Hɛn Mber Nye Iyi!
Nyankopɔn dze hɛn aba ha pɛɛ, seseiara, wɔ abakɔsɛm ne mber tsitsir a ohia mu.
Afe 1978 mu no, nna megyina fuutbɔɔl prama do a nna nyimpa 65,000 ahyɛ hɔ mã twem. M’enyim no nna mpiresifo akɔbran pii a nna wɔyɛ dɛ wɔpɛ atsew me tsir efi do gyinagyina hɔ. Nna ɔno nye m’akansi a odzi kan dɛ mehyɛɛ ase dɛ quarterback wɔ National Football League mu, na nna yɛnye mfeda Super Bowl konyimdzifo no risi akan. Nokwar, mibisaa moho dɛ ana mawea ara yie a mubotum esi akan. Mifii kyerɛpɛn no ekyir dɛ morotow bɔɔl no, na ber a bɔɔl no fii me nsamu ara no, wɔbɔɔ me dzedzenndzen kyɛn ma wɔabɔ me da. Dɛm mber mu no, a nna agodzifo akɛsefo pii gu mo do no, nna morodwendwen dza mereyɛ no hɔ. Na mowɔ adwenpɔw bɔ. Ana mebɛma m’ekyingye ahyɛ mo do, anaa mobɔhwehwɛ akokodur na ahoɔdzen dze asoɛr na makɔ do?
Associated Dawurbɔ Edwuma
Hɔ no mennhu mbrɛ sũahu yi botum esiesie me ama ndaamba akwan pa horow a ɔbɛba. Nna ohia dɛ musũa dɛ mebɛhyɛ dzen na meenya akokodur dze ehyia nkõdzen gyinabew horow.
Obotum ayɛ dɛ fuutbɔɔl agodzi ho nnkehia biara tse dɛ ɔhaw pii a ibehyia. Akwan dodow mu no, ɔrennyɛ dɛ prama do a nyimpa ahyɛ hɔ mã rohwɛ wo. Naaso w’akokodur adwenpɔwbɔ no benya onnyiewiei nsunsuando.
Ebia nnyɛ daa na ibotum egyina ɔhaw n’ano. Mbom hɛn Ɔsor Egya hu hɛn dɛ N’ahenman ne sifo ɔkokordurfo Dɛm ntsi na Ɔdze hɛn baa ha wɔ mber tsitsir a ohia mu wɔ wiadze abakɔsɛm mu. Hɛn Mber Nye Iyi!
Tsie dza President Russell M. Nelson kãe mber tsiabaa ekyir no a ɔbɛyɛ Asɔr no ne President: “Jesus Christ, hɛn Agyenkwa na Pomfo, bɛyɛ N’edwuma kokroko binom sesei kesi ber a Ɔbɛba bio no. Yebohu anwanwadze horow a ɔkyerɛ dɛ Nyankopɔn Egya no na Ne Ba, Jesus Christ, na wɔhwɛ Asɔr yi do wɔ tum na enyimnyam mu’’ (“Revelation for the Church, Revelation for Our Lives,” Liahona,” Esusow Aketseaba 2018, 96).
Edwuma kokroko? Awanwadze akyerɛdze horow? Hɔn hwɛbea bɛtse dɛn? Ebɛn asɛdze na yɛbɛyɛ, na yebesi dɛn bɛtse dza yɛbɛyɛ ase? Minnyim nyiano ne nyinara, mbom minyim dɛ Ewuradze hia hɛn ma yɛayɛ krado! Edze asɔfodzi tum no ridzi dwuma emudzi mu no ho hia tsistir dodow ndɛ kyɛn ber biara.
Ana yɛgye Nyankopɔn no nkɔnhyɛnyi dzi? Ana yebotum ehu hɛn hyɛbea na yɛahyɛ no mã? Nyew yebotum, na nyew otwar dɛ yɛyɛ, osiandɛ hɛn mber nye iyi!
Sɛ yɛtse Nyankopɔn n’asomfo etumfo a wodzii hɛn kan bae ho nsɛm—tse dɛ Moses, Mary, Moroni, Alma, Esther, Joseph, na beberee so a—wɔyɛ dɛ ekunyin ankasa wɔ abrabɔ yi mu. Naaso ɔnnson hɛn na hɔn biara. Nna wɔyɛ nkorɔfo a wohyiaa nkõdzen, Wonyaa awerɛhyɛmu wɔ Ewuradze mu. Wɔyɛɛ nsanmuyi horow a ɔtsen wɔ mber tsitsir mu. Na, wɔdze gyedzi wɔ Jesus Christ mu no, wɔyɛɛ ndwuma a nna wohia dɛ wɔyɛ wɔ hɔn mber mu.
