Ebɛnadze na Hɛn Agyenkwa Ayɛ ama Hɛn?
Jesus Christ ayɛ biribiara a ohia kɛse wɔ hɛn ɔnnkyebo akwantu yi mu dze kɔ nkrabea a wɔahyehyɛ ama hɛn wɔ hɛn Ɔsor Egya ne nhyehyɛɛ mu.
Memenda ewimbir wɔ stake ehyiadzi bi ase mfe pii a abɛsen kɔ no, mihyiaa ɔbaa bi a ɔkãa dɛ n’anyɛnkofo akã akyerɛ no dɛ ɔsan mbra asɔr mfe pii ekyir a ɔmmbɔ hyew wɔ asɔr dwumadzi mu, naaso onntum nndwen siantsir biara a ɔwɔ dɛ ɔsan ba. Ama maahyɛ no nkuran no, mekãa dɛ, “Sɛ isusu ndzɛmba nyina a Agyenkwa no ayɛ ama wo a, ibenya siantsir pii a ibɛsan bɛba abɔsɔr na asom No.” Moho boow me ber a obuaa dɛ, “Ebɛnadze na Ɔayɛ ama me?”
Ebɛnadze na Jesus Christ ayɛ ama hɛn mu kor biara? Ɔayɛ biribiara a ohia kɛse wɔ hɛn ɔnnkyebo akwantu yi mu dze kɔ nkrabea a wɔahyehyɛ ama hɛn wɔ hɛn Ɔsor Egya ne nhyehyɛɛ mu. Mebɛkasa afa dɛm nhyehyɛɛ no botae tsitsir anan ho. Kor biara mu no No Dɔ Ba a Ɔwoo no Kortonoo nye no kotowdo-bo no. Dza ɔhyɛ iyi nyina nkuran no nye “Nyame no dɔ no a ɔhɛnhɛn adasamba akoma mu no; dɛm ntsi ɔyɛ adze pa a ɔsom bo kyɛn adze nyinara” (1 Nephi 11:22).
I.
Ɔka kakra ara ma Easter Kwesida asõ no, ɔyɛ mber pa dɛ yebedzi kan akasa afa Jesus Christ no Wusoɛr no ho. Wusoɛr no yɛ dza osi hɛn ankorkor gyedzi ne fapem no pi. Ɔdze asekyerɛ ma hɛn nkyerɛkyerɛ, okenyan hɛn suban, na ɔma enyidado ma hɛn ndaamba.
Osiandɛ yɛgye dza Bible na Mormon Nwoma no akyerɛw afa Jesus Christ no Wusoɛr ampaara ho no dzi no, yɛgye kyerɛwsɛm no mu nkyerɛkyerɛ horow so dzi dɛ adasamba nyina a wɔatsena asaase yi do pɛn no, benya dɛm wusoɛr noara bi.1 Dɛ mbrɛ Jesus kyerɛkyerɛɛ no, “Osiandɛ metse ase yi, hom so bɛtsena ase” (John 14:19). Na N’Asomafo no kyerɛkyerɛɛ dɛ “na ewufo benyan a wɔmmprɔw da” na “sɛ dza ɔprɔw yi nya hyɛ dza ɔmmprɔw” (1 Corinthians 15:52, 54).
Mbom Wusoɛr no ma hɛn dza ɔbor bɛkyebo ho taduasi yi. Ɔsesã kwan a yɛdze hwɛ ɔnnkyebo abrabɔ yi.
Wusoɛr no ma hɛn nhumu na ahoɔdzen a yɛdze bɔsɔw ɔnnkyebo abrabɔ mu ɔhaw horow a hɛn mu kor biara na hɔn a yɛdɔ hɔn no behyia. Ɔma hɛn kwan fofor a yɛdze bɔhwɛ honandua mu, adwen mu, anaa nkã-tse mu esintɔ horow a wɔdze woo hɛn anaa yebenyaa no wɔ abrabɔ yi mu. Ɔma hɛn ahoɔdzen ma yɛdze sɔw awerɛhow, nkõgu, na abagura horow. Osiandɛ hɛn mu kor biara benya wusoɛr no ntsi, yenyim dɛ abrabɔ yi mu esintɔ na dza wɔkõ tsia no nyina yɛ mber tsiabaa mu ara.
