Morohom Do Kɔ Botae no Ho
Nnyɛ dza yerudua mu wɔ abrabɔ mu no na ohia dodow, mbom dza yɛreba abayɛ no a.
Sɛ mekenkan Ndwuma nwoma no na Paul no nwoma horow no a, moho boow me wɔ mbrɛ ndaase sii kenyaan Paul ma ɔsomee, ɔkyerɛkyerɛe, na ɔgyee Jesus Christ ho dase Nyimpa a ɔtse dɛm besi dɛn botum dze ɔdɔ na ndaase a ɔtse dɛm asom, tsitsir ara sɛ yɛhwɛ n’amandzehu akɛse no a? Ebɛnadze na okenyaan Paul dɛ ɔnsom? “Mohom do kɔ botae no ho meekenya Nyankopɔn ɔsor frɛ a ɔwɔ Jesus Christ mu no n’empirenyimdze no.’’1
Ibɔhom do akɔ botae no ho nye dɛ ibɔkɔdo nokwar mu ara wɔ “kwan tseaba a no mu nkekãnkekã yi a wɔdze kɔ onnyiewiei nkwa mu yi’’2 a yɛnye hɛn Agyenkwa na hɛn Egya a ɔwɔ Sor. Paul hun n’amandzehu dɛ “[ɔ]nnsɛ dɛ wɔdze to enyimnyam a woribeyi no edzi ama hɛn no ho.”3 Paul no nwoma a ɔdze kɛmaa Philippifo mber a nna ɔwɔ efiadze no yɛ dɛwdzi na enyigye mbordo nwoma, na nkuranhyɛ dze ma hɛn nyina, tsitsir ara wɔ nkõdzen mber yi mu a yennyim dza ɔreba. Hɛn nyina yehia dzenhyɛ fi Paul hɔ: “Meda ho bu ne nyina anhwer wɔ m’Ewuradze Jesus Christ ho nyimdzee kyɛnee no ntsi; ne ntsi so nna midzi nyimdzee nyina ho anhwer, na mubu hɔn dɛ efikyir, na meenya Christ ayɛ mfaso.’’4
Ber a yɛhwɛ Paul no som no, yenya nkenyan na ntowdo dɛ hɛnankasa nda mu “Paulfo’’, a hɔn so wɔdze ɔdɔ na ndaase som, kyerɛkyerɛ, na wɔgyee dase wɔ ɔhaw a wohyia wɔ hɔn abrabɔ mu na hɔn adɔfo hɔn abrabɔ mu no. Sũahu bi a menyaa no mfe akron a abasen kɔ no boaa me ma muhun erohom do akɔ botae no ho no, hia a ohia.
Afe 2012 mu, ber a odzi kan a mokɔr wiadze mfɛndzanan ehyiadzi banodzifo nhyiamu no, ɔtɔɔ mo do na muhun dɛ motɔ sin. Nna ndze bi rowɔw do wɔ m’adwen mu dɛ, “Mmfata ha! Ɔayɛ mfomdo kɛse!’’ Ber ara nna merenantsew abɔ mbɔdzen ahwehwɛ beebi atsena no, na Elder Jeffrey R. Holland hun me. Ɔbaa me nkyɛn na ɔkãa dɛ, “Edward, ɔyɛ ahomka dɛ meehu wo ha,’’ na bɔkɔɔ mu ara ɔdze ne nsa fefaa m’enyim. Minyaa atsenkã dɛ mayɛ abɔdomaba! Ɔdɔ a ɔdze fuaa me no maa minyaa ahomka, na ɔboaa me ma metsee koryɛ sunsum, na onuadɔ sunsum no. Adzekyee no, muhun Elder Holland dɛ ma ɔdze yɛɛ me ndeda no, ɔdze ne nsa afefa Elder Dallin H. Oaks, a ɔyɛ ne panyin no, n’enyim anyɛnkoyɛ mu!
