Erekyerɛkyerɛ wɔ Agyenkwa No Kwan do
Asodzi no da hɛn mu kor biara do pɛpɛɛpɛ dɛ obedzi Owura ne fasusu do na ɔakyerɛkyerɛ tse dɛ Ɔno.
Akyerɛkyerɛfo Soronko
Abosoom kakra a abɛsen kɔ no, me classmate bi a ofi mo kurow Overton, Nevada, susuu ho dɛ yɛnkɛkyɛ hɛn kindergarten kyerɛkyerɛnyi dɔfo, a odzii n’awoda a ɔtɔdo 98 ɔnnkyɛree no, Borɔnya akyɛdze. Ɔkyerɛkyerɛɛ hɛn dɛ yɛnyɛ ayamuyie, ewiaber nda kakra a ho hia, merekye na borɔtoo ne dɛw, na dɛ yɛndodɔ hɛnho nkorkor. Akyerɛbaa Davis, yɛda wo ase, dɛ eyɛɛ kyerɛkyerɛnyi nwanwafo.
Mfe pii a abɛsen no, ber a morokɔ Ricks Collegee no, minyaa kyerɛkyerɛnyi soronko kor so. Nna mereyɛ ahoboa dɛ mobɔsom asɛmpakã dwuma na modween ho dɛ ɔbɛyɛ mfaso dɛ mokɔ asɛmpasomafo ahoboa adzesũa. Dza menyae no sesãa m’abrabɔ.
Ofi adzesũa da a odzi kan no muhun dɛ nna mowɔ kyerɛkyerɛnyi a ɔawea n’enyim. Na kyerɛkyerɛnyi no nye Onuabanyin F. Melvin Hammond. Na minyim dɛ Onuabanyin Hammond dɔ Ewuradze na ɔdɔ me. Nna mutum hu wɔ n’enyim na metse wɔ ne ndze mu. Na sɛ ɔkyerɛ adze a, Sunsum no buee m’adwen mu. Ɔkyerɛɛ nkyerɛkyerɛ, naaso ɔsanee so see me dɛ marankasa munsũa. Dɛm ɔfrɛɛ no boaa me ma muhun m’asodzii pefee dɛ musũa Ewuradze ne nkyerɛkyerɛ no ma mara moho. Dɛm sũahu no sesãa me afebɔɔ. Onuabanyin Hammond, meda wo ase, dɛ erekyerɛkyerɛ wɔ Agyenkwa no kwan do.
Enuanom na nkyerɛbaa, obiara fata dɛ onya adzesũa sũahu yi bi wɔ fie na wɔ asɔr nyina.
Come, Follow Me ne mbueienyi no ma dza Christ su nkyerɛkyerɛ botum ayɛ ho enyido-adzehu. Ɔkã dɛ “Asɛmpa ne nsuae na nkyerɛkyerɛ nyina no botae, nye dɛ ɔbɛma hɛn nsakyeree ba Jesus Christ hɔ no mu adɔ, na ɔaboa hɛn ma yɛabɛyɛ tse dɛ Ɔno yie. … Asɛmpa adzesũa no a ɔtse dɛm a ɔhyɛ hɛn gyedzi dzen na ɔdze nsakyeree nwanwa ba no, nnsi prɛko pɛr. Ɔtserɛw fi adzesũa dan [no] mu dze hɛn ankorankor n’akoma na fie mu.’’1
Kyerɛwsɛm no kyerɛ dɛ Agyenkwa no somdwuma wɔ tsetse America nyaa nsunsuando kɛse a ɔtserɛwee ara ma “wɔsakyeer nkorɔfo no nyina maa Ewuradze, wɔ asaase no nyina enyi do, Nephifo na Lamanfo, na wentwiwentwi nye aperdzi biara ennsi hɔn ntamu, na obiara nye no nua dzii no pɛpɛɛpɛr.’’2
Hɛn adzekyerɛ besi dɛn botum enya nsunsuando a ɔtse dɛm wɔ hɔn a yɛdɔ hɔn no do? Yebesi dɛn botum akyerɛkyerɛ yie tse dɛ Agyenkwa no na yɛaboa binom so ma hɔn nsakyeree adɔ bun mu yie? Hom mma me kwan ma me mma nsusui kakra.
Sũasũa Agyenkwa no
Dza ohia dodow no, fa to wodo dɛ ibosũa dza ibotum nyina afa Kyerɛkyerɛnyi Mãpa Nankasa no ho. Osii dɛn kyerɛɛ ɔdɔ maa binom? Nna sɛ Ɔkyerɛkyerɛ a ebɛn nkã-tse na wonya? Ebɛnadze na Ɔkyerɛkyerɛe? Nna ebɛn enyisoadze na Ɔwɔ ma hɔn a ɔkyerɛkyerɛe no?. Adwendwen nsɛmbisa a ɔtsetse dɛm yinom ekyir no, ker na sesã w’adzekyerɛ kwan ma abɛyɛ tse dɛ Ɔno yie.