Wusoɛr no so ma hɛn nkamfo a ɔyɛ ndam dɛ yebesie Nyankopɔn ne mbrasɛm wɔ hɛn ɔnnkyebo abrabɔ yi mu. Sɛ yɛsoɛr fi ewufo mu na yɛkɔ hɛn Atsɛmbu a Odzi Ewiei a wɔahyɛ ho nkɔm no a, yɛbɛpɛ dɛ yɛbɛfata nhyira horow a ɔkrɔn a wɔdze abɔ abɔdze horow a woewu na wɔasoɛr no anohoba no.2
Dza ɔkã ho no, dɛ kwan da hɔ dɛ yebotum nye hɛn ebusua mu mba—kun, yer, mba, awofo, na ewuakɔr atsena no kã Wusoɛr anohoba no ho no—yɛ nkuranhyɛ a ɔyɛ ndam dɛ yɛbɛhyɛ hɛn ɔnnkyebo abrabɔ mu ebusua asodzi no mã. Ɔboa hɛn so ma yɛdze ɔdɔ bɔmu tsena ase wɔ abrabɔ yi mu, na ɔyɛ awerɛkyekyer ma hɛn wɔ hɛn dɔfo no wu mu. Yenyim dɛ ɔnnkyebo mpapaamu yi yɛ mber kumabaa na yɛwɔ enyidado wɔ enyigye nkabɔmu na nkitahodzi horow ho. Wusoɛr no ma hɛn enyidado na ahoɔdzen dɛ yebenya abotar ber a yerotweɔn no. Ɔboa hɛn so ma yɛdze akokodur na enyidzi hyia hɛnankasa hɛn wu—owu mpo a yɛbɛkã no dɛ wɔaba ntsɛm dodow.
Wusoɛr no nsunsuando yinom nyina kã nyiano a odzi kan wɔ asɛmbisa dɛ “Ebɛnadze na Jesus Christ ayɛ ama me?”
II
Hɛn mu dodowara no, kwan a yenya dɛ wɔdze hɛn bɔn horow bɛkyɛ hɛn no nye Jesus Christ No Werdambɔ no n’asekyerɛ tsitsir. Yɛrosɔr a, yɛtow ndwom yi obu mu ara:
No bɔgya a ɔsombo no okyii guu kwa;
Ɔdze no nkwa maa kwa,
Tsenenee afɔrbɔ a wɔdze ma bɔn,
Dze gyee wiadze a oruwu no nkwa.3
Hɛn Agyenkwa na Pomfo no sɔɔw amandzehu a yennkotum atse ase dze bɛyɛɛ afɔrbɔ ama adasamba nyina a wonu hɔnho no hɔn bɔn. Werdam afɔrbɔ yi dze papa mu dza ɔyɛ abɔsõ koraa no, eguambaa no a dzɛm nye nkekaa nnyi no ho, maa ɔbɔn mu bɔn kɛse koraa no, wiadze nyina bɔn no. Obue abow no maa hɛn mu kor biara ama hɛnho atsew efi hɛnankasa hɛn bɔn ho ama wɔaasan aagye hɛn bio aakɔ Nyankopɔn, hɛn Onnyiewiei Egya no n’enyim. Abow a woebue yi ɔwɔ hɔ ma Nyankopɔn ne mba nyina. Yɛrosɔr a yɛtow ndwom:
Ɔyɛ me ahobow dɛ osianee fii n’ahengua do
Begyee ɔkra kɔbesaenyi a ɔtse dɛ emi,
Ɔama no dɔ kɛse aso emi dɛm yi so do.4
Jesus Christ No Werdambɔ no nsunsuando nwanwa a yenntum nntse ase no gyina Nyankopɔn no dɔ a ɔwɔ ma hɛn mu kor biara no. Osi no pi wɔ Ne mpaamukã dɛ “dɛ akra som bo”—obiara dze—yɛ “kɛse wɔ Nyame enyim” (Nkyerɛkyerɛ na Ahyɛmudzi 18;10 Bible mu no, hɛn Jesus Christ kyerɛkyerɛɛ iyi mu wɔ hɛn Ɔsor Egya no dɔ mu dɛ: “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor mae, ama obiara a ɔgye no dzi no ɔaannhera, na oeenya onnyiewiei nkwa” (John 3:16 Ndɛ nyikyerɛ mu no, hɛn Pomfo, Jesus Christ, akã dɛ Ɔno “ɔdɔɔ wiadze no a ɔdze nankasa no nkwa too hɔ, ama dodowara a wɔbɛgye no edzi no abɛyɛ Nyame ne mba” (Nkyerɛkyerɛ na Ahyɛmudzi 34:3).
