Jesus Christ: Hɛn Kra n’Oduyɛfo
Sɛ a yenu hɛnho fi hɛn bɔn ho nokwar mu a, yɛma Christ no werdam afɔrbɔ no kwan ma odzi dwuma imu wɔ hɛn abrabɔ mu.
Mo nuanom na nkyerɛbaa adɔfo, Easter anapa yi a ɔrehyerɛn yi m’akoma dzi ehurusi ber a mekaa dza ɔyɛ nwanwa, dza ɔkrɔn kɛse, adasa nyina abakɔsɛm mu dza woesi a wonnkotum esusu ho no—hɛn Ewuradze Jesus Christ no werdam afɔrbɔ no. Nkɔnhyɛnyi Isaiah ne nsɛm a ɔayɛ atsenka no krɔn Agyenkwa N’abrabɔ ne kɛseyɛ na N’etuhoakyɛ, mbrɛ Osi kotow na Ɔbɔ afɔr ma Nyankopɔn Ne mba nyina:
“Ampaara, ɔasɔw hɛn yaw, na ɔasoa hɛn awerɛhow; naaso yebuu no dɛ nyia wɔahwe no, Nyame abɔ no, na woehiahia no.
“Na mbom wopiraa no wɔ hɛn mbrato ntsi, woposoow no wɔ hɛn emumuyɛ ntsi, wɔdze hɛn asomdwee ho ntsẽa too no do; na ne mbaa ano na wɔdze asa hɛn yarba.”1
Ɔnoara gyee adasa nyina hɔn bɔn too Noho do, wɔbɔɔ no mprɛgow wɔ mbeamudua no do ewurkadze mu, na konyimdzi mu mo odzii owu do nyim wɔ da otsĩa ebiasa no mu,2 Jesus maa Apaho ayɛdze no a wɔdze maa Israel tsetseber no ho asekyerɛ krɔnkrɔn soronko.3 Ama nkɔnhyɛ no aahyɛ mã no, Ɔdze Nankasa ne nyimpadua na no bɔgyaa a ɔsom bo no mae dɛ afɔrbɔ kɛse a odzi ewiei no,4 a Ɔdze kyerɛɛ dɛ tsetse ngyinahɔmadze a wɔdze hyɛ Ewuradze N’Apaho fa no yɛ nokwar.5 Ɔyɛɛ dɛm no, Christ hun amandze wɔ honandua nye sunsum mu a nyimpa adwen nnkotum atse ase. Agyenkwa Noara see dɛ:
“Na, hwɛ, emi Nyankopɔn meehu amandze yinom dze ama obiara, …
“Amandzehu a ɔmaa emi a meyɛ Nyame a mo sõ sen obiara mpo no, moho popoe, osian yaw ntsi, na bɔgya fii mo honandua enyi nyina kyĩi, na muhun amandze wɔ honam nye sunsum mu—na mepɛɛ dɛ nkyɛ monnkɔnom kuraba wenwen no ano na mawodow—
“Naaso, enyimnyam nkã Egya no, na monomee na muwiee mo mboaboaho biara yɛ dze maa adasamba.”6
Adom mu ara Christ duaa N’ehumbɔbɔr afɔrbɔ a ɔmmbɔadze da do dze hyɛɛ Egya Ne pɛ no mã.7 Odzii konyim wɔ honandua nye sunsum mu owu no bɔr do,8 a oduaa Asehwe no do baa wiadze,9 na Ɔama hɛn kwan a yebotum enya enyimnyam onnyiewiei nkwagye.10
Jesus nkotsee nye Abɔdze a obotum ayɛ onnyiewiei afɔrbɔ a odzi mu yi ama hɛn nyinara.12 Wɔsaan mu yii No na wohun no siei wɔ Ɔsor Nhyiamu Soronko no mu, ansaana wɔrobɔ asaase yi.12 Bio so, enã a ɔnnkyebo woo No ntsi, Odzi wɔ No dɛ Obowu honandua mu, naaso fi Nyankopɔn, dɛ Egya Ne Ba a Ɔwoo No Kortoo no, Onyaa tum a Ɔdze Nankasa No nkwa bɔto hɔ na nkyii Ɔama do.13 Dza ɔkã ho so no, Christ bɔɔ bra emudzi a, nkekaa biara nnyi ho, na dɛm ntsi, ɔsor pɛrpɛrdzi nnyi No do tum.14 Nkɔnhyɛnyi Joseph Smith kyerɛkyerɛɛ wɔ gyinabew binom dɛ:
“Nkwagye nnkotum aba wiadze mu a Jesus Christ a nngyina ntamu.
