Hɛn Ankorankor Agyenkwa
Osian No werdam afɔrbɔ no ntsi, Agyenkwa no wɔ tum dɛ Ɔtsew hɛnho, Ɔsa hɛn yarba, na Ɔhyɛ hɛn dzen nkorkor.
Ɔyɛ me enyisɔ dɛ Easter anapa nwanwa yi, menye hom wɔ ha. Sɛ modwen Easter ho a, modɔ dɛ misi do kã nsɛm a abɔfo no kãa kyerɛɛ hɔn a nna wɔwɔ Ture mu Nda no ho no: “Ɔyɛ dɛn na hom rohwehwɛ nyia ɔtse ase no wɔ ewufo mu yi? Onnyi ha, na ɔasoɛr.”1 Megye dase dɛ Jesus Nazarethnyi no Ɔsoɛree fii ewufo mu na Ɔtse ase.
“Hom dwen Christ no ho dɛn?
Mfe eduasa anan a abɛsen kɔ no, emi na m’asɛmpasomafo adamfo no hyiaa banyin ɔbemfo bi na yɛkyerɛɛ no adze a, ɔyɛ ɔkyerɛwfo ma apaamu dawurbɔ krataa bi wɔ Davao Kuropɔn, wɔ Philippines. Hɛn enyi gyee dɛ yɛrekyerɛ no adze osiandɛ nna ɔwɔ nsɛmbisa pii na ɔdze obu maa dza yɛgye dzi no ara yie. N’asɛmbisa a yɛkãa no yie a obisaa hɛn nye “Hom dwen Christ no ho dɛn?2 Nyew, enyigye mu ara yɛkyɛɛ hɛn atsenkã na yɛgyee Jesus Christ ho dase. Ekyir no ɔdze nsɛm bi puee gua do a ɔwɔ nsɛngyinado kor noara a nkasafua na nkasasin nwanwa a ɔfa Agyenkwa no ho wɔ mu. Mekaa dɛ nna ɔyɛ me enyisɔ naaso woennkenyan me. Nna nsɛmpa hyɛ mu ara yie naaso nna ɔyɛ pan a sunsum mu tum biara nnyi mu.
Yɛrokɔ do Yɛrebohu No Ara Yie
“Hom dwen Christ no ho dɛn? Muruhu afei dɛ mbrɛ misi muhu Agyenkwa no ankasa no nya nhyɛdo mapã wɔ mbrɛ mutum tsie No na mbrɛ misi dzi N’asɛm do. Mfe kakra ara abɛsen kɔ no, Elder David A. Bednar bisaa nsɛmbisa yinom dze kãa ne kasaa ho: “Ana yenyim Agyenkwa no ho asɛm nko, anaa yɛrokɔ do yɛrebohu No ara yie? Yebesi dɛn bɛba ebohu Ewuradze?”3
Ber a musũae na modwendween ho no, mebaa bohunii pefee dɛ dza minyim a ɔfa Ewuradze ho no bor dza minyim No ampaara no do koraa. Misii m’adwen pi fi dɛm ber no dɛ mobɔbɔ mbɔdzen yie dze ehu No. M’enyi sɔ kyerɛwsɛm na dasegye horow no ara yie a hɛn Asɔr mu mbanyin na mbaa anokwafo, Jesus Christ esũafo no ama no. Mankasa m’akwantu mu wɔ mfe kakra ara a abɛsen no nye me afa adzesũa na nhunmu horow akwan mu. Mobɔ mpaa dɛ Sunsum Krɔnkrɔn no dze nsɛm bɛma hom ndɛ a ɔbor me nsɛm a ɔtɔ sin a makyerɛw no do.
Odzi kan, ohia dɛ yebohu dɛ yeruhu Agyenkwa no yɛ hɛn abrabɔ mu botae tsitsir. Ɔsɛ dɛ ohia kyɛn biribiara.
