Nnyɛ dɛ Mbrɛ Wiadze Ma
Edwindadze no a yehia a yɛdze bɛma nda a ɔreba no ahyerɛn na papayɛ enyin no, Jesus Christ asɛmpa no dze ma mbordo.
Ansaana Easter a odzi kan reba no, Jesus wiee sacrament ayɛdze fofor no a Ɔdze maa Duebien no, Ɔhyɛɛ N’enyimnyam nkra no ase na Ɔbɛɛn Gethsemane, woriyi No ama, na No mbeamuduabɔ. Naaso, Ɔtsee dza ɔhaw hɔn, nye suro pɔkyee mpo a dɛm mbarimba no kyerɛɛ no, Ɔsee hɔn dɛ (na hɛn so dɛ):
“Mma hom akoma nntutu, hom ngye Nyankopɔn ndzi, hom ngye mo so ndzi. …
“Mirinngya hom ngyanka, mebɛba hom nkyɛn.
“Asomdwee na medze gya hom; mara m’asomdwee na medze mema hom, nnyɛ dɛ mbrɛ wiadze ma, medze mema hom. Mma hom akoma nntutu, eso mma ɔmmbɔ hu.”1
Mber a ɔyɛ dzen ba wiadze abrabɔ yi mu a, ɔkã anokwafo no, mbom amandzɛɛbɔ a ɔhyɛ nkuran a ofi Christ hɔ nye dɛ, Ɔno, apaho eguambaa no, bɔkɔ dɛ “oguambaa a [ɔwɔ] no nhwitwitwafo enyim,”2 naaso Ɔbɔsoɛr, abɛyɛ, dɛ mbrɛ ndwontofo no kãe no, “[ɔabɛ]yɛ hɛn guandɔbea na ahoɔdzen, [hɛn] mprɛmprɛ boafo wɔ ɔfona [ber] mu”3
Yeruhu mber a ɔyɛ dzen da hɔ rotweɔn Christ ber a Ɔrebɛn mbeamudua no na N’esuafo a wɔdze N’asɛmpa no bɔkɔ wiadze wɔ mber nkyekyɛmu ntamu no, afei hom nye me nkɔ asɛm a ɔfa Agyenkwa N’Asɔr mu asɔrmba wɔ nda a odzi ekyir yi mu. Ɔhyɛ nyiyimu pii a ɔyɛ ahobow a, ɔwɔ Mormon Nwoma no mu a wɔkã ɔkõ horow ho nsɛm, fi Laman na Lemuel hɔn su a ɔhyɛ ebufuw kesi ɔkõ a odzi ewiei a nsordaafo mpem ɔha mpem ɔha dze sii ano. Siantsir kor a ɔda edzi yie mbrɛ woesi etsim do nye dɛ susuampara dɛ Mormon Nwoma no wɔkyerɛwee maa nda a odzi ekyir akenkanfo no, akyerɛwfo yinom (hɔnara a wohyiaa ɔkõ mpɛn pii no) bɔ hɛn kɔkɔ nkɔnhyɛ mu ara dɛ wentwiwentwi na ɔkõ bɛyɛ nda a odzi ewiei ne sɛnkyerɛdze.
