Mba’eichagua kuimba’e piko?

Elder Donald L. Hallstrom rupive

Setentagua Presidencia

Mba’eichagua moambue piko tekotevẽ oiko hağua ñandehegui pe kuimba’e ha’eva’erã ñande?

Ñama’ẽvo ko ñembyaty opa yvy’ári oikóvare, ñañemomandu’a ndaiporiha mba’eve ikatúva oñembojoja kóva ko atýre, mamove hendápe. Ko sesiõ sacerdocio-gua conferencia general-pegua ojejapo oñehekombo’e hağua umi sacerdocio orekóvape mba’éichagua kuimba’épa ha’eva’erã ñande. (tojehecha3 Nefi 27:27) ha jajepy’amongeta jahupyty hağua upe mba’e.

Che arekórõguare Sacerdocio Aarónico Hawaii-pe, ojapo medio siglo, ha upéi misionero-icha Inglaterra-pe, roñembyaty jepi umi centro de reunión-pe rohendu hağua (ñeha’ãmbaitépe) pe sacerdocio sesiõ peteĩ teléfono rupive. Upe rire, umi satélite rupi oñetransmiti umi tenda Tupao poravopyrépe, orekóva umi antena guasu ha, umíva rupive, rohendu ha rohecha umi sesiõ. Ropytava’ekue techapyrãme upe tecnología-re! Sa’i tapicha oimo’ãneraka’e ko árapegua mundo-pe, oimeraẽ tekove orekóva internet peteĩ teléfono inteligente-pe, tablet, térã computadora ikatuha ohupyty ko atypegua mensaje.

Upevére, ko tuicha ñembohasy’ỹ ñahendu hağua Ñandejára rembiguaikuéra ñe’ẽ, ha’éva Ñandejaraite oñe’ẽrõguáicha (jahecha D. y C. 1:38), mba’eve’ỹta nañaĩ porãiramo ñahendu hağua iñe’ẽ (tojehecha D. y C. 11:21) ha upéi jasegui hağua. Ñe’ẽ mbykýme, ko conferencia general ha ko sacerdocio sesiõ potapy ojehupytýta ñaĩporãramo añoite jajapo hağua, ha ñaĩporãramo ñañemoambue hağua.

Heta árama, che aservirõguare obíspoicha. Are, areko entrevista peteĩ kuimba’e orebarriogua itujaitereivéva chehegui ndive. Upe hermano orekókuri joavy hembireko ndive ha imombyry ifamiliakuéragui. Hasý’imi chupe omba’apo puku peteĩ hendápe, ndoguerekói angirũ hi’ağuíva chugui ha hasyetereívaicha chupe oñemongeta hağua umi barriogua miembro ndive ha amo ipahápe ndoservisevéima pe Tupaópe. Roñomongeta atã jave umi py’ara’ã orekóva hekovépe rehe, ha’e oñemoağui cherehe, ha ombopahávo hetaite mba’e roñe’ẽva’ekue, he’i chéve, “Obispo, che cherekovai, ¡ha che péichantevoi!”.

Upe mba’e chemoñe’ẽngu upe pyhare ha chepy’ajokóva upe guive. Pe kuimba’e ipy’apeteĩmarõ, ha oimeraẽva ñande ñandepy’apeteĩ vove, ha ja’e pe “che péichantevoi”, jahejarei katupyry jarekóva ñañemoambue hağua. Ikatúkuri ñamopu’ã pe poyvi morotĩ, jahejarei ñane arma, ja’e japerdemaha ha péichante ñañeme’ẽ, ha opa po’a jarekova’ekue ñagana hağua okañy. Oĩramo jepe ñande apytépe he’íva ñande péicha ndaha’eiha, ikatu opavave ñande jahechauka jarekoha peteĩ térã mokõi péichagua tekovai, “Che péichantevoi”.

Upéicha, ñañembyaty ko sacerdocio atýpe pe ko’áğa ñande ha’éva ndaha’éigui pe ñande ikatúva ha’e. Ñañembyaty ko’ápe ko pyharépe Jesucristo rérape; ñañembyaty jaikuaágui pe Ijexpiasiõ ome’ẽha opavave ñandéve katupyry ñaneambue hağua, taha’e ha’éva umi tekokangy, tekovevýi, térã tekopotavai jarekóva. Ñañembyaty ñaha’arõvo pe, taha’e ha’éva umi ñane rembiasakue, ñanerenonderã ikatuha iporãve.

