Hwɛ! Meyɛ Nyankopɔn a Meyɛ Anwanwadze
Anwanwadze, nsɛnkyerɛdze, na etumdze bu do wɔ ndɛ Jesus Christ n’akadofo ntamu, wɔ hom abrabɔ nye medze mu.
Mo nuanom na nkyerɛbaa adɔfo, mbrɛ ɔayɛ me adom dɛ migyina hom enyim ndɛ. Menye hɔn a wɔakasa dada wɔ ehyiadzi yi ase no yɛkor dzi dase kyerɛ hom dɛ Jesus Christ tse ase. Ɔkyerɛ N’Asɔr kwan; Ɔkasa kyerɛ No nkɔnhyɛnyi President Russell M. Nelson, na Ɔdɔ Ɔsor Egya ne mba nyinara.
Easter Kwesida yi yɛkaa Jesus Christ, hɛn Agyenkwa na Pomfo,1 Nyame Tumfo, Asomdwee Hen, no Wusoɛr.2 No Werdambɔ, a okowiei No Wusoɛr nda ebiasa ekyir a odzii no wɔ nda a wɔfɛmee mu no, etsim dɛ anwanwadze abɔso wɔ adasa abakɔsɛm mu. “Na hwɛ,’’ Ɔbɔɔ mu kãa dɛ, “Meyɛ Nyankopɔn; na meyɛ Nyankopɔn a meyɛ anwanwadze.’’3
“Ana anwanwadze ne yɛ etwa osiandɛ Christ afow kɔ sor, na ɔakɛtsena Nyankopɔn n’abanyimfa?’’4 nkɔnhyɛnyi Mormon bisa wɔ Mormon Nwoma no mu. Oyi ano dɛ, “Oho; na eso sor abɔfo nngyaa dɛ wosom adasamba.’’5
Mbeamuduabɔ ekyir no, Ewuradze no sor ɔbɔfo bi puee Mary do, na mbaa kakra binom a, wɔkɔr nda no ho dɛ wɔrekɛsera Jesus ne nyimpadua no ngo. Ɔbɔfo no kãa dɛ:
“Ɔyɛ dɛn na hom rohwehwɛ nyia ɔtse ase no wɔ ewufo mu yi?’’6
“Onnyi ha: osiandɛ ɔasoɛr.’’7
Mormon Nwoma nkɔnhyɛnyi Abinadi bɔɔ dɛm anwanwadze no ho dawur:
“Sɛ Christ annsoɛr emmfi owu mu a, … nkyɛ owusoɛr biara nnyi hɔ.
“Mbom owusoɛr wɔ hɔ, dɛm ntsi adakamaa nnyi tum, na owu no bɔr akɛhyɛ Christ mu.’’8
Jesus Christ n’awanwadze nyɛe no maa tsetse esuafo no paa mu kãa dɛ: “Woana nye yi! a ɔhyɛ nsu na mframa ma wotsie no yi.’’9
Ber a tsetse Asomafo no kãa Jesus Christ do na wotsie dɛ Ɔkyerɛkyerɛ asɛmpa no, wohun awanwadze beberee. Wohun dɛ “enyifurafo hu adze, mbubua nantsew, akwatafo ho san, etsitsifo tse asɛm, ewufo nyan, na wɔkã asɛmpa kyerɛ ehiafo.’’10
Anwanwadze, nsɛnkyerɛdze, na etumdze bu do wɔ ndɛ Jesus Christ n’akadofo ntamu, wɔ hom abrabɔ nye medze mu. Anwanwadze yɛ ndzeyɛɛ ahorow krɔnkrɔn, nda edzi, na Nyankopɔn no tum a onnyi kabea a ɔkyerɛ no taduasi dɛ Ɔtse “dɛm ndeda, ndɛ, na afebɔɔ.’’11 Jesus Christ, nyia ɔbɔɔ po, botum ama wɔataa dzinn; Ɔno a ɔmaa enyifurafo hun adze botum aboa hɛn ma yeetsim sunsum mu ndzɛmba do; Ɔno a ɔma akwatafo ho sanee botum esiesie hɛn mberɛwyɛ; Ɔno a ɔsaa ɔbarimba no a onntum nantsew no yarba botum akã “Bra, bɛka mo do, ama yɛdze asoɛr’’.12
Hom mu dodowara ehu anwanwadze, akyɛn dza hom susu ho. Yɛdze toto Jesus a onyaan owufo no a, ebia wosusuar. Naaso nnyɛ ne kɛseyɛ na ɔkyerɛ anwanwadze, ɔyɛ awanwadze nye dɛ ofi Nyankopɔn nko hɔ ba. Binom susu dɛ anwanwadze yɛ dza osi ara anaa akradze ara. Naaso nkɔnhyɛnyi Nephi buaa hɔn fɔ, hɔn a “wɔdze Nyankopɔn no tum na n’anwanwadze bɔto famu, na wɔakyerɛkyerɛ wɔ hɔnankasa hɔn nyansa na nwomasũa mu, ama woeenya mfaso.’’13
Tum krɔnkrɔn na wɔdze yɛ anwanwadze a ɔnam “[O]tumfo [a] ɔgye nkwa no do.’’14 Anwanwadze yɛ Nyankopɔn n’onnyiewiei nhyehyɛɛ no ntoado; anwanwadze yɛ nkwagye kwan a ofi sor ba asaase.
