Hɛn Awerɛhow Bɛdan Awerɛbaa
Moto nsa frɛ hɔn nyinara a hɔn werɛ ahow, hɔn nyinara a wonnyim dza osi wɔ hɛn wu ekyir, dɛ wɔmfa hɔn gyedzi nhyɛ Christ mu.
Mfe pii a abasen kɔ no, mber a nna morokɔ nhyiamu wɔ Salt Lake City no, hɛn nkɔnhyɛnyi dɔfo, Russell M. Nelson, kyiaa me. Dɛ mbrɛ ɔyɛ no ahomka mu ara na wɔ nankasa no kwan mu no, obisaa dɛ, “Mark, wo maame noho tse dɛn?’’
Mekãa kyerɛɛ no dɛ dapɛn n’ahyɛse no nna menye no wɔ ne fie wɔ New Zealand na n’enyi rifir naaso ɔwɔ gyedzi mapã na ɔyɛ nkenyan ma hɔn a wonyim no nyinara.
Afei ɔkãa dɛ, “Meserɛ fa mo dɔ ma no … na se no dɛ m’enyi da kwan dɛ mobohu no bio.’’
Ɔyɛɛ me ahobow na mibisaa dɛ, “Ana ahyehyɛ New Zealand akwantu enyimenyim yi dadaw a?’’
Ɔdze ndwenho nokwar mu ara buae dɛ, “Oho, mobohu no wɔ abrabɔ a odzi do no mu.’’
Nna afɛwdzi biara nnyi no mbuae no mu. Nna ɔyɛ nokwarsɛm trɔdɔdɔ. Dɛm kokoa mu mber a nna m’enyi nnda mu no, metsiei na minyaa dasegye ho atsenkã krɔngyenn fi nkɔnhyɛnyi tseasefo hɔ dɛ abrabɔ kɔ do wɔ owu ekyir.
Dapɛn ewiei ehyiadzi yi, hom bɛtse asomafo na nkɔnhyɛfo atseasefo a wɔbɛgye Jesus Christ no Wusoɛr no ho dase. “Hɛn nyamesom n’asɛmpa fapem no nye Asomafo na Nkɔnhyɛfo hɔn dasegye, wɔ Jesus Christ ho dɛ Owui, wosiee No, na da a otsĩa ebiasa no Ɔsoɛree bio[;] … ndzɛmba nyina a ɔfa hɛn nyamesom ho no yɛ mbataho ma [nokwar yi].’’1 Mobɔ anohoba dɛ sɛ hom dze nokwar akoma tsie a, Sunsum no besi dasee yinom ho nokwar no pi wɔ hom adwen na hom akoma mu.2
Jesus kopuee ne tsetse Asomafo do wɔ No wu ekyir no, wɔsesãa korakoraa. Hɔn mu du ankasa hunii dɛ Ɔasoɛr efi owu mu. Thomas, a ahyɛse no nna onnyi hɔ no, paa mu kãa dɛ, “Sɛ mennhu … , merenngye nndzi.’’3 Ekyir no Jesus tuu Thomas fo dɛ: “Mma nnyɛ okyingyefo, na mbom gyedzinyi.’’4 Afei Ewuradze kyerɛkyerɛɛ gyedzi n’asɛdze tsitsir dɛ: “Nhyira ãka hɔn a woennhu me, eso wɔagye edzi.’’5
Ewuradze a Ɔasoɛr efi owu mu no maa N’Asomafo no asodzi dɛ wɔngye Noho dase. Dɛmara dɛ ndɛ hɛn Asomafo atseasefo no, wogyaa wiadze edwuma horow ekyir na wɔdze hɔn abrabɔ nyina sii hɔ akokodur mu ara paa mu kãa dɛ Nyankopɔn nyaan Jesus yi. Hɔn dasee a tum wɔ mu no gyaa mpempem ma wɔgyee too mu dɛ wonuma hɔn.6
Easter anapa enyimnyam asɛm no nye Christiansom nyinara adze tsitsir. Jesus Christ asoɛr efi owu mu, na osian iyi ntsi, hɛn so yɛbɛtsena ase bio wɔ hɛn wu ekyir. Nyimdzee yi dze mfaso na botae ma hɛn abrabɔ. Sɛ yɛdze gyedzi kɔ kan a, yɛbɛsesã korakoraa, tse dɛ tsetse Asomafo no. Hɛn, tse dɛ hɔn no. botum dze gyedzi wɔ Jesus Christ mu asɔw nkõdzen biara. Gyedzi yi so san ma hɛn enyidado wɔ mber mu a hɛn “awerɛhow bɛdan awerɛbaa.’’7
Mara me gyedzi n’ahyɛse fi awerɛhow ber ekyir.
