Adakamaa No Nnyi Tum
Ɔnam Jesus Christ No ɔpon Werdambɔ no na enyimnyam Wusoɛr no do, akoma a ebubu botum enya ayarsa, yaw botum abɛyɛ asomdwee, atseetsee botum abɛyɛ enyidado.
Easter Kwesi enyimnyam da yi, hɛn mbofra tow ndwom enyigye mu, “Fefɛw ber fɛɛfɛw bi mu no, Jesus Christ soɛree na Ofii owumaa no a ɔda mu no; Obubuu owu mpokyerɛ mu.”1
Hɛn enyi sɔ nyimdzee a yɛwɔ fa Jesus Christ No Wusoɛr no ho. Naaso, hɛn abrabɔ ber bi mu no, ber a yɛahwer obi a yɛdɔ no papaapa no, yɛtse dɛ hɛn akoma ebubu. Ɔnam seisei wiadze nsan yarba no ntsi, hɛn mu pii ahwer adɔfo—wɔyɛ ebusua mu mba anaa anyɛnkofo.2 Yɛbɔ mpaa so ma hɔn a wɔahwer adɔfo na woridzi ho awerɛhow no.
President Russell M. Nelson akã dɛ:
“Mfe biara a woedzi no, yesũ ma hɔn a yɛdɔ na yɛahwer hɔn. Awerɛhowdzi yɛ dza yɛdze kyerɛ ɔdɔ mapã a ɔkɔ bun mu. …
“Bio, hɛn enyisɔ nnkotum ahyɛ mã wɔ dɛwdzi nkabɔmu a yebenya no ekyir yi ho, sɛ sesei hɛn ntamu anntsetsew wɔ nyinsuwa mu a. Kwan kortsee a yɛbɛnam do eyi ɔyaw efi owu mu nye dɛ yebeyi ɔdɔ efi abrabɔ mu.”3
Yebotum esusu atsenkã a Jesus N’anyɛnkofo, a wodzii N’ekyir na wɔsoom No no,4 nyae ber a wohun No wu no.5 Yenyim dɛ “wodzii awerɛhow na wosũi.”6 Mbeamuduabɔ da no, wonnyim dza obesi Kwesida no, gyama ɔhaw hyɛɛ hɔn do, a wɔrodwendwen mbrɛ wobesi akɔ do ber a hɔn Ewuradze nnyi hɔ. Naaso, wɔkɔr do soom no mpo wɔ owu mu.
Joseph a ofi Arimathea serɛɛ Pilate dɛ ɔmfa Jesus no fun no mma no. Oyii fun no baa famu, dze bobɔɔw ndwera a n’enyi tsew mu, na ɔdze no too nankasa ne nda fofor a otwaa no ɔbotan mu no mu, na opireew ɔbo kɛse hiin nda no ano.7
Nicodemus dze myrrh na aloe mforaforae bae. Ɔboaa Joseph ma wɔ faa fun no na wɔdze no nye ndur no kyekyeer ndwera mu.8
Mary Magdalene na mbaa binom dzii Joseph na Nicodemus hɔn ekyir, kɔhwɛɛ bea a wɔdze Jesus no fun no toe, na wɔyɛɛ nduhuam na ngohuam a wɔdze rebɛsera no.9 Dɛ mbrɛ hɔn mbra fenkyeem tse dɛm mber no mu ntsi, wɔtweɔnee dɛ wɔbɔkɔ do ekesiesie na wɔasera fun no osiandɛ nna Memenda nye Ahomgyeda no.10 Nkyii, Kwesida anapaatu no, wɔkɔr nda no do. Wohun dɛ Agyenkwa no no fun no nnyi hɔ no, wɔkɔbɔɔ esuafo no amandzɛɛ hɔn a wɔyɛ Jesus N’Asomafo. Asomafo no nye hɔn baa nda no ho na wohun dɛ ɔatɔ pan. Ekyir no obiara kɔree ma ɔkaa Mary Magdalene nko, ɔrodwendwen dza esi wɔ Agyenkwa no no fun no ho.11
Mary Magdalene nkõ tsenaa nda no ho. Nda kakra ara nye yi a, ohun ne nyɛnko na no Wura no wu yaayaw no. Seiseiara ne nda no atɔ pan, na onnyim beebi a Ɔwɔ. Nna ɔbor no do dodow, na osũi. Dɛm mber no, Agyenkwa no a Oewu asoɛr baa ne nkyɛn na Obisaa siantsir a orusũ na nyia ɔrohwehwɛ no. Osusuu dɛ turehwɛfo no na ɔnye no kasae, ntsi obisaa dɛ, sɛ ɔwo na afa mo Wura no fun no a, ɔnkyerɛ no mbrɛ ɔdze no akɔto ma ɔnkɛfa no.12
Mususu dɛ Ewuradze gyaa Mary Magdalene ma osui na ɔkyerɛɛ ne yaw.13 Nkyii Ɔbɔɔ ne dzin frɛɛ no, na ɔdaan noho na ohun No. Ohun Christ a Ɔasoɛr no na ɔyɛɛ dasefo maa N’enyimnyam Wusoɛr no.14
Tse dɛ ɔwo, kwan bi do no emi so mubotum atse yaw a Mary Magdalene na n’anyɛnkofo faa mu no ase ber a nna woridzi awerɛhow wɔ hɔn Ewuradze no wu ho. Midzii mfe akron no, mohweer mo nuabanyin panyin wɔ asaase wosow huuhu bi mu. Osiandɛ osii mpofirmu ntsi, ɔgyee me mber kakra ana meretse dza oesi no ase. Awerɛhow maa m’akoma bubui, na nna mibisa moho dɛ, “ebɛnadze yɛɛ mo nuabanyin no? Henfa na ɔwɔ? Henfa na ɔkɔree? Ana mubohu no bio?
