Hom Bɛyɛ Adehye
Jesus Christ nye kan no a ɔwɔ dɛ yɛma do mpo wɔ hɛn sum ber mu wɔ hɛn ɔnnkyebo asetsena yi mu.
Mo nuanom na nkyerɛbaa adɔfo, menyi sɔ kwan a menya a menye hom kasa fi Africa. Ɔyɛ nhyira dɛ yɛwɔ abaefo mfir a ndɛ yɛdze dzi dwuma wɔ kwan a oye dodow do dze tsen ba hom hɔ wɔ beebiara a hom wɔ.
Fankwa 2019 mu no, emi na Sister Mutombo, ber a yɛrosom dɛ baanodzifo wɔ Maryland Baltimore Asɛmpakã Dwuma no, yenyaa kwan dze kɔr nserahwɛ wɔ Asɔr mbea a wɔayɛ atsenkã wɔ Palmyra, New York, ber a yɛkɔr asɛmpakã baanodzifo ntsetsee nhyiamu bi no. Yɛdze hɛn nserahwɛ baa ewiei wɔ Kwaa Krɔnkrɔn no mu. Nna hɛn adwen a yɛdze kɔr nserahwɛ wɔ Kwaa Krɔnkrɔn no mu no nnyɛ dɛ yebenya nsɛnkyerɛdze soronko anaa nyikyerɛ bi, naaso yɛtsee Nyankopon ne nkã wɔ bea krɔnkrɔn yi. Ndaase hyɛɛ hɛn akoma mu mã maa Nkɔnhyɛnyi Joseph Smith.
Yɛresan wɔ kwan do no Sister Mutombo hun dɛ m’enyim nyina ayɛ serɛw, ntsi obisaa dɛ, “W’enyigye ne siantsir nye dɛn?”
Mubuaa dɛ, “Mo dɔfo Nathalie, nokwar no bedzi ator do konyim daa, na sum ronnkɔ do wɔ asaase do osian Jesus Christ n’asɛmpa nsananmu no ntsi.”
Nyankopɔn Egya no na Jesus Christ seraa aberɛntsɛba Joseph Smith ma ɔdze dza woesuma epuei kan mu ma yeenya “ndzɛmba a nkyɛ ɔwɔ hɔ, … dza ɔwɔ hɔ seseiara, nye dza ɔbɛba no ho nyimdzee (Nkyerɛkyerɛ na Ahyemudzi 93:24
Mfe ahaebien na no mboree ekyir yi, pii gu do hwehwɛ nokwar a ohia ma fahodzi fi amambra binom mu na ɔtor a ɔsɛɛfo no dze apetse wiadze nyina no. Dodowara na “nyimpa a wɔyɛ ndabrabafo nam hɔn ndaadaa kwan do efura hɔn enyi” (Nkyerɛkyerɛ na Ahyemudzi 123:12). Ne krataa a ɔdze kɛma Ephesusfo mu no, Paul kyerɛkyerɛɛ dɛ: “Nyan, ɔwo a ada, soɛr fi ewufo mu, na Christ bɛhyerɛn wo do” (Ephesusfo 5:14). Agyenkwa no bɔɔ anohoba dɛ Ɔbɛyɛ kan ama obiara a otsie Ne nsɛm (hwɛ 2 Nephi 10:14).
Mfe eduosa-enum a abɛsen kɔ no, nna m’awofo so enyi efura na wɔrohwehwɛ enyiber do dɛ wobohu nokwar no na bea a wɔbɛdan ekohu. Wɔwoo m’awofo wɔ ekuraase, a nna amambra agye ndwow wɔ ankorankor nye ebusuafo hɔn abrabɔ mu. Wofii hɔn ekuraase ber a wosusuar na wɔbaa kuropɔn mu, a wɔrohwehwɛ asetsena papa.
Wɔwaree na wɔkyekyeer hɔn ebusua wɔ ɔdwe kwan do a wɔnnyɛ hyerɛpɛɛ. Nna yɛyɛ bɛyɛ nyimpa baawɔtwe wɔ fie kakraba bi mu—m’awofo, emi na me nkyerɛbaa beenu, na wɔfa ba bi a nna ɔnye hɛn tse. Modwendween ho dɛ sɛ yɛyɛ ebusua nokwar mu a, ɔnam dɛ yennyi kwan dɛ yɛnye hɛn awofo bedzidzi wɔ pon kor ho. Sɛ hɛn egya fi edwuma ba, na ɔhɛn fie no mu a, ntsɛmpanara wɔma yefi hɔ kɔ abowano. Nna hɛn anafua yɛ etsia dodow, a yenntum nda osian asomdwee na ɔdɔ mapã a onnyi hɛn awofo hɔn awar mu ntsi. Nna hɛn fie nnsuar nko, mbom nna hɔ yɛ sum. Ansaana yɛrebehyia asɛmpasomafo no, yɛkɔɔr nsɔrnsɔr ahorow Kwesida biara. Ɔyɛ pefee dɛ nna hɛn awofo rohwehwɛ biribi a wiadze nnkotum dze ama.