Abosoom kakra abasen no, nna menye Akyerɛbaa Rasband nam kwan do rokɔ Goshen, Utah, akɛyɛ Face to Face ehyiadzi a wɔrobɔ no dawur ama nyimpa bɔbor 600,000 wɔ kasahorow 16 mu.15 Nna nhyehyɛɛ no nye dɛ obetsim wɔ dza osisii wɔ Jesus Christ n’asɛmpa Nsanananmu ho a young adultfo no dze nsɛmbisa befi wiadze mfɛndzanan nyina bɛba. Nna menye Akyerɛbaa Rasband ankasa ahwehwɛ nsɛmbisa no mu; a wɔmaa hɛn kwan ma yɛgyee Joseph Smith ho dase dɛ Nyankopɔn no nkɔnhyɛnyi, nyikyerɛ no tum wɔ hɛn abrabɔ mu, Jesus Christ n’asɛmpa ne Nsanananmu no a ɔrokɔ do no, na nokwar na mbrasɛm no a wɔsom hɛn bo no ho. Dodowara a woritsie ndɛ no ka dɛm awanwadze a osisii no ho.
Ahyɛse no nna nkyɛ ɔwɔ dɛ dawurbɔ no fi Kwaa Krɔnkrɔn no mu wɔ New York etsifi, bea a Joseph Smith gyee dase dɛ: “Muhun Nyimpa-su beenu bi a hɔn hyerɛn na hɔn enyimnyam no murunntum nnkã ho asɛm, dɛ wɔsensɛn mo sor wɔ wimu. Hɔn mu kor bɔɔ me dzin na ɔkasaa kyerɛɛ me, ɔtseen ne nsa wɔ kor no do—Oyi nye mo Dɔba no. Tsie No!”16 Nuamanyin na nkyerɛbaa, nna dɛm no, yɛ awanwadze.
Wiadze nyina mu nsan yarba no maa yeyii fii hɔ dze dawurbɔ no kɔr Goshen, Utah, bea a Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no asan ayɛ no bio, dɛ wobotwa tsetse Jerusalem ne fã ne sene no. Nna aka akwansin kakra ara ma emi na Akyerɛbaa Rasband yeedu Goshen dɛm Kwesida ewimbir no, nna yehun wusiw kumbɔɔ dɛ ofi bea a yɛrokɔ no ne tsentsendo reba. Nna ogya hyehyew reyerɛɛw wɔ apaamu hɔ, na ɔhaaw hɛn dɛ esian botum akã dawurbɔ no. Nokwar trɔdɔdɔ, sima [eduonu] 20 rokɔbɔ [dɔnsia] 6:00 no, hɛn dawurbɔ mber no, enyinam ahoɔdzen a ɔwɔ dan kɛse nyina mu dumii. Enyinam ahoɔdzen nnyi hɔ! Dawurbɔ remmba do. Nna binom adwen nye dɛ generator kor bi wɔ hɔ a yebotum dze enya enyinam ahoɔdzen, mbom nna awerɛhyɛmu biara nnyi hɔ dɛ obutum ama abaefor mfir a yɛwɔ no ahom dze akyɛr.
Hen a yɛkã nhyehyɛɛ no ho nyina, a nsɛnkãfo, adwontofo, na mfirdwumafo—mpo young adultfo 20 a wofi hɛnankasa hɛn ebusua mu, kã ho—ara yie wɔ dza nna yɛrebɛyɛ no ho mu. Mifii hɔn enyisuwa kyi na adwensɛɛ no mu na mototɔe serɛɛ Ewuradze dɛ ɔma anwanwadze bi nsi. Mobɔɔ mpaa dɛ, “Ɔsor Egya,’’ “Menntaa mmbisa anwanwadze, naaso meribisa kor sesei. Otwar dɛ nhyiamu yi kɔdo ma young adultfo nyinara wɔ wiadze mfendzanan nyina. Yehia enyinam ahoɔdzen dze akɔ do sɛ ɔyɛ Wo pɛ a,’’
[Dɔnsia] 6:00 apa ho sima esuon, ntsɛm ara a enyinam ahoɔdzen no kɔree no, na ɔdze sanee bae. Biribiara hyɛɛ ase dɛ wɔreyɛ edwuma, fi ndwom na akasamu dze kesi video na ɔfama mfir no nyina. Yɛhyɛɛ dawurbɔ no ase ntsɛm ara. Yenyaa anwanwadze.