Nkyen Pa
Hom nhwɛ Ahyɛmu Dadaw mu okunyin Joshua. Nna ɔyɛ Moses n’edziekyirnyi nokwafo, baanodzifo akɛsefo no hɔn mu kor wɔ abakɔsɛm mu. Moses fii hɔ ekyir no, na ɔyɛ Joshua ne mber. Nna ɔwɔ dɛ odzi Israelmba kan kɔ anohoba asaase no do. Obesi dɛn ayɛ dɛm? Wɔwoo Joshua na wɔnyɛɛn no wɔ nkowaasom mu wɔ Egypt. Nna onnyi buukuw anaa nkyerɛkyerɛɛ video biara a ɔbɔboa no. Nna onnyi smartfoon mpo! Mbom onyaa anohoba yi fi Ewuradze hɔ:
“Dɛ mbrɛ midzii Moses ekyir no, dɛmara so na mibedzi w’ekyir: meremmpa wo, morommpow wo so.
“Hyɛ dzen na nya akokodur’’ (Joshua 1:5–6).
Mber a nna meyɛ Eduosuon fofor na minnyim hwee no, menyaa foon ɔfrɛ mpofirmu bi fi President a Odzi Kan na n’Apamfo hɔn Ɔfese, a ɔrese dɛ sɛ ana mubotum egyina nkɔnhyɛnyi n’ananmu akɔhwɛ aberantsɛba bi wɔ asopitsi—ntsɛmara a. Nna aberantsɛba no ne dzin dze Zach. Nna ɔreyɛ ahoboa abɛyɛ asɛmpasomafo na onyaa akwanhyia na opira kɛsenara wɔ ne tsir.
Ber a nna merekã kaar akɔ asopitsi no, nna m’adwen mu ruhur. Erokɔ ɔsoma ama nkɔnhyɛnyi no—ampaara anaa iridzi agor? Ebɛnadze na merekehyia? Mibesi dɛn bɔboa aberantsɛba yi? Ana me gyedzi dɔɔ sõ? Mpaabɔ dzendzen na nyimdzee dɛ mowɔ asɔfodzi krɔnkrɔn no tumdzi no bɛyɛɛ me sekyɛ.
Mber a mukodurii no, nna Zach da asopitsi mpa do. Nna edwumafo no bi ayɛ krado dɛ obepia no ntsɛmara dze no akɔ ɔprehyɛn dan no mu ama adatserfo eetum eyi ɔhaw a ɔda n’adwen do no. Mohwɛɛ ne maame a nyinsuwa egura no na ne nyɛnko kakraba a suro aka no a ogyina nkyɛn hɔ, na muhun no pefee dɛ Zach hia asɔfodzi nhyira. Ne nyɛnko no nyaa Melchizedek Asɔfodzi no ɔnnkyɛree, ntsi meserɛɛ no dɛ ɔmboa me. Metsee asɔfodzi no tum nkã ber a ahobrɛadze mu ara yɛmaa Zach nhyira. Afei ɔhar mu ara wɔdze no kɔr ɔprehyɛn bea no, na asomdwee nkã-tse sii no pi dɛ Agyenkwa no bɛyɛ ndzɛmba dɛ mbrɛ Ne nyansaa tse.
Adatserfo no twaa X-ray mfonyin kor a odzi ewiei ansaana woedzi kan apae. Ahobow mu ara, wohun dɛ, ɔprehyɛn biara nnkehia.
Eduryɛ ara yie ekyir no, Zach sũasũaa nantsew na kasa bio. Ɔsoom asɛmpakã dwuma konyimdzi mu na sesei ɔawar wɔ ebusua fɛɛfɛw.
Nokwar, nsunsuando no nnyɛ dɛm daa. Medze gyedzi pɛpɛɛpɛr ama asɔfodzi nhyira bi so, na Ewuradze amma ayarsa kwan wɔ abrabɔ yi mu. Yɛwɔ awerɛhyɛmu wɔ No botae horow mu na yegya nsunsuando no ma No. Yennkotum daa daa yɛasan mu eyi hɛn ndzeyɛɛ no nsunsuando, mbom yebotum asan mu eyi dɛ yɛbɛyɛ krado edzi dwuma.