Nna me papa na me maame nyɛn nguan wɔ New Zealand.8 Nna hɔn enyi gye hɔn abrabɔ mu. Dɛ awarfo kumabaa no, wɔdze mbasiamba baasa hyiraa hɔn. Nna wɔfrɛ dza nna osuar koraa wɔ mu no Ann. Da kor bi ber a nna wɔtsena baka bi ho regye hɔn enyi no, abosoom 17 Ann tutuu nkakrankakra fii enyiwa do. Wɔdze ahomtsew hwehwɛɛ no mber ara yie ekyir no, wohun dɛ oewu da nsu no mu.
Akomatu kɛse yi dze awerɛhow a wonntum nnka ho asɛm bae. Me papa kyerɛɛw no mfe pii ekyir no dɛ woennya enyigye biara wɔ hɔn abrabɔ mu bio. Ɔsanee so maa yɛperee hwehwɛɛ abrabɔ mu nsɛmbisa a ohia ne nyiano dɛ: Ebɛnadze na ɔbɛyɛ hɛn Ann a ɔsom bo no? Ana yebohu no bio? Ana hɛn ebusua no benya enyigye bio da?
Mfe pii wɔ esian yi ekyir no, asɛmpasomafo beenu bi fi Jesus Christ N’asɔr a ɔwɔ hɔ Nda a Odzi Ekyir Ahotseweefo mu baa hɛn haban mu hɔ. Wɔhyɛɛ ase kyerɛkyerɛɛ nokwar a yehu no wɔ Mormon Nwoma na Bible mu no. Nna awerɛhyɛmu dɛ Ann tse ase sesei wɔ sunsum wiadze no kã nokwar yinom ho. Osian Jesus Christ no Wusoɛr no ntsi, ɔno so bɔsoɛr efi owu mu. Wɔkyerɛkyerɛɛ dɛ wɔdze Jesus Christ N’Asɔr asan ananmu aba asaase do bio a nkɔnhyɛnyi tseasefo na asomafo duebien wɔ mu. Na wɔkyerɛkyerɛɛ nkyerɛkyerɛ soronko na nwanwa no dɛ ɔnam asɔfodzi tumdzi kor noara a Jesus Christ dze maa No Ɔsomafo panyin, Peter do no, wɔbotum akyekyer ebusua ebusua abɔmu afebɔɔ.9
Amonmu ara Maame hun nokwar no na onyaa Sunsum no ne dasegye. Naaso, paapa, dzii aper wɔ ekyingye na sunsum mu nkenyan afe a odzi do no mu. Ɔsanee so twetwee no ho dɛ ɔbɛsesã n’abrabɔ. Anapa bi a ɔannda anafua no, ber a nna oridzi akɔnaba wɔ daadze hɔ no, ɔdanee hwɛɛ Maame na ɔkãa dɛ, “wobonuma me ndɛ anaa ɔnnkɛba do koraa.’’
Maame kãa dza osii no kyerɛɛ asɛmpasomafo no, na ntsɛmara wohun gyedzi ne kan kakra wɔ m’egya no mu a ɔwɔ dɛ wɔsɔ anaa odum.
