Nyame wɔ hɛn mu
Nyame wɔ hɛn mu—na Nankasa kã hɛn abrabɔ no ho na Ɔrema Ne mba akwankyerɛ sesei mpo.
Mo nuanom na me nkyerɛbaa adɔfo, mber nyina mu no, Nyankopɔn akasa edua N’asomfo, nkɔnhyɛfo no mu.1 Anapa yi, wɔayɛ hɛn adom dɛ yeetsie Nyame no nkɔnhyɛnyi no rekasa kyerɛ wiadze no nyina. President Nelson, yɛdɔ wo, na mehyɛ obiara nkuran beebiara a ɔwɔ biara no dɛ onsũa na ɔnyɛ aso ma wo nsɛm.
Ansaana mudur me mfe 12 awoda no, nna wɔahyɛ hɛn ebusua ma yeetu mpɛn ebien efi hɛn fie na yɛahyɛ abrabɔ ase bio wɔ begyabegyayɛ, suro, na kɔdaannda mu a, ɔnam ɔkõ na ɔmambusɛm ho nkyekyɛmu dze bae. Nna ɔyɛ ehiasɛm mber ma me, naaso nna otwar dɛ ɔyɛ mber huuhu ma m’awofo adɔfo.
Me maame na me papa nye hɛn kyɛɛ dza ɔfa adzesoa yi ho kumaa bi. Wɔsɔɔw amandzehu na ɔhaw no mu kɛse a wobotum. Gyɛma nna suro no ahyɛ hɔn do ara yie, a ɔhwer hɔn mber na ɔbraa hɔn enyidado.
Wiadze Ɔsatu II ekyir no a beebiara tɔɔ pan no, ogyaa ne sɛnkyerɛdze wɔ wiadze no do. Ogyaa ne sɛnkyerɛdze wɔ mo do.
Dɛm mber no, m’ankonamyɛ mber a ayɛ kɔnn papaapa mu no, nna metaa dwendwen dɛ, “Ana enyidado bi aka wɔ wiadze no mu a?”
Abɔfo wɔ Hɛn Mu
Ber a morodwendwen asɛmbisa yi ho no, modween Americafo asɛmpasomafo mbasirmba bi a wɔsoom wɔ hɛn mu dɛm mfe no mu. Woefi hɔn efiefi ne bambɔ mu wɔ wiadze ne fã no ho, na woetu kwan aba Germany—ndaansa yi ara mu hɔn atamfo—dɛ wɔrebɛma hɛn nkorɔfo ɔsor enyidado. Wɔammba dɛ wɔrobɔbɔ sombo, akasa akyerɛ, anaa worubogu enyim ase. Ɔpɛ mu ara, wɔdze hɔn mbasirber mu nkwa no mae a wɔanndwen asaase yi do mfaso biara ho, rohwehwɛ ara dɛ wɔbɔboa binom ma woenya enyigye na asomdwee no a wɔwɔ no.
Emi no, mberantsɛ na nkataasia yinom nna wodzi mu. Megye dzi dɛ nna wɔwɔ nkekãa bi, naaso emi mennhu. Daa modwen hɔn ho dɛ wɔsõso kyɛn abrabɔ—kan na enyimnyam abɔfo; ayamuyie, papayɛ na nokwar asomfo.
Ber a nna wiadze remen wɔ pɛsɛankonya ho, ekyingye, awerɛhowdzi, ɔtan, na suro no, mbasirmba yinom hɔn nkyerɛkyerɛ no dze enyidado hyɛɛ me mã. Asɛmpa amandzɛɛbɔ a wɔmae no tra ɔmambusɛm, abakɔsɛm, ehwinhwin, ayawdzi, na ankorankor nsusui do. Ɔmaa hɛn ɔsor mbuae wɔ nsɛmbisa horow a ohia hɛn dɛm nkõdzen mber no mu no.
