Modɔ dɛ Muhu Temple
Temple mu na yebotum enya taduasi wɔ ebusua nhyehyɛɛ ɔdɔ mu a ɔbɔtoa do owu ekyir na daapem no.
Mo nuanom na nkyerɛbaa adɔfo, ɔyɛ me enyisɔ dɛ menye hom wɔ wiadze mfɛndzanan ehyiadzi nhyiamu a odzi kan yi ase. Hɔn a wɔakasa, ndwom no, na mpaabɔ no dze Sunsum no—nye nkenyan na enyidado atsenkã aba.
Dɛm nkã-tse no dze da a odzi kan a me nantsewee hɛɛn Salt Lake Temple mu ho nkaa asan aba. Nna meyɛ aberantsɛba. M’awofo nko na wɔkã moho dɛm da no. Yɛwɔ mu no, wɔgyinaa kakra dze gyee nkyia fii temple edwumayɛyi bi hɔ. Menantsewee gyaa hɔn ekyir kakra, ɔkaa mo nko mber kumabaa.
Ewuraba popuaba a ne tsinhwi fitaa a ɔhyɛ temple atar fitaa fɛɛfɛw kyiaa me. Ɔmaa ne tsir do hwɛɛ me na ɔyerɛɛw n’ano, na nkyii ɔkãa no kommyɛ mu ara dɛ, “Onuabanyin Eyring, Akwaaba ba temple.” Otwaa m’adwen do dɛ ɔyɛ ɔbɔfo osiandɛ nna onyim me dzin. Nna minnyim dɛ krataa sin bi a me dzin wɔ do no wɔdze abɔ mo sor atar n’enyim.
Metraa no na migyinae. Mohwɛɛ sor hwɛɛ enyi nsamdo a ɔwɔ sorsor a ɔma dan no mu yɛ kann dɛ ma oebue kɔ wimu. Na dɛm mber no mu no, adwendwen bi baa m’adwen mu wɔ nsɛm pefee yinom mu: “Maba bea yi a ɔayɛ kann yi pɛn.” Na mbom ntsɛmara ndze bi a ɔnnyɛ mankasa me ndze baa m’adwen mu wɔ nsɛmfua yinom mu: “Oho, mmbaa ha da. Irekaakaa ber bi ansaana wɔrobɔwo wo no. Nna ewɔ bea krɔnkrɔn a ɔtse dɛm.”
Hɛn temple biara abowano no, wɔakyerɛw nsɛmfua yinom, “Krɔnkrɔnyɛ ma Ewuradze.” Minyim ma moho dɛ dɛm nsɛm no yɛ nokwar. Temple no yɛ krɔnkrɔn bea a ɔnnyɛ dzen dɛ nyikyerɛ bɛba hɛn do sɛ yebue hɛn akoma mu na yɛfata a.
Ekyir no dɛm da a odzi kan no, metsee Sunsum no ne nkã bio. Temple ayɛdze no ne nsɛm bi a ɔkã ho no dze m’akoma a no mu redzɛw ho atsenkã bae a, osii dza wɔreyɛ no pi, dɛ ɔyɛ nokwar. Dza metsee no nna ɔfa moho na me daakye ho, na ɔbɛyɛɛ nokwar ampaara mfe 40 ekyir no a odua ɔfrɛ bi dɛ monkɔsom a ofii Ewuradze hɔ.
Menyaa atsenkã kor noara ber a mowaree wɔ Logan Utah Temple mu no. President Spencer W. Kimball na ɔyɛɛ nsɔwano no. Nsɛm kakrabaa a ɔkãe no, ɔdze maa afotu yi: “Hal na Kathy, hom mbɔ hom bra ama ɔfrɛ no ba a, hom etum anantsew efi ho a ɔrennyɛ dzen koraa.”
Ber a ɔkãa dɛm nsɛm a ɔnndɔɔ sõ no, muhun wɔ m’adwen mu pefee, a n’enyi nyina ada edzi, koko tsentsen bi na kwan bi a wɔdze fow kɔ no sor. Ban fufuw bi wɔ kwan ne bankum na ɔyew wɔ ndua a ɔsɔw do kɔ no sor no mu. Fie fufuw bi pue wɔ ndua no mu kakrabaa.