Iyi kɔɔr do kɛpem dɛ yehyiaa Elder na Akyerɛbaa Hutchings, asɛmpasomafo awarfo mpanyimfo a wodzii kan frɛɛ hɔn dɛ wɔnsom wɔ Zaire (ndɛ ɔyɛ DR Congo anaa Congo-Kinshasa). Yɛhyɛɛ ase hyiaa dɛm asɛmpasomafo awanwafo yinom, a wɔtse dɛ abɔfo a wofi Nyankopɔn hɔ no, mehyɛɛ no nsew dɛ biribi ahyɛ ase resesã wɔ hɛn ebusua mu. Hɛn enuma ekyir no, yɛhyɛɛ ase nokwar mu ara tuu mpon nyaa abrabɔ fofor a ɔnam asɛmpa ne nsananmu no ntsi. Christ ne nsɛm no hyɛɛ ase yeyeer hɛn akra. Wɔhyɛɛ ase maa hɛn ntseasee enyi bueii na ɔbɛyɛɛ hɛn dɛw, a nokwar a yɛagye no tɔ asowa mu na yehunii kan no, na dɛm kan yi hyerɛn na ɔhyerɛɛn daa daa.
Dɛm ntseasee wɔ asɛmpa no ne siantsir ho no nna ɔroboa hɛn ma yɛabɛyɛ tse dɛ Agyenkwa no ara yie. Hɛn fie ne kɛse annsesã; nna hɛn asetsena mu nsɛm so dɛmara. Naaso muhun m’awofo hɔn akoma nsesã ber a yɛbɔɔ mpaa daa daa, anapa na ewimbir. Yesũaa Mormon Nwoma no; yɛyɛɛ ebusũa ewimbir fie nhyiamu; nokwar ara, yɛbɛyɛɛ ebusua. Kwesida biara yɛsoɛr anapa 6:00 dze siesie hɛn ho kɔ asɔr, na yeetu kwan dɔnhwer pii mu kɔr Asɔr nhyiamu dapɛn biara a yennhwinhwin. Ɔyɛɛ sũahu nwanwa a yehunii. Hɛn a, nkyɛ yɛnam sum mu no, yɛpaam sum no fii hɛn mu (hwɛ Nkyerɛkyerɛ na Ahyemudzi 50:25) na yehun “kan kɛse” (2 Nephi 19:2).
Mekaa da kor bi ber a mennyɛɛ krado dɛ mobɔsoɛr ntsɛm anapa no aba hɛn ebusua mpaabɔ no, mohwinhwinii kyerɛɛ me nkyerɛbaa dɛ, “Nokwar mu biribiara nnyi hɔ bio a yebotum ayɛ no wɔ fie ha, gyedɛ mpaabɔ, mpaabɔ, mpaabɔ.” M’egya tsee m’asɛm a mekãe no. Mekaa ne ndzeyɛɛ a ɔdɔ mu ara naaso enyimpi mu a ɔdze kyerɛɛ me adze dɛ, “Mber dodow ara ebɔwɔ fie ha no, ebɔbɔ mpaa, abɔ mpaa, abɔ mpaa.”
M’egya ne nsɛm no gyegyee m’asowa mu daa daa. Hom dwen dɛ ebɛnadze na emi na Akyerɛbaa Mutombo nye hɛn mbofra yɛ no ndɛ? Yɛbɔ mpaa, bɔ mpaa, bɔ mpaa. Iyi nye hɛn egyapadze.
Banyin no a wɔwoo no nyifuranyi na Jesus Christ saa no yar no, ber a anyɛnkofo na Phariseefo guu no do ekyir no, ɔkãa dɛ:
“Nyimpa a wɔfrɛ no Jesus no yɛɛ dɛtse, dze seraa m’enyi do, na ɔsee me dɛ, Kɔ nstuaae Siloam mu, na kɔhohor: na mokɔree kɔhohoree, nna muhu adze yi. …
“… Adze kor na minyim, … [dɛ] nkyɛ meyɛ onyifurafo, na afei dze muhu adze” (John 9:11, 25).