Bia wɔnkɛse wo dabiara da dɛ kegyina President a Odzi Kan na n’Apamfo hɔn ananmu wɔ owu na nkwa gyinabew mu. Naaso wɔafrɛ hɛn nyina dɛ yɛyɛ Ewuradze n’ananmugyinafo dɛ yɛnyɛ abrabɔ mu nsesã ndzɛmba. Ɔrommpow hɛn. Hɛn mber nye iyi!
Nna Peter, Agyenkwa no Ɔsomafo tsitsir tsena hɛmba mu wɔ po do ber a ohun dɛ Jesus renantsew nsu do. Nna ɔpɛ dɛ ɔkã No ho, na Agyenkwa kãa dɛ, “Bra.’’ Akokodur mu ara, na awanwadze mu ara, Peter fii hɛn no n’ahotɔ mu sii na ɔhyɛɛ ase dɛ ɔrenantsew akɔ Agyenkwa ne nkyɛn. Naaso Peter dze n’enyiwa tsiim mframa dzendzenndzen do no, ne gyedzi hihimii. Nna osuro, na ɔhyɛɛ ase rodɔ no, ɔkaa mu dɛ, Ewuradze, gye me. Na ntsɛmara Jesus too ne nsa suoo no mu’’ (Hwɛ Matthew 14:22–33.)
Sɛ mframa bɔ wɔ hɛn abrabɔ mu, henfa na hɛn enyiwa tsim? Kaa dɛ, ahoɔdzen na akokodur no nokwar farbaa kor no wɔ hɔ daa. Jesus n’abasa atserɛw wɔ hɛn do, dɛmara dɛ wɔtserɛɛw kɔr Peter do. Sɛ yɛfrɛ No a, ɔdɔ mu ara Ɔbɛgye hɛn nkwa. Yɛyɛ Ne dze. Ɔkãa dɛ, “Mma nnsuro: na mapon wo, mabɔ wo dzin afrɛ wo; eyɛ medze’’ (Isaiah 43:1). Sɛ ema No kwan a, Obedzi nyim wɔ w’abrabɔ mu. Nsanmu yi no yɛ wo dze! Hwɛ Russell M. Nelson, “Let God Prevail,’’ Liahona, Ɔberɛfɛw 2020, 92–95.)
Joshua n’abrabɔ n’ewiei no, ɔtotɔe serɛɛ no nkorɔfo dɛ, “Ndɛ da yi hom nsan mu nyi nyia hom bɔsom no;… na emi nye me fi dze, yɛbɔsom Ewuradze.’’(Joshua 24:15). Osian nsanmuyi horow a ɔyɛe dɛ ɔbɔsom Ewuradze no ntsi, Joshua bɛyɛɛ baanodzinyi kɛse wɔ ne mber mu. M’anyɛnkofo adɔfo, hɛn mber nye iyi! Na hɛn nsanmuyi horow na ɔbɛkyerɛ hɛn hyɛbea (hwɛ Thomas S. Monson, “Decisions Determine Destiny’’[Brigham Young University fireside, Ɔberɛfɛw 6, 2005], speeches.byu.edu).
Mber a nna morosom dɛ bishop no, nna yɛwɔ kasasin bi wɔ hɛn ward dɛ: Nsanmuyi horow pa dze enyigye ba—daapem. Mbabun no sen mo ho wɔ pia mu hɔ a wɔkã dɛ, “Bishop mereyɛ nsanmuyi horow pa!’’ Bishop n’enyidar nye no!
“Nsanmuyi horow pa n’asekyerɛ nye dɛn? Obi bisaa Jesus mber bi dɛ, “Mbra no mu asɛnkɛse nye mmuana?” Obuaa dɛ:
“Dɔ Ewuradze wo Nyankopɔn, wɔ w’akoma nyina mu, nye wo kra nyina mu, nye w’adwen nyina mu.
“Iyi nye mbra no mu asɛm kɛse a odzi kan na ɔsõ.
“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho (Matthew 22:36–39
Minnyim wo dze, naaso sɛ mekenkan mbrasɛm akɛse ebien yinom a, muhu dza otsĩa ebiasa, mbrasɛm a ofi mu ba: dɔ wankasa woho.
Ana adwen ho dɛ ibɔdɔ wankasa woho dɛ mbrasɛm da? Yebotum nokwar mu ara yɛadɔ Nyankopɔn na yɛadɔ Ne mba sɛ yɛnndɔ hɛnho?
Ɔnnkyɛree na banodzifo nyansafo bi tuu ɔbarimba bi fo a nna ɔrobɔ mbɔdzen edzi ne mfe pii nsanmuyi horow bɔn a ɔyɛe no do. Ɔbarimba no n’enyi tõe a ɔnngye nndzi dɛ ɔfata obi no dɔ.