Amandzɛɛ no nye dɛ Nyankopɔn tse ase na Ɔdwen hɛn ho, wɔ begyabegyayɛ, adwensɛɛ na basabasayɛ dɔnhwer yinom mu mpo mu. Dɛ Opue ampaara wɔ hɛn mber yi mu a Ɔdze nokwar na kan—N’asɛmpa na N’Asɔr no asan ananmu aba. Dɛ Ɔkasa kyerɛ nkɔnhyɛfo bio; dɛ Nyame wɔ hɛn mu—na Nankasa kã hɛn abrabɔ no ho na Ɔrema Ne mba akwankyerɛ sesei mpo.
Ɔyɛ nwanwa, dza yebotum esũa sɛ yɛhwɛ hɛn Ɔsor Egya no nkwagye ho nhyehyɛɛ na nkwagye ntowdo, enyigye ho nhyehyɛɛ ma Ne mba no yie a. Sɛ yɛtse nkã dɛ yɛnnsɛ bi, wɔatow hɛn akyen, ma werɛ efir hɛn a, yebotum esi no tadua dɛ Nyankopɔn No werɛ mmfir hɛn—nokwar, Ɔma Ne mba nyina biribi a yennsusu ho: dɛ yɛbɛyɛ “Nyankopɔn adzedzifo, na Christ afɛ-adzedzifo.”2
Iyi n’asekyerɛ nye dɛn?
Dɛ yɛbɛtsena ase afebɔɔ, yenya enyigye ne mãhyɛ,3 na “[ye]benya ahengua, ahenman, mpanyindzi, na tumdzi, ahendzi.”4
Yebohu dɛ daakye nwanwa a ɔkrɔn yi botum abɛyɛ hɛn dze—nnyɛ osian nyimpa ban a yɛyɛ mbom osian mbrɛ Nyankopɔn tse ntsi, ogya hɛn ma yɛkotow wɔ ahobrɛadze mu.
Yenyim iyi no, yebesi dɛn botum ehwinhwin bio, anaa yɛakɔ do edzi yaw? Yebesi dɛn botum dze hɛn enyiwa etsim famu ber a ahemfo Ɔhen no to nsa frɛ hɛn dɛ yentu nkɔ ahomka daakye krɔnkrɔn bea a yennkotum esusu ho mu?5
Nkwagye wɔ Hɛn Mu
Osian Nyankopɔn no dɔ mapã ma hɛn ntsi na Jesus Christ n’onnyiewiei afɔrbɔ no, wobotum apepa hɛn bɔn horow—akɛse na nkakraba—a wɔrennkaa no bio.6 Yebotum egyina N’enyim emudzi mu, yɛafata, na wɔatsew hɛnho.
Enyisɔ bu do pem fi m’akoma mu ma mo Sor Egya. Muhu dɛ Ɔanndoom Ne mba dɛ wonfitsiw ndua ɔnnkyebo abrabɔ yi mu a wonnyi enyidado wɔ onnyiewiei ndaamba a ɔhyerɛn ho. Ɔama hɛn nkyerɛkyerɛ a ɔda kwan a yɛdze bɛsan akɔ no edzi. Na ne fapem koraa nye No Dɔba, Jesus Christ,7 na N’afɔrbɔ ma hɛn no.
Agyenkwa no No Werdambɔ no a ɔmmbɔadze da no sesã kwan a yɛdze bɔhwɛ hɛn mbratõ na esintɔ horow no. Nkyɛ yebetsim do na yebenya atsenkã dɛ wɔpon hɛn a ɔnnkɛyɛ yie anaa enyidado biara nnyi no, yebotum esũa efi mu na yeenya awerɛhyɛmu ho atsenkã.8 Nnuho no nhohoree akyɛdze no ma hɛn kwan ma yegya hɛn bɔn wɔ ekyir na yepue dɛ abɔdze fofor.9
Osian Jesus Christ ntsi, nnyɛ hɛn nkõgu na ɔbɛkyerɛ hɛn nyimpaban. Wobotum ama yɛasakyer.
