“Ame’ẽmagui peẽme techaukarã”
Élder Richard G. Scott
Pe Quórum Doce Apóstoles-gua
Techaukarã tuichavéva araka’eve oguatava’ekue ko yvy’ape ári ha’e Ñande Salvador Jesucristo…Ha’e ñane’invita jasegui hağua pe Itechaukarã oĩmporãmbáva.
Apensávo pe che rembiaporã akomparti hağua pe Evangelio, ajepy’amongeta umi che rapicha cherayhúva mborayhuporãre che pytyvõva’ekue ajuhu hağua tape marangatu oipytyvõva’ekue che progreso espiritualpe.Umi ára imba’eguasúvape che rekovépe, Túva Yvagagua che rovasava’ekue máva ojepy’apýva cherehe reheve omboguata haĝuáicha jepe umi mba’e che ajapóva tape porã gotyo. Ha’ekuéra iñe’ẽrendúkuri pe Salvador ñe’ẽre. “Ame’ẽmagui peẽme techaukarã, che ajapo haguéicha penendive, peẽ pejapo hağua avei”1.
Che mitãrõguare, che ru ndaha’eiva’ekue Tupaogua miembro ha che sy ndohóiva pe tupaópe. Roikova’ekue Washington D.C.-pe ha che sy rukuéra oikova’ekue 4.000 kilómetro, Washington estado-pe. Amboty riremi ocho año, che abuela Whittle ohasa pe tetã pukukue orevisita hağua. Ha’e ojepy’apýkuri che ryke’y ni che noroñemongarai haguére. Ndaikuaái mba’épa he’íraka’e upe mba’ére che rukuérape, ha katu peteĩ pyharevépe oregueraha che ryke’y ha chéve peteĩ parque-pe ha he’i oréve imba’eguasuha pe ñemongarai ha pe jeho py’ỹive Tupao reunión-kuérape. Nachemandu’a porãi mba’épa he’iva’ekue oréve, ha katu iñe’ẽnguéra oike pypuku che pype ha ára uperiremi, che ryke’y ha che roñemongarai.
Ha’e orepytyvõve ohóvo. Chemandu’a che ha che ryke’ýpe ojejeruréramo peteĩ discurso Tupaópe, rohenóimi chupe teléfono-pe rojerure hağua pytyvõ, ha uperiremi peteĩ discurso pópe jehaipyre oğuahẽ oréve correo rupive. Upe rire katu, ore pytyvõ mbykyve ohóvo ha tekotevẽma romba’apove hese.
Pe abuela oiporúnteva’ekue py’aguasu ha respeto tekotevẽva oipytyvõ hağua che rúpe ohechakuaa hağua imba’eguasuha oregueraha pe Tupaópe roike hağua umi ore reunión-pe. Opa hendáicha ore pytyvõva’ekue roñandu hağua pe Evangelio tekovẽha ore rekovépe.
Pe imba’eguasuvéva niko ore roikuaa ha’e ore rayhuha ha ohayhuha pe Evangelio. ¡Ha’e’va’ekue ha’e peteĩ techaukarã hechapyrãva! ¡Tuichaite aguyje niko añandu pe testimónio okompartiva’ekuére chendive che mitãrõguare! Ipu’aka omoambue che rekove rape mba’eporã ijapyra’ỹvape ĝuarã.
Heta año uperire, ajegraduáta jave universidágui, ahayhueterei peteĩ kuñataĩ porã hérava Jeanene Watkins, ha ha’etévaicha chéve ha’e oñepyrũha avei oñandu mba’e porã cherehe. Peteĩ pyharépe roñemongeta jave hína pe ára upeigua rehe, ha’e, ñe’ẽrorýpe, ogueru pe ore ñemongetápe peteĩ ñe’ẽmbyky omoambuéva che rekove tápiate ğuarã. He’i: “Che amenda vove, Témplopeta, peteĩ karia’y ijeroviáva ha oujeýmava imisiongui ndive”.
Upe mboyve ndajepy’amongeta guasúikuri peteĩ misión-re, ha katu upe pyharépe, kyre’ỹ che arekóva ajapo hağua servicio misional tuicha iñambue. Aha ógape ajepy’amongetávo upe mba’érente. Ndakéi upe pyhare pukukue, ha upe ko’ẽme ndaikatúi amoĩ che apytu’ũ umi che estúdiore. Heta añembo’e rire, ha’e chejupe ahataha ahecha che obíspope ha añepyrũtaha ajapo pe solicitu misión-pe ğuarã.
