Wonnkotum Edzi Konyim, Yennkotum Ahwe Ase
Sɛ yesi hɛn fapem wɔ Jesus Christ do a, yennkotum ahwe ase!
Hɛn nkɔnhyɛnyi dɔfo, President Russell M. Nelson, kãa no wɔ hɛn ndaansa yi wiadze mfɛndzanan ehyiadzi mu dɛ: “Mbusu mber yinom a Ɔsomafo Paul hyɛɛ ho nkɔm no, Satan rommbɔ mbɔdzen mpo nnsuma ne sa a otu wɔ Nyankopɔn ne nhyehyɛɛ do no. Nsɛmbɔn atahye. Dɛm ntsi, kwan kor ara a yebotum edzi konyim sunsum mu nye yebesi nketse dɛ yɛbɛma Nyankopɔn bedzi nyim wɔ hɛn abrabɔ mu, yesũa dɛ yebetsie Ne ndze na yɛdze hɛn ahoɔdzen aboa ma wɔaboa Israel ano.’’1
Sɛ yɛhwɛ nkɔnhyɛnyi no ne nsato dɛ yensũa dɛ yɛbɛtse Nyankopɔn ne ndze a, ana hɛn akoma esi pi anaa woepirim? Hom mma yɛnkaa afotu a wɔdze mae wɔ Jacob 6:6: “Nyew, ndɛ da yi, sɛ hom tsie ne ndze a, mma hom mmpirim hom akoma; ebɛn ntsi na hom bowu?’’ Hom mma yensi pi dɛ Nyankopɔn bedzi nyim wɔ hɛn abrabɔ mu.
Yebesi dɛn botum bɛma Nyankopɔn edzi nyim wɔ hɛn abrabɔ mu na nnyɛ ɔsɛɛefo no? Nkyerɛkyerɛ na Ahyɛmudzi 6:34 mu no, yɛkenkan dɛ, “Dɛm ntsi, mma hom nnsuro, nguambaakuw; hom nyɛ papa; ma asaase nye hɛl nyina mbɔmu ntsia hom, na sɛ hom si wɔ mo botan do a, wonnkotum edzi hom do konyim.’’ Ɔyɛ anohoba soronko. Ɔwɔ mu dɛ asaase na hɛl nyina bɔbɔmu etsia hɛn dze, sɛ yɛsan mu yi dɛ Nyankopɔn bedzi nyim ber a yɛdze hɛn abrabɔ esi No botan do a wonnkotum edzi nyim.
Ɔrekasa kyerɛɛ N’esuafo no, Jesus Christ kyerɛkyerɛɛ ɔbarimba nyansafo na ɔbarimba kwasea ho asɛm, a wɔakyerɛw no wɔ Matthew tsir 7 wɔ Ahyɛmu Fofor no mu. Hɔn mu dodow atse Primary ndwom “The Wise Man and the Foolish Man.’’2 Sɛ enya adagyer dze nyiyimu a ɔwɔ ndwom yi mu no atotõ ho a, ibohu dɛ nyiyimu 1 na 2 no nye nyiyimu 3 na 4 no saa papaapa. Nna ɔbarimba nyansafo na ɔbarimba kwasea beenu no risi dan. Wɔpɛ dɛ hɔn ebusua nya ahotɔ na ahomka fie tsena mu. Wɔpɛ dɛ wɔbɔ mu tsena enyigye mu afebɔɔ dɛ ebusua, dɛmara dɛ emi na ɔwo pɛ no. Nna gyinabew a woetwa hɔnho ehyia no yɛ pɛr: “nsu tɔree na nsuyirii no baa sor.’’ Sɛ yɛtow ndwom no a yɛtow no mpɛn esia. Nsonsonee pɛr nye dɛ ɔbarimba nyansafo no sii ne dan wɔ botan do na dan no gyinaa pi, a ɔbarimba kwasea no sii ne dan wɔ anhwea do na nsu hohoor dan no kɔree. Dɛm ntsi, bea a hɛn sunsum mu fapem wɔ no hia ankasa, na iyi wɔ ewiei na mfesantsen nsunsuando a ɔda edzi ntsɛm.