Dɛm anapa noara hɛn ebusua tuu kwan kɔr mpoano bi a ɔbɛn ara yie. Nna yennyim dza orisi no, hɛn mboframba no dzii agor wɔ anhwea no mu ber a Elderfo Boyd Green na Gary Sheffield gyaa m’awofo kɔr po no mu na wonumaa hɔn. Ɔkyerɛɛ gyedzi bio no, Paapa nankasa dze noho maa Ewuradze dɛ dza ɔbɛba biara no, ɔbɛyɛ nokwafo wɔ n’abrabɔ nyina mu ama anohoba horow a ɔrobɔ no.
Afe kor ekyir no wotuu temple hyɛɛ Nyame ne nsa wɔ Hamilton, New Zealand. Annkyɛr na n’ekyir no hɛn ebusua a, obi gyinae maa Ann, buu ntwɛr hyiaa afɔrmbukyia no ho wɔ Ewuradze ne fie krɔnkrɔn no mu. Hɔ no, ɔnam asɔfodzi tumdzi do no, wɔkaa hɛn bɔmu kor dɛ onnyiewiei ebusua wɔ ayɛdze tsiabaa fɛfɛɛw mu. Iyi dze dɛwdzi na asomdwee kɛse bae.
Mfe pii ekyir no Paapa kãa kyerɛɛ me dɛ sɛ nnyɛ Ann no wu no a nkyɛ, ɔannyɛ ahobrɛadze yie da ammfa anngye asɛmpa a wɔdze asan ananmu aba no. Mbom Ewuradze no Sunsum maa no enyidado nkakrankakra ara dɛ dza asɛmpasomafo no kyerɛkyerɛɛ no yɛ nokwar. M’awofo hɔn gyedzi kɔɔr do nyinii kɛpem dɛ hɔn mu kor biara dze dase ho ogya a ɔdzɛwee bɔkɔɔ na ahobrɛadze mu ara dze maa hɔn adwenpɔw biara wɔ abrabɔ mu no kwankyerɛ.
Mebɛda ase daa wɔ m’awofo hɔn fasusu ma ndaamba ebusuasantsen. Wonnkotum esusu abrabɔ dodow a wɔsesãe korakoraa osian hɔn gyedzi ndzeyɛɛ wɔ awerɛhow dzendzen no mbuae ho ntsi.
Moto nsa frɛ hɔn nyinara a hɔn werɛ ahow, hɔn nyinara a wɔnye ekyingye dzi aper, hɔn nyinara a wonnyim dza osi wɔ hɛn wu ekyir, dɛ wɔmfa hɔn gyedzi nhyɛ Christ mu. Mobɔ anohoba dɛ sɛ hom pɛ dɛ wɔgye dzi, na afei hom dze gyedzi dzi dwuma na wodzi Sunsum n’awɔse do a, hom benya dɛwdzi wɔ abrabɔ yi mu na wiadze a ɔreba no mu.
Mbrɛ misi hwɛ da no kwan dɛ mebehyia m’akyerɛbaa Ann. M’enyi da menye m’egya a owui mfe 30 a abasen kɔ no, benya enyigye nkabɔmu kwan. Megye dɛwdzi a menya no wɔ medze gyedzi robɔ bra mu, megye dzi eso munnhunii, naaso ɔnam Sunsum Krɔnkrɔn no tum do minyim dɛ Jesus Christ tse ase ho dase. Medze m’akoma na me kra nyina, masan mu eyi dɛ mibedzi Jesus Christ na N’asɛmpa a wɔdze asan ananmu no do. Iyi hyira m’abrabɔ no nyinara. Minyim dɛ Jesus nye Christ no, Nyankopɔn ne Ba, hɛn Agyenkwa na Pomfo. Jesus Christ ne dzin mu, amen.