COVID-19 na Temple horow
Hom nsie hom temple ahyɛmu na nhyira horow nkankara wɔ hom adwen na akoma mu. Hom nkɔ do ndzi nokwar mma ahyɛmu a hom ayɛ no.
Mo nuanom na nkyerɛbaa adɔfo, yɛamee wɔ sunsum mu ampaara. Mbrɛ m’enyi sɔ ehyiadzi yi mu mpaabɔ, nsɛm na ndwom nyinara no. Meda hom mu kor biara ase, beebiara hom wɔ biara dɛ hom bɛkãa hɛn ho.
Mfeda, osian COVID-19 wiadze nyina mu nsan yarba no na hɛn pɛ dɛ yɛbɛyɛ amamba pa wɔ wiadze nyina mu ntsi, yɛbɔɔ adwenpɔw a ɔyɛ dzen dɛ yɛbɔtotow temple horow nyina mu mber kakra. Abosoom a odzidzi do no, yenyaa nkenyan dɛ yembuebue temple horow no nkakrankakra ahwɛyie mu ara. Afei woebobue temple horow wɔ gyinabew anan mu a, woridzi aban ne mbra nye bambɔ ho nhyehyɛɛ do katsee.
Temple horow a wɔwɔ gyinabew 1 no, awarfo a wɔfata a woedzi kan agye hɔn endowment no wobotum asɔw hɔn ano dɛ kun na yer.
Temple horow a wɔwɔ gyinabew 2 no, wɔyɛ ayɛdze nyina a wɔyɛ ma atseasefo, a wankasa wo endowment kã ho, kun na ɔyer nsɔwano, na mba ma hɔn awofo nsɔwano. Ndaansa yi yɛayɛ gyinabew 2 nhyehyɛɛ no mu nsesã a wɔma hɛn mbabun kwan, asɔrmba afoforfo, na binom a wokitsa limited-use recommend ma wɔyɛ ananmusinyi enuma ma hɔn ewuakɔr.
Temple horow a wɔwɔ gyinabew 3 no, hɔn a wɔahyehyɛ hɔn dɛ wɔnkɔ no bɛyɛ atseasefo nye ananmusinyi ayɛdze ma hɔn ewuakɔr.
Gyinabew 4 no yɛ temple dwumadzi a wɔyɛ no dada no a wɔasan reyɛ ne nyinara.
Yɛda hom ase wɔ hom abotar na som pa wɔ mber yi a ndzɛmba sesã na ɔhaw yi mu. Mobɔ mpaa dɛ hom pɛ dɛ hom bɔsɔr na wɔasom wɔ temple mu no bɛhyerɛn mbordo sesei akyɛn ber biara.
Bia hom rodwendwen mber a hom dze bɛsan akɔ temple. Nyiano: Hom temple bobue sɛ sɔn mu aban ne nhyehyɛɛ ma ho kwan a. Sɛ COVID-19 no dodow a ɔwɔ w’apaamu no ma ahobambɔ kwan a, wobobue wo temple no. Hom nyɛ dza hom botum nyina mma COVID no dodow no mbra famu wɔ hom apaamu mu ama kwan a ibotum enya aakɔ temple no aakɔ sor.
Yɛrotweɔn yi, hom nsie hom temple ahyɛmu na nhyira horow nkankara wɔ hom adwen na akoma mu. Hom nkɔ do ndzi nokwar mma ahyɛmu a hom ayɛ no.
Yɛrotow sesei ama ndaamba no! Temple horow eduonan kor na wogu do risi anaa worisiesie. Mfeda pɛr no, nsan yarba nyina ekyir no, yetutuu famu hyɛɛ temple afofor 21 ase!
Yɛpɛ dɛ yɛdze Ewuradze ne fie no bɛn hɛn asɔrmba no ara yie, ama woeenya ndzinoa krɔnkrɔn dɛ wɔbɔkɔ mpɛn dodow a hɔn gyinabew bɛma ho kwan.
Medze hɛn nhyehyɛɛ to gua dɛ yebesi temple horow 20 no, modwendwen edzikamfo ho na miyi hɔn ayew—mfedafo na ndɛfo—hɔn a wotuu hɔn abrabɔ sii hɔ dze boae ma yɛreyɛ dza ɔnntɔ kã ndɛ yi. Wobesi temple fofor wɔ mbea a odzi do yinom yi kor biara mu: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; na Smithfield, Utah.
Temple edwuma yɛ Jesus Christ asɛmpa no Nsanananmu wɔ ne mãhyɛ mu ne fã tsitsir. Temple ayɛdze dze tum na ahoɔdzen hyɛ hɛn abrabɔ mu a—nsa nnkã no wɔ kwan biara do. Yɛda Nyame ase wɔ dɛm nhyira no ho.
Ber a yɛdze ehyiadzi yi ba ewiei no, yesi do kyerɛ hɛn dɔ ma hom. Yɛbɔ mpaa dɛ Nyankopɔn bohue Ne nhyira egu hom do na Ɔahwɛ hom mu kor biara do yie. Yɛabɔ mu wɔ N’edwuma krɔnkrɔn no mu. Yɛdze akokodur no, hom mma yɛmper nkɔ kan wɔ Ewuradze enyimnyam edwuma no mu. Iyi ho na mobɔ mpaa wɔ Jesus Christ ne dzin krɔnkrɔn no mu, amen.