Oĩramo ndoguerekóiva arandu
Elder Marcos A. Aidukaikis rupive
Setentagua
Tupã orreveláta pe añetegua umi ohekávape he’ihaichaite Escitura-kuérape.
Kokuehe, che nieto oguerekóva 10 año, ostudiákuri hína internet-pe yvypóra apytu’ũ rehegua, oikoségui ha’e cirujano-ramo; ndahasýi ojehechakuaa hag̃ua iñakãporãveha chehegui.
Ore rohayhu pe internet jeporu ógape; roiporu umi redes sociales, correo electrónico ha ambue medio roñe’ẽ hag̃ua ore pariente ha umi ore anguirũ ndive. Che ra’ykuéra ojapo heta umi hembiaporã mbo’ehaopegua internet rupi.
Taha’e ha’éva porandu roguerekóva, roikotevẽramo kuaauka, roheka internet-pe ha rojuhu heta mba’e peteĩ tesapirĩme; hechapyrãite ningo.
Pe internet ningo ome’ẽ ñandéve heta oportunida jaikuaa hag̃ua. Upevére, Satana oipota jaiko vy’a’ỹme ha omoypytũ maerãpa añete umi mba’e; ha’e oiporu ko tuicha tembiporu omyasãi hag̃ua py’amokõi ha kyhyje, ha ohundi hag̃ua jerovia ha esperanza.
Hetaite mba’e oĩvagui internet-pe, jahechava’erã moõ gotyopa ñamoĩta ñane mbarete jarekóva. Satana ikatu ñanemohembiapo, ñaneresamombia ha ñanembojepokuaavai jaiporavópe pe momarandu, heta ijapytepegua ikatúva ha’e yty meme.
Ñdajaikoiva’erã yty apytépe.
Pemañáke pe guía Escritura-kuéra ome’ẽvare ñandéve: “…opa yvypórape oñeme’ẽ Cristo Espíritu ohechaporã hag̃ua iporãva pe ivaívagui; upévare, che ahechauka peẽme mba’éichapa pehusgava’erã; opa mba’e oporohenóiva ojejapo hag̃ua iporãva, ha oporomokyre’ỹva ojeguerovia hag̃ua Cristo-pe, oñembou Cristo pu’aka ha don rupive, upévare ikatúta peikuaa…Tupã mba’eha”1.
Añetehápe, ñambohovake pe mba’e José Smith ombohovakeva’ekue imitãrusúpe: py’ỹiete niko ndajaguerekói arandu.
Tupã rréinope ojehauyhu ha oñemokyre’ỹ pe añetegua jeheka, ha katu ndojejokói ni ndojekyhyjéiva chugui. Ñandejaraite voi he’i’asy Tupaogua miembro-kuérape oheka hag̃ua kuaapy2. Ha’e he’iva’ekue:“… Peheka jesarekópe ...heẽ, peheka arandu ñe’ẽnguéra umi kuatiañe’ẽ porãme; peheka kuaapy, pe estudio ha jerovia rupive” 3. Upevére, ¿mba’éicha piko ikatu jaikuaa pe añetegua ko mundo oñemoĩ véva ohóvo umi Tupã mba’ekuéra rehe?
Escritura-kuéra ñanembo’e péicha:
Primero, ikatu jaikuaa pe añetegua ñama’ẽ vove hi’akuérare.
Ñandejára he’iva’ekue pe Ituicháva Sermón del Monte-pe:
“Ha péicha, opa yvyra iporãva ome’ẽ yvara’ỹi porã, ha katu pe yvara ivaíva ome’ẽ yvara’ỹ vai …
“Ha péicha, umi hi’a rupi peikuaáta”4.
Pe profeta Mormón ombo’eva’ekue avei kóva ko principio he’ívo: “..Hembiapokuére reikuaáta chupekuéra; hembiapokuéra iporãramo, ha’ekuéra iporã avei”5.
Ajerure opavavépe ostudia hag̃ua ko Tupao a’kuéra ha tembiapokuéra.
