Abɔbɔfo Nkakraba
Ward na nkorbata biara mu no yehia obiara—hɔn a wɔyɛ dzen na hɔn a ebia woridzi aper no. Hɔn nyinara hia tsitsir.
Meyɛ banyimba no, mekaa dɛ menye m’egya tsena hɛn mu a ɔrekã ma yɛrokɔ na yehu ankorankor pii wɔ kwan nkyɛn dɛ wɔwɔ gyinabew horow a ɔyɛ dzen mu anaa nna wohia mboa. M’egya daa na ɔkã dɛ “Pobrecito,” a n’asekyerɛ nye dɛ “ɔbɔbɔfo kakraba.’’
Ber bi, megyeen m’enyi hwɛɛ m’egya ber a ɔboaa nkorɔfo yinom mu pii, nkankara sɛ yerutu kwan akɔ Mexico akɔhwɛ me nananom a. Ɔtaa dɛ ɔhwehwɛ obi a ɔwɔ ahohia mu na afei kokoa mu ara ɔkɔ na ɔkɛma no mboa a wohia. Ekyir no muhun dɛ nna ɔroboa hɔn ma wɔakɔ skuul, wɔatɔ edziban, anaa ɔma wɔ kwan bi do ama hɔn eyiedzi. Nna ɔrosom “ɔbɔbɔfo kakraba’’ no a ɔsen no kwan mu no. Nokwar, mber a nna mirinyin no munntum nkaa mber bi a nna yennyi obi a ɔtse hɛn nkyɛn a ohia beebi atsena ber a wɔreyɛ ahodan no. Sũahu yinom a muhunii no maa menyaa ayamuhyehye sunsum dze maa me mfɛfo mbanyin na mbaa na hɔn a wɔwɔ ahohia mu.
Wɔakã no wɔ Preach My Gospel mu dɛ: “Nyimpa etwa woho ehyia. Epa hɔnho wɔ stiitsi mu, esera hɔn wɔ hɔn efiefi, na etu kwan wɔ hɔn mu. Hɔn nyinara yɛ Nyankopɔn ne mba, wo nuambanyin na nkyerɛbaa. … Nyimpa yinom mu dodowara rohwehwɛ botae wɔ abrabɔ mu. Hɔn ndaamba na hɔn ebusua ebusua ho hia hɔn’’ (Preach My Gospel: A Guide to Missionary Service [2018], 1).
Mfe pii mu no, ber a morosom wɔ Asɔr no mu no, mabɔ mbɔdzen dɛ mobɔhwehwɛ hɔn a wohia mboa wɔ hɔn abrabɔ mu, honandua mu na sunsum mu nyina. Metaa tse m’egya ne ndze a ɔrekã dɛ, “Pobrecito,’’ ɔbɔbɔfo kakraba.
Yehu erohwɛ ɔbɔbɔfo kakraba ho mfatoho nwanwa wɔ Bible mu:
“Na Peter nye John siaan anan kɔr asɔrfi no mu, na ɔrokɔ dɔn a otsĩa akron a wɔsɔr mu no.
“Na wɔsoaa ɔbarimba bi ɔyɛ obubuafo fi ne nã yamu a daa wɔdze no bɔtoo asɔrfi abow a wɔfrɛ no Fɛɛfɛw no ano, dɛ ɔnserɛ hɔn a wɔrokɔ asɔrfi no mu adze;
“Ɔno na ohun Peter nye John dɛ wɔrekɛhɛn asɔrfi mu no, obisaa dɛ obenya akyɛdze.
“Na Peter, dze n’enyiwa tsiim no do ɔnye John so, na ɔsee dɛ, Hwɛ hɛn.
“Na ɔhwɛɛ hɔn komm, osusu dɛ oribenya biribi wɔ hɔn hɔ.
“Na Peter see dɛ, Sika nye dwɛɛtɛɛ dze; minnyi bi, na dza mowɔ na medze rema wo yi: Nazarethnyi Jesus Christ ne dzin mu, nantsew.
“Na osuoo ne nsa nyimfa mu, na ɔmaa no do: na amonmu hɔ ara n’anansa nye n’anandwɛ yɛɛ dzen’’ (Ndwuma 3:1–7; oetsĩ mu akã ho).