Dɛm mber mu no na modua mbarimba yinom a yɛma hɔn tsipia dɛ nkɔnhyɛfo, adzehufo, na nyikyerɛfo do tsee Ewuradze no dɔ nkã. Elder Holland, nam n’ayamuyie, awosu ndzeyɛɛ do, boaa me ma mehyɛɛ me pɛsɛankonyasu na me sintɔ nkã-tse do. Ɔboaa me ma mitsimii wɔ edwuma a ɔyɛ krɔnkrɔn na dɛwdzi a ɔafrɛ me wɔ ho no—dɛ memfa akra mbrɛ Christ hɔ. Ɔno, tse dɛ tsetse Paul no, kyerɛɛ me dɛ monhom nkɔ botae no ho.
Ahomka mu ara, Paul rutu hɛn fo dɛ yɛmper nkɔ kan, ber a ɔrefrɛ hɛn dɛ hɛn werɛ mfir dza wɔapa ho no—hɛn suro a woetwa mu kɔ, dza yetsimii do a woetwa mu kɔ, hɛn nkogu a woetwa mu kɔ, na hɛn awerɛhow a woetwa mu kɔ. Ɔtse dɛmara dɛ ndɛ hɛn nkɔnhyɛnyi dɔfo,, President Russell M. Nelson, roto nsa frɛ hɛn, kɔ “kwan fofor, a ɔkrɔn mu.’’5 Agyenkwa n’anohoba yɛ nokwar: “Na obiara a ɔpɛ dɛ ɔgye no nkwa no, ɔbɛyew no: na obiara a emi ntsi ɔbɛyew no nkwa no, obohu.’’6
Me wiadze mfɛndzanan ehyiadzi a odzi kan kasaa mu no, me kãa me maame a nna ɔrekyerɛkyerɛ me ma maayɛ edwuma wɔ hɛn kwã mu sũahu ho asɛm. Ɔkãa dɛ, “Mma nnhwɛ w’ekyir dabiarada.” “Hwɛ kan wɔ dza yɛda ho wɔyɛ ho.’’7
Ɔrokɔ n’abrabɔ n’ewiei no, mber a nna kokoram yarba nye no ridzi ako no, nna ɔnye emi na Naume tse. Anafua da kor bi metsee dɛ orusũ kɛse wɔ ne pia mu. Nna ne yaw n’ano yɛ dzen dodow, mpo a nna ɔafa ne morphine edur a odzi ewiei bɛyɛ dɔnhwer ebien pɛr a nna ɔnnkyɛree.
Mehɛn ne pia mu na menye no sũi. Mubue m’ano bɔɔ mpaa ma no dɛ hɔnara obenya ahom efi ne yaw mu. Na afei ɔyɛɛ dɛm adze noara a ɔyɛɛ no wɔ kwã mu mfe pii a abasen kɔ no na ɔkyerɛɛ me adzesuadze bi. N’enyim nnkefi m’enyim wɔ dɛm mber no mu da a: nna ɔayɛ mberɛw, yarba ahaw no, na yaw ahyɛ no mã, a ɔdze mbɔbɔrhu rohwɛ ne babanyin a oridzi awerɛhow. Ɔyerɛɛw n’ano wɔ n’enyisuwa no mu, hwɛɛ m’enyiwa mu tseen, na ɔkãa dɛ, “Ɔnnyɛ ɔwo anaa obiara n’asɛm, mbom ɔyɛ Nyankopɔn n’asɛm sɛ yaw no bɔkɔ anaa ɔnnkɔkɔ.’’
