Enyidado wɔ Christ mu
Yɛpɛ papaapa dɛ yɛboa hɔn nyina a wonya akonamyɛ ho atsenkã anaa wɔtse dɛ wɔnnkã ho. Menkã, nkankara dɛ, hɔn a sesei wɔyɛ ahokwafo no.
Enuanom na nkyerɛbaa, Easter ber yi yetsim wɔ hɛn Ewuradze na Agyenkwa, Jesus Christ N’enyimnyam Wusoɛr no do. Yɛkaa Ne nsato ɔdɔ mu ara dɛ: “Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.
“Hom mfa mo kɔndua no nto hom do, na hom nsũa me, osiandɛ modwe na mebrɛ moho adze wɔ akoma mu; na hom benya ahomgye ama hom akra.
“Na mo kɔndua yɛ mberɛw, na m’adzesoa yɛ har.”1
Agyenkwa no ne nsato dɛ yɛmbra No hɔ no yɛ nsato ma obiara dɛ nnyɛ No hɔ nnko na ɔmbra mbom ɔmbɛkã N’Asɔr ho so.
Nyiyimu no a odzi ɔdɔ mu ara nsato yi kan no, Jesus kyerɛɛ hɛn mbrɛ wosi yɛ, a yehwehwɛ dɛ yɛbɛka No do. Ɔkãa dɛ, “Na obiara nnyim Ɔba no, gyedɛ Egya no, eso obiara nnyim Egya no gyedɛ Ɔba no, na nyia a Ɔba no pɛ dɛ oyi no kyerɛ.”2
Jesus pɛ dɛ yehu dɛ Nyame yɛ Ɔsor Egya dɔfo.
Yenyim dɛ hɛn Ɔsor Egya dɔ hɛn no bɔboa hɛn ma yeehu nyimpa ban a yɛyɛ na yeehu dɛ yɛkã N’onnyiewiei ebusua kɛse no ho.
Mayo Clinicfo ndaansa yi wɔkyerɛɛw dɛ: “Ewɔ atsenkã bi dɛ ekã ho no ho hia dodow. … Hɛn abrabɔ n’afã biara mu no wɔahyehyɛ no dɛ yɛkã biribi ho.” Nkyerɛwee yi dze kã ho dɛ, “Yennkotum atsew atsenkã dɛ ekã ho no efi hɛn honandua mu na adwen mu apɔwmudzen ho”3—na medze hɛn sunsum mu apɔwmudzen bɛkã ho.
Ewimbir no a ansaana Oruhu amandze wɔ Gethsemane na No wu wɔ mbeamudua no do no, Agyenkwa no nye N’esuafo no hyiae wɔ Ewimbir Edzidzi a Odzi Ewiei mu. Ɔsee hɔn dɛ, “Wiadze mu dze, hom wɔ ahohia:: naaso hom nhyɛ dzen; medzi wiadze do konyim”4 Ansaana ewia rokɔtɔ wɔ da a odzi do no, Jesus hun amandze na “hɛn bɔn ntsi na [O]wui [wɔ mbeamudua no do].”5
Modwen mbrɛ mbaa na mbarimba agyedzifo a woedzi N’ekyir no atsenkã a wobenya wɔ Jerusalem ber a ewia no rokɔtɔ na sum na suro rehyɛ hɔn do no.6
Tse dɛ tsetse esuafo mfe 2,000 a abɛsen yi, hom mu binom so bia wobenya ankonamyɛ ho atsenkã ofi mber to mber. Maatse ankonamyɛ fi ber a me yer a ɔsombo, Barbara, wui mfe ebien na fã nye yi. Minyim dza ɔtse dɛ ebusua mu mba, anyɛnkofo, na mfɛfo etwa wo ho ehyia na eda ho nya ankonamyɛ ho atsenkã—osiandɛ m’abrabɔ mu ɔdɔ no nnkã moho bio.
COVID-19 wiadze mu nsan yarba no so ada kokoamuhyɛ na ankonamyɛ edzi ama dodow. Ɔhaw horow a yehyia wɔ abrabɔ yi mu nyina ekyir no, yebotum, tse dɛ Easter anapa no a odzi kan no, enyan aba nkwa fofor wɔ Christ mu a, yɛdze akwan afofor a ɔyɛ nwanwa na ndzepa afofor, ber a yɛdan Ewuradze dze hwehwɛ enyidado na yɛkã ho no.