Mber a menye Akyerɛbaa Rasband tsena kaar no mu resan akɔ fie ewimbir no, President na Akyerɛbaa Nelson dze asɛm yi texti hɛn dɛ: “Ron, yɛpɛ dɛ hom hu dɛ ntsɛmara a yɛtsee dɛ enyinam ahoɔdzen nnyi hɔ no, nna yɛbɔɔ mpaa dɛ awanwadze bi nsi.’’
Ɔakyerɛw wɔ nda a odzi ekyir kyerɛwsɛm mu dɛ: “Na emi, Ewuradze matsen me nsa dze ekenyan sor etumfo; hom runntum nnhu no sesei, na mbom ɔnnkɛkyɛr na hom ehu, na hom nhu dɛ Emi nye mara, na mebɛba menye mo nkorɔfo ebedzi hen.’’17
Dɛm pɛpɛɛpɛr nye dza osii. Ewuradze tseen Ne nsa na enyinam ahoɔdzen no bae.
Dɛ mbrɛ President Nelson kyerɛkyerɛɛ hɛn tum mu ara wɔ nhyiamu a odzi ewiei mu no, gyedzi tum do na awanwadze yɛ edwuma. Nkɔnhyɛnyi Moroni tuu nkorɔfo no fo dɛ, “Na sɛ gyedzi nnyi adasamba mu a nkyɛ Nyankopɔn runntum nnyɛ anwanwadze wɔ hɔn mu; dɛm ntsi, oennyi noho annkyerɛ kesii dɛ wonyaa gyedzi.’’
Ɔkɔɔr do kãa dɛ:
“Hwɛ, Alma nye Amulek hɔn gyedzi na ɔmaa efiadze dwuruwii guu famu.
“Hwɛ, Nephi nye Lehi hɔn gyedzi na ɔmaa Lamanfo no nyaa nsakyer, ma wɔdze gya nye Sunsum Krɔnkrɔn numaa hɔn.
“Hwɛ, Ammon na no nuanom hɔn gyedzi na ɔyɛɛ anwanwadze akɛse wɔ Lamanfo no mu. …
“Na hɔn mu biara nnyi hɔ wɔ aber biara mu a otumii yɛɛ anwanwadze kodu dɛ onyaa gyedzi; dɛm ntsi wodzii kan nyaa gyedzi wɔ Nyankopɔn ne Ba no mu.’’18
Mubotum dze bi akekã ho atoatoa kyerɛwsɛm no do dɛ, “Nna ɔyɛ young adult agordzifo a hɔn enyi aber hɔn gyedzi, hɔn a wɔawea dawurbɔ ho, Asɔr baanodzifo, na asɔrmba, ɔsomafo bi, na Nyankopɔn no nkɔnhyɛnyi na wɔhwehwɛɛ anwanwadze kɛse a ɔtse dɛm ma enyinam ahoɔdzen no sanee baa Goshen, Utah no, bea a ɔwɔ ekyirekyir a wotwa sene.’’
Anwanwadze botum aba dɛ mpaabɔ ne nyiano. Wɔnnyɛ dza daa yebisa no anaa dza hɛn enyi da do no, naaso sɛ yenya awerɛhyɛmu wɔ Ewuradze mu a, Ɔbɔ wɔ hɔ, na Ne dze bɛtsen. Ɔbɛma anwanwadze no afata mber a yehia no.
Ewuradze yɛ anwanwadze dze kaa hɛn No tum, No dɔ ma hɛn, Ne nhyɛdo fi sor dze ba hɛn ɔnnkyebo sũahu mu, na Ne pɛ dɛ ɔbɛkyerɛkyerɛ dza ɔsom bo dodow ho asɛm. Ɔkãa kyerɛɛ Ahotseweefo no wɔ afe 1831 mu dɛ, “Nyia ɔwɔ gyedzi wɔ mo mu dɛ obenya ayarsa no,’’ na anohoba no kɔ do ndɛ dɛ, “na sɛ wɔnnhyehyɛe mmaa no dɛ obowu a, obenya ayarsa.’’19 Wɔahyehyɛ ɔmom ho mbra wɔ sor, na yɛhyɛ n’ase daa.