Tse dɛ ndwontofo a orusũa no ndwom tow no, yebotum ehu bia a yɛannyɛ no yie, hɛn nkekaa na bɔn horow dɛ kwan a yebodua do ehu hɛnho yie, yɛadɔ nkaafo nokwar mu akɔ bun mu, na yeedua nnuho mu enya ahotsew.
Sɛ yenu hɛn ho a, mfomdo nntwa hɛn nnkyen. Wɔkã hɛn mpontu ho.
Hɛn nyina yɛyɛ mbɔdomaba sɛ yɛdze toto enyimnyam abɔdze a ɔkrɔn a wɔahyehyɛ dɛ yɛbɛyɛ no ho a. Nyimpa biara nnyi hɔ a ofi aweawea, anantsew anantsew kɔ mbirikã tutu a ɔnntaa mmfintsiw, mmpempem adze, na ommpirapira. Dɛm na yesi sũa adze.
Sɛ yɛkɔ do sũa adze, daa yɛbɔ mbɔdzen sie Nyankopɔn ne mbrasɛm, na yesi pi wɔ hɛn mbɔdzembɔ mu dɛ yebonu hɛnho, yeetsim, na yɛdze dza yesũa no bɔ bra a, nkakrankakra no, yɛbɔboaboa kan akɔ hɛn akoma mu.10 Na ɔwɔ mu dɛ yennkotum atse mbrɛ yɛbɛyɛ no ase emudzi mu sesei mpo, a “Yenyim dɛ, sɛ [Agyenkwa] no yi noho edzi a,” yebohu N’enyim wɔ hɛn mu, na “yebohu no dɛ mbrɛ ɔtse.”11
Enyimnyam anohoba bɛn nyi!
Nyew, wiadze mu ayɛ basabasa. Na, nyew, yɛwɔ mbrɛwyɛ horow. Naaso onnhia dɛ yebesi hɛn etsir adze wɔ abagura mu, osiandɛ yebotum atwer Nyankopɔn, yebotum atwer Ne Ba, Jesus Christ, na yebotum agye Sunsum akyɛdze no ma wɔama hɛn kwankyerɛ wɔ anamɔn kwan a ɔkɔ abrabɔ a enyigye na sor ahomka ahyɛ no mã.12
Jesus wɔ Hɛn mu
Motɔ dɛ modwendwen ho dɛ, sɛ Jesus wɔ hɛn mu ndɛ a, Ebɛnadze na Ɔbɛkyerɛkyerɛ na Ɔbɛyɛ?
Wusoɛr ekyir no, Jesus Christ hyɛɛ N’anohoba no mã dɛ Ɔbɛsera “nguan bi so” no.13
Mormon Nwoma no: Jesus Christ Ahyɛmu Kor So no kã dɛm mpuei wɔ nkorɔfo a wɔwɔ America asaasetɔw do ho asɛm. Yɛwɔ nkyerɛwee yi a ɔsombo yi dɛ ɔyɛ Agyenkwa no n’edwuma ho dase a ɔda edzi.
Mormon Nwoma mu nkorɔfo no tsenaa ase wɔ wiadze n’afã no ho—hɔn abakɔsɛm, amambra, na amambusɛm ho tsebew no yɛ soronko koraa fi nkorɔfo a Jesus kyerɛkyerɛɛ hɔn adze wɔ No honandua mu som no. Naaso, Ɔkyerɛkyerɛɛ hɔn ndzɛmba kor noara pii a Ɔkyerɛkyerɛɛ wɔ Asaase Krɔnkrɔn no do no.
Dɛn ntsi na Ɔbɛyɛ dɛm?
Daa, Agyenkwa no kyerɛkyerɛ daapem nokwar a ɔnnsesã. Ɔfa nkorɔfo nyinara a wɔwɔ mber biara na tsebew biara mu ho.