Afe kor n’ekyir no, muhun koko no ber a m’asew banyin kãa ne kaar nye hɛn faa dɛm kwan no do no. Nna ɔtse dɛ ma President Kimball maa hɛn afotu wɔ temple no pɛpɛɛpɛr.
Yeduur koko no sor no, m’asew gyinaa wɔ fie fufuw no ne nkyɛn. Ɔkãa kyerɛɛ hɛn dɛ ɔno na ne yer rotɔ dan na asaase no na ɔno bɛpɛ dɛ emi na hɔn babaa no bɛtsena ahohɔ bea hɔ. Hɔn dze wɔbɛtsena fi kɛse no mu, anamɔn tu kakra ara fi ha. Ntsi, mfe 10 mu no yɛtsenaa dɛm ebusua tsenabew fɛɛfɛw mu no, na emi na me yer yɛtaa kã no daa dɛ, “Yɛma hɛn enyi ngye iyi ho yie, osiandɛ yɛnnkɛkyɛr wɔ ha.”
Ɔfrɛ bi fi Asɔr nwomasũa hwɛdofo, Neal A Maxwell hɔ bae. President Kimball no kɔkɔbɔ dɛ yebotum “anantsew efi ho a ɔrennyɛ dzen koraa” no bɛyɛɛ hɔ. Ɔfrɛ dɛ yebefi ebusua gyinabew a odzi mu, nkɔsom wɔ edwuma bi wɔ bea a minnyim no ho hwee. Nna hɛn ebusua ayɛ krado dɛ yebefi hɔ dɛm nhyira ber no na bea no osiandɛ dɛ nkɔnhyɛnyi bi, wɔ temple krɔnkrɔn mu, nkɔnhyɛ bea no, ohun dza obesi daakye bi a nkyii yɛyɛɛ ho ahoboa.
Minyim dɛ Ewuradze ne temple horow no yɛ krɔnkrɔn mbea. Mo botae ndɛ a merekasa fa temple ho no nye dɛ mebɛpegya hom pɛ na medze ama yɛaafata na yɛaayɛ krado ama akwan horow pii a yɛdze benya temple sũahu a ɔrebɛba ama hɛn no.
Emi no, dza ɔhyɛ mo nkuran kɛse dɛ mebɛfata temple sũahu nye dza Ewuradze akã afa Ne fi krɔnkrɔn no ho no:
“Mber dodow biara a mo nkorɔfo besi dan ama me wɔ Ewuradze ne dzin mu, na wɔnnkɛma wɔdze adze fĩ biara akɔ mu dze egu ho fĩ no, m’enyimnyam bɛhyerɛn do;
“Nyew, na m’enyim bɔwɔ hɔ, osiandɛ mebɛba mu, na hɔn a wɔbɛba mu nyina a hɔn akoma mu tsew no bohu Nyame.
“Mbom sɛ wogu ho fĩ a, meremmba mu, na m’enyimnyam rennhyerɛn hɔ; osiandɛ meremmba temple a no mu nntsew mu.”1
President Russell M. Nelson maa ɔyɛɛ pefee maa hɛn dɛ yebotum “ehu” Agyenkwa no wɔ temple wɔ kwan bi do dɛ Ɔbɛyɛ Obi a yenyim no. President Nelson kãa dɛ: “Yɛtse No ase. Yɛtse [N’]edwuma na [N’]enyimnyam ase. Na yɛhyɛ ase nya N’abrabɔ a onnyikabea no nsunsuando a ɔmmbɔadze da no ho atsenkã.”2
Sɛ emi anaa ɔwo yɛkɔ temple a hɛnho nntsew yie a, yennkotum edua Sunsum Krɔnkrɔn no do, ehu sunsum mu nkyerɛkyerɛ a ɔfa Jesus Christ ho a yebotum enya wɔ temple mu no.
