Hyira wɔ Ne Dzin mu
Hɛn botae a yɛdze gye asɔfodzi no nye ɔbɛma hɛn kwan ma yeehyira nkorɔfo ama Ewuradze, a yɛreyɛ dɛm wɔ Ne dzin mu.
Mo nuanom adɔfo, asomfo mfɛfo wɔ Nyankopɔn n’asɔfodzi mu, ɔyɛ enyidzi ma me dɛ menye hom bɛkasa anafua yi. Medze obu kɛse na enyisɔ ma hom. Sɛ menye hom kasa na metse hom gyedzi kɛse no a, ɔma megye dzi dɛ asɔfodzi tum no rokɔ do wɔ wiadze yi mu ara yie, a quorum horow rehyɛ dzen ara yie na yerenya anokwafo a wokitsa asɔfodzi tum ara yie.
Me mber kakra ara ewimbir yi, mebɛkasa akyerɛ hɔn a wɔpɛ dɛ wɔyɛ ndam mpo yie wɔ hom ankorankor asɔfodzi som mu no. Hom nyim hom ndwuma dɛ hom bɔkrɔn hom frɛ, dɛ hom nsom.1 Mbom bia hom frɛ a hom bɔkrɔn no n’asekyerɛ botum ayɛ ama hom no, bɛyɛ hom adwendwen
Mebɛhyɛ ase efi deaconfo afoforfo koraa no osiandɛ hɔn na, mbrɛ ɔbɛdan biara no, hɔn na asɔfodzi som no nkrɔnee no n’asekyerɛ bia ɔbɛkyer hɔn adwen mu kɛse. Bia elderfo a mbrɛana wɔahyɛ hɔn asɔfo so bɛpɛ dɛ wobetsie. Na bishop bi a ɔwɔ no som mu adapɛn a odzi kan mu no, bia n’enyi bɛgye ho so.
Ɔbɛyɛ adzesũadze ama me dɛ mobɔhwɛ ekyir dze ahwɛ me nda a nna meyɛ deacon no. Me yamu ankyɛ obi kãa dza morubosusu ho sesei kyerɛɛ me dɛm mber no. Nkyɛ obotum aboa me wɔ m’asɔfodzi edwuma horow a wɔaba mo hɔ fitsi dɛm ber no—ma menya no ndɛ mber yi mpo no.
Wɔhyɛɛ me deacon wɔ nkorbata kakraba a osuar ara ma mo nko nye deacon na mo nuabanyin Ted nko nye kyerɛkyerɛnyi. Hɛn nko nye ebusua a nna yɛwɔ nkorbata no mu. Nkorbata mu mba nyina hyiaa mu wɔ hɛn fie. Emi na mo nua no nna hɛn asɔfodzi baanodzinyi no yɛ obi a ɔasakyer a mbrɛana nankasa oenya asɔfodzi no a. Nna megye dzi dɛ m’asɔfodzi dwuma ara nye me dze sacrament no bɔkɔ aporɔw wɔ mankasa m’edzidzi dan mu.
Ber a m’ebusua tui kɔr Utah no, mokɔr ward kɛse bi a deaconfo pii wɔ mu. Me sacrament nhyiamu a odzi kan wɔ hɔ no, mohwɛɛ deaconfo no—wɔyɛ me dɛ nsordaafo kuw—wɔnantsew pɛpɛɛpɛr ber a wɔdze sacrament no rokɔ aporɔw no, tse dɛ kuw a wɔatsetse hɔn.
Ɔyɛɛ me akoma tu ara ma Kwesida odzi do no, mokɔr ward dan no mu ntsɛm ama ɔato mo nko a obiara nnkotum ehu me. Mekaa dɛ ɔyɛ Yalecrest Ward wɔ Salt Lake Kuropɔn, na ohonyi si n’asaase no do. Mekɛhyɛɛ ohonyi no ekyir bɔɔ mboa ho mpaa enyiber do ama meehu mbrɛ sɛ midzi m’ananmu wɔ sacrament a wɔdze rokɔ aporɔw no a monnkɔtõtõ. Dɛm mpaa no wobuae.
