Nyankopɔn Dɔ Ne Mba
Mepɛ dɛ mekyɛ akwan horow ebiasa tsitsir a hɛn Ɔsor Egya da No dɔ edzi ma hɛn, Ne mba.
Enuanom na nkyerɛbaa, menye hom dzi dɛw wɔ Jesus Christ n’asɛmpa no mu. Medze ɔdɔ fi asɔrmba a wɔhyɛ dzen wɔ Philippines hɔ, na migyina hɔn ananmu kã dɛ, Mabuhay!
Easter anapa yi, megye Christ tseasefo noho dase, dɛ Ɔsoɛree fi owu mu na dɛ No dɔ ma hɛn na hɛn Egya a ɔwɔ Sor yɛ krɔngyenn na onnyiewiei. Ndɛ, mepɛ dɛ mitsim wɔ Ɔsor Egya na Jesus Christ hɔn dɔ ma hɛn nyinara, a ɔnam, Jesus Christ No Werdambɔ do, da edzi no “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae’’ (John 3:16).
Mber a ɔbɔfo bi bisaa nkɔnhyɛnyi Nephi ne nyimdzee wɔ Nyankopɔn ho asɛm no, Nephi buae bɔkɔɔ dɛ, “Minyim dɛ ɔdɔ ne mba’’ (hwɛ 1 Nephi 11:16–17).
Nyiyimu kor bi fi Mormon Nwoma no mu: Jesus Christ ho Ahyɛmu Kor So kã wɔ tum mu ara fa Agyenkwa no dɔ a odzi mu ho asɛm dɛ: “Na osian wiadze emumuyɛ ntsi wobobu no atsɛn dɛ ɔyɛ adzegyangyan; … wɔahwe no abaa, … wɔabɔ no asotɔr, … woehima no ntafi, na ɔbɛpen do, osian n’adɔyɛ na ne penkyɛr a ɔwɔ wɔ adasamba ho ntsi’’ (1 Nephi 19:9). Agyenkwa no no dɔ ma nyimpa nyina no nye siantsir a onkenyaan dza Otumii yɛɛ nyinara no. Yenyim dɛ dɛm dɔ no nye ɔdɔ noara a hɛn Egya a ɔwɔ Sor wɔ ma hɛn, osiandɛ Agyenkwa no kyerɛkyerɛɛ ahobrɛadze mu ara dɛ Ɔno na Egya no “yɛ kor’’ (hwɛ John 10:30; 17:20–23).
Afei, yesi dɛn san dze ma no na yɛkyerɛ hɛn ndaase ma Hɔn amansan dɔ no? Agyenkwa no dze nsato bɔkɔɔ a ɔkɔ adze nyina do no kyerɛkyerɛɛ hɛn dɛ: “Sɛ hom dɔ me a, hom ndzi me mbrasɛm do’’ (John 14:15).
President Dallin H. Oaks kyerɛkyerɛɛ dɛ, “Nyankopɔn n’amansan na ɔdɔ a odzi mu no da edzi wɔ N’asɛmpa nhyehyɛɛ nyina mu, a nokwar nye dɛ Ne nhyira horow a ɔasan mu eyi no wɔ hɔ ma hɔn a wodzi Ne mbra do.’’1
Mepɛ dɛ mekyɛ akwan horow ebiasa tsitsir a hɛn Ɔsor Egya da No dɔ edzi ma hɛn, Ne mba.
Odzi Kan, Yɛnye Nyankopɔn na Ebusua Nkitahodzi Da No Dɔ Edzi.