Jajúvo ko atýpe “jaipota añetégui” ñemoambue (Moroni 10:4), pe Espíritu ikatu oikepa ñane korasõ ha ñane apytu’ũme. Ñandejára ohechauka haguéicha Profeta José Smith-pe: “Ha ojehúta, pe…omomba’apóramo hikuái jerovia cherehe”—nemandu’áke pe jerovia ha’eha peteĩ pu’aka ha tembiapo moñepyrũ— “añohẽta hi’arikuéra che Espíritu ára oñembyaty vove hikuái”(D. y C. 44:2), péva he’ise, ¡ko pyharépe!

Peimo’ãramo umi py’ara’ã perekóva ndaikatuiha oñemyatyrõ, peheja tamombe’u peẽme peteĩ kuimba’e ore rojuhuva’ekue peteĩ táva michĩ Hyderabad okápe, India ary 2006-pe. Upe kuimba’e ha’eva’ekue techaukaha pe mba’épa he’ise ñaĩporã ñemoambuerã. Appa Rao Nulu heñoiva’ekue India táva okápe. Ha’e orekorõguare 3 año, ova hese poliomielitis ha hete opytavai. Umi itayvagua ombo’e chupe ndaikatuveimaha ikatupyry mba’everã. Upevére, imitãrusúpe, oikuaa ñane misionerokuérape. Ha’ekuéra ombo’e chupe ikatupyry tuichaveha, kóva ko tekovépe ha pe eternida oútavape avei. Ha’e oñemongarai ha oñekonfirmava’ekue Tupaogua miembro. Peteĩ jehecha ijyvatevévape, ha’e omoĩ tape oñeme’ẽ hağua chupe Sacerdocio de Melquisedec ha oservi hağua peteĩ misión tiempo completo-va. Ha 1986-pe oñe’ordenava’ekue chupe Elder ramo ha oñehenói oservi hağua India-pe. Hasyva’ekue chupe oguata hağua; ojapo opa ikatúva oiporúvo peteĩ yvyra mokõive ipópe, ha ho’ámi py’ỹi. Ha katu araka’eve nde’íriva ndojapokuaaiha. Ha’e oñekomprometeva’ekue oservitaha imisión tekojoja ha ñemova’ỹme, ha upéicha ojapo.

Roikuaarõguare hermano Nulu-pe 20 año oservi rire imisión, ha’e oremomaitei vy’ápe pe tape pahápe ha oregueraha peteĩ tape ijyvy joja’ỹvare pe hóga mokõi ikotývape, oikohápe hembireko ha mbohapy mitã ndive. Upérõ hakueteri ha ipohýi pe ára. Ha’e oguata’asy gueteri, ha katu noñembyasýi ijehe. Oñeha’ãmbaitégui, oiko chugui peteĩ mbo’ehára ha ohekombo’e umi mitã itavaguápe. Roikéramo pe hogamíme, upei’ete chegueraha peteĩ hóga tenda ruguápe ha oguenohẽ peteĩ mba’e orekóva imba’e hepykuéra ndive. Oipotákuri amoñe’ẽ peteĩ kuatia’i he’ívape, “Che mba’eporã ha jehovasa Elder Nulu-peğuarã, peteĩ misionero ipy’aguasu ha ovy’áva; [ára] 25 junio-pe, 1987; [ojahaíba] Boyd K. Packer rupive”. Uperõguare, Elder Packer ovisita India ha oñe’ẽ peteĩ misionero atýpe, ha’e he’ijeyva’ekue Elder Nulu-pe ikatupyryha. Ñemombykýpe, pe hermano Nulu he’iva’ekue chéve upe ára 2006-pe ha’e pe Evangelio ¡omoambuehague chupe tapiaite ğuarã!

Pe rovisita aja familia Nulu-pe, oho orendive pe presidente de misión. Ha’e oĩva’ekue upépe o’entrevista hağua hermano Nulu, hembireko ha imembykuérape, umi tuvakuérape oñeme’ẽtagui iñinvestidura ha ojeselláta avei, ha umi mitã ojeselláta ituvakuéra rehe. Roikuaauka avei pe familia-pe ñembosako’i ojejapova’ekue oho hağua hikuái Templo Hong Kong, China-pe, oñeme’ẽ hağua chupekuéra ko’ã ordenansa. Ha’ekuéra hasẽ vy’águi, pe ikepegua ñeha’arõ puku ojejapótamagui.