Mbom afei minyim dɛ kwan pa a wɔdze bɔ mpaa na yɛdze dwen no wɔ hɔ, ber a yɛbɔ mbɔdzen dɛ yebenyin wɔ hɛn asɔfodzi som mu. Oedua me ntseasee wɔ siantsir a wɔma ankorankor asɔfodzi ho no do aba. Hɛn botae a yɛdze gye asɔfodzi no nye ɔbɛma hɛn kwan ma yeehyira nkorɔfo ama Ewuradze, a yɛreyɛ dɛm wɔ Ne dzin mu.2
Meyɛɛ deacon mfe pii ekyir ana murusũa n’asekyerɛ wɔ nyɛe mu. Mfatoho, meyɛ ɔsɔfopanyin no, wɔmaa me dwuma dɛ menkɛsera mpanyimfo ahwɛdobea asoɛe sacrament nhyiamu. Wɔkãa dɛ memfa sacrament no nkɔ aporow. Nkyɛ mobɔdwen kwan no anaa kwan pɛpɛɛpɛ no a medze sacrament no bɔkɔ aporɔw no, mbom mohwɛɛ nyimpa panyin biara n’enyim. Muhun dɛ hɔn mu dodowara rusũ. Ewuraba kor suoo mo sortar ne nsa n’ano, hwɛɛ m’enyim, na ɔkãa no kɛse dɛ, “O, meda ase, meda ase.”
Nna Ewuradze ehyira mo som a memaa no wɔ Ne dzin mu no do. Dɛm da no nna maabɔ dɛm anwanwadze no ho mpaa dɛ ɔmbra kyɛn dɛ mobɔbɔ mpaa dze ehu mbrɛ minsi nyɛ m’afãmudze no yie. Mobɔ mpaa dɛ nkorɔfo no bodua mo som ɔdɔ mu no do, eenya Ewuradze no dɔ ho atsenkã. Meesũa dɛ iyi nye erosom na irihyira binom wɔ Ne dzin mu no, ho saafee.
Maatse ndaansa yi dza osii a ɔkaa me ɔdɔ a ɔtse dɛm yi. Ber a wɔtwee Asɔr nhyiamu horow nyina sensanee ɔnam COVID-19 wiadze nyina mu nsan yarba no, onuabanyin a ɔrosom bi gyee edwuma fii ne elderfo quorum president hɔ dɛ obehyira na ɔama sacrament no ama akyerɛbaa a ɔsom no no. Ber a ɔfrɛɛ ɔbaa no dɛ ɔdze sacrament no bɛba no, ɔammpen do ɔpɛ mu ara, a ɔammpɛ dɛ ɔbɛma banyin no befi ne fie dɛm esian ber yi mu, na ɔgye dzi so dɛ ɔnnkɛkyɛr na ndzɛmba asan ayɛ yie bio.
Ber a odur ne fie Kwesida anapa no, nna ɔbaa no wɔ ebisadze bi. Ana wobotum anantsew akɔ fie no a ɔtoa do no na wɔnye mfe 87 fipamfo no edzi sacrament no? Bishop no maa ho kwan no, onua no peen do.
Adapɛn pii mu, na wɔdze nyimpa ntamu ntsetsewee nye ahobambɔ ho nhyehyɛɛ binom so no, dɛm Ahotseweefo kuw kakraba yi hyiaa mu Kwesida biara yɛɛ sacrament som a ɔnnyɛ kyinkyinɛnn. Paanoo mbubui na nsu kuraba kakraaba ara—naaso wokyii nyisuwa pii wɔ Nyame dɔfo ne papayɛ ho.