Hɛn nkitahodzi a wɔsom bo dodow nye yɛnye Egya na Ɔba no na yɛnye hɛnara hɛn ebusua ebusua osiandɛ yɛnye hɔn nkitahodzi yɛ onnyiewiei. Enyigye ho nhyehyɛɛ kɛse yɛ Nyankopɔn no dɔ ma hɛn nwanwa a ɔda edzi. Hɛn enyiwa tsim Nyankopɔn ne nhyehyɛɛ do no, ɔpɛ mu ara yɛsan mu yi tutu pɛsankomanya ɔpɛ horow fi hɛn abrabɔ mu ama yeetum akyekyer onnyiewiei nkitahodzi. Sɛ yɛkã a, yebotum afrɛ iyi “sunsum mu ntutui.’’ Yɛreyɛ hɛn sunsum mu ntutui edwuma no, otwar dɛ yedzi kan hwehwɛ Nyankopɔn na yɛfrɛ No (hwɛ Jeremiah 29:12–13.
Yɛrohwehwɛ No na yɛrefrɛ No bɛhyɛ kwan no ase na ɔama kwan ma yɛakyekyer na yɛahyɛ hɛn onnyiewiei nkitahodzi no dzen. Ɔtserɛw hɛn sunsum mu adzehu mu na ɔboa hɛn ma yetsim wɔ dza yebotum ahyɛdo do kyɛn dɛ yebetsim wɔ hɛn suro do. Yerusũa hɛn Agyenkwa, Jesus Christ, n’abrabɔ na somdwuma ho asɛm no bɛma hɛn tum ma yɛdze onnyiewiei nhumu ehu ɔhaw yinom.
Ɔtɔfabi a ndan enyi horow botum esiw hɛn kwan ma yennkenya Nyankopɔn no dɔ wɔ hɛn ebusua nkitahodzi na dwumadzi ahorow mu. Enã, a ohun dɛ mfir [foon, tablet na binom so] regye n’ebusua nkitahodzi mber no, nyaa ho mbuae. Ewimbir edzidzi mber na wɔ ebusua mber bi so no, ma ɔkãe ara nye dɛ, “Foon horow nkɔ nkyɛn; enyim tua enyim mber aso.’’ Ɔkãa dɛ iyi nye ntɔyɛɛ fofor ma hɔn ebusua na dɛm no hyɛ hɔn nkitahodzi dzen dɛ ebusua sɛ wɔyɛ eyim tua enyim ankasa a. Sesei no wɔbɔmu dɛ ebusua nya Come, Follow Me mu mpɛnsampɛnsamu ho mfaso dɛwdzi.
Otsĩa Ebien, Ɔda No Dɔ Edzi kyerɛ Ne Mba ber a Ɔfrɛ Nkɔnhyɛfo
Hɛn ndɛ wiadze no “kasatsia na adwen a ɔnnsaa” ahyɛ mu mã (Joseph Smith—Abakɔsɛm 1:10). Paul kaa hɛn dɛ “ndze horow … pii wɔ wiadze’’ (1 Corinthfo 14:10). Ndze horow nyinara hen dze na ɔkɔ sor yie na ntseasee wɔ mu tra basabasa dze no do? Ɔyɛ Nyankopɔn ne nkɔnhyɛfo, adzehufo, na nyikyerɛfo no hɔn ndze a.
Mekaa pefee dɛ, meyɛɛ ɔprehyɛn wɔ afe 2018 mu na meresan akɔ edwuma no, medze me hɛn kesii Asɔr n’asoɛbea hɔ. Mpofirmu ara, metsee President Russell M. Nelson ne ndze a ɔrefrɛ, ‘Taniela, Taniela.’’ Mutuu mbirika kɔr ne nkyɛn, na obisaa m’apɔw mu.
Mekãa dɛ, “President Nelson, meretse apɔw yie papaapa.’’
Otuu me fo na otui fua me. Nokwar metsee nkɔnhyɛnyi nankasa no somdwuma ma “ɔbaako’’ no ne nkã.
President Nelson etu kwan akɔ asaase n’aman horow pii do. M’adwen mu no, ɔronnsom mpempem ara, mbom ɔrosom mpempem no “nkorkor.’’ Ɔreyɛ dɛm no, ɔkyɛ Nyankopɔn no dɔ a ɔwɔ ma Ne mba nyinara.