Nkyɛ hɛn so yɛyɛ enyifurafo na afei dze yehu adze. Asɛmpa nsananmu no enya nhyɛdo wɔ hɛn ebusua do fi dɛm mber no. Asɛmpa no ne siantsir ho ntseasee ehyira ebusuasantsen baasa wɔ m’ebusua mu na ɔbɔkɔ do ehyira ebusuasantsen pii a wɔbɛba.
Jesus Christ nye kan no a ɔhyerɛn wɔ sum mu. Hɔn a wodzi n’ekyir no “rennantsew sum mu, na [w]obenya nkwa kan no” (John 8:12).
Bɛyɛ afe kor, wɔ 2016 na 2017 ntamu, nkorɔfo a wɔwɔ Kasai apaamu no hyiaa esian huhu bi. Nna ɔyɛ sum ber ankasa ma nkorɔfo no ɔnam ɔkõ a ɔwɔ amambra mu akõfo kuw bi na aban nsordaafo ntamu. Basabasayɛ no tsenee fi Kasai Finimfin Mantɔw mu kɔr Kasai apaamu nyina. Nyimpa pii guanee fii hɔn efiefi kosumaa kwaa mu dze bɔɔ hɔn ho ban. Nna wonnyi edziban anaa nsu, anaa biribi pa biara, na binom wɔ hɔn mu a nna wɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrmba wɔ Kananga apaamu. Nsordaafo no kunkum Asɔrmba binom.
Onuabanyin Honoré Mulumba a ɔwɔ Nganza Ward wɔ Kananga na n’ebusua kã nkorɔfo kumaa bi a wɔdaa ho sumaa wɔ hɔn fie, a wonnyim bea a wɔbɔkɔ osiandɛ akwan no nyina mu adan itur ntotowee bea. Da kor bi sɔn mu akõfo mbanyin bi hun Onuabanyin Mulamba na n’ebusua dɛ wɔwɔ hɔ, ber a ewimbir bi wɔkɔr abowano kɔhwehwɛɛ hɔn ebusua ture mu dɛ nkyɛ wobenya nduadzewa bi edzi a. Akõfo kuw no bi baa hɔn fie na wɔtwee hɔn pueii na wɔsee hɔn dɛ wondzi hɔn akõfo ndzeyɛɛ do ɔno wobokum hɔn.
Akokodur mu ara Onuabanyin Mulumba see hɔn dɛ, “Meyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba. Emi na m’ebusua agye Jesus Christ ato mu na yɛwɔ gyedzi wɔ no mu. Yɛbɛyɛ ankowafo ama hɛn ahyɛmudzi na yɛbɛgye ato mu dɛ yebowu.”
Wobuaa hɔn dɛ, “dɛ hom afa Jesus Christ yi, mbɔdɔm bedzi hom nam,” na wɔbɔɔ anohoba dɛ wɔbɛsan aba. Naaso wɔannsan ammba bio, na ebusua no tsenaa hɔ abosoom ebien na woennhu hɔn bio. Onuabanyin Mulumba na n’ebusua maa hɔn gyedzi kandzea dzɛwee. Wɔkaa hɔn ahyɛmudzi na wonyaa ahobambɔ.
Jesus Christ nye kan no a ɔwɔ dɛ yɛma do mpo wɔ hɛn sum ber mu wɔ hɛn ɔnnkyebo asetsena yi mu. (hwɛ 3 Nephi 18:24). Sɛ yɛsan mu yi dɛ yebedzi Christ n’ekyir a, yɛfa dɛ yɛbɛsesã. Banyin anaa basia a ɔasesã ama Christ no, Christ bɛyɛ ne kandzifo, na yeebisa, tse dɛ mbrɛ Paul yɛɛ no dɛ, “Ewuradze, ebɛnadze na epɛ dɛ meyɛ?” (Ndwuma 9:6). Yebedzi “n’anamɔn ekyir” (1 Peter 2:21). “[Yɛbɛ]nantsew, dɛ mbrɛ ɔno so nantsewee” (1 John 2:6). (Hwɛ Ezra Taft Benson, “Born of God,” Tambuli, Ɔbɛsɛ 1989, 2, 6.)
Midzi dase wɔ Nyia Owui no ho, wosiee no, na Ɔsoɛree bio da a otsĩa ebiasa na Ɔfowee kɔr sor ama emi na ɔwo enya bɛkyebo na nkwagye ntowdo ne nhyira. Ɔno nye “kan no, … nkwa no, na nokwar no” (Ether 4:12). Ɔno nye wiadze basabasayɛ no n’ano edur na no nsɔwano. Ɔno nye nkwagye ntowdo ho fasusu a ɔkrɔn, mpo Jesus Christ. Jesus Christ ne dzin mu, amen.