Ana ɔyɛ nwanwa, nkyii, dɛ Mormon Nwoma no: Jesus Christ N’Ahyɛmu Kor So no dze nkyerɛkyerɛ yi wie dɛ ama “yeedzi mu” na “yɛatsew hɛnho wɔ Christ mu no” otwar dɛ yɛdze [hɛn] ahom nye [hɛn] adwen nye [hɛn] ahoɔdzen nyina dɔ Nyankopɔn”?(Moroni 10:32–33). Ne nhyehyɛɛ no ɔdɔ na okenyanee na otwar dɛ wɔdze ɔdɔ gye.
III.
Ebɛnadze bio na hɛn Agyenkwa, Jesus Christ, ayɛ ama hɛn? Ɔnam No nkɔnhyɛfo hɔn nkyerɛkyerɛ do na ɔnam Ɔno ankasa no som dwuma do no, Jesus kyerɛkyerɛɛ hɛn nkwagye ho nhyehyɛɛ no. Nhyehyɛɛ yi Wiadze no Mbɔe, abrabɔ no botae, dza otsia ho hia a ohia, na nyimpa ne pɛ akyɛdze, kã ho. Ɔkyerɛkyerɛɛ hɛn so mbrasɛm na ahyɛmu a otwar dɛ yɛyɛ setsie na ayɛdze horow a otwar dɛ yenya mu sũahu a ɔdze hɛn bɛsan akɔ hɛn sor awofo nkyɛn.
Bible mu no yɛkenkan ne nkyerɛkyerɛ dɛ: “Emi nye wiadze kan no: nyia odzi m’ekyir no rennantsew sum mu, na obenya nkwa kan no.”(John 8:12 Na wɔ ndɛ nyikyerɛ mu no yɛkenkan dɛ, “Hwɛ, … emi nye Jesus Christ, … kan a sum nnkotum akata do” (Nkyerɛkyerɛ na Ahyɛmudzi 14:9). Sɛ yedzi Ne nkyerɛkyerɛ do a, Ɔma hɛn abrabɔ mu anamɔn kwan mu yɛ kan na Ɔma hɛn nkrabea wɔ dza odzi do mu no ho awerɛhyɛmu.
Osiandɛ ɔdɔ hɛn ntsi, Ɔto nsa frɛ hɛn dɛ yentsim wɔ No do, nnyɛ wɔ ɔnnkyebo wiadze yi mu ndzɛmba do. N’asɛnkã wɔ nkwa paanoo ho a wɔayɛ atsenkã no, Jesus kyerɛkyerɛɛ dɛ onnyi dɛ yɛkã nkorɔfo no a wiadze mu ndzɛmba twetwe hɔn kɛse no ho—ndzɛmba a ɔma nkwa wɔ asaase do naaso onnyi edziban biara mma onnyiewiei nkwa.5 Na Jesus to nsa frɛ frɛ hɛn, bio, na bio, na bio dɛ, “Hom nka mo do.”6
IV.
Ewiei no, Mormon Nwoma ne kyerɛkyerɛ dɛ dza ɔkã Jesus Christ No Werdambɔ ho no “oehu amandze na obenya nsɔhwɛ ahorow biara bi; na iyi bɛma asɛm no aahyɛ mã, dza ɔkã dɛ, na ɔbɛfa no nkorɔfo hɔn yaw nye yarba ato noho do” (Alma 7:11).
Ebɛnadze ntsi na hɛn Agyenkwa hun amandze wɔ dɛm nkwa nda mu ɔhaw “ahorow biara yi”? Alma kyerɛkyerɛɛ mu dɛ: “Na ɔbɛfa hɔn mberɛwyɛ ato no do, ama ehumbɔbɔr aahyɛ n’abadaa mã dɛ mbrɛ ɔtse wɔ honam mu, ama ɔnam honam mu, eehu mbrɛ obesi aboa no nkorɔfo dɛ mbrɛ hɔn mberɛwyɛ tse no” (Alma 7:11–12).