Ber a yɛfata dɛ yɛbɛgye nkyerɛkyerɛ a ɔtse dɛm no, enyidado, enyigye, na daakye yieyɛ ho gyedzi bodua hɛn temple sũahu mu enyin wɔ hɛn abrabɔ nyina mu. Dɛm enyidado, enyigye, na daakye yieyɛ ho gyedzi no, nsa kã nko, ber a egye ayɛdze a wɔyɛ no wɔ temple krɔnkrɔn no to mu. Temple mu na yebotum enya taduasi wɔ ebusua nhyehyɛɛ ɔdɔ mu a ɔbɔtoa do owu ekyir na daapem no.
Mfe pii abɛsen no, ber a nna morosom dɛ bishop no, aberantsɛba fɛfɛw bi tsiaa me nsato dɛ ɔmbɛfata dɛ ɔnye Nyankopɔn bɛtsena wɔ ebusua ebusua mu afebɔɔ. Ntsɛn mu ara no ɔkãa kyerɛ me enyigye mber papa a ɔnye n’anyɛnkofo nyae. Memaa ɔkasae. Nkyii ɔkãa kyerɛ me dɛ hɔn aponto kor ase no, dede begyabegya pii nyina mu no, mpofirmu ara no onyaa atsenkã dɛ ɔayɛ ankonam. Mibisaa no dɛ ebɛnadze na osii. Ɔkãa dɛ ɔkaa ber no a ɔyɛ banyimba kakraba a, ɔtsena ne maame n’aserɛ do, na ɔdze n’abasa efua no. Ber a ɔrekã n’asɛm no, otuu sũ mber kumaa. Mekãa kyerɛɛ no dza minyim dɛ ɔyɛ nokwar: “Kwan kortsee a ibotum enya dɛm ebusua mfuae ho atsenkã afebɔɔ no nye dɛ ɔwo ankasa ebɛfata na aboa binom ma wɔagye temple nsɔwano ayɛdze no.”
Yennyim ebusua nhyehyɛɛ a ɔwɔ sunsum wiadze mu pefee anaa dza yɛsoɛr fi owu mu a ɔbɛba. Naaso yenyim dɛ nkɔnhyɛnyi Elijah baa dɛ mbrɛ wɔbɔɔ ho anohoba dɛ ɔrebɛdandan egyanom hɔn akoma aba mba no do, na mba hɔn akoma aba hɔn egyanom do.3 Na yenyim dɛ hɛn onnyiewiei enyigye gyina yɛbɔbɔ hɛn mbɔdzen kɛse dze dɛm ahomkã a otsim daapem noara ama hɛn ebusuafo dodow a yebotum.
Menya dɛm pɛ noara dɛ mubotum ato nsa afrɛ ebusuafo atseasefo dɛ wobenya pɛ dɛ wɔbɛfata dɛ wɔbɛgye temple nsɔwano ayɛdze no na woedzi no nyi. Ɔno kã nda a odzi ewiei Israel mboano anohoba no a ɔwɔ ntwamutam n’afã ebien nyina ho.
Kwan kɛse kor a yenya nye ber a hɛn ebusua mu mba no wosusuar no. Christ ne kan no yɛ akyɛdze a wɔdze woo hɔn. Ɔma wotum tse dza oye na dza ɔyɛ bɔn. Dɛm ntsi, wɔrohwɛ temple mpo anaa temple no mfonyin no botum wɔ abofra no mu no, wɔama woenya ɔpɛ dɛ wɔbɛfata na dabi ɔbɛyɛ hɔn ndzinoa dɛ wɔbɛhɛn mu.
Da no bɛba a nkyii ber a wɔyɛ mbabun no, wɔagye temple recommend dze ayɛ ananmusinyi enuma wɔ temple mu. Dɛm sũahu no mu no, hɔn nkã-tse benyin, ama temple no abɛyɛ bea a daa ɔkyerɛ Agyenkwa na No Werdambɔ no. Ber a wɔtse nkã dɛ wɔrema obi a ɔwɔ sunsum wiadze mu no kwan ma ɔatsew noho efi bɔn ho no, hɔn nkã-tse dɛ wɔbɔboa Agyenkwa no wɔ No dwuma krɔnkrɔn dɛ obehyira hɛn Ɔsor Egya ne ba no benyin.