Mba’e oñeha’arõ peteĩ orekóvagui Tupã sacerdocio? Mba’éichagua moambue tekotevẽ, oiko hağua ñandehegui pe kuimba’e ha’eva’erã ñande? Ame’ẽ mbohapy ñemoñe’ẽ:

1. ¡Ñande ha’eva’erã sacerdocio-gua kuimba’e! Taha’e mitãrusu jarekóva pe Sacerdocio Aarónico, térã kuimba’e jarekóva pe Sacerdocio de Melquisedec, ñande ha’eva’erã kuimba’e sacerdocio-gua ohechaukáva mbarete espiritual jajapógui konveniokuéra. Pablo he’ihaguéicha: “Chemitãrõguare, añe’ẽva’ekue mitãicha, ajepy’amongeta mitãicha, ahusga mitãicha; ha katu oikómavo chehegui peteĩ kuimba’e, aheja umi mitã reko” (1 Corintios 13:11). Ñande ñaneambueva’erã jarekógui pe sacerdocio; ndaha’éi oñembotuicháva ni ijejapóva ni ha’enteséva térã ñane rekomarangatu, hasy’ ỹva oñehekombo’e ha ipy’aguapýva. Oñeme’ẽ ñandéve pe sacerdocio ha umi heta ijoficio imba’eguasuva’erã ñandéve. Ndajahechaiva’erã ha’erõguáicha peteĩ oñeme’ẽnteva mba’eve’ỹre peteĩ edápe, ha katu ha’eva’erã peteĩ tembiapo marangatu jajapóva py’amongetápe. Ñañanduva’erã tuicha po’a ha aguije ha tojekuaa opa tembiapo jajapóva rupi. Sapy’a mimínte jajepy’amongetáramo pe sacerdocio rehe, ñaneambueva’erã.

2. ¡Ñame’ẽva’erã servicio! Pe sacerdocio jereko he’ise ñamomba’apo ñande ñehenói (véase D. y C. 84:33) ambue tapichakuérape ñeipytyvõ rupi. Ñande ndaha’éi pe tekove ha’evarã jahejareíramo ñanerembiapo imba’eguasuvéva ñaipytyvõ hağua ñane rembireko ha ñane familiakuéra, nañamoporãiramoTupaogua ñehenói térã ñakumpli vai vaíramo, térã jajepy’apýramo ambue tapicháre ñandéve ouporã javénte. Pe Salvador he’iva’ekue, “Ehayhúta Ñandejára ne Tupãme opa ndepy’aite, ha opa ne’angarugua, ha opa ne’apytu’ũ guive” (Mateo 22:37) ha upéi he’ive, “Cherayhúramo, cheservíta”. (D. y C. 42:29). Pe ñandejehénte jehesagui ha’e mba’e oñemoĩva pe sacerdocio responsabilida rehe, ha péva ha’éramo ñande reko, ñaneambueva’erã.

3. ¡Ñane rekomarangatuva’erã! Ikatu che ndarekói katupyry orekova’ekue Elder Jeffrey Holland, oñe’ẽrõguare yma peteĩ sacerdocio sesiõ aja, “añemoĩ hağua tova továre penderovake, pe tata che ñe’ẽme reheve ahapy’imi hağua pende tyvyta” (“Ñande ningo ha’e umi soldado,” Liahona, noviembre de 2011, pág 45); ha katu, che hermano-kuéra ahayhúva, tekotevẽ japáy jahecha hağua mba’éichapa umi tekovai ojeguerohory katúva ko yvy’ári ombopytupa ñande sacerdocio pu’aka. Jaroviarõ ikatuha ñañombojaru umi mba’etie’ỹ térã ñaneñe’ẽrendu’ỹ pe ley de castida rehe térã ñanderekojoja’ỹ oimeháicha, ha ndojapovaimo’ãi ñanderehe ha ñandefamíliare, peñembotavy. Moroni he’iva’ekue: “…pema’ẽ pejapo hağua opa mba’e tekomarangatúpe” (Mormón 9:29). Ñandejára he’i tuicha pu’akápe, “Ha ko’áğa ame’ẽ peẽme tembiapoukapy pejesareko hağua, pendejehe, peime hağua pejesarekópe umi ñe’ẽ jeikove opave’ỹva rehegua rehe” (D. y C. 84:43). Oĩramo pekado oñemoĩporã’ỹva ndohejáiva ñande rekomarangatu, ñañemoambueva’erã.

Peteĩnte mbohovái omyenyhẽva pe porandu ojapova’ekue Jesucristo “Mba’éichagua kuimba’e piko ha’eva’erã peẽ?” ha Ha’e he’iva’ekue mbykymi ha pypukúpe: “Jepeve chéicha” (3 Nefi 27:27). Pe ñehenói “peju Cristo-pe, ha penerekoporãmbaite ipype” (Moroni 10:32), oikotevẽ ha oha’arõ jajapo umi ñemoambue. Poriahuverekópe, Ha’e nañanderejái ñeneaño. “Ha yvyporakuéra oúramo chéve, ahechaukáta chupekuéra ikãngyha…upéramo ajapóta umi mba’e ikãngýva taimbarete chupekuéra” (Éter 12:27). Jejeroviávo pe Salvador expiasiõ rehe, ikatu ñanñemoambue. Péva che aikuaaporã. Jesucristo rérape, Amén.