Ɔnnkyɛree na President Nelson ne nsɛm ayɛ ahoɔdzen na nkenyan ne farbaa ama Philippinefo. Dɛ mbrɛ wiadze mu ɔman biara ayɛ no, 2020 COVID-19 nsan yarba no kãa Philippinefo dzendzenndzen, dɛmara dɛ ogya a otui fi asaase tsir mu, asaase-wosow, ehum dzendzenndzen, na nsuyirii a ɔsɛe adze.
Naaso, tse dɛ kan fadum a ɔhyerɛn wɔ suro, ankonamyɛ, na abagura no mununkum kebii mu no, na nkɔnhyɛnyi ne nsɛm bae. Wɔserɛɛ wiadze nyina mu akɔnkye na mpaabɔ na afotu dɛ nsan yarba nyina ekyir no, yɛnkɔ kan. Ɔserɛɛ dɛ yɛnyɛ hɛn efiefi ankorankor gyedzi guandɔbea horow. Ɔfrɛɛ Latter-day Saintfo a wɔwɔ beebiara dɛ wondzi Nyankopɔn ne mba nyinara nyi na wɔma Nyankopɔn ndzi nyim wɔ hɔn abrabɔ mu.2
Dɛmara na nna President Nelson ne video dasegye a ɔnnkyɛree wɔ ndaase no tum, na ne mpaabɔ a odzi ewiei, a ɔyɛɛ nkenyan wɔ Philippines no.3 Leyte mansin mu no, wɔbɔɔ video no wɔ nsɔrnsɔr dwumadzi bi ase, na wɔsanee kãa no asɔr bi no sɔfo ne nkenyan nsɛmpa mu. Wɔayɛ nhyira ama Philippinefo, nye wiadzefo nyina, dɛ wɔnam No nkɔnhyɛnyi a ɔasan mu eyi no do tsee Nyankopɔn no dɔ nkã.
Otsĩa Ebiasa, Ntsẽa Botum Ada Nyankopɔn no Dɔ ma Ne Mba Edzi
Ɔtɔfabi a, Nyankopɔn da No dɔ edzi ber a ɔtsẽa hɛn. Ɔyɛ kwan a ɔkaa hɛn dɛ Ɔdɔ hɛn na Onyim ma yɛtse. N’anohoba asomdwee ho nhyira wɔ hɔ ma hɔn nyina a akokodur mu ara wɔnantsew ahyɛmudzi anamɔn kwan no do na wɔwɔ pɛ dɛ wɔbɛgye nsiesie.
Sɛ yehu ntsẽa no, na yɛyɛ agyefo ɔpɛ mu ara a, ɔbɛyɛ sunsum mu ɔprehyɛn. Oye, woana na ɔpɛ ɔprehyɛn? Mbom hɔn a wohia na wɔwɔ pɛ dɛ wɔbɛgye no, obotum agye hɔn nkwa. Ewuradze tsẽa nyia Ɔdɔ no. Kyerɛwsɛm no kã dɛmara kyerɛ hɛn (hwɛ Hebrewfo 12:5–11; Helaman 12:3; Nkyerɛkyerɛ na Ahyɛmudzi 1:27; 95:1). Dɛm ntsẽa, anaa sunsum mu ɔprehyɛn, dze nsesã a yehia no wɔ hɛn abrabɔ mu no bɛba. Enuanom na nkyerɛbaa, bohu dɛ osiesie na ɔtsew hɛn mu kuraba no ho.