“Na iyi nye onnyiewiei nkwa, dɛ wobohu ɔwo, nokwar Nyame kor no, nye nyia esomaa no, mekyerɛ Jesus Christ.”4
“Jesus see no dɛ, Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.”5
“Emi nye wiadze kan no: nyia odzi m’ekyir no rennantsew sum mu, na obenya nkwa kan no.”6
Otsia ebien, ber a yɛreba yɛrobohu Agyenkwa no ara yie no, kyerɛwsɛm nyiyimu na nkɔnhyɛfo hɔn nsɛm nya ntseasee soronko ma hɛn ara ma wɔbɛyɛ dɛ hɛnara hɛn nsɛm mpo. Iyi mmfa eresuãsuã kasafua, anaa binom hɔn atsenkã na sũahu, mbom ɔyɛ yɛreba yɛrebohu ama hɛnho, wɔ hɛnankasa hɛn kwan soronko do ber a yɛsɔ asɛm no hwɛ7 na yenya dasegye fi Sunsum Krɔnkrɔn no hɔ. Dɛ mbrɛ nkɔnhyɛnyi Alma paa mu kãe no:
“Ana hom nndwen dɛ mankasa minyim dɛm ndzɛmba yinom? Hwɛ, megye dase kyerɛ hom dɛ minyim dɛ dɛm ndzɛmba yinom a makã ho asɛm yi yɛ nokwar. Na hom si dɛn hu dɛ minyim dɛ ɔyɛ nokwar?
“Hwɛ, mese hom dɛ Nyame no Sunsum Krɔnkrɔn no na ɔdaa no edzi kyerɛɛ me. Hwɛ, makye kɔm na mabɔ mpaa nda pii ama mankasa meehu dɛm ndzɛmba yinom. Na afei mankasa mehu dɛ ɔyɛ nokwar; osiandɛ Ewuradze Nyankopɔn nam no Sunsum Krɔnkrɔn no do ada no edzi akyerɛ me; na iyi nye nyikyerɛ sunsum no a ɔwɔ mo mu no.”8
Otsĩa ebiasa, yerinya ntseasee yie dɛ Jesus Christ No Werdambɔ no fa hɛnankasa hɛnho nkorkor no bɔboa hɛn ma yehu No. Ɔtaa dɛ ɔnnyɛ dzen ma hɛn dɛ yɛbɔdwen Christ No Werdambɔ ho na yɛbɛkasa afa ho ara a yennhu no ho hia tsitsir wɔ hɛnankasa hɛn abrabɔ mu. Jesus Christ No Werdambɔ no ɔmmbɔadze da na ɔyɛ onnyiewiei na ofua biribiara wɔ ne tɛtɛr mu na no bun mu, naaso ɔyɛ ankorankor na no nsunsuando no yɛ nkorkor. Osian No werdam afɔrbɔ no ntsi, Agyenkwa no wɔ tum dɛ Ɔtsew hɛnho, Ɔsa hɛn yarba, na Ɔhyɛ hɛn dzen nkorkor.
Agyenkwa no ne pɛ nko, No botae fitsi ahyɛse ankasa no, nye dɛ Ɔbɛyɛ Egya ne pɛ. Egya no ne pɛ nye dɛ Ɔbɔboa No ma [Ɔdze] nyimpa ne bɛkyebo na onnyiewiei nkwa bɔbɔ adze.”9 dɛ Ɔbɛyɛ “ɔkasagyefo wɔ Egya ne nkyɛn.”10 Dɛm ntsi, “ɔyɛ Ɔba dze, naaso osũaa yɛɛ setsie wɔ amandze a, ohunii no mu; na onyae dzii mu no, ɔbɛyɛɛ onnyiewiei nkwagye farbaa ma hɔn a wotsie no nyina.”11
“Na obefir edzi, ɔatse yaw na oehu amandze na obenya nsɔhwɛ ahorow biara bi. …
Na ɔbɛfa owu ato no do, ama oesiansian owu mpokyerɛ … na ɔbɛfa hɔn mberɛwyɛ ato no do, ama ehumbɔbɔr aahyɛ n’abadaa mã, … ama ɔnam honam mu, eehu mbrɛ obesi aboa no nkorɔfo dɛ mbrɛ hɔn mberɛwyɛ tse no.
“… Nyankopɔn ne Ba no bohu amandze wɔ honam mu ama ɔaafa no nkorɔfo hɔn bɔn ato no do, ama ɔnam no nkwagye tum no do apepa hɔn mbrato.”12
Mepɛ dɛ menye hom kyɛ sũahu kumaa bi a minyae a ɔkyerɛ aperdzi a ɔtɔfabi a yedua mu dze fua Ewuradze No Werdambɔ no su no ankorankor.