Mankasa metse hɔn a wɔnntse dɛ wɔkã ho no hɔn yaw. Sɛ mohwɛ wiadze aman horow do nsɛm a, muhu dodow a ɔyɛ dɛ worinya ankonamyɛ atsenkã yi. Modwen ho dɛ, bia ma dodowara no, osiandɛ bia wonnyim dɛ Ɔsor Egya dɔ hɔn na hɛn nyina yɛkã N’onnyiewiei ebusua no ho. Yɛregye edzi dɛ Nyame dɔ hɛn na dɛ yɛyɛ Ne mba no yɛ awerɛkyekye na tadua si.
Osiandɛ dɛ yɛyɛ Nyame no sunsum mu mba, obiara wɔ fibea, awosu, na ndaamba krɔnkrɔn. Hɛn mu kor biara “yɛ sor awofo hɔn sunsum mu dɔ babanyin anaa babaa.”7 Iyi nye hɛn ahyɛnsewdze! Iyi nye hɛn nyimpa ban ankasa!
Hɛn sunsum mu ahyɛnsewdze no ɔda edzi yie ber a yɛtse hɛn abrabɔ yi mu ahyɛnsewdze horow, a ebusuakuw, amambra, anaa ɔman egyapadze kã ho.
Sunsum mu na amambra ahyɛnsewdze ho atsenkã, ɔdɔ, na yɛkã ho no, botum ekenyan enyidado na ɔdɔ ama Jesus Christ.
Mekasa fa enyidado a ɔwɔ Christ mu, nnyɛ adwendwen hun biara. Mbom, mekasa fa enyidado dɛ dza ewɔ ho enyisoatsɛw dɛ ɔbɛba mu. Dɛm enyidado no hia ara yie ama yeetum eedzi abɛbrɛsɛ do konyim, yesie sunsum mu dzenhyɛ na ahoɔdzen, na yɛaba ebohu dɛ hɛn Onnyiewiei Egya dɔ hɛn na yɛyɛ Ne mba a, yɛkã N’ebusua ho.
Sɛ yɛwɔ enyidado wɔ Christ mu a, yɛba ebohu dɛ yehia dɛ yedzi na yesie ahyɛmu krɔnkrɔn no a, hɛn apɛdze na adaasõ a yɛdɔ papaapa no botum edua No mu ahyɛ mã.
Asomafo Duebien no hɔn Quorum no abɔ mu afa apam dze mpaabɔ sunsum na yɛrohwehwɛ dɛ yɛbɛtse ase mbrɛ yebesi bɔboa hɔn a wonya akonamyɛ ho atsenkã anaa wɔtse dɛ wɔnnkã ho, nkankara hɔn a wɔyɛ ahokwafo no. Yɛpɛ papaapa dɛ yɛboa hɔn nyina a wonya iyi ho atsenkã no. Menkã, nkankara dɛ, hɔn a sesei wɔyɛ ahokwafo no.
Enuanom na nkyerɛbaa, ndɛ mpanyimfo a wɔbor fã na wɔwɔ Asɔr yi mu a wɔyɛ ekunafo, woegyaa awar, anaa wonnyaa nnwaree. Binom dwendwen fa akwan na dzibew horow a wɔwɔ wɔ Nyankopɔn ne nhyehyɛɛ mu na wɔ Asɔr no mu. Ɔsɛ dɛ yenya ntseasee dɛ onnyiewiei nkwa nnyɛ asɛmbisa a ɔfa ndɛ w’awar ne gyinabew ho ara, mbom ɔfa wo suanyiyɛ na: “dasegye a ɔwɔ Jesus ho no a [ɔ]yɛ dzen.”8 Hɔn a wɔyɛ ahokwafo no hɔn enyidado no kor noara tse dɛ Ewuradze N’Asɔr a wɔdze asan ananmu aba mu asɔrmba no—wodua “setsie ma mbra no na Asɛmpa n’ayɛdze no”9 do dze enya Christ n’adom no ho kwan.
