Ebɛnadze na Yerusũa na Hɛn Werɛ Nnkefir Da
Naaso sɛ ehwɛ w’abrabɔ mpaabɔ mu ara a, megye dzi dɛ ibohu akwan pii mu a Ewuradze ama wo kwankyerɛ wɔ nkõdzen mber yi mu.
Mo nuanom adɔfo, maahwɛ kwan dɛ menye hom bɛyɛ abaɛfor nhyiamu yi. Ber a odzi ekyir a yɛyɛɛ asɔfodzi nhyiamu wɔ wiadze mfɛndzanan ehyiadzi no yɛ Ebɔbira 2019 mu. Ndzɛmba piinara na woesisi mfe ebien a abɛsen yi! Binom ahwer hɔn adɔfo. Binom ahwer hɔn edwuma, hɔn edzidzi kwan, anaa apɔwmudzen. Binom so ahwer hɔn ndaamba asomdwee anaa enyidado ho adwen. M’akoma mu hue ma hom mu kor biara a woehu amandze wɔ iyinom ho anaa wɔahwer biribi so. Mobɔ mpaa daa dɛ Ewuradze bɛkyekye hom werɛ. Ber a hom kɔ do ma Nyame dzi nyim wɔ hom abrabɔ mu no, minyim dɛ Ɔwɔ enyidado pa ma hom ndaamba dɛ mbrɛ Ɔwɔ no ber biara no.
Dza hom ahwer nyina mu no, hom enya sũahu, ndzɛmba binom so wɔ hɔ a hom ehu. Binom enya gyedzi kɛse wɔ hɛn Ɔsor Egya na Ne Ba Jesus Christ mu. Dodowara enya abrabɔ mu nhumu fofor—onnyiewiei nhumu mpo. Binom nye hom adɔfo na Ewuradze enya nkitahodzi a no mu yɛ dzen yie. Mowɔ enyidado dɛ hom ehu dɛ hom tum tsie No yie na hom nya ankorankor nyikyerɛ. Ɔtaa dɛ nsɔhwɛ a ɔyɛ dzen kyerɛ hɛn akwan a yɛdze nyin a nkyɛ onnkotum edua kwan biara do aba.
Hom ndwen nkɔ ekyir mfe ebien. Esi dɛn enyin? Ebɛnadze na isũae? Bia ahyɛse no wo yamu ankyɛ ibotum asan ekyir akɔ 2019 na atsena! Naaso sɛ ehwɛ w’abrabɔ mpaabɔ mu ara a, megye dzi dɛ ibohu akwan pii mu a Ewuradze ama wo kwankyerɛ wɔ nkõdzen mber yi mu, Ɔroboa wo ma esi pi wɔ wo som mu, asakyer yie, ayɛ—Nyame nyimpa ampara.
Minyim dɛ Ewuradze wɔ nhyehyɛɛ kɛse a ɔyɛ nwanwa ma hɛn—dɛ ankorankor na hɛn nyina. Ɔdze ayamuhyehye na abotar, Ɔkã dɛ:
“Hom yɛ mbofra nkakraba, na hom nnyae nntsee nhyira akɛse a … Egya … oesiesie ama hom no ase;
“Na hom nnkotum agye ndzɛmba nyina sesei; naaso, hom enyi ngye, osiandɛ mibedzi hom kan.”1
Mo nuanom adɔfo, megye dase dɛ Oedzi hɛn kan, na Oridzi, hɛn kan, ber a yɛhwehwɛ etsie No no. Ɔpɛ dɛ yenyin na yesũa, nkankara—annhwɛ a—edua abɛbrɛsɛ mu.
Abɛbrɛsɛ yɛ kyerɛkyerɛnyi mapã. Ebɛnadze na esũa no mfe ebien yi a wɔabɛsen yi a ibɛpɛ dɛ daa ekaa? Wo nyiano bɛyɛ soronko ama wo, mbom munsusu adzesũa anan a mowɔ enyidado dɛ hɛn nyina yeesũa na hɛn werɛ nnkefir da.