N’asɛm no nna ɔyɛ enyidado na nkãho asɛm—dasegye dɛ Nyankopɔn hɛn Ɔsor Egya no nndan Ne mba nngyae.
Dɛ Nyame wɔ hɛn mu!
Mfe aha ebien a abɛsen no, Agyenkwa no sanee baa asaase yi do. Ɔnye Ɔsor Egya puee Joseph Smith a oedzi mfe 14 do na wɔhyɛɛ Jesus Christ N’Asɔr asɛmpa no ne Nsanananmu no ase. Ofitsi dɛm da no dze ba kan no, ɔsorsor buei, na ɔsor abɔfo sianee fii bɛkyebo enyimnyam mu bae. Kan na nyimdzee huei fii ɔsorsor ahengua no enyim.
Ewuradze Jesus Christ akasa akyerɛ wiadzemba bio.
Ebɛn asɛm na Ɔkãe?
Dza wɔayɛ hɛn nhyira no, N’asɛm mu pii no wɔakyerɛw no wɔ Nkyerɛkyerɛ na Ahyɛmudzi mu—a ɔwɔ hɔ ma wiadze mu obiara a ɔpɛ dɛ ɔkenkan na osũa. Ndɛ, nsɛm yinom wonnkotum etwa no ho bo!
Na onnyi dɛ ɔyɛ hɛn nwanwa dɛ yebohu bio dɛ Agyenkwa no kyerɛkyerɛ N’asɛmpa ne fapem nsɛm: “Hom mfa hom akoma nyina, nye hom ahom, hom adwen, nye hom ahoɔdzen nyina ndɔ Ewuradze hom Nyankopɔn, na hom nsom no wɔ Jesus Christ ne dzin mu.”14 Okenyan hɛn ma yɛhwehwɛ Nyankopɔn15 na yedzi nkyerɛkyerɛ a Oeyi akyerɛ N’asomfo, nkɔnhyɛfo no do.16
Ɔkyerɛ hɛn ma yɛdodɔ hɛnho nkorkor17 na hɛn “ayamuyie nhyɛ mã, mfa mma nyimpa nyina.”18
Ɔto nsa frɛ hɛn dɛ yɛmbɛyɛ Ne nsa, yɛnkɔ aporow nyɛ papa.19 “Mma yɛnnfa asɛm no nndɔ … na mbom hom mma yɛndɔ wɔ nyɛe nye nokwar mu.”20
Ɔmaa hɛn taferbanyinmbɔmu dɛ yendzi No soma kɛse no do: dɛ yɛbɔdɔ, yɛbɛkyɛ, na yɛato nsa afrɛ obiara ma wɔaba N’asɛmpa na N’Asɔr no mu.21
Ɔhyɛ hɛn dɛ yensisi temple krɔnkrɔn ahorow na yɛnhɛn mu nkɔsom wɔ hɔ.22
Ɔkyerɛkyerɛ hɛn ma yɛabɛyɛ N’esuafo—amma hɛn akoma mmper nhwehwɛ nyimpa do tum, ahonyadze, nkamfo, anaa dzibew. Ɔkyerɛkyerɛ hɛn dɛ “[yɛn]fa wiadze ndzɛmba [n]to nkyɛn, na [yɛn]per [n]hwehwɛ ndzɛmba a ofir bea pa.”23
Otu hɛn fo dɛ yɛnhwehwɛ enyigye, adwenmutsewee, asomdwee, nokwar na enyigye,24 na bɛkyebo na onnyiewiei nkwa a wɔabɔ ho anohoba no.25
Hom mma yɛnfa iyi nkɔ kan kakra. Yensusu dɛ Jesus baa wo ward, wo nkorbata, anaa wo fie ndɛ. Nkyɛ ɔbɛ tse dɛn?
Obohu w’akoma no bun mu. Dza opuee enyiwa do ho hia a ohia no bɛyew. Obohu wo dɛ mbrɛ etse. Obohu w’akoma mu ahwehwɛdze.