Mber guu mu no, onuabanyin a ɔrosom no, n’ebusua, na akyerɛbaa no a ɔrosom no no tumii sanee baa asɔr. Mbom mfe 87 kunafo no dze, fipamfo no, ɔnam ahwɛyie dodow ho ntsi, nna ɔsɛ dɛ ɔtsena fie. Onuabanyin a ɔrosom no—hom nkaa dɛ n’edwuma no dzi wɔ akyerɛbaa no ne fipamfo hɔ na nnyɛ akyerɛbaa panyin no nankasa mpo—ɔda ho ara besi ndɛ mpo ba ne fie Kwesida biara kommyɛ mu ara, kitsa kyerɛwsɛm na paanoo sin bi, dɛ ɔrebɛma sacrament, Ewuradze Edzidzi no.
N’asɔfodzi som no, tse dɛ me dze dɛm da no wɔ mpanyimfo ahwɛdobea no, ɔma no wɔ ɔdɔ mu. Nokwar, onuabanyin a ɔrosom no, ndaansa yi obisaa no bishop dɛ nkyɛ binom so wɔ ward no mu a, obotum ahwɛ hɔn do a. Ne pɛ dɛ ɔbɔkrɔn n’asɔfodzi som no enyin ber a ɔasom wɔ Ewuradze ne dzin mu na wɔ akwan a Ɔno nko na Onyim no dodowara. Minnyim sɛ onuabanyin a ɔrosom no abɔ mpaa, ama hɔn a ɔsom no, dɛ ma mobɔe no, ama oeehu Ewuradze no dɔ, naaso osiandɛ no som no ɔayɛ wɔ Ewuradze ne dzin mu ntsi, nsunsuando no ayɛ kor.
Nsunsuando nwanwa dɛmara na ɔba ber a mobɔ ho mpaa ansaana maama obi a ɔyar anaa ɔwɔ asɛnhia mber mu no asɔfodzi nhyira. Osii mber bi wɔ asopitsi ber a adatserfo a wonnyi abotar kãa kyerɛɛ me—ɔbor wɔkãa kyerɛɛ me—wɔdze nhyɛ maa me—dɛ menyɛ ntsɛm mfi kwan no mu ama woeetum aayɛ hɔn edwuma, kyɛn dɛ wɔbɛma me kwan ma maama asɔfodzi nhyira no. Motweɔnee, na memaa nhyira no. Na dɛm basiaba kakraba no a mihyiraa no dɛm da no, a adatserfo dwenee dɛ obowu no, tsenaa ase. Ɔyɛ me enyisɔ ber yi, dɛ dɛm da no, mamma m’atsenkã anntoto kwan no mu, mbom metsee dɛ nna Ewuradze pɛ dɛ basiaba kakraba no nya nhyira. Na minyim dɛm nhyira no. Mihyiraa no dɛ onya ayarsa. Na onyae.
Woesisi mber pii mu ber a maama obi a ɔyɛ dɛ ɔabɛn owu no nhyira, a n’ebusua mu mba etwa ehyia ne mpa ho, a wɔwɔ enyidado wɔ ayarsã ho nhyira mu. Mpo sɛ mber kumaa o, mobɔ mpaa dze ehu nhyira a Ewuradze wɔ a, mubotum dze ama wɔ Ne dzin mu. Na mibisa dze ehu mbrɛ Ɔpɛ dɛ Ohyira dɛm nyimpa no na nnyɛ dza emi anaa nkorɔfo a wogyina bɛn no rohwehwɛ. Mo sũahu nye dɛ sɛ nhyira no nnyɛ dza nkaafo no rohwehwɛ ama hɔn ho anaa hɔn adɔfo no mpo a, Sunsum no kã akoma ma wonya ngye ntomu na awerɛkyekye sũahu kyɛn abagura.
