Hom Botum Aboa Israel Hɔn Ano!

Ahmad S. Corbitt ne Kasaa

Ɔpamfo a Odzikan wɔ Wiadze Mfɛndzanan Young Men Presidency mu

Minyim nokwar pefee dɛ hom mbabun botum ayɛ iyi osian biribi a ɔfa hom nyimpa ban ho na tum kɛsenara a ɔwɔ hom mu no ntsi.

Bɛyɛ mfe ebiasa abasen kɔ no, President Russell M. Nelson too nsa frɛ Jesus Christ N’asɔr a ɔwɔ hɔ ma Nda a Odzi Ekyir Ahotseweefo ne mbabun nyinara dɛ wɔmbɛka “Ewuradze ne mbabun nsordaafo kuw ho ma wɔmboa Israel ano’’ wɔ ntwamutam n’afã ebien no. Ɔkãa dɛ, “Dɛm mboano no nye adze a ohia dodow a ɔrokɔ do wɔ asaase do ndɛ.’’¹ Minyim nokwar pefee dɛ hom mbabun botum ayɛ iyi—na wɔayɛ no yie— osian (1) biribi a ɔfa hom nyimpa ban ho na (2) tum kɛsenara a ɔwɔ hom mu no ntsi.

Mfe eduonan biako a abasen kɔ no, asɛmpasomafo beenu fi hɛn Asɔr mu tsee nkã dɛ woegya hɔn ebefir fie bi mu wɔ New Jersey, United States. Mber rugu mu no, awanwadze mu ara, wonumaa awofo beenu na hɔn mba 10 no nyinara. Nkɔnhyɛnyi ne nsɛm mu no, wɔmaa “ma Nyankopɔn dzi nyim’’² wɔ hɔn abrabɔ mu. Ɔwɔ dɛ mekã dɛ, “hɛn abrabɔ mu.’’ Nna meyɛba abofra a otsĩa ebiasa no. Nna meedzi mfe 17 mber a misii gyinae dɛ mebɛyɛ ahyɛmudzi a ɔmmpepa da aka Jesus Christ do. Naaso hom nsusu adze a misii ho gyinae? Merennkɛyɛ etuhoakyɛ asɛmpakã dwuma. Nna ɔyɛ dzen dodow. Nna onnyi dɛ wɔdwen dɛ mebɛyɛ asɛmpakã dwuma no, anaa? Nna meyɛ Asɔrba fofor koraa. Na minnyi sika. Ɔno da nkyɛn a, nna dɛ mowiei nsɔwdo skuul wɔ West Philadelphia a ɔbɛn no a hɔ yɛ dzen dodow no ɔnnkyɛree na mihyiaa mbusu nkõdzen bi so, nna kokoa mu dze mobɔ hu dɛ mebefi fie mfe ebien mu no nyina.

Wo Nokwar Nyimpa Ban

Mbom nna musũae nnkyɛree dɛ emi na adasa nyinara nye Ɔsor Egya atsena dɛ No sunsum mu mbabanyin na mbabaa ansaana hɛn awoo. Ohia dɛ binom so hu, dɛ mbrɛ nna minyim, dɛ hɛn Ɔsor Egya pɛ ma Ne mba nyinara nye No tsena ase wɔ onnyiewiei nkwa ne dɛw mu. Ntsi, ansaana obiara bɛba asaase do no, Ɔdze No nkwagye ho nhyehyɛɛ a odzi mu na ɔyɛ enyigye a yɛnye Jesus Christ dɛ hɛn Agyenkwa no, too hɛn nyinara enyim. Awerɛhow mu ara, Satan tsĩaa Nyankopɔn ne nhyehyɛɛ no.³ Dɛ mbrɛ Nyikyerɛ nwoma kã no, “na akõdzi baa sor’’!⁴ Satan dze enyitsew daadaa Ɔsor Egya no sunsum mu mba no mu nkyɛ mu ebiasa no mu kor ma odzii nyim kyɛn dɛ Nyankopɔn bedzi nyim.⁵ Mbom nnyɛ hom a! Ɔsomafo John hun dɛ hom “nye [hom] dasesɛm’’ dzii Satan do konyim.⁶