Wɔtsẽaa Joseph Smith, Nsananamu no Nkɔnhyɛnyi no. Ɔyeew Mormon Nwoma ne nkrataafa 116 ekyir no, Ewuradze tsentseen no na Ɔkyerɛɛ no dɔ ber a Ɔkãa dɛ: “Nkyɛ onnyi dɛ isuro nyimpa kyɛn Nyankopɔn. … Naaso nkyɛ ɔwɔ dɛ eyɛ nokwafo. … Hwɛ, ɔwo nye Joseph, na wɔasan mu eyi wo. … Kaa dɛ, Nyame yɛ mbɔbɔrhufo; dɛm ntsi nu woho’’ (Nkyerɛkyerɛ na Ahyɛmudzi 3:7–10).
Afe 2016 mu, ber a nna morosom asɛmpakã dwuma wɔ Little Rock, Arkansas no, meserɛɛ Nuabanyin Cava dɛ ɔmfa akyɛdze bi nkɛma m’akyerɛbaa panyin, a nna ɔtse supruw bi do wɔ Fiji. Na ne nyiano no nnyɛ adze a m’enyi da ho kwan. “President Wakolo,’’ ɔpeen ne menmu see dɛ, “w’akyerɛbaa no efi mu na wosiee no [nda] 10 a abasen kɔ no.’’ Mo werɛ howee na mpo meyɛɛ basaa dɛ wɔannhaw m’ebusuafo dɛ wɔbɛma maatse.
Adzekyee no, mber a nna me yer rekyerɛkyerɛ asɛmpasomafo adze no, adwen yi hɛɛn me kra mu: “Taniela, sũahu yinom nyina ye ma wo yieyɛ na mpontu. Akyerɛkyerɛ na akyɛ wo dasegye wɔ Jesus Christ No Werdambɔ no ho; afei fa bɔ bra dɛmara. Wɔkaa me dɛ “homkanyi nye nyimpa a Nyankopɔn kã n’enyim; dɛm ntsi [onnyi dɛ] mma hom mmbu … Otumfo ne ntsẽa no enyimtsia’’ (Job 5:17). Nna ɔyɛ sunsum mu ɔprehyɛn ma me, na no nsunsuando no baa ntsɛntsɛm.
Mber noara nna morodwendwen sũahu noho no, nna wɔfrɛɛ me dɛ menkã mekasae a odzi ewiei wɔ mpɛnsampɛnsamu no ho. Dza me dze kã ho no, mekãa adzesũadze a wɔkyerɛkyerɛɛ me hɔnara no: kor, Sunsum Krɔnkrɔn no atsẽa me hɔnara na mepɛe osiandɛ nna emi nko nye nyia a ɔtsee; ebien, osian Agyenkwa n’afɔrbɔ na mpatadze ntsi, merennkã dɛ me taferbanyinmbɔmu no yɛ nsɔhwɛ na atseetsee bio, mbom wɔyɛ “m’adzesũa sũahu horow’’; na ebiasa, osian N’abrabɔ a odzi mu na bɔn nnyi ho ntsi merennkã dɛ m’esintɔ na ahom a minnyi no yɛ mbrɛwyɛ horow mbom dɛ mo mpontu akwan ahorow. Sũahu yi boaa me ma muhun dɛ Nyankopɔn tsẽa hɛn osiandɛ Ɔdɔ hɛn.
Medze wie. Mo wie a, hɛn Onnyiewiei Egya na Ne Ba, Jesus Christ, kyerɛ Hɔn dɔ ber a wɔyɛe ma hɛn ma yɛnye Hɔn na hɛn ebusuafo enya onnyiewiei nkitahodzi, ber a wɔfrɛ ndɛ da nkɔnhyɛfo dɛ wɔnkyerɛkyerɛ na wɔnsom hɛn, na ber a wɔtsẽa hɛn no dze aboa hɛn ma yeesua na yeenyin. Yɛda Nyame ase wɔ Ne Ba krɔnkrɔn akyɛdze a onyi kãbea no ntsi,’’4 hɛn Ewuradze a ɔasoɛr efi owu mu, mpo Christ tseasefo no. Jesus Christ ne dzin mu, amen.