Hɛn Agyenkwa tse na onyim hɛn nsɔhwɛ, hɛn aperdzi, hɛn akoma mu yaw, na hɛn amandzehu horow, osiandɛ ɔpɛ mu ara Ɔfaa dɛm sũahu yi nyina mu dɛ ɔkã No Werdambɔ no ho. Kyerɛwsɛm binom si iyi pi. Ahyɛmu Fofor no paa mu kã dɛ, “wɔsɔɔ no hwɛe ma nankasa so hun amandze ntsi, otum boa hɔn a wɔsɔ hɔn hwɛ no.” (Hebrewfo 2:18). Isaiah kyerɛkyerɛ dɛ, “Mma nnsuro; na menye wo nam: … Mebɛhyɛ wo dzen; nyew mobɔboa wo” (Isaiah 41:10). Hɔn a wohu amandze wɔ ɔnnkyebo abrabɔ mu mbrɛwyɛ horow yi, ɔwɔ dɛ wɔkae dɛ hɛn Agyenkwa so nyaa dɛm yaw yi bi ma ɔnam No Werdambɔ no do, Ɔma hɛn ahoɔdzen ma yetum dze gyina ano.
Nkɔnhyɛnyi Joseph Smith twaa ne nyina tsia wɔ hɛn gyedzi ho nsɛmpɔw a otsĩa ebiasa no mu: “Yɛgye dzi dɛ ɔnam Christ no Werdambɔ do adasamba nyinara botum enya nkwa, ber a wɔyɛ setsie ma mbra no na asɛmpa n’ayɛdze no.”
“Ebɛnadze na Jesus Christ ayɛ ama me?” a akyerɛbaa no bisae no. Ɔnam hɛn Ɔsor Egya ne nhyehyɛɛ do no, “Ɔbɔɔ ɔsorsor nye asaase” (Nkyerɛkyerɛ na Ahyɛmudzi 14:9) ama hɛn mu kor biara eetum eenya ɔnnkyebo sũahu a yehia dze ahwehwɛ hɛn nkrabea krɔnkrɔn no. Dɛ ɔkã Egya no ne nhyehyɛɛ ho no, Jesus Christ no Wusoɛr no dzii owu do konyim dze maa hɛn mu kor biara bɛkyebo asetsena ho awerɛhyɛmu. Jesus Christ no werdam afɔrbɔ no ma hɛn mu kor biara kwan dɛ yebonu hɛnho efi hɛn bɔn ho na yɛasan krɔngyenn akɔ hɛn ɔsor fie. Ne mbrasɛm na ahyɛmudzi horow no kyerɛ hɛn kwan no, na N’asɔfodzi no ma hɛn tumdzi a yɛdze yɛ ayɛdze horow no a ohia ara yie ma yeedu dɛm nkrabea no. Na ɔpɛ mu ara na hɛn Agyenkwa hun adasa nyina hɔn yaw na mbrɛwyɛ ama oehu mbrɛ Obesi ahyɛ hɛn dzen wɔ hɛn amandzehu horow mu.
Jesus Christ yɛɛ iyi nyina osiandɛ Ɔdɔ Nyankopɔn ne mba nyina. Ɔdɔ na okenyaan iyi nyina, na dɛm nna ɔtse fi ahyɛse noara. Nyankopɔn akã akyerɛ hɛn wɔ ndɛ nyikyerɛ mu dɛ “ɔbɔɔ nyimpa … ɔbanyin nye ɔbaa, wɔ nankasa no su … ; do na ɔmaa hɔn mbrasɛm dɛ wɔndɔ no na wɔnsom no” (Nkyerɛkyerɛ na Ahyɛmudzi 20:18–19).
Megye iyi nyina ho dase na mobɔ mpaa dɛ hɛn nyina bɛkaa dza hɛn Agyenkwa ayɛ ama hɛn mu kor biara na dɛ hɛn nyina bɔdɔ na yɛasom No, wɔ Jesus Christ dzin mu, amen.