Asɔr no ma nkyerɛkyerɛ mboa ahorow pii wɔ Asɛmpa Nwoma Korabea app no na wɔ ChurchofJesusChrist.org do no. Mboa kor a ɔtse dɛm nye Teaching in the Savior’s Way. Moto nsa frɛ hom dɛ hom nkenkan na hom nsũa no mu asɛm biara. Ne fapem bɔboa hom wɔ hom mbɔdzembɔ mu dɛ wɔbɛfa Christ-su yie wɔ hom nkyerɛkyerɛ mu.
Hom mma Ebusua Ebusua Tum no Ndzi Dwuma Mbordo
Medze sũahu a menyaa no abosoom kakra a abɛsen kɔ no ber a mekɛseraa me nyɛnko dɔfo bi bɛkyerɛ mo nsusui a odzi do no. Nna mutum tse ne yer ne ndze wɔ ekyir dɛ ɔnye bi ridzi nkɔmbɔ ntsi ntsɛmara motwee moho ama oeetum nye n’ebusua edzi nkɔmbɔ.
Bɛyɛ dɔnhwer kor ekyir no menyaa nkra fii ne yer dɔfo hɔ dɛ: “Nuabanyin Newman, yɛda ase dɛ ebae. Nkyɛ ɔwɔ dɛ yɛma eba dan mu, naaso mepɛ dɛ mekã dza nna yɛreyɛ kyerɛ wo. Fitsi wiadze nsan yarba ahyɛse no, yɛnye hɛn mba mpanyimfo edua Zoom do apɛnsapɛnsa Come, Follow Me mu Kwesida biara. Nokwar dɛ ɔayɛ anwanwadze. Megye dzi dɛ ɔyɛ mber a odzi kan a hɛn babasia nankasa akenkan Mormon Nwoma no. Ndɛ nye Mormon Nwoma no n’adzesũa a odzi ewiei na nna yerobowie ber a edze bae no. … Megye dzi dɛ ɔbɛyɛ ahomkã dɛ ibɛtse mbrɛ Come, Follow Me, Zoom na wiadze nsan yarba no esi ebue kwan ama mber pa mu no, ɔdze akoma mu nsesã aba. … Ɔma modwendwen anwanwadze nketsenketse pii a osisii wɔ mber a ɔnnyɛ yi mu no ho.’’
Iyi yɛ me dɛ anohoba a President Russell M. Nelson bɔɔ no wɔ Ɔbɛsɛ 2018 mu no ne mãhyɛ. Ɔkãa dɛ fie-nhyiamu, Asɔr-mboa asɛmpa adzesũa “wɔ tum dɛ ɔma ebusua ebusua tum no dzi dwuma mbordo, ber a ebusua biara dze enyidaho na ahwɛyie dze sũa ne nyina dze sesã hɔn fie ma ɔyɛ gyedzi guandɔbea. Mobɔ anohoba dɛ ber a hom dze enyimia yɛ edwuma dze sesã hom fie ma ɔyɛ asɛmpa adzesũa ne sibea no, mber resen no hom Ahomgyeda bɛyɛ enyigye nokwar mu. Hom mba enyi bɛgye dɛ wobosũa Agyenkwa ne nkyerɛkyerɛ na wɔdze abɔ bra. … Nsesã wɔ hom ebusua mu bɛyɛ nwanwa na ɔbɔkɔ do.’’3 Enyimnyam anohoba bɛn nye yi!
Yebenya nokwar abrabɔ, nsakyeree akɔ Jesus Christ hɔ no otwar dɛ ɔyɛ hɛn kra nyina na nhyɛdo wɔ hɛn abrabɔ ne fa biara mu. Iyi nye siantsir ntsi a otwar dɛ otsim wɔ hɛn abrabɔ ne finimfin—hɛn ebusua ebusua na efiefi.
Kaa Dɛ Nsakyeree Yɛ Ankorankor
Mo nsusui a odzi ewiei nye dɛ kaa dɛ otwar dɛ nsakyeree no fi nyimpa no mu ba. Dɛ mbrɛ wɔkyerɛɛ no wɔ mbabun du hɔn abɛbusɛm mu no, ma hɛn mbɔdzembɔ bɛyɛ biara no yennkotum dze hɛn nsakyeree ngo ama obi. Dɛ mbrɛ Elder David A. Bednar kyerɛkyerɛɛ no: “Ngo a ɔsom bo yi wonya no tam tam … abotar na nwɔwdo mu ara. Kwantsia biara nnyi hɔ; mpofirmu ahoboa biara nnkɛyɛ yie.’’4
Come, Follow Me tsim dɛm nokwar no do. Medze toto ɔbɔfo no a ɔboaa Nephi ma osũaa Jesus Christ noho asɛm ber a ɔkãa dɛ, “Hwɛ!’’5 Tse dɛ ɔbɔfo no, Come, Follow Me to nsa frɛ hɛn dɛ yɛnhwɛ kyerɛwsɛm na ndɛ da yi nkɔnhyɛfo hɔn nsɛm no mu ama yeehu Agyenkwa no na yeetsie No. Tse dɛ Nephi no, Sunsum no bɛkyerɛkyerɛ hɛnankasa ber a yɛrekenkan na yɛrodwendwen Nyankopɔn n’asɛm ho. Come, Follow Me yɛ dza okenyan na ɔboa hɛn mu kor biara ma yɛdɔ bun mu sũa Christ ne nkyerɛkyerɛ ho nkwa nsu.