Merekenkan asɛm yi no, moho boow me dɛ ɔkãa kasafua tsiim no. Kasafua tsiim n’asekyerɛ nye obi bɛkyɛn n’enyiwa, anaa n’adwen, anaa ɔbɔhwɛ biribi pɔkyee (hwɛ “fasten,” Dictionary.com). Ber a Peter hwɛɛ ɔbarimba yi no, ohun no soronko koraa kyɛn ma nkaafo hu no. Ɔannhwɛ no dɛ onntum nnantsew anaa ne mbrɛwyɛ horow mbom otumii hun dɛ ne gyedzi sõ dɛ obenya ayarsa na ɔahɛn temple no mu akɛgye nhyira horow a nna ɔrohwehwɛ.
Mekenkaan dɛ osuoo ne nsa nyimfa mu maa no do. Ber a ɔboaa ɔbarimba yi wɔ kwan yi mu no, awanwadze mu ara Ewuradze saa no yarba, na “n’anansa na n’anandwɛ yɛɛ dzen’’ (Ndwuma 3:7). No dɔ ma ɔbarimba yi na pɛ dɛ ɔboa no kenyaan ahoɔdzen na ahom kɛse wɔ ɔbarimba a nna ɔyɛ mberɛw no mu.
Mber a nna morosom dɛ Apaamu Eduosuon no, mutuu Benada anafua biara sii hɔ dɛ menye stake presidentfo a wɔwɔ m’asodzi apaamu no bɛyɛ erosom ho nsera. Memaa wɔnye hɔn a wohia Jesus Christ n’asɛmpa ho ayɛdze anaa sesei no worinnsie ahyɛmudzi horow a woedzi no hyehyɛɛ mber. Ɔnam hɛn ɔsom a yɛwɔw do na yɛgye hɛn enyim yɛɛ no, Ewuradze tserɛɛw hɛn mbɔdzembɔ mu na yetumiii nyaa ankorankor na ebusua ebusua a nna wɔwɔ ahohia no mu. Nna iyinom nye “abɔbɔfo nkakraba’’ no a nna wɔtsetse stake horow a nna yɛsom wɔ mu no.
Ber bi dze, mekãa President Bill Whitworth ho, Sandy Utah Canyon View Stake president no, nye no yɛɛ erosom ho nsera. Ɔbɔɔ mpaa wɔ hɔn a ɔwɔ dɛ yɛsera hɔn ho, a ɔbɔ mbɔdzen dɛ obenya dɛm sũahu a Nephi nyae no, a “Sunsum no gyaa me kɔr hɔ, a nna minnyim dza [ɔno] merekɛyɛ’’ (1 Nephi 4:6) Ɔkyerɛɛ dɛ ber a yɛsom no, ɔwɔ dɛ nyikyerɛ gya hɛn kɔ hɔn a wohia dodow no hɔ, kyɛn dɛ yɛdze edzin rokɔ ara anaa yɛreserasera ankorankor dɛ mbrɛ wɔahyehye no. Nkenyan no tum na ɔwɔ dɛ ogya hɛn.
Mekaa dɛ mokɔr awarfo kumabaa, Jeff na Heather, na hɔn banyinba kakraba, Kai, hɔn fie. Jeff nyinii dɛ Asɔrba a ɔbɔ hyew. Nna ɔwɔ mbirikatu ho akyɛdze na ho edwuma papa. Ɔhyɛɛ ase dɛ ɔrotwe noho fi Asɔr no ho wɔ ne mbasir ber mu. Ekyir no okenyaa hɛn akwanhyia, a ɔsesãa n’abrabɔ. Ber a yɛhɛn hɔn fie na yɛdaa hɛnho edzi no, Jeff bisaa hɛn siantsir a yɛaba dɛ yɛrobɔhwɛ n’ebusua. Yebuaa dɛ asɔrmba bɛyɛ 3,000 na wɔwɔ hɔ a wɔtsetse stake n’ahẽ ahorow no mu. Afei mibisaa no dɛ, “Jeff, efiefi a nkyɛ yebotum aserasera nyina anafua no, kã siantsir kor a Ewuradze somaa hɛn wɔ ha kyerɛ hɛn.’’
