Kaa Wo Kwan San Kɔ Fie
Yɛwɔ Jesus Christ ne fasusu a odzi mu dɛ yɛka do, na akwantu no a ɔkɔ hɛn onnyiewiei fie no botum ayɛ yie osian Ne nkyerɛkyerɛ, N’abrabɔ, na No werdam afɔrbɔ no nko ntsi.
Afe 1946 mu no, nna nhwehwɛmunyi aberantsɛba Arthur Hasler rutu mpasar wɔ esutsen a ɔda bepɔw bi ho a, ɔbɛn ne banyimba fie, nna onyaa sũahu a ogyaa kɔr nhwehwɛmu bi a ohia wɔ mbrɛ nam si hwehwɛ hɔn kwan san kɔ esutsen a wɔwoo hɔn wɔ mu no.
Orutu mpasar wɔ bepɔw do, naaso onnhu ne mbafober mu nsu a ɔtsen gu famu no, mpofir mu ara na Hasler kaa dza nna no werɛ efir no. Ɔkãa dɛ, “Ber a mframa winwin, dze nhyirɛn huanhuam, bɔɔ faa apaamu abotan ntamu no, nsu a ɔtsen gu famu yi na ne fibea horow wɔ bepɔw n’enyi do no baa m’adwen enyiwa mu mpofirmu ara.’’1
Nkã yinom sanee dze ne mbafober mu nkaadze bae na ɔma ɔkae ne fie.
Sɛ nkã yinom botum ekenyan nkaadze a ɔtsetse dɛm ama no a, ɔtsee ase dɛ ebia nkã botum ayɛ dɛ nkaadze ama salmon nam a, mfe pii ekyir wɔ po kɛse mu no, wɔsan kɔ esutsen ankasa no a wɔwoo hɔn wɔ mu no.
Ɔnam sũahu yi do, Hasler, nye nhwehwɛmufo binom so, kɔɔr do kyerɛɛ dɛ salmon kaa nkã ankasa a ɔbɔboa akyerɛ hɔn ma woetwa kwan tsentsenntsen dze ehu hɔn kwan fi po mu asan akɔ fie.
Asɛm yi maa modwen ho dɛ ndzɛmba a ohia dodow mu kor a yebotum ayɛ no abrabɔ yi mu nye yebohu na yɛakaa anamɔn kwan dze san kɔ hɛn Ɔsor Egya nkyɛn na nokwar na dɛwdzi mu ara yɛwɔw do wɔ akwantu ne nyina mu.
Modwendwen nkaadze anan ho a, sɛ yɛdze dzi dwuma na yɛwɔw do dze bɔ bra wɔ hɛn abrabɔ mu a, obotum ekenyan hɛn ɔsor fie ho nkã-tse.
Odzi kan Yebotum Akaa Dɛ Yɛyɛ Nyame ne Mba.
Yɛwɔ egyapadze krɔnkrɔn. Yeruhu dɛ yɛyɛ Nyame ne mba na Ɔpɛ dɛ yɛsan kɔ Ne nkyɛn nye anamɔn horow no mu dza odzi kan wɔ hɛn akwantu dze san kɔ hɛn ɔsor fie.
Kaa woho wɔ egyapadze yi ho. Nya mber daa daa fa hyɛ wo sunsum mu ahoɔdzen dzen ber a ekaa nhyira horow a enya efi Ewuradze hɔ. Nya awerɛhyɛmu wɔ akwankyerɛfo a Ɔno dze ama wo no hɔn mu, kyɛn dɛ ebɛdan wiadze nko dze esusu wankasa wo bo a esom na ehu wo kwan.
Ɔnnkyɛree na mekɛseraa dɔfo bi wɔ asopitsi. Ɔdze nkã-tse kãa kyerɛɛ me dɛ ber a nna ɔda asopitsi mpa do no, nna n’apɛdze nyinara nye dɛ obi bɔtow ndwom “Meyɛ Nyame Ne Ba’’ ama no. Ɔkãa dɛ, dɛm adwendwen no nko, maa no asomdwee a ohia wɔ atseetsee ber no mu.
Eruhu wo nyimpa ban sesã ma itse na dza eyɛ.
Eretse wo nyimpa ban ase ankasa siesie wo yie ma ihu na ekaa wo kwan san kɔ wo ɔsor fie na ipɛ dɛ ibɔwɔ hɔ.
Otsĩa Ebien, Yebotum Akaa Fapem no a Ɔbɔ Hɛnho Ban
Sɛ yɛkɔdo yɛ tsenenee, yedzi nokwar, na yɛyɛ anokwafo ma Ɔsor Egya na Jesus Christ a ahoɔdzen ba hɛn hɔ, mpo sɛ binom hyɛ daa bu mbrasɛm no na nkwagye fapem no enyimtsia a.2
Mormon Nwoma mu no, Helaman kyerɛkyerɛɛ ne mbabanyin no dɛ wɔnkaa dɛ otwar dɛ wɔtow hɔn fapem wɔ Jesus Christ do ama woenya ahoɔdzen dze egyina ɔsɛɛfo no nsɔhwɛ ano. Satan ne mframa na ehum dzendzen no retseetsee hɛn, naaso wonnkenya tum dɛ wɔbɔtwe hɛn daadze sɛ yɛdze hɛn werɛ hyɛ bea a ɔyɛ dwudwoodwo mu—wɔ hɛn Pomfo mu a.3
Mankasa mo sũahu ma muhu dɛ sɛ yɛsan mu yi dɛ yebetsie Ne ndze na yɛaka No do a, yebenya No mboa. Yebenya hɛn gyinabew horow no nhumu kɛsenara na abrabɔ ho ntseasee a no mu dɔ yie. Yɛbɛtse sunsum mu ndzɛmba a okenyan hɛn ma yɛsesa na ɔbɔweɔn hɛn akɔ hɛn ɔsor fie.