Nyew, nnyɛ emi na meedzi kan aakã nda a odzi ekyir wentwiwentwi ho asɛm. Mfe 2,000 abɛsen no, Agyenkwa no bɔɔ kɔkɔ dɛ nda a odzi ewiei mu no “akõkõekõ na akosɛm nkã,”4 bɛba, ekyir no Ɔkãa dɛ “wobeyi asomdwee efi asaase do,”5 Ampaara, Asomdwee Hen, a Osii no pi kyerɛkyerɛɛ dɛ wentwitwentwi fi ɔbɔnsam no,6 otwar dɛ Ɔnye N’Egya Krɔnkrɔn no sũ wɔ adasa ebusua ho wɔ hɛn nda yi mu a “ wonnyi dɔ” dɛ ma kyerɛwsɛm no se, na wonntum nndwen mbrɛ wobesi botum dze ɔdɔ abɔ mu atsena ho.7
Enuanom na nkyerɛbaa, yehu ɔkõ, ebufuw, na enyansɔ dodow a ɔbɔ hɛn ho aporɔw. Adom mu ara, ebusuasantsen yi nnyaa Wiadze Ɔsatu a Otsĩa Ebiasa nnkõe, nna yennya wiadze nyina mu sikasɛm ne nsɛe tse dɛ dza ogyaa kɔr afe 1929 Ahokyer Kɛse mu no. Naaso yerihyia Wiadze Ɔsatu a Otsĩa Ebiasa bi a ɔnnyɛ hɛn atamfo na yɛrokɔ ekodwerew hɔn, mbom yɛrokɔboaboa Nyame mba ano ma wɔadwen hɔnho nkorkor, na wɔaboa ma wɔasã epirakur a yehu no wiadze a ayɛ basabasa yi mu. Ahokyer Kɛse no a sesei yehyia no mmfa hɛn sika a yɛdze esie a wɔayew ho, na mbom ɔfa hɛn awerɛhyɛmu ho, gyedzi na enyidado na ayamuyie a wɔatɔ sin ara yie a, etwa ehyia hɛnho nyina no. Mbom edwindadze a yehia a yɛdze bɛma nda a ɔreba no ahyerɛn na papayɛ enyin wɔ ɔman no mu no, Jesus Christ asɛmpa no dze ma mbordo. Yennkotum ama—na wiadze yi nnkotum ama—yeedzi nkõgu dɛ yɛdze asɛmpa nkyerɛkyerɛ yinom na bambɔ ahyɛmu horow no bedzi dwuma ara yie ankorankor na bagua do.
Ntsi, wɔ wiadze a “ehum etu wo, na wɔnnkyekyee wo werɛ,” dɛ mbrɛ Jehovah kãa dɛ ɔbɛba no, yebesi dɛn bohu dza Ɔfrɛ no “asomdwee ho … nhyehyɛɛ no”? Yebohu ber a yɛdan kɔ Ɔno a Ɔkãa dɛ, na “[ɔdze] daapem ayamuyie,” benya ehumbɔbɔr wɔ hɛn do, na ɔama hɛn mba hɔn asomdwee adɔɔ sõ.8 Nkɔnhyɛ huuhu na kyerɛwsɛm a ɔmma hɛn ho mmbaa hɛn dɛ wobeyi asomdwee efi wiadze nyina mu no ekyir no, nkɔnhyɛfo no, a hɛn ankasa hɛn Russell M. Nelson dɔfo ka ho no, akyerɛkyerɛ dɛ wonnkeyi efi hɛn mu ankorankor!9 Ntsi, Easter yi, yɛmbɔ mbɔdzen dɛ yɛbɛtahye asomdwee wɔ ankorankor kwan do, yɛmfa adom na Ewuradze Jesus Christ No Werdambɔ ayarsã edur nyɛ hɛnho na hɛn ebusua ebusua na hɔn a wɔabɔ hɛnho aporɔw no a hɛn nsa bɛkã hɔn no. Adom mu ara, na nwanwa mpo mu, edur yi a ɔdwedwe yi hɛn nsa botum akã a wɔmmfa sika nntɔ na wonntwa bo so.”10