M’enyidado na mpaa nye dɛ hɛn nyina bɔhwehwɛ na yetsim wɔ nokwar fapem no do ber a yɛkyekyer hɛn ndaamba abrabɔ. Wɔkaa hɛn wɔ Helaman 5:12: mu dɛ, “Na afei me mbabanyin, hom nkaa, hom nkaa dɛ hɛn Pomfo a ɔyɛ Christ, Nyame ne Ba no, no botan no do na ɔwɔ dɛ hom tow hom fapem; ama sɛ abɔnsam bɔ n’ehum dzendzen no a, nyew, n’egyen menaba a ɔwɔ ekyinehyia ehum no mu no a, nyew, sɛ n’ɔsor-bo nyinara tɔ na n’ehum kɛse bɔ dzendzenndzen hwe hom a, orinnya tum wɔ hom do nntwe hom nnkɛhyɛ awerɛhow nye mbusu a onnyi ewiei no bun ase, osian ɔbotan a hom atow hom adan wɔ do ntsi, dza ɔyɛ fapem tsim, fapem a sɛ adasamba si hɔn adan wɔ do a wɔnkɔhwe ase.
Ɔno nye anohoba fi Nyankopɔn hɔ! Sɛ yesi hɛn fapem wɔ Jesus Christ do a, yennkotum ahwe ase! Sɛ nokwar mu ara yɛsɔw kodu ewiei a, Nyankopɔn bɔboa hɛn ma yeesi hɛn abrabɔ wɔ No botan do, “na hɛl mbobow no nnkotum edzi konyim etsia [hɛn]’’ (Nkyerɛkyerɛ na Ahyɛmudzi 10:69). Yennkotum asesa dza ɔreba nyinara, mbom yebotum asan mu eyi mbrɛ yebesi ayɛ ahoboa ama dza ɔreba no.
Hɛn mu binom bɔdwen dɛ, “Asɛmpa no ye, ntsi no ɔwɔ dɛ yɛdze hyɛ hɛn abrabɔ mu, ebia da kor pɛ wɔ dapɛn mu.” Yɛrokɔ asɔr da kor pɛ dapɛn mu no nndɔɔsõ dɛ yebesi dan wɔ botan no do. Jesus Christ n’asɛmpa no wɔdɛ ɔhyɛ hɛn abrabɔ nyina mu mã. Asɛmpa no nnyɛ hɛn abrabɔ ne fã bi, mbom hɛn abrabɔ kã Jesus n’asɛmpa noho ankasa. Dwen ho. Iyi nnyɛ nokwar? Hɛn ɔnnkyebo abrabɔ yɛ nkwagye nhyehyɛɛ na ntowdo ne fã ara.
Nyankopɔn yɛ hɛn Ɔsor Egya. Ɔdɔ hɛn nyianra. Onyim hɛn ndaamba koraa kyɛn ma hɛnara yenyim. Nnyɛ hɛn abrabɔ mu nsɛm nktsenketse nko na Onyim. Nyankopɔn nyim hɛn abrabɔ mu nsɛmansɛm nketsenketse nyinara papaapa.
Meserɛ hom ndzi hɛn nkɔnhyɛnyi tseasefo, President Nelson ne nyansaa afotu do. Dɛ mbrɛ wɔakyerɛw no wɔ Nkyerɛkyerɛ na Ahyɛmudzi 21:5–6 mu dɛ:
“Na n’asɛm na hom bɛgye, tse dɛ ofi mankasa m’anomu, wɔ abotar nye gyedzi nyina mu.
“Na sɛ wɔyɛ dɛm ndzɛmba yinom a hɛl mbobow no nnkotum edzi hom do konyim; nyew, na Ewuradze Nyankopɔn bɔhwetse sum no tum efi hom enyim, na ɔama sor awosow ama hom yieyɛ, nye ne dzin n’enyimnyam ntsi.’’
Ɔno ne siantsir ntsi, wonnkotum edzi konyim, na yennkotum ahwe ase.
Megye dase kyerɛ hom dɛ Christ bɛba bio mber a otsĩa ebien dɛ mbrɛ Ɔyɛe no mber a odzi kan no, mbom mber yi dze ɔbɛyɛ enyimnyam kɛse na fɛɛfɛw. M’enyidado na mpaa nye dɛ mebɛyɛ krado agye No, sɛ ɔyɛ ntwamutam n’afã ha anaa no ho. Ber a yedzi Easter hyɛber nwanwa yi no, mowɔ enyidado dɛ, ɔnam Jesus Christ No Werdambɔ na No Wusoɛr tum do no (hwɛ Moroni 7:41), mubotum akɔ sor na menye me Yɛfo ekehyia na makã dɛ, “Meda ase.’’ Jesus Christ ne dzin mu, amen.