Minyim mo nokwar nyimpa ban, a me patriarch nhyira boaa me no, maa me akokodur na gyedzi dze gyee President Spencer W. Kimball ne nsato dɛ yɛmboa Israel hɔn ano.⁷ Anyɛnkofo adɔfo, ɔbɛyɛ dɛmara ama hom. Inyim dɛ wo dasesɛm do na idze dzii Satan do konyim mber tsentsen no bɔboa wo ma “adɔ akyɛ, na ato nsa afrɛ’’⁸ ndɛ na daa daa—ma ato nsa afrɛ afofor ma wɔaba na wɔabɔhwɛ, wɔaba na wɔabɔboa, na wɔaba na wɔabɛka ho, osiandɛ dɛ dɛm akõdzi ma Nyankopɔn ne mba hɔn akra no rokɔ do papaapa.

Gyedzi Tum a ɔwɔ Wo mu

Na tum kokurokoo na ɔwɔ wo mu no ɛ? Dwen iyi ho: idze enyigye tsẽatsẽamu⁹ dɛ ebɛba wiadze a ɔahwe ase no mu bea hɛn nyinara behyia honandua na sunsum mu owu. Hɛnankasa yennkotum dze hɛn ahom edzi no mu biara do konyim. Nnyɛ hɛnara hɛn bɔn nko na yebohu ho amandze mbom binom so dze kã ho. Adasamba benya mbubui na abagura biara a yennkotum esusu ho¹⁰—ne nyinara a awerɛfir ntwamutam hata hɛn adwen do na wiadze ne tamfo a omuo koraa no akɔ do etsiw hɛn na ɔasɔ hɛn ahwɛ. Enyidado nyinara dɛ yɛbɛsan asɔr efi owu mu na yɛdze ahotsew asan akɔ Nyankopɔn ne nkyɛn krɔnkrɔn no nyina daa Jesus Christ a osie N’anohoba no do.¹¹

Ebɛn adze na ɔhyɛɛ wo tum dɛ fa kɔ kan? President Henry B. Eyring kyerɛkyerɛɛ dɛ, “Ɔgyee gyedzi wɔ Jesus Christ mu ma edze maa enyigye ho nhyehyɛɛ na Jesus Christ ne sibew a ɔwɔ mu no tsipia ber a nna inyim ɔhaw a ebehyia wɔ ɔnnkyebo abrabɔ yi no mu ketseaba bi.”¹² Ber a Jesus Christ bɔɔ anohoba dɛ Ɔbɛba ɔnnkyebo asetsena mu na Ɔdze No nkwa ama dze aboa hɛn ano¹³ na Ɔagye hɛn no, anngye No endzi ara. Hom “enyimnyam esunsum’’¹⁴ nyaa “gyedzi mapã’’ dɛ hom hun N’anohoba dɛ ɔyɛ nokwar.¹⁵ Onnkotum edzi ator, ntsi hom hun No dɛ ɔyɛ dɛ Oekyi No bɔgyaa dada ama hom, mber tsentsen ansaana wɔrowo No.¹⁶

John n’asɛnkyerɛdze nsɛm mu no, hom nam “Eguambaa no bɔgyaa do dzii [Satan] do konyim.’’¹⁷ President Dallin H. Oaks kyerɛkyerɛɛ dɛ wɔ dɛm wiadze mu no “[hom] hun ewiei no fi ahyɛse no.’’¹⁸