Adzesũa 1: Fie no Nye Gyedzi Asoɛe a Yɛsɔr
Ɔtaa dɛ sɛ Ewuradze bɔ hɛn kɔkɔ wɔ mbusu a ɔwɔ nda a odzi ewiei no mu a, Otu fo dɛ: “Hom ngyina mbea krɔnkrɔn do, na mma hom nnhihim.”2 “Mbea krɔnkrɔn” yinom yi no, mbrɛ ɔbɛdan biara no Ewuradze ne temple na asɔr adan horow no bɛkã ho. Naaso woesiw hɛn kwan dɛ yɛbɔboa ano wɔ mbea yinom mu wɔ akwansidze horow mu no, yeesũa dɛ bea krɔnkrɔn papa kor a ɔwɔ wiadze mu nye fie—nyew, wo fie mpo.
Enuanom, hom kitsa Nyankopɔn n’asɔfodzi. “Kyɛfa a ɔwɔ asɔfodzi no mu no nye sor tum no fam ho.”3 Ɔwo na w’ebusua agye asɔfodzi ayɛdze horow. Ɔyɛ “ayɛdze yi mu na nyamesu mu tum no da edzi.”4 Dɛm tum no wɔ hɔ ma ɔwo na w’ebusua wɔ wankasa wo fie sɛ esie ahyɛmu no a edzi no a.5
Mfe 185 a abɛsen no, da yi ara no, Ebɔbira 3, 1836 no, Elijah dze Asɔfodzi ho nsaafee no a ɔma kwan ma hɛn ebusua ebusua wɔsɔw ano daapem no sanee ananmu bae. Dɛm no ntsi inya atsenkã pa ber a erema sacrament wɔ wo fie no. Edwen ho a, osii dɛn nyaa nhyɛdo wɔ w’ebusua mu mba do, dɛ wohu wo—dɛ erema ayɛdze krɔnkrɔn yi—dɛ hɔn egya, nana banyin, kun, babanyin, anaa nuabanyin? Ebɛnadze na ibɛyɛ ma dɛm atsenkã krɔnkrɔn no aka w’ebusua mu?
Bia ibɛtse dɛ biribi bio wɔ hɔ a ɔsɛ dɛ eyɛ ama wo fie abɛyɛ gyedzi guandɔbea mapã. Sɛ ɔtse dɛm a, meserɛ, yɛ! Sɛ awar a, enye wo yer mfa apam dɛ adamfo tsĩpɛnfo wɔ edwuma tsitsir yi ho. Ndzɛmba kumabaa bi na no nhwehwɛe hia kyɛn iyi. Fitsi sesei kesi ber a Ewuradze bɛba bio no, hɛn nyina yehia dɛ hɛn efiefi bɛyɛ asomdwee na bambɔ mbea.6
Su na ndzeyɛɛ horow a ɔtwe Sunsum no bɛma wo fie no krɔnkrɔnyɛ no epegyaw. Dza no so yɛ nokwar ampaara no nye dɛ krɔnkrɔnyɛ no bɛyew sɛ biribiara wɔ wo suban ho nye dza ɔbɔ wo ho aporɔw a Sunsum Krɔnkrɔn no kyir a, nna “ɔsorsor twe hɔnho.”7
Ana adwen ho pɛn, siantsir a Ewuradze pɛ dɛ yɛyɛ hɛn efiefi asɛmpa adzesũa na abrabɔ asoɛe? Nnyɛ dɛ ɔbɛyɛ hɛn ahoboa ara ama, anaa ɔaboa hɛn edua wiadze nsan yarba mu. Sesei mboano ho akwansidze no wobeyi efi hɔ. Naaso, w’enyimpisi a ibɛyɛ ma wo fie abɛyɛ gyedzi guandɔbea a odzi kan no nnwie da. Ber a gyedzi na krɔnkrɔnyɛ do huan wɔ wiadze yi a wɔahwe ase yi mu no, hia a ibehia mbea krɔnkrɔn no bɔdɔɔ sõ. Mehyɛ hom nkuran dɛ hom nkɔ do nyɛ hom fie bea krɔnkrɔn ampara “na mma nnhihim”8 mfi botae tsitsir no ho.