Meehu dɛm sũahu no mu tum a ɔasesã ɔbabun bi n’abrabɔ. Mfe pii a abɛsen no menye me babaa kɔr temple ɔdze rokɔ ewimber no. Nna ɔno na odzi ewiei a ɔrosom wɔ enuma nsubura bea no dɛ ananmusinyi no. Wobisaa me babaa no dɛ ana obotum atweɔn kakra dze ewie ayɛdze ama nkorɔfo nyina no a woesiesie hɔn edzin. Ɔsee dɛ, nyew.
Mohwɛe ber a me babaa kakraba no tuu n’anan sii enuma nsubura no mu no. Wɔhyɛɛ enuma no ase. Nna nsu nam me babaa kakraba n’enyim resian ber biara a wɔmaa no do fii nsu no mu no. Wobisaa no bio na bio dɛ, “Ana ibotum ayɛ bi akã ho?” Ber biara no, ɔkãa dɛ, nyew.
Dɛ egya a modwen no ho no, mehyɛɛ ase dween ho dɛ nkyɛ wɔama oegyaa dɛ ɔbɛyɛ bi akã ho. Naaso meda ho kaa ne pisi ber a wobisaa no dɛ ana obotum ayɛ bi akã ho no na ɔdze ndze kakrabaa enyimpi mu kã dɛ, “Nyew.” Ɔtweɔnee kesii dɛ nyimpa a ne ndzin dzi ewiei dɛm da no nyaa n’enuma nhyira wɔ Jesus Christ ne dzin mu.
Ber a menye no nantsewee puei fii temple hɔ anafua no, dza muhunii no yɛɛ me nwanwa. Woepegya abofra no na wɔasesã no wɔ m’enyi do ɔnam dɛ ɔrosom Ewuradze wɔ Ne fie mu. Meda ho kaa nkenyan na asomdwee ho atsenkã menyae ber a yɛrenantsew efi temple hɔ no.
Mfe pii abɛsen. Ɔda ho ara rese nyew wɔ asɛmbisa a ofi Ewuradze hɔ sɛ ɔbɛyɛ bi akã ho ama No ber a ɔyɛ dzen a. Dɛm na temple som botum ayɛ dze asesã na woepegya hɛn. Dɛm ntsi na m’enyidado ma hom na hom ebusua adɔfo nyina nye dɛ hom benyin wɔ ɔpɛ na enyimpi mu dɛ hom bɛfata dɛ hom betaa akɔ Ewuradze ne fie mber dodow a hom gyinabew bɛma hom kwan.
Ɔpɛ dɛ Ɔyɛ hom akwaaba wɔ hɔ. Mobɔ mpaa dɛ hom bɔbɔ mbɔdzen atow ɔpɛ wɔ Ɔsor Egya ne mba hɔn akoma mu dɛ wɔbɔkɔ hɔ, bea a wobotum atse nkã dɛ wɔabɛn No, na dɛ hom bɔto nsa afrɛ hom ewuakɔr ma wɔafata dɛ wɔnye No na hom bɛtsena afebɔɔ.
Nsɛm yinom botum ayɛ hɛn dze:
Modɔ dɛ muhu Temple.
Mobɔkɔ hɔ dabi
Aakɛtse Sunsum Krɔnkrɔn no ne nkã,
Etsie na maabɔ mpaa.
Osiandɛ temple yɛ Nyankopɔn ne fie,
Bea a ɔdɔ atahyɛ na ɔyɛ fɛw.
Mibesiesie moho ber a musuar yi;
Iyi nye m’asodzii krɔnkrɔn.4
Megye me dasegye nokwar mu ara dɛ yɛyɛ Ɔsor Egya dɔfo ne mba. Ɔsaan mu yii No Dɔba, Jesus Christ dɛ Ɔmbɛyɛ hɛn Agyenkwa na Pomfo. Kwan kortsee a yebotum asan nye Hɔn na hɛn ebusua akɛtsena nye yebodua temple krɔnkrɔn ayɛdze do. Megye dase dɛ President Russell M. Nelson kitsa asɔfodzi nsaafee nyina na ɔdze dzi dwuma ama Nyankopɔn ne mba nyina eetum eenya onnyiewiei nkwa. Megye ho dase wɔ Jesus Christ ne dzin krɔnkrɔn no mu, amen.