Nkenyan kor noara na ɔba ber a patriarchfo kyen kɔm na wɔbɔ mpaa nya kwankyerɛ a wɔdze bɛma nhyira a Ewuradze hwehwɛ ma nyimpa no. Bio, maatse nhyira pii a wɔama a wɔayɛ me ahobow na ɔayɛ nyimpa no a ɔregye nhyira no so ahobow. Ɔyɛɛ pefee dɛ, nna nhyira no fi Ewuradze hɔ—kɔkɔbɔ a ɔkã ho nye anohoba horow a wɔkyɛɛ wɔ Ne dzin mu ne nyina. Ewuradze maa patriarch no ne mpaabɔ na akɔnkye ho akatua.
Meyɛ bishop no, musũae ber a mereyɛ emudziyɛ ho kokoamu mpɛnsapɛnsamu no dɛ mombɔ mpaa mma Ewuradze ama meenya dza Ɔpɛ ma nyimpa no ho adwen, na mammfa mankasa m’atsɛmbu ennsiw nkenyan biara enyim. Ɔno yɛ dzen sɛ Ewuradze pɛ dɛ, ɔdɔ mu ara, Ɔdze ntsentsenee hyira obi a. Ɔgye mbɔdzembɔ dze ehu nsonsonee a ɔda dza ɔwo ipɛ na nyimpa no bia ɔrohwehwɛ, efi dza Ewuradze rohwehwɛ no mu.
Megye dzi dɛ hɛn abrabɔ nyina yebotum dze akrɔn hɛn asɔfodzi som na annhwɛ a wɔatra. Obegyina hɛn enyimpi do dɛ yɛbɔbɔ mbɔdzen bohu Ewuradze ne pɛ na hɛn mbɔdzembɔ dɛ yebetsie Ne ndze ama yeetum eehu no yie dza Ɔrohwehwɛ ama nyimpa a yɛrosom ama no No. Dɛm nkrɔnee yi bɛba nkakrakakra. Ɔbɛba nyaa, naaso ɔbɛba. Ewuradze abɔ hɛn iyi ho anohoba:
“Na hɔn nyina so a wɔbɛgye asɔfodzi ebien yinom a makã ho asɛm yi na wobedzi nokwar wɔ ho, na wɔakrɔn hɔn frɛ no, Sunsum no bɛtsew hɔn ho na wɔayɛ hɔn nyimpadua no fofor.
“Na wɔabɛyɛ Moses na Aaron hɔn mbabanyin na Abraham asefo, na asɔr no nye ahenman no, na Nyankopɔn n’apamufo.
“Na hɔn nyinara a wɔgye asɔfodzi yi no wɔgye me.”3
Ɔyɛ me dasegye dɛ asɔfodzi nsaafe no wɔdze saan ananmu maa Nkɔnhyɛnyi Joseph Smith. Ewuradze n’asomfo puei fii sor dɛ wɔdze asɔfodzi no resan ananmu aba ama dza woesisi tsitsir, a woesiansian na ɔda hɛn enyido yi. Wɔbɔboaboa Israel ano. Ewuradze no nkorɔfo bɛyɛ ahoboa ama Ne Mbae a Otsĩa Ebien wɔ enyimnyam mu no. Nsanananmu no bɔkɔ do. Ewuradze beyi Ne pɛ mbordo akyerɛ No nkɔnhyɛfo na akyerɛ N’asomfo.
Ibia ibenya atsenkã dɛ iyɛ ketseaba wɔ nkɔnhyɛ akɛse a ɔbɛba a ɔfa dza Ewuradze bɛyɛ ho. Sɛ itse dɛm a, moto nsa frɛ wo dɛ bisa mpaabɔ mu ara mbrɛ Ewuradze si hu wo. Onyim wo ankasa, Ɔdze N’asɔfodzi ahyɛ wo, na erosoɛr na akrɔn w’asɔfodzi no fa No ho osiandɛ Ɔdɔ wo na Ɔwɔ awerɛhyɛmu wɔ wo mu dɛ ibehyira nkorɔfo Ɔdɔ hɔn no wɔ Ne dzin mu.
Mihyira wo sesei dɛ ibotum bɛtse No dɔ na N’awerɛhyɛmu nkã wɔ Ewuradze Jesus Christ ne dzin mu, amen.