Adzesũa 2: Yehia Hɛnho Nkorkor
Nyankopɔn pɛ dɛ yɛbɔ mu yɛ edwuma na yɛboa hɛnho nkorkor. Dɛm ntsi na Ɔdze hɛn ba asaase do wɔ ebusua ebusua mu na ɔkyekyer hɛn gu ward na stake ahorow mu no. Dɛm ntsi na Ɔse hɛn dɛ yɛnsom hɛnho nkorkor no. Dɛm ntsi na Ɔse hɛn dɛ yɛntsena wiadze no mu mbom yennfi wiadze.9 Yebotum abɔ mu ayɛ mbordo kyɛn ma hɛn nko yebotum ayɛ. Nyankopɔn n’enyigye ho nhyehyɛɛ no bɛyɛ gyan sɛ Ne mba tsetsew hɔn mu gyina ankonam a.
Ndaansa yi wiadze nsan yarba no ayɛ soronko osiandɛ wɔakã wiadze mu obiara wɔ mber kor noara mu. Binom ehu amandze akyɛn binom dze, naaso wɔahaw hɛn nyina wɔ kwan bi do. Osian iyi ntsi, hɛn nyina hɛn nsɔhwɛ kor no wɔ kwan dɛ ɔboa Nyankopɔn ne mba ma wɔayɛ kor a, ne nsaso mmbaa da. Ntsi, mibisa, ana nsɔhwɛ yi a hɛn nyina wɔ mu kyɛfa yi atwe wo abɛn wo fipamfo—wo nuanom na nkyerɛbaa wɔtse bɛn wo na wɔ wiadze nyina mu?
Mbrasɛm nyina mu akɛse ebien no botum aboa hɛn afa iyi ho, odzi kan, yɛdɔ Nyankopɔn na otsĩa ebien, yɛbɔdɔ hɛn nyɛnko.11 Yɛsom dze kyerɛ hɛn dɔ.
Sɛ inyim obiara a ɔayɛ ankonam a, bɛn no—sɛ itse dɛ ayɛ ankonam so mpo a! Onnhia dɛ ibenya siantsir anaa asɛm bi a ibɛkã anaa edwuma a irekɛyɛ. Kyia no ara na kyerɛ wo dɔ. Abaɛfor mfir botum aboa wo! Wiadze nsan yarba ekyir mpo a, Nyankopɔn ne ba biara a ɔsom bo no hia dɛ ohu dɛ ɔnnyɛ ankonam.
Adzesua 3: W’Asɔfodzi Quorum no Wɔ Ndwuma Dodow Yɛ Kyɛn Nhyiamu Ara
Wiadze nsan yarba ber mu no, wɔtoow Kwesida quorum nhyiamu horow no mu mber kakra. Sesei quorum horow binom yɛ nhyiamu wɔ abaɛfor kwan do. Naaso, Ewuradze n’edwuma a ɔdze ama asɔfodzi quorum horow no nnyɛ nhyiamu nko mu na wɔyɛ. Nhyiamu horow no yɛ dza quorum no ɔsɛ dɛ ɔyɛ na wobotum ayɛ ne fã kakrabaa pɛr.
