opa yvy’ape”¹⁹.

Tupã ha’e ñande Ru Eterno ha Jesús ha’e pe Cristo; Chupekuéra ja’adora. Mba’eve rehe noñembojojái umi Hembiapokuéra, pe Plan de Salvación ha pe sacrificio expiatório del Cordero de Dios rehe. Kóva ko dispensaciónpe, ñakumpli pe Túva plan ndive ha japarticipa umi fruto de la expiaciónre ñaneñe’ẽrendúramo añoite umi ley ha ordenanza Evangeliore oñemoĩjeyva’ekue profeta José Smith rupive. Atestifika Chuguikuéra: Tupã pe Padre Eterno ha Jesucristo, pe Salvador del Mundogui; ha péva ajapo Jesucristo rérape. Amén.