Metsena ase dzinn. Ɔno so tsena ase dzinn. Dza osii ho mfonyin no aka m’adwen mu pefee. Dɛm anafua no, Ewuradze dua me maame do, kyerɛkyerɛɛ me adzesuadze bi a ɔbɛka moho afebɔɔ. Ber a me maame kyerɛɛ dɛ ɔagye Nyankopɔn ne pɛ ato mu no, mekaa Jesus Christ n’amandzehu wɔ Gethsemane ture no mu na wɔ Golgotha mbeamudua no do. Ɔkãa dɛ: “Hwɛ medze m’asɛmpa no ama hom, na iyi nye asɛmpa a medze ama hom no—dɛ mebaa wiadze bɛyɛɛ m’Egya ne pɛ, osiandɛ m’Egya na ɔsomaa me.’’8
Modwendwen hɛn nkɔnhyɛnyi dɔfo, President Nelson no nkɔnhyɛsɛm nsɛmbisa ma hɛn wɔ ndansa wiadze mfɛndzanan ehyiadzi ho no. President Nelson bisaa dɛ: “Ana ipɛ dɛ ema Nyankopɔn dzi nyim wɔ w’abrabɔ mu? Ana ipɛ dɛ ema Nyankopɔn yɛ nhyɛdo tum abɔsõ wɔ w’abrabɔ mu? Ebɛma Ne ndze kwan … ma ɔabor biribiara do? Ana ipɛ dɛ ema wo pɛ kɛhyɛ Ne dze mu?’’9 Nkyɛ me maame dze ahopopo na “nyew’’ a ɔyɛ dzen beyi ano, na Asɔr no mu mba anokwafo binom a wɔwɔ wiadze nyina mu so dze ahopopo a ɔyɛ dzen beyi ano dɛ “nyew.’’ President Nelson, yɛda wo ase dɛ edze nkɔnhyɛsɛm nsɛmbisa yinom dze kenyanee na ipegyaa hɛn.
Ɔnnkyɛree na menye bishop bi a osiee ne yer na ne babasia panyin da kor noara dzii nkɔmbɔ wɔ Pretoria, South Africa. Coronavirus wiadze nsan yarba yi ara na oyii hɔn nkwa fii hɔ. Mibisaa no dɛ ɔtse no dɛn. Bishop Teddy Thabethe no mbuae no maa misii mo bo dɛ mibedzi Ewuradze ne nsɛm na n’afotu a ɔdze dua no nkɔnhyɛfo, adzehufo, na nyikyerɛfo do no do. Bishop Thabethe buae dɛ enyidado na awerɛkyekyer wɔ hɔ daa dɛ ibohu dɛ Agyenkwa no afa No nkorɔfo hɔn yaw ato No do, ama Oetum ehu mbrɛ Obesi bɔboa hɛn.10 Ɔdze gyedzi a no mu dɔ gyee dase dɛ, “Meda ase wɔ nkwagye ho nhyehyɛɛ, no, enyigye ho nhyehyɛɛ no.’’ Afei obisaa me asɛmbisa bi dɛ, “Ana nnyɛ iyi nye dza nna hɛn nkɔnhyɛnyi no robɔ mbɔdzen akyerɛkyerɛ hɛn wɔ ndaansa wiadze mfɛndzanan ehyiadzi yi bi?
Ber a ɔnnkyebo asetsena ɔhaw bɛba hɛn nyinara do wɔ kwan bi mu no, hom ma yentsim wɔ hɛn botae no “[yɛro]hom akɔ botae no ho,’’ do a ɔyɛ “Nyankopɔn ɔsor frɛ n’empirenyimdze.’’11
M’ahobrɛadze nsato ma hɛn nyinara nye dɛ mma yɛmmpa aba da! Wɔfrɛ hɛn dɛ “hom mma yɛmfa dza osiw kwan nyina nto nkyɛn, nye bɔn a ɔnnkyɛr na ɔatoto hɛn ananmu no, na yɛmfa abotar ntutu empire a osi hɛn enyim no mu mbirika, nhwɛ gyedzi ne dzikamfo nye no wiefo Jesus.’’12
Nnyɛ dza yerudua mu wɔ abrabɔ mu no na ohia dodow, mbom dza yɛreba abayɛ no a. Enyigye wɔ erohom akɔ botae no ho mu. Megye dase dɛ Ɔno a odzi adze nyinara do no bɔboa hɛn sɛ yɛdan No a. Jesus Christ ne dzin mu, amen.