Ɔwofo n’asodzii tse dɛm wɔ akwanhorow pii mu. Mba nya egyapadze pii fi hɔn awofo hɔ, naaso dasegye nnyɛ no mu kor. Yennkotum ama hɛn mba dasegye dɛ ma yennkotum ama abafua efir. Mbom yebotum ama bea pa, a asaase pa wɔ a nsoɛnsoɛ nnyi hɔ a “obemia asɛm no.’’ Yebotum aper enya gyinabea ahorow a oye ama hɛn mba—na binom a yɛdɔ hɔn no—etum enya bea ama aba no, ‘’[etsie] asɛm no, na [wɔatse ase]’’6 na oehu ama hɔnho “dɛ aba no ye.’’7
Mfe pii a abɛsen kɔ no, menye me babanyin nyaa kwan kedzii Old Course agor wɔ St. Andrews wɔ Scotland, bea a golf agodzi hyɛɛ ase. Nna ɔyɛ enyigye dodow! Mesanee bae no mobɔɔ mbɔdzen kyerɛɛ nkorɔfo ma woehu no sũahu no no nwanwa. Naaso menntum. Mfonyin, video ahorow, na nkasaho pii no annsõ. Ekyir no muhun dɛ kwan kor pɛ a obi botum ehu St. Andrews ne fɛw nye dɛ ɔbɔkɔ hɔ—ekohu mfuw a oetwa do fɛɛfɛw, mframa pa a wɔhom, mframa a ohuw nyimpa n’enyim, nye golf bɔɔl a wɔtow a ɔnnkɔ dɛ mbrɛ ɔkɔ na ɔkɔtɔ tu a ahwea gu mu na wɔkɔtɔ pɔw mu a yɛyɛɛ no emudzi mu ara.
Dɛmara na Nyankopɔn n’asɛm tse. Yebotum akyerɛ, yebotum abɔ ho dawur, yebotum akyerɛkyerɛ mu. Yebotum akasa afa ho, yebotum akã ho asɛm, yebotum mpo agye ho dase. Naaso kɛpem dɛ nyimpa no bɛtse Nyankopɔn n’asɛm krɔnkrɔn ne nkã dɛ ɔnam Sunsum no tum do asosɔ no do dɛ bɔw a ofi sor no,8 ɔbɛyɛ tse dɛ ɔrohwɛ krataa do mfonyin anaa obi n’enyigye akwantu ho mfonyin. Ɔwɔ dɛ wankasa kɔ hɔ. Nsakyeree yɛ ankorankor akwantu—mboano ho akwantu.
Obiara a ɔkyerɛkyerɛ wɔ fie na asɔr, no botum ama binom akwan ma woenya hɔnara hɔn sunsum mu sũahu horow. Ɔnam sũahu horow yinom mu no, wɔbɛba ebohu “adze nyina ho nokwar’’ ama hɔnho.9 President Nelson kyerɛkyerɛɛ dɛ, “Sɛ ewɔ nokwar asɛmbisa wɔ asɛmpa no ho anaa Asɔr no ho, dɛ mbrɛ asan mu eyi dɛ Nyankopɔn bedzi nyim no, wobegya wo ma ehu na atse onnyiewiei nokwar trɔdɔdɔ ase a ɔbɔboa ama w’abrabɔ kwankyerɛ na wɔaboa wo ma etsim wɔ ahyɛmu anamɔn kwan no do.’’10
Nwanwa mu ara Tu Adze Kyerɛ Mpon
Moto nsa frɛ baanodzifo na akyerɛkyerɛfo wɔ Asɔr no mu kuw biara mu dɛ wɔnye awofo na mbabun mbɔ mu mfa apam ama nwanwa mu ara woetu adze kyerɛ mpon wɔ mpɛnpɛndo biara mu—wɔ stake horow mu, wɔ ward horow mu, na wɔ efiefi mu. Iyi bɛyɛ hɔ ber a yɛrekyerɛkyerɛ nkyerɛkyerɛ no na yɛrema Sunsum no ahyɛ mpɛnsampɛnsamu no mã wɔ nokwar no a Sunsum Krɔnkrɔn no akyerɛkyerɛ hɛn wɔ hɛnankasa hɛn kommyɛ adzesũa ber mu no.
M’anyɛnkofo adɔfo wɔ Christ mu, asodzi no da hɛn mu kor biara do pɛpɛɛpɛ dɛ obedzi Owura ne fasusu do na ɔakyerɛkyerɛ tse dɛ Ɔno. No kwan nye nokwar kwan no! Ber a yɛka No do no “ber a obopue no yɛabɛyɛ tse dɛ ɔno, osiandɛ yebohu no dɛ mbrɛ ɔtse; ama yeenya dɛm enyidado yi; ama ɔaatsew hɛnho dɛ mbrɛ noho tsew no.’’11 Ɔno a ɔasoɛr, Owura Kyerɛkyerɛnyi Nankasa, Jesus Christ, amen.