Otsĩa ebiasa, Yebotum Akaa dɛ Yɛbɔbɔ Mpaa.
Yɛtse mber bi mu a nsa ano anaa asɛmkã kor pɛ no, yebotum ahyɛ ase ahwehwɛ nyiano wɔ asɛm tsir biara ho wɔ nsɛm a piinara a wɔdze esie na wɔahyehyɛ no wɔ kɔmputa hunyaa no do ho.
Anaaso dɛ, yɛwɔ ɔfrɛ mberɛwyɛ mu dɛ yɛbɛhyɛ ase ahwehwɛ nyiano efi sor. “Bɔ mpaa aber nyina, na mubohue mo Sunsum egu wo do.’’ Nkyii Ewuradze bɔ anohoba dɛ, “Na wo nhyira bɛyɛ kɛse—nyew, ɔbɛyɛ mbordo mpo akyɛn dɛ ibenya asaase do ahonyadze.’’4
Nyankopɔn nyim hɛn mu kor biara yie na ɔayɛ krado dɛ obetsie hɛn mpaabɔ. Sɛ yɛkaa bɔ mpaa a, yenya No ɔdɔ ahom, na mber dodow a yɛbɔ mpaa ma hɛn Egya a ɔwɔ Sor wɔ Christ ne dzin mu no, dɛm ara na yɛdze Agyenkwa no ba hɛn abrabɔ mu na yebohu anamɔn kwan a Ɔakyerɛ no yie dze akɔ hɛn ɔsor fie.
Otsĩa anan, Yebotum Akaa Asom Binom
Sɛ yɛper dɛ yɛbɛka Jesus Christ do ber a yɛrosom na yɛrekyerɛ ayamuyie ma binom a, yɛyɛ wiadze no bea pa.
Hɛn ndzeyɛɛ botum tsitsir ara woehyira hɔn a woetwa ehyia hɛnho no hɔn abrabɔ na hɛnara hɛn dze so dɛmara. Ɔsom ɔdɔ mu ara dze mfaso ma nyia ɔdze ma na nyia ɔgye no hɔn abrabɔ.
Mma mmbu kwan a ewɔ dɛ edze benya nhyɛdo pa wɔ binom do no adze kakraba, wɔ wo ndzeyɛe na wo ɔsom a ɔyɛ fasusu ho.
Ɔsom ɔdɔ mu ara ma binom weɔn hɛn wɔ anamɔn kwan ho dze kɔ hɛn sor fie—anamɔn kwan no a yɛbɛyɛ tse dɛ hɛn Agyenkwa no.
Afe 1975 mu no, osian ɔman mu ɔkõ no nsunsuando ntsi, Arnaldo na Eugenia Teles Grilo na hɔn mba, gyaa hɔn fie na dza wɔdze mfe du mfe du edwuma dzen wɔayɛ nyina ekyir. Hɔnankasa hɔn kurow Portugal mu no, Onuabanyin na Akyerɛbaa Teles Grilo hyiaa ɔhaw dɛ wɔbɛhyɛ abrabɔ ase bio. Mbom mfe pii ekyir no, a wɔbɔdɔɔm Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no, wɔkãa dɛ, “Biribiara a nna yɛwɔ no fii hɛn nsa, naaso nna ɔyɛ adze papa osiandɛ ɔhyɛɛ hɛn ma yesusuu onnyiewiei nhyira horow no ho hia.’’5
Wɔyeew hɔn asaase do fie, mbom wohun kwan no a ɔdze san kɔ hɔn sor fie.
Adzebiara a otwar dɛ yegya no ekyir dze dzi anamɔn kwan do kɔ wo ɔsor fie no, yebohu no da kor bi dɛ, ɔnnyɛ afɔrbɔ koraa.
Yɛwɔ Jesus Christ ne fasusu a odzi mu dɛ yɛka do, na akwantu dze no a ɔkɔ hɛn onnyiewiei fie no bɛyɛ yie nko osian Ne nkyerɛkyerɛ, N’abrabɔ, na No werdam afɔrbɔ no ntsi—a No wu na enyimnyam Wusoɛr kã ho.
Moto nsa frɛ wo dɛ ibenya nkaa ho dɛwdzi dɛ yɛyɛ Nyame ne mba na dɛ Ɔdɔ wiadze dɛ Ɔsomaa Ne Ba6 dɛ ɔmbɛkyerɛ hɛn anamɔn kwan no. Moto nsa frɛ wo dɛ kaa dɛ ebɛyɛ nokwafo, dze adan w’abrabɔ ama Agyenkwa no na atow wo fapem wɔ No do. Kaa dɛ ebɔbɔ mpaa wɔ w’akwantu mu na asom binom wɔ kwan no do.
Enuanom na nkyerɛbaa adɔfo, Easter Kwesida yi, megye dase dɛ Jesus Christ nye wiadze no Pomfo na Agyenkwa. Ɔno nye nyia obotum dze hɛn akɔ enyigye abrabɔ pon no ho na Ɔaweɔn hɛn wɔ hɛn akwantu mu. Yɛnkaa No na yendzi N’ekyir nkɔ fie. Jesus Christ ne dzin mu, amen.