Jeanene araka’eve ndojerureiva’ekue chéve aservi hağua peteĩ misiónhese. Che rayhuporãva’ekue he’i hağua chéve umi mba’e ha’e ogueroviáva ha ome’ẽ chéve araporã aiporavo hağua che rekove rape. Mokõivéva roservi peteĩ misión ha upéi rojesella témplope. Py’aguasu ha tembiapo oguerekóva Jaenene pe ijerovia gotyo tuicha omoambue ore rekove oñondive. Aikuaa añete noroñanduiva’erãmo’ã hetaite vy’a ha’e ndojerovia atãirire pe principio he’ívare jaserviva’erãha Ñandejárape raẽ. ¡Ha’e niko peteĩ tekojoja techaukarã hechapyrãva!
Che abuela Whittle ha Jeanene cherayhuporãva’ekue okomparti hağua chendive jerovia mbarete orekóva hikuái umi ordenanza Evangelio-guáre ha pe servicio Túva Yvagaguápe ohovasataha che rekove. Avave ndachejopýi ni nachemo’anduva’íri che lája rupi. Ha’ekuéra che rayhúnte ha ohayhu Tupã Yvagaguápe. Mokõivéva oikuaa Ha’e ikatuveha ojapo che rekovére pe che ikatúvagui ajapo chejehe. Py’aguasu ha mborayhúpe, mokõivéva che pytyvõ ajuhu hağua tape tuichavehápe vy’a.
¿Mba’éichapa ikatu opavave ñandekuéra ha’e peteĩ pu’aka imba’eguasuetéva? Jahechava’erã jahayhu añeteha umi ñaipytyvõ porãsévape, upéicha ha’ekuéra oñepyrũta omoĩ ijerovia pe Tupã mborayhúre. Hetavépe yvypóra yvy’arigua, peteĩ mba’e hasýva o’acepta rire pe Evangelio ha’e oguereko hağua jerovia pe Tupã Yvagaguáre, ohayhúva chupekuéra peteĩ mborayhu iporãmbajepévape. Hasy’ỹve upe jerovia ñemongakuaa orekóramo hikuái anguirũ térã familiar upéicha ohayhúva avei chupekuéra.
Ojeroviáramo hikuái pe mborayhu erekóvare hesekuéra, péva ikatu oipytyvõ chupekuéra omongakuaa hağua jerovia Tupã mborayhúre. Upéi, neñe’ẽ mborayhu ha techakuaa rupive, hekovekuéra ojehovasáta ekompartívo umi mbo’epy reikuaava’ekue, umi jehasa erekova’ekue ha umi principio eseguiva’ekue emoĩporã hağua neproblemakuéra. Ehechauka py’apy añetegua iñeimeporãkuérare ha upéi ekomparti nde testimónio Jesucristo evangéliore.
Ikatu eipytyvõ chupekuéra rejapóramo umi principio ha doctrinape oĩháicha. Emokyre’ỹ umi rehayhúvape oheka hağua mba’éichapa ikatu ontende hikuái pe Ñandejára oipotáva ojapo. Peteĩ henda ha’e, jajapo chupekuéra umi porandu omopensava’erã chupekuéra ha upéi eme’ẽ rire chupekuéra tiempo, taha’e hora, dia, mese térã hetave, ojepy’amongeta ha oheka hağua ijeheguikuéra umi iñembo’e mbohovái. Eipytyvõ chupekuéra oikuaa hağua umi Escritura ha’eha peteĩ mba’e kuaapy rehegua imba’eguasúva orrecibi hağua ha ohechakuaa hağua hikuái umi mbohovái oúva. Upéicha, eipytyvõta chupekuéra oñembosako’i hağua umi araporã ha aravai upeigua ğuarãme.
Tupã rembipota ha’e: “Tojejapo yvypóra ñenove’ỹ ha hekove ñembopave’ỹ”2. Upéva imba’eguasu opa mba’e jajapóvape. Sapy’ante ñañesamboyketerei umi mba’e jaipotávare, térã jajepy’apyeterei umi responsabilida yvy’ariguáre, ha ñanderesarái Tupã rembipotakuéragui. Emoĩramo akóinte nde rekove umi principio básico rehe, ehupytýta peteĩ kuaapy pe mba’épa rejapova’erã rehe, ha ejapovéta mba’eporã Ñandejárape guarã ha hetavéta vy’a ndéve ğuarã.
Emoĩramo nde rekove umi principio básico pe Plan de Salvación rehe, ejepy’amongeta porãvéta ekomparti hağua pe reikuaáva rentendégui imba’eguasuha ára apyra’ỹ meve umi ordenanza pe Evangelio rehegua orekóva. Ekompartíta pe reikuaáva ikatu hağuáicha nderapichakuéra ikyre’ỹ imbareteseve hağua espiritualmente. Eipytyvõta umi rehayhúvape oñekompromete hağua iñe’ẽrendutaha opa umi tembiapoukapy [Tupã mba’éva] rehe ha omoĩtaha ijehe Jesucristo réra.