“Nyankopɔn … siesie afɔrbɔ wɔ Ɔno ankasa Ne Ba akyɛdze mu, Ɔno a ɔsɛ dɛ wɔsoma No mber pa mu ma … Obue mbobow no a nyimpa botum edua mu akɔ Ewuradze Ne nkyɛn no.”15
Agyenkwa no duaa N’afɔrbɔ no do dze yii honandua no wu no nsunsuando koraa,16 naaso Oennyi hɛn ankorankor asodzi dɛ yebonu hɛnho wɔ bɔn horow a yɛyɛ ho.17 Mbom, Ɔtserɛɛw nsato ɔdɔ mu ara maa hɛn dɛ yɛnye hɛn Onnyiewiei Egya bɔbɔ mu. Ɔnam Jesus Christ mu na No werdam afɔrbɔ no mu no, yebotum enya adwen na akoma mu nsesã kɛse, a obekenyan suban pa wɔ Nyame enyim, na hɛn abrabɔ nyina mu.18 Ber a yenu hɛnho fi hɛn bɔn ho nokwar mu no, yɛdan hɛn akoma na hɛn pɛ ma Nyankopɔn na Ne mbrasɛm no, yebotum enya No bɔnfakyɛ na yɛatse Sunsum Krɔnkrɔn no ne nhyɛdo mbordo. Mbɔbɔrhu mu ara, yekwetsir dɛ amandzehu no a Agyenkwa no sɔɔwee no yebenya ho sũahu a ɔdɔ bun mu19
Nnuho akyɛdze no kyerɛ Nyankopɔn Ne papayɛ a Ɔyɛ ma Ne mba na ɔyɛ No tum a onnyi kãbea a ɔbɔboa hɛn ma yeedzi hɛn bɔn do konyim ho nkyerɛe. Ɔyɛ adanse so wɔ hɛn Egya dɔfo N’abotar na penkyɛr ma hɛn ahoɔmberɛw na hɛn mbrɛwyɛ. President Russell M. Nelson, hɛn nkɔnhyɛnyi dɔfo no, kãa dɛ akyɛdze yi nye “enyigye na akoma mu asomdwee ho saafee.”20
M’anyɛnkofo adɔfo, megye dase dɛ sɛ yenu hɛnho fi hɛn bɔn ho nokwar mu a,21 yɛma Christ no werdam afɔrbɔ no kwan ma odzi dwuma emudzi mu wɔ hɛn abrabɔ mu.22 Bɔn ne nkyehoma nnkenya hɛn, yebenya enyigye wɔ hɛn ɔbra sar do akwantu no mu, na yɛabɛfata dɛ yebenya onnyiewiei nkwagye a, wosiesie fitsi wiadze ne fapem ma obiara a ɔgye Jesus Christ dzi na ɔba Ne nkyɛn. no.23
Dza ɔkã nkwagye akyɛdze a ɔkrɔn yi a Ɔdze ma ho no, Agyenkwa no ma hɛn ahotɔ na awerɛkyekye ber a yehyia atseetsee, nsɔhwɛ, na ɔnnkyebo abrabɔ mu ahoɔmberɛw, a gyinabew a yeedua mu wɔ wiadze nsan yarba a ɔrokɔ do yi kã ho. Mubotum ama hom awerɛhyɛmu dɛ Christ nyim ahohiahia biara a yedua mu wɔ abrabɔ yi mu. Ɔtse ayawdzi, amandzehu, na honandua mu yaw nyina ase nye hɛn nkã-tse na sunsum mu ɔhaw a yehyia no nyina. Ehumbɔbɔr aahyɛ Agyenkwa no n’abadaa mã, na Ɔayɛ krado dɛ daa Ɔbɔboa hɛn. Iyi tum ba osiandɛ Nankasa nyaa ho sũahu na Ɔfaa hɛn mbrɛwyɛ na yarba ne yaw too No honandua do.24
Ɔdze botooyɛ na ahobrɛadze akoma no, Oesian ndzɛmba nyina ase na Ɔapen do dɛ adasa buu no enyimtsia, wɔpoow No, woguu N’enyim ase, wopiraa No wɔ hɛn mbrato na emumuyɛ ho ntsi. Ohun iyinom ho amandze ma obiara, a Ɔfaa wiadze bɔn too Noho do,24 dɛm ntsi Ɔbɛyɛɛ hɛn sunsum n’oduyɛfo tsitsir.