Mber bi wɔ hɔ a yenya enyidado dɛ anwanwadze bi bɛma dɔfo bi atse apɔw, dze adan nsisii nyɛe bi, anaa dze agow ɔkra a odzi yaw anaa abawgura no n’akoma. Yɛrohwɛ adze wɔ hɛn ɔnnkyebo enyiwa mu a, yɛpɛ dɛ Ewuradze sian mu, dze besiesie dza oebubu no. Ɔnam gyedzi do no, anwanwadze bɛba, ebia nnyɛ hɛn mber nhyehyɛɛ do anaa Oesiesie no dɛ ma hɛn yɛpɛ no. Ana dɛm no kyerɛ dɛ hɛn gyedzi suar anaa yɛmmfata No mboa a? Oho. Ewuradze dɔ hɛn. Ɔdze No nkwa maa hɛn, na No Werdambɔ no kɔdo gye hɛn fi adzesoadze na bɔn mu sɛ yenu hɛnho na yɛtwe bɛn No a.
Ewuradze abɔ hɛn nkaa dɛ, “Eso nnyɛ hom akwan nye m’akwan.’’20 Ɔdze kyɛ dɛ, “Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.”21—ahomgye fi adwendwen, abagura, suro, asowadzen, adɔfo hɔnho haw, enyidadoadze a ɔammba mu anaa ɔaayew. Asomdwee wɔ basabasayɛ na awerɛhow mu yɛ awanwadze. Hom nkaa Ewuradze ne nsɛm: “Ana mammfa asomdwee ho asɛm annhyɛ w’adwen mu a ɔfa dɛm asɛm no ho? Ebɛn dasegye kɛse na ibotum enya akyɛn dza ofi Nyame hɔ?’’22 Anwanwadze no nye dɛ Jesus Christ, Jehovah Kɛse no, Ɔsorsornyi ne Ba no, dze asomdwee riyi ano.
Dɛmara dɛ Opue Mary do wɔ ture mu no, Ɔdze ne dzin refrɛ no no, Ɔfrɛ hɛn dɛ yɛmfa hɛn gyedzi ndzi dwuma. Nna Mary rohwehwɛ asom No na ɔahwɛ No do. Nna No Wusoɛr no nnyɛ dza n’enyi da ho kwan, naaso nna ɔnam enyigye nhyehyɛɛ kɛse no do.
“Fi mbeamudua ho na si famu ɛ,’’23 dɔm a wɔnnyɛ agyedzifo sii No atwetwe wɔ Calvary. Nkyɛ obotum ayɛ anwanwadze a ɔtse dɛm. Mbom nna Onyim ahyɛse fi ewiei no, na Ɔgyee to do dɛ ɔbɛyɛ nokwafo ama N’egya ne nhyehyɛɛ. Ɔwɔ dɛ yɛtse dɛm fasusu no ase yie.
Nsɔhwɛ mber mu no Ɔakã dɛ, “Hom nhwɛ me mfẽ mu epirakur, nye mprɛgow ananmu wɔ me nsa nye m’anan mu; hom ndzi nokwar, hom ndzi me mbrasɛm do, na hom benya ɔsor ahenman no edzi.’’24 Enuanom na nkyerɛbaa, ɔno nye anohoba a wɔdze bɔɔ hɛn nyinara.
Easter Kwesida ber yi a yedzi Hɛn Ewuradze no Wusoɛr ho afe no, dɛ Jesus Christ no Ɔsomafo no, mobɔ mpaa dɛ hom bɛtse Pomfo no tum ho nkã wɔ hom abrabɔ mu, dɛ hom benya hom ntotɔserɛ ma hɛn Ɔsor Egya no benya nyiano no wɔ ɔdɔ na enyimpi si a Jesus Christ kyerɛɛ wɔ No somdwuma mu nyina no. Mobɔ mpaa dɛ hom ngyina pintsinn na nokwar mu wɔ dza ɔbɛba nyina. Mihyira hom dɛ anwanwadze bɛyɛ hom dze dɛ mbrɛ yenyaa no wɔ Goshen no—sɛ ɔyɛ Ewuradze ne pɛ a. Hom nhwehwɛ nhyira horow yinom a sor dze ba wɔ hom abrabɔ mu ber a “hom hwehwɛ Jesus yi a nkɔnhyɛfo nye asomafo akyerɛw noho nsɛm yi, ama adom a ofi Egya Nyankopɔn no, nye Ewuradze Jesus Christ, nye Sunsum Krɔnkrɔn a ɔgye hɔn ho dase no aaba na ɔabɛtsena hom mu afebɔɔ.’’25 Jesus Christ ne dzin mu, amen.