Munsusu dɛ fapem nkyerɛkyerɛ binom wɔ hɔ a yehia dɛ yɛbɛtse ase.
Odzi kan, kyerɛwsɛm na nda a odzi ekyir akɔnhyɛfo si no pi dɛ obiara a nokwar mu ara osie asɛmpa ayɛdze no benya nkwagye ntowdo ho kwan. President Russell M. Nelson akyerɛkyerɛ dɛ: “Ewuradze ne mber pa mu no, wɔremmfa nhyira biara nnkam N’ahotseweefo anokwafo no. Ewuradze bobua obiara na Ɔama no akatua dɛ mbrɛ n’akoma mu ahwehwɛdze na ndzeyɛɛ tse.”10
Otsĩa ebien, mber pɔkyee na kwan a nkwagye ntowdo nhyira no wɔdze bɛma no, wonnyi ne nyina nnkyerɛe, naaso woesi ho tadua.11 President Dallin H. Oaks kyerɛkyerɛɛ mu dɛ tsebew binom wɔ “abrabɔ yi mu no wɔdze bɔto yie wɔ Mfe Apem no mu, a ɔyɛ mber a wɔdze bɛhyɛ dza onndzi mu nnwie wɔ nkwagye nhyehyɛɛ kɛse no mu ama hɛn Egya Ne mba a wɔfata nyina.”12
Dɛm no nnkyerɛ dɛ wɔdze nhyira nyina to hɔ dze tweɔn Mfe apem no; nsa akã binom na nkaa no wɔbɔkɔ do nsa akã ara ekesi dɛm da no.13
Otsĩa ebiasa, erotweɔn Ewuradze no kyerɛ erokɔ do yɛ setsie na sunsum mu mpontu kɔ No hɔ. Erotweɔn Ewuradze no, nnkyerɛ eresɛɛ wo mber a mmfa nnyɛ hwee. Onnyi dɛ enya atsenkã dɛ ewɔ atweɔnee bea.
Erotweɔn Ewuradze no kyerɛ ereyɛ biribi. Meehu wɔ mfe pii a abɛsen mu dɛ hɛn enyidado wɔ Christ mu no kɔ kan ber a yɛsom binom no. Yerosom dɛ mbrɛ Jesus somee no, hɛn enyidado wɔ No mu ara na ɔkɔ kan.
Mpontu a ankorankor botum enya ber a ɔrotweɔn Ewuradze na N’anohoba no som bo, ɔyɛ krɔnkrɔn a ɔkã Ne nhyehyɛɛ ma hɛn mu kor biara ho. Ntoboa a obi botum ayɛ sesei dze aboa ma wɔakyekyer Asɔr no wɔ asaase yi do na yɛboa Israel ano no wohia papaapa. Mbrɛ ibotum asom no mmfa w’awar ne gyinabew ho. Ewuradze hyɛ hɔn a wɔsom na wɔtweɔn No abotar na gyedzi mu no enyimnyam.14
Otsĩa anan, Nyankopɔn ma Ne mba nyina onnyiewiei nkwa. Hɔn a wɔgye Agyenkwa no no nnuho adom akyɛdze na wɔdze Ne mbrasɛm bɔ bra no, benya onnyiewiei nkwa, sɛ woennya no su na n’emudzi nyina wɔ abrabɔ yi mu mpo a. Hɔn a wonu hɔn ho bohu dɛ Ewuradze ayɛ krado dɛ Ɔdze hɔn bɔn bɛkyɛ hɔn, dɛ mbrɛ Oesi no tadua no, “Nyew, mber dodow biara a mo nkorɔfo bonu hɔnho no, medze hɔn mfom a wɔayɛ etsia me no bɛkyɛ hɔn.”15
Ne nyina n’ewiei no, yɛhwehwɛ mu a, dza obi tum yɛ, n’apɛdze, na kwan a ɔdze ne pɛ na nsanmuyi dzi dwuma, a mbrɛ yebesi bɛfata onnyiewiei nkwa no kã ho no, yɛ nsɛm a Ewuradze nko na obotum ebua.