Nemandu’áke umi tapicha konversiõ ha’eha peteĩ pártente pe obra-pe. Eñeha’ã akóinte emombarete familia-kuérape. Embo’e techauka he’ívape imba’egusuha pe familia ojesella témplope. Oĩta familia oikotevẽtava heta año, peichava’ekue che rukuéra ndive. Heta año chekarai rire, che ru ikaraiva’ekue, ha upéi che familia ojesella témplope. Che ru oserviva’ekue témplope selladorcha ha che sy oserviva’ekue ijykére. Erekóramo upéva upe techauka umi ordenanza selladora temploguáre, eipytyvõta oñemopu’ã haguã Tupã reino ko yvy’ape ári.
Nemandu’áke pe mborayhu erekóva hesekuéra ha’eha pu’aka pyenda omoambue hağua umi eipytyvõsévape. Che abuela Whittle ha che rembireko Jeanene pu’aka ndaha’eiva’eramo’ã mba’eve che ndaikuaáirire ha’ekuéra cherayhuha ha oipotaha mba’e iporãvéva chéve ğuarã.
Ehayhu chupekuéra ha upéi, ejerovia hesekuéra. Oĩta ára ha’etévaicha hasyha ejerovia hesekuéra, ha katu ehekava’erã mba’éichapa ikatu ejapo. Tupã Yvagagua ra’ykuéra ikatu ojapo mba’e hechapyrãva oñandúramo ojejeroviaha hese. Opavave Tupã ra’y kóva ko tekovépe oiporavova’ekue pe Salvador plan. Ejeroviáke, oguereko vove oportunida, oiporavo jeýtaha péicha.
Ekompartíke umi principio oipytyvõtava rehayhuvakuérape oho hağua tenonde gotyo pe vida eterna repére. Nemandu’áke maymáva japrogresaha sa’i sa’i. Nde upéicha ejapova’ekue entende hağua pe Evangelio. Embo’e pe evangelio hasy’ỹháicha.
Testimonio nde erekóva Jesucristo Expiasiõre ha’e peteĩ tembiporu ipu’akapáva. Ambue mba’e arekóva ha’e ñembo’e, Mormón Kuatiañe’ẽ ha ambue escritura-kuéra, ha pe tembiapo erekóva umi sacerdocio ordenanzape. Opaite umíva oguerúta pe Espíritu inspirasiõ, ha upévare imba’eguasuete rejerovia.
Ndekatupyry ha ejapo hağua Cristo ojapohaguéicha3, ejepy’amongeta kóva ko principio Evangelio rehegua hasy’ỹvare: Jesucristo Expiasiõ rupive ñande ikatuha jajoguave pe ñande Ru Yvagaguápe ikatu hağua jaikove oñondivepa ára opave’ỹ meve joajúpe familiaicha..
Ndaipóri doctrina imba’eguasevéva ñande obrape ğuarã Jesucristo Expiasiõgui. Opa araporã arekóvape, etestifika pe Salvadorgui ha pe Ijehasa’asy expiatorio pu’akágui. Eiporu umi escritura ombo’éva Hese ha mba’érepa ha’e pe techaukarã oĩporãmbáva opavépe ğuarã4. Tekotevẽta e’estudia kyre’ỹme. Ani ejepy’apyete umi mba’e vyroreíre ani hağua embohasa araporã erekóva eñemo’arandu hağua pe doctrínagui ha pe Ñandejára rekombo’ekuéragui. Peteĩ pyenda doctrinal personal mbarete reheve, nde ikatu ha’e peteĩ tembiporu ipu’akapáva ekomparti haguã pe añetegua umi oikotevẽtereíva ndive.
Jaservi porãve ñande Ru Ygavaguápe ha’éramo peteĩ pu’akaporã ambue tapichakuérape ha jaservíramo chupekuéra5. Pe techaukarã tuichavéva araka’eve oguatava’ekue yvy’ape ári ha’e ñande Salvador Jesucristo. Iministério terrenal henyhẽva’ekue tekombo’e, servicio ha mborayhúgui. Oguapyva’ekue tapicha Ha’e oĩkuaa’ỹva ndive; ohayhuva’ekue mayma umívape; ohecha hekotevẽkuéra ha ombo’e chupekuéra Hi’evangelio. Ha’e ñane’invita jasegui haguã pe Itechaukarã oĩporãmbáva.
Aikuaa Hi’evangélio ha’eha py’aguapy ha vy’a rape kóva ko tekovépe. Ajerure ñanemandu’a hağua jajapo pe Ha’e ojapova’ekue ha ñakomparti hağua ñane mborayhu, jerovia ha kuaa pe añetegua rehe umi ambue tapicha ne’íraveguetei ndive omboaje pe Evangelio resape mimbi. Jesucristo rérape Amén.