Pe discipulado mba’epohýi rory
Elder Ronald A. Rasband rupive
Umi Setenta presidenciagua
Ñande liderkuérape ñasostene ha’e peteĩ privilegio; oguerúva responsabilida ñandéve ğuarã ñakomparti hağua hendivekuéra imba’epohýi ha ha’e hağua Ñandejára Jesucristo remimbo’ekuéra.
Pe 20 de Mayo año pasádope, peteĩ yvytujere’atã ombyaipa pe tavaguasu Oklahoma rembe’y, EE.UU. centralpe, ohejávo peteĩ pypore orekóva 1.6 km ipekue ha 27 km ipukukue. Ko yvytuvai, ha hetaite yvytujere’atã opa mba’e rundiha, omoambuepaite pe tenda opytáva ha umi tapicha rekove ohasakuévo.
Peteĩ semánante oiko rire pe yvytujere’atã pochyete, oje’e chéve avisita hağua pe tenda umi óga ha tachipa mba’ekuéra isarambipahápe umi vecindáriore oñehundi ha oñemonandíva.
Aha mboyve, añomongeta ñande querido profeta, Presidente Thomas S. Monson ndive, irorýva kóichagua tembiapo Ñandejárape ğuarãre. Respétope, ndaha’éi pe ijoficíorente, ha katu pe ipy’aporãre avei, che aporandu chupe, “Mba’épa eipota ajapo? ¿Mba’épa eipota che ha’e?”
Ha’e ojagarra che po mborayhúpe, ojapotaháicha maymáva umi tekove imba’e mbyasýva ndive ha umi omba’apóva ndive pe mba’evaiete oikohaguépe oĩramogui kuri ha’e upépe, ha he’i:
“Peteῖháme, ere umívape ahayhuha chupekuéra.
“Upéi, ere umívape añembo’eha hína hesekuéra.
“Ha upéi katu, eme’ẽ aguyje opavave umi oipytyvõva hínape.”
Setentagua Presidencia miembroicha, añandukuaa imba’eguasuha pe responsabilida umi ñe’ẽ Ñandejára he’iva’ekue Moisespe oĩháicha:
“Embyaty chéve ğuarã setenta kuimba’e umi anciano Israelgua apytégui, ha umi nde reikuaáva ha’eha anciano ha iprincipalkuéra …
“Ha che aguejýta ha añemongetáta nendive upépe; ha ajagarráta pe espíritu nde pype oĩvagui [Moisés] ha amoĩta hesekuéra, ha ogueraháta hikuái nendive umi tavaygua mba’epohýi, ha ndereguerahamo’ãi nde ne’año”1.
Ymaguare ko’ã ñe’ẽ, ha katu pe Ñandejára reko naiñambuéi.
Ko’áğa, pe Tupaópe, Ñandejára ohenói 317 Setenta, oservíva 8 quórumpe oipytyvõ hağua umi Doce Apóstolpe ogueraha hağua mba’epohýi oraháva pe Primera Presidencia. Vy’ápe che añandu upe responsabilida chepy’aite guive, umi ambue Autoridad Generalcha. Upevére, nda’oreñoi roipytyvõva ko tembiapo gloriosope. Tupaogua miembro háicha, opavave ñadekuéra jareko hechapyrãva araporã jahovasa hağua ambue tapichakuéra rekove.
Che añemoarandu ñande querido Profétagui umi tapicha ohasava’ekue pe yvytuvai rupi oikotevẽha: mborayhu, ñembo’e ha añeme’ẽva’erãha aguyje umi tapicha po oipytyvõvape.
Ko ka’arúpe, maymáva ñande jahupíta ñande po ha ñasostenéta pe Primera Presidenciape ha pe Quórum Doce Apóstolkuérape ha’eha hikuái profeta, techapahára ha revelador ko Iglesia de Jesucristo de los Santos de los Ultimos Días-pe. Ko’ãva ndahe’éi peteĩ jepokuaante, ni ojejapónteva umi oñehenoivape ha’e hağua Tupaogua oficial general. Ha’e ñandéve guarã peteĩ mba’eguasu pe ñande liderkuérape ñasostene; oguerúva responsabilida ñakomparti hağua hendivekuéra pe imba’epohýi ha ha’e hağua Ñandejára Jesucristo remimbo’ekuéra.