Dɛm mboa na enyidado no wohia no papaapa osiandɛ ndɛ wiadze nyina mu mboanofo yi dodowara nye ɔhaw horow ridzi aper—honandua anaa nkã-tse mu, nkitahodzi mu, anaa ɔhaw pii no binom mu. Mbom iyinom mu dodow no yennyi ahoɔdzen a ɔbɔ sõ a hɛnankasa yebesiesie, osiandɛ mboa na asomdwee kor a yehia no “nnyɛ dɛ mbrɛ wiadze ma”11 Oho, nsɛnhia a ɔyɛ dzen ampaara no yehia dza kyerɛwsɛm no frɛ no “sor tum no,” na ama nsa aakã tum yinom no otwar dɛ yɛdze dza dɛm kyerɛwsɛm noara frɛ no “tseneneeyɛ fapem”12 no bɔ bra. Afei, yɛretse dza ɔfam fapem no na tum no ntamu no nye adzesũadze kor a ɔyɛ dɛ adasa ebusũa mmpɛ dɛ wosũa, dɛm na ɔsor na asaase Nyame se!13
Na dɛm fapem horow nye dɛn? Oye, wɔakyerɛw no nkorkor wɔ kyerɛwsɛm no mu, wɔkyerɛkyerɛ no bio na bio wɔ ehyiadze a ɔtse dɛm mu, na wɔ hɛn mberano yi, wɔkyerɛkyerɛɛ Nkɔnhyɛnyi Joseph Smith dɛm wɔ mbuae ma nankasa no sũ a ɔtse dɛ “Me Nyankopɔn, me Nyankopɔn, ɔyɛ dɛn na apa me yi?” dze no.14 Liberty Efiadze ahokyer na awɔw no mu no, wɔkyerɛkyerɛɛ no tseneneeyɛ fapem tse dɛ, abotar, penkyɛr, botooyɛ, nye ɔdɔ mapã.15 Dɛm fapem horow yinom nnyi hɔ a nkyɛ otwar dɛ mbrɛ ɔbɛdan biara yebehyia ntõtõ na enyitan.
Ɔfa dɛm ho no, menkasa kakra mfa tseneneeyɛ fapem a onnyi tsebew binom mu no ho wɔ hɛn mber yi mu. Ɔtɔ dɛ meyɛ obi a n’enyi gye noho, na papa pii na ndzɛmba fɛɛfɛw na ɔwɔ hɛn wiadze yi mu. Nokwar, woehyira hɛn honandua mu ndzɛmba akyɛn ebusuasantsen biara wɔ wiadze abakɔsɛm mu, naaso afe aha otsia 21 mu no, amambra dodow, na ɔtaa dɛ ɔdɔɔ sõ wɔ Asɔr mu no, yehu abrabɔ a wɔwɔ ɔhaw mu, su bɔn a ɔnnsɛ pii a no nsunsuando nye ahyɛmu a woebu do na ɔyɛ yaw dɛ akoma pii so a wɔabobɔ. Hom nsusu kasa fĩ a ɔnye awartõ nam, ne nyina wohu no ber biara wɔ sene mu anaa tɛlɛbihyɛn do, anaa ɔbra kyew a wodua nhyɛ do nye dza ɔnnsɛ wɔ edwumayɛ bea a yɛkenkan pii fa ho no. Nsɛm a ɔfa ahyɛmu ahotsew ho, dza ɔyɛ krɔnkrɔn no wɔtaa wogu ho fĩ. Obiara a ɔbɛpɛ dɛ ɔbɛnantsew anaa ɔbɛkyerɛ su, wɔ akwan yinom mu no—“tse dɛ ma wiadze dze ma no a”, sɛ yɛrekã a—mma hom nnya enyidado dɛ obegya hom ma hom enya asomdwee sũahu; mobɔ hom anohoba wɔ Ewuradze mu dɛ ɔnnkyɛ yie. Emumuyɛdze nnyɛ enyigyedze ara da,”16 dɛ ma tsetse nkɔnhyɛnyi kãa no mpɛn bi no. Sɛ agor no ba ewiei, otwar dɛ daa wotua mbɛnhɛmfo no kaw, na ɔtaa dɛ enyisuwa na mfehoekyir nye dwɛɛtɛɛ a ɔgye.17