Dɛm mber no nna minnyim Nyankopɔn no nkwagye nhyehyɛɛ, na nna mowɔ pɛ dɛ mubohu bea a yefi bae, hɛn abrabɔ yi no botae, na dza obesi hɛn do wɔ owu ekyir. Ana hɛn nyina nnya dɛm pɛ yi, ber a yɛahwer dɔfo bi anaa ber a yerudua nkõdzen ber mu wɔ hɛn abrabɔ mu?
Mfe kakra ekyir, mehyɛɛ ase dwendween mo nuabanyin no ho wɔ kwan soronko bi do. Mususuu dɛ ɔrobɔ hɛn abow mu. Mubobuei abow no, nna ogyina hɔ, na ɔrekã kyerɛ me dɛ, “Munnwui. Metse ase. Menntum amba wo nkyɛn, naaso sesei menye wo bɛtsena na moronnkɔ bio.” Dɛm nsusui no a, ɔyɛ dɛ adaaso ara no, boaa me ma mutumii gyinaa ɔyaw a metsee no wɔ no wu ho no ano. Adwendwen no dɛ ɔnye me bɔwɔ hɔ no baa m’adwen mu mpɛn pii. Ɔyɛ mpo a nna medze m’enyiwa tsim abow no do, dɛ nkyɛ ɔbɔbɔ mu na meehu no bio.
Bɛyɛ mfe 40 ekyir, wɔ Easter ber mu, nna morodwendwen Jesus Christ No Wusoɛr no ho na mehyɛɛ ase dwendween mo nuabanyin no ho. Dɛm mber no, biribi sii m’adwen mu. Mekaa murususu no dɛ ɔabɛsera me.
Da no muhun dɛ Sunsum no na ɔama me awerɛkyekyer wɔ nkõdzen ber no mu. Minyaa dase dɛ mo nuabanyin no no sunsum nnwui; ɔtse ase. Ɔda ho rinyin wɔ n’onnyiewiei asetsena no mu. Seisei minyim dɛ “[mo] nuabanyin bɔsoɛr bio”15 wɔ dɛm mber fɛɛfɛw no, a ɔnam Jesus Christ no Wusoɛr no ntsi, hɛn nyina bɔsoɛr bio. Bio, Ɔama kwan dɛ hɛn nyina bɛsan abɔ mu dɛ ebusua ebusua na yeenya onnyiewiei enyigye wɔ Nyame enyim sɛ yɛsan mu yi dɛ yɛnye No bedzi na yeesie ahyɛmudzi krɔnkrɔn no a.
President Nelson akyerɛkyerɛ dɛ:
Owu yɛ adze a ohia a ɔkã hɛn onnyiewiei asetsena ho. Obiara innyim ber a ɔbɛba, naaso ohia ma Nyankopɔn n’enyigye ho nhyehyɛɛ kɛse no. Ɔnam Ewuradze No Werdambɔ no ntsi, wusoɛr yɛ dza ɔwɔ hɔ nokwar na nyimpa nyina botum enya onnyiewiei nkwa. …
“… Adɔfo a woegya hɔn ekyir a woridzi awerɛhow … yesiw owu no bɔr no ano ber a hɛn gyedzi tsim wɔ Christ mu, yenya enyidado a ɔhyerɛn na odzi mu, na Nyankopɔn na nyimpa nyina ho dɔ, nna pɛ a no mu dɔ dɛ yɛbɔsom hɔn. Dɛm gyedzi no, dɛm enyidado no, dɛm ɔdɔ no bɛma hɛn kwan aba Nyankopɔn ne nkyɛn krɔnkrɔn no mu, na yɛnye hɛn onnyiewiei ahokafo na ebusua ebusua no, yɛnye No atsena bio.”16
Megye dase dɛ sɛ Christ annsoɛr emmfi owu mu, anaadɛ oemmbubu owu mpokyerɛ mu ma owumaa nnyi tum, na owu so nnyi bɔr a, nkyɛ owusoɛr biara nnyi hɔ.
“Mbom owusoɛr wɔ hɔ, dɛm ntsi adakamaa nnyi tum, na owu no bɔr akɛhyɛ Christ mu.
“Ɔno nye wiadze kan no na nkwa no; nyew, kan a onnyi ewiei, dɛ onnkodum da; nyew, na nkwa a onnyi ewiei, na dɛ owu nnyi hɔ bio.”17
Jesus Christ Noara kãa dɛ, “Emi nye wunyan no, nye nkwa no: nyia ɔgye me dzi no, owu mpo a, ɔbɛtsena ase.”18
Megye dase dɛ ɔnam Jesus Christ No ɔpon Werdambɔ no na enyimnyam Wusoɛr no do, akoma a ebubu botum enya ayarsa, yaw botum abɛyɛ asomdwee, atseetsee botum abɛyɛ enyidado. Obotum efua hɛn wɔ n’ehumbɔbɔr abasa no mu, ɔrema hɛn awerɛkyekyer, dzen nhyɛ, na ɔresa hɛn mu kor biara yarba. Jesus Christ ne dzin mu, amen.