Presidente Monson he’iva’ekue:
“Ojere ñanderehe tapicha oikotevẽva ñande techakuaa, ñane ñemokyre’ỹ, pytyvõ, angapyhy ha mborayhu, taha’e familiar, anguirũkuéra, umi tekove jaikuaáva térã tapicha jaikuaa’ỹva. Ñande ha’e Ñandejára po ko vyv’ape ári, jarekóva tembiapouka jajapo hağua servicio ha ñamopu’ã hağua Ita’yrakuérape. Ha’e oikotevẽ opavave ñandehegui…
“‘…Pejapóramo ko’ã peteĩre …cherehe pejapo’ [Mateo 25:40]”2.
¿Ñambohováitapa mborayhúpe jareko vove araporã jajapo hağua peteĩ visita, peteĩ llamada, térã jahai hağua peteĩ mensaje térã jahasa hağua peteĩ ára jajesarekóvo ambue tapichakuéra ñeikotevẽ rehe? ¿Térã katu ha’éta ñande pe karia’ýicha he’iva’ekue iñe’ẽrenduha opa Ñandejára rembiapoukapykuérare?:
“Opaite ko’ãvare cheñe’ẽrendúkuri che mitãrusu guive. ¿Mba’e piko aikotevẽve”?
“Jesús he’i chupe: “Neporãmbaséramo, tereho, evende pe erekóva ha eme’ẽ imboriahúvape, ha erekóta mba’ehepy yvágape; ha eju, chesegui”3.
Oñehenói kuri pe karia’ýpe peteĩ servicio tuichavévape Ñandejára ykére ojapo hağua pe yvága reino rembiapo ko yvy’ape ári, ha katu ha’e oñemboyke, “oguerekógui heta mba’ehepy.”4.
¿Mba’e ja’e ñande umi ñane mba’ehepykuérare? Jahecháma mba’épa ikatu ojapo umívagui pe yvytujere’atã peteĩ tesapirĩme. Imba’eguasueterei mayma ñandekuéra ñambyaty umi mba’ehepy yvágape, jaipurúvo ñane tiempo, talentokuéra, ha sasõjeiporavorã jarekóva Ñandejára servíciope.
Jesucristo ojapónte hína ñehenói “Eju, chesegui”5. Ha’e oguatava’ekue Ijyvýre Hemimbo’ekuéra ndive jepytasópe. Ha’e oguata gueterei ñande ykére, ñane pytyvõ ha ñane sambyhývo. Jasegui pe Hechaukaha iporãmbáva he’ise jehechakuaa ha ñambotuicha pe Salvadorpe, oropu’akava’ekue opa ñane mba’epohýi pe Hi’expiasiõ marangatu ha oporosalváva rupive, ha’éva servicio paha. Pe Ha’e ojeruréva opavave ñandekuérape ha’e ñande katupyry hağua ha ñaimeporã jagueraha hağua peteῖ discipulado “mba’epohýi” rory.
Aĩme aja Oklahomape, arekókuri araporã aikuaávo umi familiakuéra opytavaiva’kue yvytujere’atã rire. Avisita aja familia Sorrels-pe, che mopirĩ pe itajýra hérava Tori rembiasakue, uperõ guare ha’e oĩkuri 5to. grado escuela Plaza Towerspe. Ha’e ha pe isy oĩ hína ko’ápe ñanendive ko árape.