Fa no dɛ da kor bi ansaana ebɔkɔ skuul no w’awofo no mu kor bɔ nokwar anohoba dɛ sɛ esan ba fie a ibotum ebedzi w’edziban a ipɛ! W’enyi agye! Mber a ewɔ skuul no nna esusu dɛ iridzi dɛm edziban no na eetum aakã w’ano dada. Ɔyɛ wo su dɛ, enye binom mpo kyɛ enyigyesɛm no. W’enyi da kwan dɛ erokɔ fie no ma w’enyi gye dodow dɛ skuul nsɔhwɛ na nkõdzen no yɛ dɛ ma ɔyɛ mberɛw. Hwee nnkotum eyi w’enyigye no efi hɔ anaa ɔbɛma agye kyim osiandɛ inyim mbrɛ anohoba no si yɛ nokwar! Ɔtse dɛmara dɛ, ansaana wɔwoo hom “enyimnyam esunsum’’ hom suae dɛ wɔbohu Christ n’anohoba horow no wɔ nokwar kwan yi mu, na hom sɔɔ ¹⁹ No nkwagye no hwɛe. Wo gyedzi kɛse tse dɛ wo mpɔw a ɔyɛ dzen na ɔyɛ kɛse mber dodow a etsentsen w’apɔw mu, naaso wɔhyɛ wo mu dada.

Ibesi dɛn botum ekenyan wo gyedzi kokurokoo wɔ Christ mu na idze edzi dwuma aboa Israel hɔn ano sesei na edzi Satan do konyim bio? Ber a eresan esua bio ahwɛ kan na idze dɛm nokwar noara ehu Ewuradze n’anohoba dɛ ɔbɔboa ano na ɔagye nkwa ndɛ. Tsitsir ara ɔdze Mormon Nwoma na No nkɔnhyɛfo dze kyerɛkyerɛ hɛn mbrɛ ibesi bɛyɛ. Mber tsentsen ansaana Christ bɛba no, Nephifo “nkɔnhyɛfo, na … asɔfo, na … akyerɛkyerɛfo … [dzɛfɛwdzɛfɛw nkorɔfo no] dɛ wɔnhwɛ Messiah no kwan, na wɔgye no ndzi dɛ ɔbɛba dɛ ma ɔaba dada.’’²⁰ Nkɔnhyɛnyi Abinadi kyerɛkyerɛɛ dɛ, “Na afei sɛ Christ ammba wiadze yi mu, ammbɛkã ndzɛmba a ɔbɛba ho nsɛm annkyerɛ tse dɛ mbrɛ ɔaba dadaw a, ɔpon biara nnyi hɔ.’’²¹ Tse dɛ Alma no, Abinadi “dze gyedzi enyiwa [hwɛɛ] kwan’’²² na ohun Nyankopɔn no nkwagye anohoba dɛ ɔahyɛ mã dadaw. Ɔnam “Eguambaa no bɔgyaa, na … hɔn dasesɛm do dzii [Satan] do konyim’’ mber tsentsen ansaana wɔwoo Christ, dɛmara dɛ ma eyɛe no. Na Ewuradze maa hɔn tum dɛ wɔnto nsa mfrɛ na wɔmboa Israel ano. Ɔbɛyɛ dɛmara ama wo ber a edze gyedzi hwɛ kwan, ihu Israel a wɔaboa hɔn ano—wiadze nyina mu na wɔ ɔwoara wo “mfɛfo mu’’²³—na ito nsa frɛ hɔn nyinara!

Asɛmpasomafo ɔha ɔha a wosii nketse wɔ hɔn asetsena ansaana wɔreba asaase do nam gyedzi a tum wɔ mu wɔ Christ mu do na wohun hɔn a wɔnye hɔ nyaa nkitahodzi anaa wɔkyerɛkyerɛɛ hɔn adze no dɛ nna wɔhyehyɛ enuma na temple ntar. President Nelson ne kasaa a ɔtoo no dzin “Hyɛ Ase a Ewiei no da W’adwen do,’’²⁴ mu no, ɔkãa nankasa ne fasusu ho asɛm a nna ɔreyɛ iyi na ɔkyerɛkyerɛɛ asɛmpakã baanodzifo dɛ wɔnkyerɛkyerɛ hɛn asɛmpasomafo no ma wɔnyɛ dɛmara. Wonyim dɛ wosiei gyedzi kɛse yi wɔ Jesus Christ mu wɔ asetsena ansaana yɛreba wiadze mu no boaa hɛn asɛmpasomafo adɔfo kɛsenara ma wo “tsie No’’²⁵ na wɔkaa hɔn gyedzi kɛse no hyew dze aboa Israel ano dɛ mbrɛ Ewuradze bɔɔ anohoba no.