Umi oikuaaséva pe añetegua, ohechakuaáta pe juavy ajapóva ko tupao ha imiembrokuéra pe tenda ha’ekuéra oĩháme. Ohecháta avei hikuái umi oseguíva hekombo’ekuéra oikoporãveha. Umi ohesa’ỹijóva hi’a ohecháta pe Iglesia de Jesucristo de los Santos de los Últimos Días hi’a he ha oje’useha.
Segundo, ikatu jatopa pe añetegua ñandete voi ñañandúramo pe ñe’ẽ.
Pe profeta Alma ombo’eva’ekue:
“ Ko’ág̃a, ñambojojáta pe ñe’ẽ peteĩ yvara’ỹire...peme’ẽramo tenda oñeñotỹ hag̃ua peteĩ yvara’ỹi pene korasõme, péina ápe, ha’éramo peteĩ yvara’ỹi añetegua...ha napemombóiramo pende jerovia’ỹ rupi...péina ápe, oñepyrũta okakuaa pene korasõme; ha...peñepyrũta peje pende pype: Kóva ha’éne peteĩ ivara’ỹi porã...oñepyrũgui ombotuicha che ánga; heẽ, oñepyrũ omyesakã che apytu’ũ, heẽ, oñepyrũ heterei chéve …
“Ha, péina ápe, ¿kóva piko nomombaretemo’ãi pende jerovia? Heẽ, omombaretéta pende jerovia …
“opa yvara’ỹi ome’ẽgui ambue ha’eichagua”6.
¡Hechapyrãitéva jerure peteĩ Ñandejára profétagui! Oñembojoja peteĩ experimento cietífico rehe, ojejerurégui ñandéve ñamomba’apo hag̃ua pe ñe’ẽ, ha oñeme’ẽ ñandéve mba’éichapa ñamedíta ha oje’e ñandéve mba’épa oikóta, jaseguíramo umi techaukakuéra.
Péicha, Escritura-kuéra ñanembo’e ikatuha jaikuaa pe añetegua ñama’ẽrõ umi hi’áre, péva he’ise, ñandete voi jajapóramo, ñamoĩramo tenda pe ñe’ẽme g̃uarã ñane korasõme ha ñañotỹramo, yvara’ỹicha.
Upevére, oĩ peteĩ tercer techauka jaikuaa hağua pe añetegua ha péva ha’e rrevelasiõ personal rupive.
Pe sección 8 Doctrina ha Konvenio-kuérape oñembo’e pe rrevelasiõ ha’eha jekuaa.: “… jekuaa opa mba’e rehegua [jajeruréva] jeroviápe, peteĩ korasõ añete reheve, jagueroviávo [jahupytytaha]”7.
Ha avei, Ñandejára he’i ñandéve mba’éichapa jahupytýta upe rrevelasiõ: “… añe’ẽta ne’apytu’ũ ha nekorasõme pe Espíritu Santo rupive oútava nde’ári ha oikóta nekorasõme”8.
Upévare, oñembo’e ñandéve ikatuha jahupyty pe rrevelasiõ jajeruréramo jerovia reheve, korasõ añete reheve ha jagueroviáramo jahupytytaha.
Pema’ẽke Ñandejára he’i porãva’ekue omomarandúvo: “Nemandu’áke jerovia’ỹre ndaikatuiha rejapo mba’eve; upévare, ejerure jeroviápe”9. Jerovia oikotevẽ mba’apo, pe ñahesa’ỹijo ñane apytu’ũme ha upéi ñaporandu, ñembo’e rupi, oĩ porãpa.
Ñandejára he’iva’ekue:
“…ha [oĩporãramo], nde py’a hakuvóta nde pype: upévare, eñandúta oĩ porãha.
“Ha noĩ porãiramo, nereñandumo’ãi upe mba’e, ha katu oúta nde ári peteĩ py’amongeta sarambi nembyesaráitava pe oĩ vaívagui”10.
Jerovia tembiapo’ỹre omano11. Ha péicha “ [pejerure] jerovia reheve, ndapedudáivo mba’evépe”12.