Ber a yɛtwe bɛn No no, yegyaa hɛnho mu hyɛ Ne nsa sunsum no, yebotum afa No kɔndua a, ɔyɛ mberɛw, na N’adzesoa a, ɔyɛ har no ato hɛn do, ama yeenya awerɛkyekye na ahomgye no a wɔabɔ ho anohoba no. Dza ɔkã ho no, yebenya ahoɔdzen a yehia nyina dze edzi nkõdzen, ahoɔmberɛw, na abrabɔ mu awerɛhow do, a nkyɛ ɔyɛ dzen koraa dɛ yɛbɔsɔw a yɛnndze No mboa na ayarsã tum.25 Kyerɛwsɛm no kyerɛ hɛn dɛ “tow w’adzesoa to Ewuradze do, na obosuo wo mu.”26 “Na Nyankopɔn ndua ne Ba no [n’]enyigye do mma [hɛn] adzesoa nyɛ har.”27
Mfeda, afe no rokɔ ewiei no, metsee m’adɔfo awarfo, Mario na Regina Emerick a, wɔsoom Ewuradze nokwar mu dɛ, woetwa mu kɔ wɔ nda anan ara ntamu, ɔnam COVID-19 yarba no ntsi.
Hɔn mbabanyin mu ɔbaako a, sesei ɔrosom dɛ bishop wɔ Brazil no, kãa dza odzi do yi kyerɛɛ me: “Nna ɔyɛ dzen papaapa dɛ mubohu m’awofo dɛ woefi mu wɔ wiadze yi mu wɔ dɛm tsebew no mu, naaso mutumii tsee Ewuradze Ne nsa wɔ m’abrabɔ mu wɔ esian ber no mu, osiandɛ menyaa ahoɔdzen na asomdwee a ɔtraa me ntseasee. Ɔnam me gyedzi wɔ Jesus Christ na No Werdambɔ no mu no, menyaa ɔsor mboa a ɔhyɛɛ emi na m’ebusuafo dzen na ɔkyekyee hɛn werɛ nye hɔn a wɔboa hɛn dɛm mber a ɔyɛ dzen no mu. Anwanwadze a hɛn nyina hɛn enyi da do no ammba dze, naaso meyɛ dasefo wɔ anwanwadze pii binom a wɔaba mankasa m’abrabɔ mu nye m’ebusua mu mba hɔn abrabɔ mu. Metsee asomdwee a ɔhɛɛn m’akoma mu a monnkotum akyerɛ ase, a ɔmaa me enyidado na awerɛhyɛmu wɔ Agyenkwa no dɔ ma me no ho, na wɔ Nyankopɔn n’enyigye nhyehyɛɛ ma Ne mba no ho. Awerɛhow nda kɛse papaapa no mu no, musũaa dɛ Agyenkwa n’adɔyɛ abasa no, daa na Ɔatsen mu, ber a yɛdze hɛn akoma, tum, adwen, na ahoɔdzen nyina hwehwɛ No no.”
Mo nuanom na nkyerɛbaa adɔfo, Easter Kwesida yi, megye me dasee awɔse mu dɛ Jesus soɛree fii ewufo mu na Ɔtse ase. Megye dase kyerɛ hom dɛ ɔnam No mu na No Werdambɔ a ɔmmbɔadze da no do no, Agyenkwa no ama hɛn kwan a yɛdze bedzi owu do konyim, honandua mu na sunsum mu nyina. Bio so dze kã nhyira akɛse yinom ho no, Ɔma hɛn awerɛkyekye na awerɛhyɛmu wɔ mber a ɔyɛ dzen mu. Mema hom awerɛhyɛmu dɛ sɛ yɛdze hɛn werɛ hyɛ Jesus Christ na no werdam afɔrbɔ krɔnkrɔn no mu, na yetsim wɔ hɛn gyedzi mu kodu ewiei a, yebenya enyigye ho anohoba no a hɛn Ɔsor Egya dze abɔ hɛn no, Ɔno a Ɔyɛ biribiara a ɔwɔ No tum mu no, dɛ Ɔbɔboa hɛn ma yɛasan akɔ Ne nkyɛn dabi no. Iyi nye N’edwuma na N’Asɔr!29 Megye dase kyerɛ hom dɛ Jesus nye Christ no, wiadze yi no Pomfo no, Messiah no a wɔbɔɔ ho anohoba no, Owusoɛr na Nkwa no.28 Na menye hom kyɛ nokwar yinom wɔ Ne dzin krɔnkrɔn no mu, Egya Ne Ba a Ɔwoo no Kortoo no, hɛn Ewuradze, Jesus Christ, amen.