Anaa bia yehu ewurkadze anaa dza ɔnnyɛ enyidzi kakra ara. Mbrɛ ɔsɛ dɛ yɛyɛ ahwɛyie ara yie dɛ Ewuradze Jesus Christ esuafo no yɛnnkɛkyerɛ suban a ɔtse dɛm. Kwan biara nnyi hɔ a ɔsɛ dɛ yedzi fɔ wɔ ewurkadze ne nyɛe na dza ɔnntsen dze tseetsee hɔn a yɛhwɛ hɔn do anaa nhyɛ wɔ—honandua, nkã-tse mu, asɔfodzi kwan do, anaa dza ɔtse dɛm biara. Mekaa dɛ metsee ɔhyewbɔ a ofi President Gordon B. Hinckley, mfe kakra abɛsen no ber a ɔkasaa kyerɛɛ mbanyin a wɔwɔ Asɔr no mu a ɔfa hɔn a ɔfrɛɛ hɔn “esisifo wɔ hɔn ara hɔn efiefi mu no:”19
Ɔkãa dɛ, “Mbrɛ osi yɛ yaw na abofon koraa ewurkadze a wɔdze yɛ ɔyer.” “Banyin biara a ɔwɔ Asɔr yi mu na ɔyɛ ne yer ewurkadze, a ogu n’enyim ase, ɔhyehyɛ no ahorba, ɔyɛ dza ɔnntsen dze tseetsee no no mmfata dɛ okitsa asɔfodzi no. … [Ɔ]mmfata dɛ obekitsa temple recommend.”19 Ma ɔyɛ tantan tse dɛ ɔno nye abofra ewurkadze ne nyɛe—anaa ewurkadze wɔ kwan biara do.20
Gyinabew pii mu no, asɔrmba a nkyɛ wɔyɛ anokwafo no botum edzi fɔ wɔ nsɛm a ɔnnyɛ ne nkãe ho, wɔ ɔsɛɛ kwan mpo do, dze akyerɛ hɔn a ɔtaa dɛ wɔdze ayɛdze krɔnkrɔn asɔw hɔn ano wɔ Ewuradze ne temple mu. Obiara wɔ ndzinoa dɛ obenya asomdwee na bambɔ atsenkã wɔ fie. Meserɛ, hom mbɔ mbɔdzen nkyekyer dɛm ehoo no wɔ hɔ. Anohoba a wɔdze abɔ esiesiefo nye dɛ wobenya Sunsum Krɔnkrɔn no n’anyɛnkoyɛ no aber nyina, na nhyira no bɛpem egu [hom] do a “ɔnnam nhyɛ kwan biara do” afebɔɔ.21 Obiara nnkotum dze tɛkyerɛma a ɔasew ano anaa nsɛmbɔn dze “atow ɔpon ho dɔ ndwom.”22
Munwie bea a mehyɛɛ ase no. Ɔkyena yɛ Easter, ber a Jesus Christ asɛmpa ne tsenenee fapem na No Werdambɔ no “dzi hɛn apaho” apaho tra ɔkõ na wentwiwentwi, apaho tra abagura na mbratõ, na ewiei apaho atra owu. Ɔyɛ ber a yebosua nokwardzi trɔdɔdɔ wɔ kasa na nyɛe mu ama Nyame Eguambaa a, “ɔsɔɔw hɛn yaw, na ɔsoaa hɛn awerɛhow”23 wɔ N’enyimpi si mu dɛ Obowie nkwagye edwuma no wɔ hɛn afã.
Woyii No mae na yaw nyina ekyir no, wɔannye no enndzi no yie na ewurkadze na Ɔrosoa adasamba nyina hɔn bɔn mboano nyina no, Nyame tseasefo Ne Ba no hwɛɛ abrabɔ sar do, Ohun hɛn dapɛn ewiei yi na Ɔkãa dɛ: “Asomdwee na medze gya hom; mara m’asomdwee na medze mema hom, nnyɛ dɛ mbrɛ wiadze ma. Mma hom akoma nntutu, eso mma ɔmmbɔ hu.”24 Hom nnya Easter nhyira, enyigye na asomdwee. Dza wonnkotum esusu ho no Asomdwee Hen no etua ho kaw dada, Ɔno a medze m’akoma nyina dɔ no na Asɔr yi yɛ nedze, na Ɔno ho na megye dase, a ekyingye biara nnyi ho, Ewuradze Jesus Christ mpo no, amen.