Akwaaba Nsɛm
Akwaaba ba wiadze mfɛndzanan ehyiadzi na adom dɛ yɛbɛtse Ewuradze ne ndze.
Mo nuanom na nkyerɛbaa na anyɛnkofo adɔfo a hom wɔ wiadze nyina mu, mema hom m’akwaaba ba wiadze mfɛndzanan ehyiadzi yi. Yɛaboa ano dɛ wiadze nyina mu ebusua a yɛpɛ dɛ yɛsɔr hɛn Ewuradze na Agyenkwa, Jesus Christ. Meda hom ase dɛ hom abɛkã hɛn ho.
Mfeda yɛɛ soronko dodow. Mbrɛ ɔbɛdan biara hɛn mu kor biara esũa ndzɛmba a nna yennyim no dada. Adzesũadze binom a nna minyim dada no wɔakyerɛw no wɔ m’akoma pon do wɔ nkyerɛkyerɛ akwan fofor do.
Mfatoho, minyim ara yie dɛ Ewuradze na ɔma N’Asɔr mu dwumadzi ho kwankyerɛ. Ɔkãa dɛ, “Mebɛkyerɛ [wo] dɛ mutum yɛ mankasa m’edwuma.”1
Mpɛn pii na, emi na m’apamfo, gyinabew a ɔyɛ ɔhaw kɛse ber mu no, na yɛayɛ dza yebotum nyina na yenntum nnyɛ bio nkã ho no, yɛdze enyiwa a nyisuwa ahyɛ mu mã no hwɛ dɛ Ɔnoara sian mu besiesie. Yegyina ahobow mu ampaara.
Afei so maatse dza nna Ɔpɛ akã ase yie ber a Ɔkãa dɛ, “Hwɛ, merebɛyɛ m’edwuma ntsɛm wɔ ne ber mu.”2 Bio na bio no meedzi ehurusi ber a Ɔakyerɛ na Ɔama N’edwuma akɔ ntsɛm—wɔ wiadze nyina mu nsan yarba ber no mpo mu.
Mo nuanom na nkyerɛbaa adɔfo, Asɔr no n’ahoɔdzen no gyina asɔrmba hɔn dasegye a daa rinyin na hɔn mbɔdzembɔ do. Fie no mu na wɔtsetse dasegye ara yie. Afe yi a ɔabɛsen no, hom mu dodowara etu asɛmpa adzesũa wɔ hom fie no mpon papaapa. Meda hom ase, na hom mba bɛda hom ase.
Edwumayɛ kɛsenara dɛ yebesiesie Salt Lake Temple no rokɔ do. Fi me ɔfese no muhu edwuma a wɔreyɛ no wɔ temple asaase no do no ara yie.
Maahwɛ edwumayɛfo dɛ worututu ndua a woenyin no no ndwow, pipe na wire adadaw, na nsubura bi a onwin, maadwen ho hia a ohia dɛ hɛn mu kor biara wɔ dɛ yɛdze Agyenkwa no mboa no, yeyiyi nkukunkakar adadaw efi hɛn abrabɔ mu.
Jesus Christ n’asɛmpa no yɛ nnuhu asɛmpa.3 Osian Agyenkwa No Werdambɔ no ntsi, N’asɛmpa no ma hɛn nsato dɛ yɛnkɔ do nsesã, nyin, na hɛnho ntsew yie. Ɔyɛ enyidado asɛmpa, ayarsã, na mpontu. Dɛm ntsi asɛmpa no yɛ enyigyesɛm! Hɛn esunsum dzi dɛw wɔ anamɔn kor biara a yetu kɔ kan.
Israel mboano ne fã bi, na ɔfã so a ohia ara yie, nye hɛn ahyɛdze dɛ ɔman nye dɛ yendzi mu na yeenya pɛ dɛ yɛbɔboa esiesie wiadze no ama Ewuradze Ne Mbae a Otsĩa Ebien no.
Ber a yetsie nsɛm a woesiesie no ahwɛyie mu wɔ Sunsum Krɔnkrɔn no kwankyerɛ do no, moto nsa frɛ hom dɛ, hom mbɔ mpaa mfa nhu dza ɔnnsɛ wɔ hom abrabɔ mu a ɔsɛ dɛ hom yi ama hom eebedzi mu yie.
Mo nuanom na nkyerɛbaa, modɔ hom, na megye dase dɛ hɛn Ɔsor Egya na No Dɔba no dɔ hom ankorankor. Wogyina ayɛ krado dɛ wɔbɔboa wo wɔ anamɔn tu biara edze kɔ kan mu no. Akwaaba ba wiadze mfɛndzanan ehyiadzi na adom dɛ yɛbɛtse Ewuradze ne ndze. Jesus Christ ne dzin mu, amen.