Mo nuanom a hom wɔ Aaron Asɔfodzi na elderfo quorum horow mu, hom ntserɛw hom enyido-adzehu wɔ siantsir a yɛwɔ quorum horow. Ibesi dɛn dze wo quorum no ayɛ Ewuradze N’edwuma a Ɔpɛ dɛ eyɛ no—sesei? Hwehwɛ nyikyerɛ fi Ewuradze hɔ. Brɛ woho adze! Bisa! Tsie! Sɛ wɔafrɛ wo dɛ dzi bano a, hom mfa apam dɛ president na n’apamfo na wɔnye quorum mba no. Asɔfodzi ɔfese anaa ɔfrɛ biara no, ma Nyankopɔn ndzi nyim wɔ wo pisi dɛ quorum kuw ba na wɔ wo som mu. Fa enyigye hyia sũahu a edze tseneneeyɛ bɔbɔ adze ber a “[e]dze enyimpi yɛ adzepa.”12 Quorumfo wɔ kwan soronko mu a wɔbɛma Israel mboano no akɔ ntsɛntsɛm wɔ ntwamutam n’afã ebien nyina no.
Adzesũa 4: Yetsie Jesus Christ Yie Ber a Yɛayɛ Komm
Yɛtse mber a wɔhyɛɛ ho nkɔm mfe pii a abɛsen no mu, ber a “ndzɛmba nyinara bɛyɛ begyabegya; na nokwar, adasa hɔn akoma botutu; na suro bɛba nkorɔfo nyinara do.”13 Ansaana wiadze nsan yarba no bɛba no, nna ɔyɛ nokwar, na n’ekyir so ɔbɛyɛ nokwar. Wiadze mu begyabegyayɛ bɔdɔɔ sõ. Edze to ho a, Ewuradze ne ndze nnyɛ “dede kɛse dzendzen bi, mbom … ɔyɛ ndze tseabaa bɔkɔɔ a ɔtse dɛ ma ɔrowasa gu asowa mu a ohwira kɔ ɔkra mu.”14 Ama yɛaatse ndze tseabaa yi no, otwar dɛ yɛyɛ dzinn!15
Mber kakra mu no, nsan yarba no etwa dwumadzi horow mu a nkyɛ ɔbɛhyɛ hɛn abrabɔ mu mã no. Ɔnnkɛkyɛr a yebotum asan mu eyi dɛ dɛm mber no yɛdze dede na wiadze begyabegyayɛ no bɛhyɛ mu mã bio. Anaa dɛ yebotum dze hɛn mber no etsie Ewuradze ne ndze a Ɔrowasa N’akwankyerɛ, awerɛkyekye, na asomdwee. Mber komm no yɛ mber krɔnkrɔn—mber a yɛdze bɔboa ma ankorankor nyikyerɛ aba na yɛdze asomdwee aba.
Dzi wo ho do ama eenya wo nko wo mber na enye w’adɔfo so. Bue w’akoma mu ma Nyankopɔn wɔ mpaabɔ mu. Nya mber fa woho hyɛ kyerɛwsɛm no mu na sɔr wɔ temple.
Mo nuanom adɔfo, ndzɛmba pii wɔ hɔ a Ewuradze bɛpɛ dɛ yesũa fi hɛn sũahu horow wɔ nsan yarba ber mu yi. Maakyerɛw nkorkor anan ara. Moto nsa frɛ wo dɛ kyerɛw wankasa wo dze nkorkor, susu no ahwɛyie mu ara, na enye hɔn a idɔ hɔn no nkyɛ.
Ndaamba no hyerɛn ma Nyame n’ahyɛmu siefo no.16 Ewuradze bɔkɔ do ara afrɛ N’asomfo a wokitsa asɔfodzi emudzi mu no ma woehyira, akyekye werɛ na wɔahyɛ adasamba dzen na wɔaboa esiesie wiadze yi na no mu nkorɔfo ama Ne Mbaa a Otsĩa Ebien no. Ogyina hɛn mu kor biara do dɛ ahyɛdze krɔnkrɔn no a yɛagye no yɛdze bedzi dwuma yie. Yebotum ayɛ! Megye ho dase, na mekyerɛ modɔ ma hom mu kor biara, mo nuanom adɔfo, wɔ Jesus Christ ne dzin mu, amen.