Otsĩa enum, hɛn awerɛhyɛmu wɔ dza woesi no tadua no gyina hɛn gyedzi wɔ Jesus Christ do, Ɔno a ɔnam n’adom do ndzɛmba nyina a ɔfa abrabɔ yi ho wɔdze to yie no.16 Nhyira a wɔabɔ ho anohoba no a ɔnam Ɔno a, No Werdambɔ no ntsi “[o]sianee baa ndzɛmba nyinara ase”17 na “[o]edzi wiadze do konyim”18 no do. “Ɔakɛtsena Nyankopɔn n’abanyimfa, dɛ ɔregye ehumbɔbɔr ne kyɛfa efi Egya no hɔ ama adasamba ntsi[;] … ; dɛm ntsi odzi ma adasamba.”19 Ewiei no, “wɔdze n’enyimnyam no bɛhyɛ ahotseweefo no mã na hɔn nsa akã hɔn egyapadze”20 dɛ “Christ afe-adzedzifo.”21
Hɛn pɛ nye dɛ fapem yinom bɔboa obiara ma oenya enyidado yie wɔ Christ mu na oenya atsenkã dɛ ɔkã ho.
Mma wo werɛ mmfir dɛ eyɛ Nyame, hɛn Onnyiewiei Egya no ne ba, sesei na daapem. Ɔdɔ wo, na Asɔr no rohwehwɛ wo na ohia wo. Nyew, yehia hom! Yehia hom ndze, talent horow, nsaano dwuma, papayɛ, na tsenenee.
Mfe pii mu no, yɛakasa afa “young single adultfo,” “single adultfo,” na “mpanyimfo” ho. Dɛm edzin nkyekyɛmu no botum aboa wɔ nhwɛdo edwuma mu ɔtɔfabi a naaso obotum wɔasesã mbrɛ yesi hwɛ binom a enyi nnda.
Ana kwan bi wɔ hɔ a yebotum ekwetsir nyimpa su yi a obotum akyekyɛ hɛn mu yi?
President Nelson ase dɛ yɛnfrɛ hɛn ho dɛ yɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrmba. Dɛm no kata hɛn nyina do, ɔnntse dɛm a?
Jesus Christ n’asɛmpa no wɔ tum dɛ ɔkã hɛn bɔ mu. Ne nyina mu no yɛyɛ adze kor kyɛn hɛn nsonsonee. Dɛ yɛyɛ Nyankopɔn n’ebusua no, hɛn nyina yɛ hɛn nuambanyin na nkyerɛbaa. Paul kãa dɛ, “Na [Nyankopɔn] ofi adze kor mu yɛɛ nyimpa amanaman nyina, dɛ wɔntsena asaase enyi nyina.”22
Hom stake presidentfo, bishopfo, na quorum na nkyerɛbaa baanodzifo, meserɛ dɛ hom nhwɛ hom asɔrba biara ɔwɔ hom stake, ward, quorum, anaa ekuw no dɛ asɔrba a obotum ama ntoboa na ɔasom wɔ ɔfrɛ horow mu na akwan pii mu no ɔayɛ biribi.
Asɔrba biara a ɔwɔ hɛn quorum, ekuw, ward, na stake horow mu no wɔ Nyame akyɛdze na talent horow a obotum aboa ma woesi N’ahenman no sesei.
Hom mma yɛmfrɛ hɛn asɔrmba a wɔyɛ ahokwafo no ma wɔnsom, wompegya, na wɔnkyerɛkyerɛ. Hom mma yennyi mfeda ntseasee na adwenkyerɛ no a ɔtɔfabi a yɛanngye enyim mpo no, wɔama binom enya ankonamyɛ atsenkã na dɛ wɔnnkã ho anaa wonnkotum asom.
Megye dase wɔ Easter dapɛn ewiei yi wɔ hɛn Agyenkwa Jesus Christ ho, na onnyiewiei enyidado a Ɔdze ma me na nkorɔfo a wɔgye Ne dzi no. Na megye dase yi ahobrɛadze mu wɔ Ne dzin krɔnkrɔn no mu, Jesus Christ mpo no, amen.