Ne banodzinyi see no dɛ, “Ewuradze nyim wo, ɔdɔ wo, na n’enyisɔ [wo] na akokodur anamɔn a erutu no.’’ Afei ɔdze kãa ho dɛ, “[Ihia] dɛ ibɛtse mbrasɛm no dɛ dɔ wankasa woho ama eetum aatse [Nyankopɔn] no dɔ na adɔ binom so.’’
Mber a nuabanyin yi tsee dɛm afotu no, ɔdze enyiwa fofor hun abrabɔ no. Ekyir no ɔkãa dɛ, “Medze me mber nyina abɔ mbɔdzen dɛ morohwehwɛ asomdwee na ngyetomu. Mahwehwɛ dɛm ndzɛmba no wɔ mbeambea bɔn. Ɔsor Egya na Agyenkwa hɔn dɔ nko mu na mubotum enya awerɛkyekyer. Minyim dɛ Wɔpɛ dɛ modɔ mankasa moho; ɔno nye nokwar kwan nko a mubotum atse Hɔn dɔ nkã ma me.’’
Hɛn Ɔsor Egya pɛ dɛ yɛdɔ hɛnankasa hɛnho—nnyɛ dɛ yɛbɛyɛ ahantan anaa pɛsɛankonya, mbom ama yeehu hɛnho wɔ mbrɛ osi hu hɛn no: yɛyɛ Ne mba a yɛsom bo. Sɛ nokwar yi hɛn w’akoma bun mu a, hɛn dɔ ma Nyankopɔn nyin. Sɛ yɛdze nokwar enyidzi hwɛ hɛnankasa hɛn ho a, yebue hɛn akoma mu dze hwɛ binom so dɛmara. Mber dodow a ehu wo krɔnkrɔnyɛ bo a esom no, etse nokwar krɔnkrɔn yi ase koraa: dɛ Nyankopɔn asoma wo ha yi ara, seseiara, wɔ abakɔsɛm mber tsistir yi mu, ama talent na akyɛdze horow a iwɔ no etum dze ayɛ papa kɛsenara biara a ibotum ayɛ no. Hɛn mber nye iyi! (Hwɛ Russell M. Nelson, “Becoming True Millennials,’’[wiadze nyina mu mpaabɔsom ma mbasirmba, Sanda 10, 2016], broadcasts.ChurchofJesusChrist.org).
Joseph Smith kyerɛkyerɛɛ dɛ nkɔnhyɛnyi biara, wɔ mber biara mu no, “dze enyigye ahwɛ da a yɛtse yi mu no kwan; … wɔatow hɛn da yi ho ndwom na wɔakyerɛw na wɔahyɛ ho nkɔm;… yɛyɛ Nyankopɔn no nkorɔfo a N’enyimpa wɔ hɛn do na [ɔasan mu eyi] dɛ yɛdze Nda a odzi ekyir enyimyam bɔbɔ adze’’ (Teachings of Presidents of the Church: Joseph Smith [2007], 186).
Ber a ihyia wo daa daa nkõdzen horow no, kaa awerɛhyɛmu yi a Elder Jeffrey R. Holland mae no: “Ntsi iwɔ asodzi, mbom ɔbɛyɛ enyimnyam na konyimdzi sũahu. … Wɔapaa mu akã empiresi a odzi ewiei no konyimdzi dadaw. Konyimdzi no wɔ nkyerɛwee nwoma no mu dadaw … , kyerɛwsɛm no!’’ (“Be Not Afraid, Only Believe” [asɛm a wɔkãa kyerɛɛ Asɔr Adzesũa Nhyehyɛɛ no nyamesom akyerɛkyerɛfo, Kwakwar 6, 2015], broadcasts.ChurchofJesusChrist.org).
Dapɛn n’ewiei Easter da fɛɛfɛw yi mentsen nsato mma hom dɛ hɛn nyina mbɔ mpaa mfa nhu na yɛngye hɛn ankorankor asɛdze nto mu ber a yɛyɛ ahoboa ma enyimnyam da no a Agyenkwa bɛba bio. Ewuradze dɔ hɛn dodow ma yennkotum atse ase, na Obeyi hɛn mpaabɔ ano! Na sɛ yɛwɔ fuutbɔɔl prama do, yɛwɔ asopitsi dan mu, anaa bea biara o, yebotum aka ne fã tsitsir bi ho—osiandɛ hɛn mber nye iyi! Jesus Christ ne dzin mu, amen.