Areko peteĩ che anguirũ ndaha’éiva ñande fe rehegua ha he’i chéve ha’e ndaha’eiha peteĩ yvypóra espiritual. Nomoñe’ẽi Escritura-kuéra ni noñembo’éi he’ígui nontendeiha Tupã ñe’ẽ, ni ndoikuaa porãiha Ha’e oikoveha. Péva pe jepokuaa ohechauka ndoguerekoiha espiritualida ha ogueraháta chupe pe rrevelasiõgui iñambuévape, oikuaauka haguéicha Alma, he’iva’ekue:“Ha upévare, pe omohatãva ikorasõ pévape oñeme’ẽ’ive iñe’ẽ”.
Ha katu he’i avei: “… ha nomohatãivape ikorasõ oñeme’ẽ hetave iñe’ẽgui, ojeheja peve chupe oikuaa Tupã mba’eñemimbykuéra oikuaapaite peve”13.
Alma ha Mosiah ra’ykuéra ome’ẽ techaukarã pe principio he’ívagui pe jerovia oikotevẽha tembiapo. Mormón Kuatiañe’ẽme ñamoñe’ẽ:
“ …ohesa’ỹijókuri hikuái umi escritura jesarekópe, oikuaa hag̃ua Tupã ñe’ẽ.
“Ha katu ndaha’éi upéva añónte; ha’ekuéra oñeme’ẽkuri heta ñembo’e ha ajúnope; upévare oguereko hikuái espíritu profesía rehegua ha espíritu rrevelasiõ rehegua”14.
Jajerure korasõ añete reheve imba’eguasu avei ko mba’e jejapópe. Jaheka añetéramo pe añetegua, jajapóta opa ikatúva jatopa hag̃ua péa, ha péva ndive oike ñamoñe’ẽ umi Escritura, jaha umi Tupao ñembyatýpe ha ñañeha’ã ñaneñe’ẽrendu Tupã rembiapoukapykuérare. Avei he’ise ñaimeporãha jajapo hağua Tupã rembipota jaikuaa vove.
Pe Jose Smith ojapova’ekue ohekavoguare arandu ha’e peteĩ techaukarã iporãmbáva pe mba’épa he’ise jaguereko peteĩ korasõ añete. Ha’e he’iva’ekue oikuaaseha mávapa ha’e pe Tupao añetéva, “oikuaa hag̃ua mávapepa [ojoaju]va’erã”15. Oñembo’e mboyve ha’e oĩma ñembosako’ípe iñe’ẽrendu hag̃ua oimera’ẽichagua ñembohovái oñeme’ẽvare chupe.
Jajerureva’erã jeroviápe ha korasõ añete reheve. Ha katu ndaha’éi upéva añónte, jagueroviava’erã avei jahupytytaha pe rrevelasiõ. Jajeroviava’erã Ñandejárare ha ñaha’arõ ipromesakuéra rehe. Penemandu’áke pe ojehaiva’ekuére: “Ha oĩramo pende apytépe iñarandu’ỹva, tojerure Tupãme, ome’ẽva opavavépe heta ha jeja’o’ỹme, ha oñeme’ẽta chupe”16. Mba’eguasuete ningo ko promesa!
Ajerure opavavépe peheka hag̃ua pe añetegua peiporúvo oimera’ẽ ko’ã mba’e ojehechaukáva, ha katu voi, pe Tupã rrevelasiõ personal rupive. Ha’e orreveláta pe añetegua mayma ohekávape umi escritura-pe oĩ ha he’iháicha. Oñeikotevẽ hetave tembiapo peteĩ jeheka internet-pegui, ha katu ovale la pena.
Atestifika kóva ha’eha Jesucristo Tupao añetegua. Ahechava’ekue hi’a heta comunida rupi ha hetaiterei yvyporakuéra rekovépe, ha che famíliape avei; upévare, aikuaa añeteguaha. Amoĩva’ekue avei pe ñe’ẽ che rekovépe heta año aja ha añanduva’ekue ojapóva che ángare: upévare, aikuaa añeteguaha. Ha katu pe imba’eguasuvéva ha’e che aikuaahague añeteha chejehegui pe rrevelasiõ rupi pe Espíritu Santo pu’aka rupive; upévare aikuaa añeteguaha. Ajerure opavave peẽme pejapo hag̃ua avei upéicha. Jesucristo rérape Amén.