Dɛm no, isũ sii Jeff na ɔhyɛɛ ase nye hɛn kyɛɛ ne haw na nsɛmansɛma a ebusua no rudua mu kyerɛɛ hɛn. Yɛhyɛɛ ase kãa Jesus Christ n’asɛmpa fapem horow ho asɛm. Yɛserɛɛ hɔn dɛ wɔnyɛ ndzɛmba etsitsir kakra bi a obotum ayɛ dzen ahyɛase no naaso mber rugu mu no ɔdze dɛwdzi na enyigye kɛse bɛbrɛ hɔn. Afei President Whitworth maa Jeff asɔfodzi nhyira ma ɔaboa no ma oedzi no nkõdzen do konyim. Jeff na Heather gyee pen dɛ wɔbɛyɛ dza yɛaserɛ hɔn dɛ wɔnyɛ no.
Afe kor ekyir no, ɔyɛɛ me adom dɛ mohwɛɛ Jeff a orunuma ne yer, Heather, ma ɔabɛyɛ Jesus Christ N’asɔr a ɔwɔ hɔ Nda a Odzi Ekyir Ahotseweefo mu asɔrba. Wɔreyɛ ahoboa sesei dɛ wɔbɛhɛn temple mu ma wɔasɔw hɔn ano dɛ ebusua ma mber yi mu na mfesantsen nyina. Hɛn nsera no sesãa hɔn abrabɔ ne sibea wɔ honandua mu na sunsum mu nyina.
Ewuradze akã dɛ:
“Dɛm ntsi, dzi nokwar, gyina dzibew a medze ama wo no; boa hɔn a wɔyɛ mberɛw no, ma nsa a ɔsensɛn famu no do wɔ sor, na ma nkotodwe a wɔagow no mu nyɛ dzen’’ (Nkyerɛkyerɛ na Ahyɛmudzi 81:5
“Na ndzɛmba yinom ne nyɛe mu no, ebɛyɛ adzepa kɛsenara dze ama wo mfɛfonom adasamba, na ama nyia ɔyɛ w’Ewuradze no n’enyimnyam akrɔn’’ (Nkyerɛkyerɛ na Ahyɛmudzi 81:4).
Enuanom na nkyerɛbaa, Ɔsomafo Paul kyerɛkyerɛɛ adzehia tsitsir bi wɔ hɛn ɔsom mu. Ɔkyerɛkyerɛɛ dɛ yɛyɛ “Christ nyimpadua no, nye mfafakuwa nkorkor’’ (1 Corinthfo 12:27) na wohia nyimpadua ne fafakuwa kor biara ama nyimpadua no nyina enya ntowdo. Afei ɔkyerɛkyerɛɛ nokwar a tum wɔ mu a ɔhɛn m’akoma bun mu yie ber a mekenkanee no. Ɔkãa dɛ, “Na mbom nyimpadua ho mfafakuwa a wɔyɛ dɛ wɔyɛ mberɛw dodow no, hɔn na hɔn ho hia: na nyimpadua ho bi a yɛdwen dɛ wɔnnsɛ enyidzi pii no na, yɛhyɛ no enyidzi pii’’ (1 Corinthfo 12:22–23; oetsĩ mu akã ho).
Dɛm ntsi, wɔ ward nye nkorbata biara mu no yehia obiara—hɔn a ebia wɔyɛ dzen na ebia hɔn a woridzi aper no. Hɔn nyinara hia tsitsir ma “Christ ho nyimpadua’’ nyina no ntowdo. Metaa dwendwen hɔn a wonnyi hɛn mboanofo ahorow no mu a wɔbɛhyɛ hɛn dzen na wɔama yeedzi mu.
Elder D. Todd Christofferson kyerɛkyerɛɛ dɛ: Asɔr mu no yennsũa nkyerɛkyerɛ krɔnkrɔn nko; yɛsan so nya ne nyɛe ho suahu. Dɛ Christ ho nyimpadua no, Asɔr mu asɔrmba no som hɔnho nkorkor wɔ dza dabiara osi wɔ mu no. Hɛn mu biara nndzi mu. … Christ mu nyimpadua mu no, ɔwɔ dɛ yɛtra adwenkyerɛ na nsɛm a wɔka no akɛse do na yenya ‘suahu ankasa’ ber a yesua ‘bɔ mu tsena wɔ ɔdɔ mu’ [Nkyerɛkyerɛ na Ahyɛmudzi 42:45]’’ (“Why the Church,’’ Liahona, Ɔberɛfɛw 2015, 108–9).