Hɔn a wɔyɛ botoo na ahobrɛadzefo no na Obepegya hɔn.
Ayarfo no Ɔbɛsã hɔn yarba.
Ekyingyefo no Ɔdze gyedzi na akokodur a wɔdze begye edzi no bɛhyɛ hɔn mu.
Ɔbɛkyerɛkyerɛ hɛn dɛ yembue hɛn akoma mu mma Nyankopɔn na yɛntsen nhwɛ binom.
Obohu na Ɔakamfo nokwardzi, ahobrɛadze, emudzi, ayamuhyehye, na ayamuyie.
Yɛhwɛ N’enyiwa mu kor pɛr a, yɛnnkɛyɛ dɛ mbrɛ yɛtse yi ara bio. Yɛbɛsesã afebɔɔ. Yɛdze ahobow ruhu dɛ, ampaara, Nyame wɔ hɛn mu no, bɛsesã hɛn.
Ebɛnadze na Yɛnyɛ?26
Medze ayamuyie hwɛ ekyir dze hwɛ aberantsɛba a nna meyɛ, ber a nna mirinyin no. Sɛ nkyɛ mubotum asan ekyir a, nkyɛ mebɛkyekye no werɛ na mase no dɛ ɔnantsew kwan pa no do na ɔnkɔ do nhwehwɛ. Na mase no dɛ ɔnto nsa mfrɛ Jesus Christ mbra n’abrabɔ mu, osiandɛ Nyame wɔ hɛn mu!
Enuanom na nkyerɛbaa, m’anyɛnkofo adɔfo, na hom nyina a hom rohwehwɛ mbuae, nokwar na ahomkã no, mema hom afotu kor noara dɛ: hom nkɔ do mfa gyedzi na abotar nhwehwɛ.27
Hom mbisa na hom nsa bɛkã. Hom mbɔ mu na wobobue hom.28 Hom ntwer Ewuradze.29
Hɛn daa daa abrabɔ mu no, ɔyɛ hɛn dwuma son na enyimnyam kwan dɛ yebehyia Nyame.
Ber a yɛdze ahantan to nkyɛn na yɛdze akoma a abobɔ na sunsum a abotow bɛn N’ahengua no30 Ɔbɔtwe abɛn [hɛn].31
Ber a yɛhwehwɛ dɛ yɛbɛkã Jesus Christ do na yɛanantsew wɔ osuanyiyɛ anamɔn kwan do no, nkakrankra no, da no bɛba a yebenya dɛm enyigye mãhyɛ ho akyɛdze a yennsusu ho no ho sũahu.
M’anyɛnkofo adɔfo, hom Ɔsor Egya dze ɔdɔ a odzi mu dɔ hom. Ɔada No dɔ no edzi wɔ onnyiewiei akwan horow mu, mbom dza ɔbor do koraa nye Ɔdze Ne Ba a Ɔwoo no Kortoo mae dɛ afɔrbɔ na akyɛdze ma Ne mba, ama hɛn ɔsor awofo nkyɛn nsan nkɔree no esi pi.
Megye dase dɛ hɛn Ɔsor Egya tse ase, dɛ Jesus Christ na Odzi N’Asɔr ne kan, dɛ President Russell M. Nelson nye No nkɔnhyɛnyi.
Metserɛw me nhyira mu ma hom Easter enyigye ber yi mu. Hom mbue hom akoma mma hɛn Agyenkwa na Pomfo no, gyinabew biara hom wɔ mu no, nsɔhwɛ, amandzehu horow, anaa mfomdo no, hom botum ehu dɛ Ɔtse ase, dɛ Ɔdɔ hom, na dɛ osian Ɔno ntsi, hom rennyɛ ankonam dabiarada.
Nyame wɔ hɛn mu.
Iyi ho na midzi dase na meyɛ ho dasefo wɔ Jesus Christ ne dzin krɔnkrɔn no mu, amen.