Tori ha hi’anguirũkuéra oñemocha’ĩ peteĩ báñope oñemo’ã hağua ohasa peve pe yvytujere’atã ombetíva tyapuvaípe pe escuelare. Pejapysakami amoñe’ẽvo Tori he’iva’ekue upe mba’e ojehúvare pe árape:
“Che ahendu mba’e oñembotáva pe téchore. Aimo’ã ha’eha amandáu. Pe tyapu hatã hatãve ohóvo. Ajapo peteĩ ñembo’e Tupã Yvagaguápe opavavépe oremo’ã hağua ha roĩporãmba hağua. Upévo, rohendu peteĩ pu atã ha’erõguáicha mba’e oipyte’atãva ryapu, ha pe técho ore árigua ojeipa. Yvytu’atã kuri ha umi mba’e pehẽngue ovevejoa ha che rete nupãmba. Pytũvékuri okápe ha ha’ete hũmbáva pe yvága, ha katu nda’upéichaira’e, ha’ékuri pe yvytujere’atã ryepypegua. Ambotýnte che resa aha’arõvo ha añembo’e opa pya’e hağua.
“Upe jave oῖ kirirĩ.
“Ajesape’ávo, ¡ahecha peteĩ cartel orekóva señal he’íva “alto” pe che rasa renondetépe! Haimete oja che tĩre”6.
Tori, isy, mbohapy iñermanokuéra ha heta iñanguirũ oĩva’ekue hendive escuélape, milagrosamente nomanói upe yvytujere’atãme; ha katu siete hapichakuéra omano.
Pe semana paha umi hermano sacerdocio orekóva ome’ẽkuri heta jehovasa miembrokuéra ohasa’asývape pe yvytuvai rupi. Amomba’eguasu ikatúre ame’ẽ peteĩ jehovasa Tóripe. Amoĩvo che po iñakã ári, peteĩ che escritura ahayhuvéva ou che akãme: “Che aháta penerenonderã. Che aĩméta pende po akatúape ha nde po asúpe, ha che Espíritu oĩta pene korasõme, ha che angelkuéra ojeréta pende rehe, pendejoko hağua.”7.
Añemoñe’ẽ Tóripe imandu’a hağua pe ára peteĩ Ñandejára rembiguái omoĩrõguare ipo iñakã ári ha he’írõguare ha’e oñemo’ã hague angelkuérare pe yvytuvai aja.
Pe jaipyso pe ñande po ñañojopytyvõ hağua ojupe, oimeraẽ mba’épe, ha’e peteĩ mborayhu techaukaha opave’ỹva. Péichagua servicio ha’e pe ahechava’ekue Oklahomape.
Py’ỹi, jareko araporã ñaipytyvõ hağua ambue tapichápe ára vai aja. Ko Tupao miembro háicha, mymáva jareko pe sagrada responsabilida “jagueraha ojupe ñane mba’epohyikuéra ivevui hağua”8, “ñamoangapyhy umi oikotevẽvape angapyhy”9, ha [jahupi] umi ipo’áva ha [ñamombarete] tenypy’ã ikangývape”10.
Hermano ha hermanakuéra, tuicha aguije oreko Ñandejára opavave penendivekuéra umi jaipapakuaa’ỹva ára ha tembiapo servicio rehegua pejapova’ekuére, tuicháva ha michĩva, peẽ peikuave’ẽva ára ha ára pojera ha torýpe.
Pe Rey Benjamin ombo’eva’ekue Mormón Kuatiañe’ẽme, “Peĩme jave pende rapicha pytyvõme, peimehánte pene Tupã pytyvõme.”11.
Jajepytasóvo jaservi hağua ñane hermanokuérape ikatu ñandeguia jaiporavo hağua pe imarangatúva ñande rekovépe ha ñanembosako’i ñamomba’eguasu ha jahayhu hağua pe Ñandejára ohayhúva. Jajapóvo péicha, jatestifika, ñande rekovete rupive, ñande ha’eha Hemimbo’ekuéra. Ñamba’apóramo Hembiapópe, ñañandu oῖha Ijespíritu ñanendive, ha jakakuaa testimónio, fe, jeroviapy ha mborayhúpe.
Che aikuaa oikoveha che Redentor, Jesucristo; ha Ha’e oñe’ẽha Iprofeta ndive ha rupive, ñande querido Presidente Thomas S. Monson, ko ã, ñande árape.
Ajerure opavave tajajuhu vy’apavẽ oúva pe sagrado servicio jagueraha hağua ojupe ñane mba’epohyikuéra, jepe umi mba’eve’ỹva ha michĩvape avei; Jesucristo rérape. Amén.