Afe 1849 mu no, Brigham Young nyaa adaasõ a ohun Nkɔnhyɛnyi Joseph Smith a ɔyɛ dɛ nna ɔreka nguankuw na mpɔnkye kuw. Nna mbowa yinom mu bi yɛ fɛw na wɔsoso; nna bi so yɛ nkakraba na hɔn ho yɛ fĩ. Brigham Young kaa dɛ ɔhwɛɛ Nkɔnhyɛnyi Joseph Smith n’enyiwa mu na ɔsee dɛ, “Joseph, ewɔ mbowakuw nwanwa … a mara munnhun bi da wɔ m’abrabɔ mu; edze hɔn rekɛyɛ dɛn?’’ Nkɔnhyɛnyi no, a nna mbowakuw hɔn su mmfa noho no buae bɔkɔɔ dɛ, “Hɔn nyinara woye wɔ hɔn ananmu.’’
Mber a President Young sɔree no, ɔtsee ase dɛ ber a Asɔr no bɔboaboa “nguan na mpɔnkye’’ asorɔtow ano no, ɔyɛ n’asodzii dɛ ɔdze hɔn nyinara ba mu na ɔma hɔn mu kor biara kwan ma onya ne ndaamba emudzi mu ber a wɔkɛhyehyɛ hɔn ananmu wɔ Asɔr no mu. (Wɔfae fii Ronald W. Walker, “Brigham Young: Student of the Prophet,” Ensign, Kwakwar 1998, 56–57.)
Enuanom na nkyerɛbaa, me kasae n’ahyɛse no bae ber a modween kor no a sesei ɔmmbɔ hyew wɔ Jesus Christ N’Asɔr mu ho no. Mebɛpɛ dɛ mekasa kyerɛ hɔn mu kor biara mber tsiabaa. Elder Neal A. Maxwell akyerɛkyerɛ dɛ “ankorankor a wɔtsetse dɛm no hɔn mu kor biara nnkɔr ekyir—naaso wɔmmfa hɔnho nnhyɛ—Asɔr no mu yie. Wɔmmba asɔrdan mu, nna wonngyaa n’enyim hɔ gyina so. Iyinom nye hɔn a wohia na Asɔr no hia hɔn, naaso hɔn na ne fã bi no, ‘wɔtse wiadze yi mu a wonnyi Nyame’ [Mosiah 27:31]’’ ((“Why Not Now?,’’ Ensign, Ɔberɛfɛw 1974, 12).
Mebɛsan esi hɛn nkɔnhyɛnyi dɔfo President Russell M. Nelson ne ɔfrɛ no do bio ber a odzi kan kasae kyerɛɛ Asɔrtɔw no. Ɔkãa dɛ: “Afei, mekã kyerɛ Asɔrba biara dɛ, hom nantsew ahyɛmudzi anamɔn kwan no do. Hom pisi dɛ hom bɛkã Agyenkwa no do, ber a hom nye No dzi ahyɛmu na nkyii hom sie ahyɛmudzi no, bobuei sunsum mu nhyira na ndzinoa biara a ɔwɔ hɔ ma mbanyin, mbaa na mbofra a wɔwɔ beebiara no mbobow ama hom.’’
Afei ɔtotɔe serɛɛ dɛ: “Sesei, sɛ hom mu binom efi anamɔn kwan no do a, hom ma memfa m’akoma mu enyidado nyina nto nsa mfrɛ, dɛ yɛserɛ hom nsan ekyir mbra. Mbrɛ wo dadwen tse biara no, mbrɛ wo haw tse biara no, beebi wɔ hɔ ma wo wɔ Ewuradze N’Asɔr no mu. Hom ndzeyɛɛ horow no behyira hom nye hom ebusuasantsen a wonnyaa nnwoo hɔn sesei dɛ isan ba ahyɛmu anamɔn kwan no do’’ (“As We Go Forward Together,” or Liahona, Ebɔbira 2018, 7; oetsĩ mu akã ho).
Megye No ho dase, mpo Jesus Christ, Owura somfo na hɛn nyinara Agyenkwa. Moto nsa frɛ hom mu kor biara dɛ ɔnhwehwɛ “pobrecitos,’’ “abɔbɔfo nkakraba’’ a wɔwɔ hɛn ntamu no a wohia no. Iyi nye me mpaabɔ na m’enyidado wɔ Jesus Christ ne dzin mu, amen.