Mfe pii abɛsen no, wɔ me baanodzinyi ne nsato do no, mekenkaan Mormon Nwoma fi n’ahyɛse kɔ ewiei na mehyɛɛ nyiyimu horow a ɔkã fa Agyenkwa No Werdambɔ no ho nsew. Me baanodzinyi no sanee serɛɛ me dɛ dza musũae no muntwa no tsia krataafa kor ara. Mekãa kyerɛ moho dɛ, “Krataafa kor? Ɔno dze, nkyɛ ɔyɛ mberɛw.” Naaso, ɔyɛɛ me ahobow dɛ muhun dɛ edwuma no yɛ dzen dodow, na menntum annyɛ.
Afei meehu siantsir a midzii nkõgu no, osiandɛ metraa ahwehwɛdze no do a mo nsusui no nndzi mu. Odzi kan, nna m’enyidado nye dɛ dza metwa no tsia no obekenyan obiara. Dza oetwa no tsia nna ɔyɛ medze na nnyɛ obiara dze. Me nkã-tse na dza ɔyɛ me fa Agyenkwa no ho na dza Ɔayɛ ama me no nna ɔsɛ dɛ mekyerɛw, ama ber biara a mebɛkenkan no, ɔdze sunsum mu sũahu nwanwa, na awɔse a mankasa menyae no epue aba.
Otsia ebien, nna m’enyidado nye dɛ dza metwa no tsia no bɛyɛ kuntann a oeyiyi mu yie na nkasafua na nkasasin apaatɛr wɔ mu. Nna ɔmmfa nkasafua apaatɛr ho. Nna ɔsɛ dɛ ɔyɛ me gyedzi ho mpaamukã pefee a ɔnnyɛ kyinkyinɛnn. “Na me kra enyi gye wɔ nokwardzi ho; na ɔnam dɛm kwan yi do na Ewuradze Nyankopɔn yɛ n’edwuma wɔ adasamba mu. Na Ewuradze Nyankopɔn ma nyia ɔwɔ ntseasee no kan.”13
Otsĩa ebiasa, nna m’enyidado nye dɛ obedzi mu, dza woetwa no tsia a ɔbɔ nkaa ne nyina do—dza woetwa no tsia ewie a onnyi dɛ wɔdze bi kã ho—mbom ɔwɔ dɛ ɔyɛ dza wogu do rekyerɛw a mubotum dze kasafua bi anaa asɛnsin bi bɛkã wɔ ho, ber a me ntseasee wɔ Jesus Christ No Werdambɔ ho no rodɔɔ sõ.
Dasegye na Nsatõ
Meyɛ aberantsɛba no, musũaa adze pii fii nkɔmbɔdzi a menye me bishop dzii mu. Dɛm mbafober mu no, mobɔdɔɔ nsɛm a ɔwɔ ndwom a yɛpɛ no kor mu:
Migyina ahobow mu wɔ ɔdɔ a Jesus dze dɔ’ m’ ho,
Mobɔn gyengyen wɔ adom a ɔdze adom me ho.
Mopopoe ber a muhun dɛ emi ntsi na wɔsɛɛn no,
Bɔnyɛnyi emi ntsi, ohun amandze na owui.
Nkɔnhyɛnyi Moroni to nsa frɛ hɛn: “Na afei, mekamfo kyerɛ hom dɛ hom nhwehwɛ Jesus yi a nkɔnhyɛfo nye asomafo akyerɛw noho nsɛm yi.”15
President Russell M. Nelson abɔ anohoba dɛ sɛ [yɛ]kɔ kan dze sũa dza [ye]botum nyina fa Jesus Christ ho a [hɛn] tum a yɛdze dan fi bɔn ho no bɛyɛ kɛse. [Hɛn] pɛ dɛ yɛdze bedzi mbrasɛm no do no bɔkɔ sor.”16
Easter Kwesida yi, tse dɛ ma Agyenkwa no fi ɔbo nda mu soɛree no, nkyɛ hɛn so yeenyan efi hɛn sunsum mu nkomtɔ mu na yɛasoɛr atra ekyingye mununkum, suro a ɔkyekyer, ahantan ne nsãbow, na akwadwer mpa do. Jesus Christ na Ɔsor Egya tse ase. Megye dase wɔ Hɔn dɔ a odzi mu ma hɛn no Jesus Christ ne dzin mu, amen.