Nokwar, erususu ator no haw gyedzi.²⁶ M’anyɛnkofo, eregye enyim ara adwendwen anaa ahwɛ ndzɛmba a ɔnye nokwar su bɔ ebira no, tsitsir ara ehuhu mfonyin no, bɛbrɛ wo gyedzi wɔ Christ mu ase na nnuhu annka ho a, obotum asɛe no. Meserɛ fa wo nsusui no pegya wo gyedzi wɔ Christ mu, mmfa nnsɛe no.

Mbofra na Mbabun Nhyehyɛɛ

Mbofra na Mbabun Nhyehyɛɛ no yɛ nkɔnhyɛsɛm edwindadze a ɔboa ma hom mbabun hom gyedzi kɛse no nya ahom. President Oaks kyerɛkyerɛɛ dɛ, “Wɔayɛ nhyehyɛɛ yi ma aboa wo ma abɛyɛ tse dɛ Agyenkwa no yie wɔ mbea anan mu: sunsum mu, anyɛkoyɛ, honandua, na nyimdzee mu.’’²⁷ Ber a hom mbabun dzi kan—wodzi kan—wɔdze asɛmpa no robɔ bra mu, hom rohwɛ binom yie, wɔroto nsa frɛ obiara ma wɔagye asɛmpa no, wɔreka ebusua ebusua abɔmu ama mfesantsen, na wɔrehyehyɛ enyika dwumadzi horow no,²⁸ gyedzi kɛse wɔ Christ mu a nna hom kitsa wɔ abrabɔ ansaana yɛreba asaase do mu no bɛsan eyi no ho na ɔama hom tum ma hom ayɛ N’edwuma wɔ abrabɔ yi mu!

Ankorankor botae horow, so, “tsitsir ara enyim enyim botae ahorow,’’²⁹ boa hom ma hom san bɔ hom gyedzi tum no hyew. Sɛ hom sie botae papa bi a hom enyi da ho kwan, dɛ mbrɛ hom dzii kan yɛe no, a na hom hu dza Ɔsor Egya pɛ dɛ ɔwo anaa bi so ba bɛyɛ.³⁰ Afei eyɛ ho nhyehyɛɛ na eyɛ edwuma dzen dze nya. Elder Quentin L. Cook kyerɛkyerɛɛ dɛ, “Mma hom mmbu nhyehyɛɛ, eresie botae horow … na [eroto nsa afrɛ afoforfo]—a edze gyedzi enyiwa reyɛ no adze kakraba.’’³¹

Nsanmu yi no yɛ wo dze! Ewuradze kãa homho dɛ, “Tum no a [wɔdze bɛsan mu eyi] no wɔ hɔn mu.’’³² Elder Neil L. Andersen kyerɛkyerɛɛ mu dɛ, “Nnyɛ akradze na ɔbɛma wo gyedzi enyin mbom wo nsanmu yi a.’’³³ Ɔsanee kãa dɛ, wɔdze abotar na gyedzi enyiwa besiesie, “nokwar nsɛmbisa [biara] a [ebia hom wɔ] no.’’³⁴

Megye dase dɛ (1) wo nokwar nyimpa ban na (2) gyedzi tum kɛsenara wɔ Christ mu a ɔwɔ hom mu no bɛma hom etum dze “hom mboa nsiesie wiadze no mma Agyenkwa ne nsanee ber a hom refrɛ obiara dɛ wɔmbra Christ hɔ na wombenya No Werdambɔ ho nhyira horow no.”³⁵ Hom ma hɛn nyinara nkyɛ Mormon Nwoma no nokwar dɛwdzi anohoba no dɛ:

“Atseneneefo a wotsie nkɔnhyɛfo hɔn nsɛm no … na … wɔdze pintsinn … ahwɛ Christ ne mbaa … atseetsee nyina ekyir no … wɔrennhera.

“Mbom [Christ] … bɛsa hɔn yar, na wɔnye no bedzi asomdwee.’’³⁶

Jesus Christ ne dzin mu, amen.