Christ Asoɛr; Gyedzi wɔ No Mu Botutu Mbepɔw
Gyedzi wɔ Jesus Christ mu nye tum kɛse koraa a ɔwɔ hɔ ma hɛn wɔ abrabɔ yi mu. Ndzɛmba nyina botum ayɛ hɔ ama hɔn a wɔgye dzi no.
Mo nuanom na nkyerɛbaa adɔfo, ɔyɛ me enyisɔ dɛ menya adom kwan yi nye hom rekasa Easter Kwesida yi.1 Jesus Christ No werdam afɔrbɔ na No Wusoɛr no asesã hɛn nyina hɛn abrabɔ daapem. Yɛdɔ No na enyisɔ mu ara yɛsɔr Ɔno na hɛn Ɔsor Egya .
Abosoom esia a abɛsen yi, yɛakɔ do nye wiadze nsan yarba no edzi aper. Hom apɔwmudzen na sunsum mu ahoɔdzen wɔ yarba, dza hom hweree, na hom ankonamyɛ ho ayɛ me nwanwa. Mobɔ mpaa daa dɛ, ne nyina mu no hom bɛtse Ewuradze no dɔ a ɔmmbɔadze ma hom no. Sɛ hom dze osũanyiyɛ a, ɔyɛ dzen ehyia hom nsɔhwɛ horow, afe yi a abɛsen no a, ɔrennyɛ kwa.
Anapa yi, hom atse efi Asɔr baanodzifo a wofi wiadze n’asaasetɔw biara a nyimpa tsetse do no, hɔn hɔ. Nokwar asɛmpa ne nhyira no wɔ hɔ ma ebusuakuw biara , kasa, na nkorɔfo biara. Jesus Christ N’Asɔr yɛ wiadze nyina mu asɔr. Jesus Christ nye hɛn kandzifo.
Ndaase mu ara, wiadze nsan yarba no mpo enntum amma No nokwar a ɔrokɔ kan no ammbrɛ adze. Jesus Christ asɛmpa no nye dza wiadze yi a wɔayɛ adwensɛɛ, wentwiwentwi, na ɔbrɛ yi, hia no papaapa.
Nyankopɔn ne ba kor biara fata dɛ onya kwan tse na ɔgye Jesus Christ n’asɛm a ɔpon na ɔma ayarsã no to mu. Asɛm biara nnyi hɔ a ohia tsitsir ma hɛn enyigye—sesei na daapem.2 Asɛm biara nnyi hɔ a enyidado ahyɛ mu mã. Asɛm biara nnyi hɔ a obotum eyi wentwiwentwi efi hɛn ɔman mu.
Gyedzi wɔ Jesus Christ mu nye dza yɛgye dzi nyina ne fapem na kwan a wodua do nya ɔsor tum. Dɛ mbrɛ Ɔsomafo Paul kãa no, “na gyedzi nnyi mu a, obi nntum nnsɔ [Nyankopɔn] enyi: na nyia a ɔba Nyankopɔn nkyɛn no otwar dɛ ɔgye dzi dɛ ɔwɔ hɔ, na ɔyɛ hɔn a wɔhwehwɛ n’ekyir kwan no katuafo.”3
Abrabɔ mu biribiara a oye no—nhyira biara a ɔwɔ onnyiewiei nsunsuando no—dze gyedzi hyɛ ase. Yɛrema Nyame kwan ma Oedzi nyim wɔ hɛn abrabɔ mu no dze gyedzi hyɛ ase dɛ Ɔpɛ dɛ Ɔma hɛn kwankyerɛ. Nnuho nokwar mu dze gyedzi dɛ Jesus Christ wɔ tum dɛ Ɔtsew ho, Ɔsa yarba, na Ɔhyɛ hɛn dzen hyɛ ase.4
“Mma hom mmpow Nyankopɔn no tum no” nkɔnhyɛnyi Moroni paa mu kãa dɛ, “na ɔdze tum yɛ edwuma dɛ mbrɛ adasamba hɔn gyedzi tse.”5 Ɔyɛ hɛn gyedzi na obue Nyankopɔn no tum wɔ hɛn abrabɔ mu.
Naaso, yɛdze gyedzi ridzi dwuma botum ayɛ dɛ adze a ɔbor hɛn do. Ɔtɔfabi a, yɛdwendwen dɛ ana yebotum esie gyedzi a ɔsõ dze agye nhyira horow a yehia no dzendzenndzen no. Naaso, Ewuradze duaa Mormon Nwoma nkɔnhyɛnyi Alma ne nsɛm dze dɛm suro no too famu.
Alma bisa hɛn ara dɛ hom asɔ me nsɛm no ahwɛ na hom “dze gyedzi kumaabi edzi dwuma a, nyew, sɛ hom benya pɛ bi dze agye edzi a.”6 Kasasin “gyedzi kumaabi” no kaa me Ewuradze n’anohoba wɔ Bible mu dɛ “yɛwɔ gyedzi tse dɛ sinape abafua a yebotum ase kokwaa yi dɛ, Tutu fi ha kɔ noho, na nkyɛ obotutu; na nkyɛ biribiara ronnsõ hom yɛ7
Ewuradze tse hɛn honandua mu mberɛwyɛ no ase. Ɔtɔ mber binom a yɛfom. Naaso Onyim hɛn hyɛbew mapã no. Sinape abafua hye ase kakrabaa mbom onyin bɛyɛ dua tantam a nnoma horow si hɔn buw wɔ no nkorbata no do. Sinape aba no gyina hɔ ma gyedzi kumaabi a mbom orinyin .13
Ewuradze nnhia hɛn gyedzi a odzi mu ana yeenya kwan nsa akã No tum a odzi mu no. Naaso Ɔse hɛn dɛ yɛngye ndzi.
Mo nuanom na nkyerɛbaa adɔfo, me frɛ ma hom Easter anapa yi nye dɛ hom bɛhyɛ ase ndɛ ato hom gyedzi mu. Hom gyedzi mu no, Jesus Christ bɔto hom tum a hom dze yiyi akokwaa wɔ hom abrabɔ mu no mu,9 sɛ hom ankorankor ɔhaw mpo bɛyɛ tsentsen dɛ Bepɔw Everest a.
Hom mbepɔw bia ɔbɛyɛ ankonamyɛ, ekyingye, yarba, anaa ankorankor ɔhaw horow biara. Hom mbepɔw bɔsonson, naaso hom haw biara ne nyiano ara nye hom bɔto hom gyedzi mu. Dɛm no gye edwumayɛ. Adzesuafo enyihafo na esuafo akɔtrɔbɔdwe bɛper daa dɛ wobenya gyedzi kumaabi mpo.
Ama yɛaayɛ biribiara yie no ɔgye mbɔdzembɔ. Yɛrebɛyɛ Jesus Christ esuafo no nokwafo no kã ho. Eroto wo gyedzi na awerɛhyɛmu wɔ No mu no gye mbɔdzembɔ. Me mma hom esusudze enum a ɔbɔ boa hom ma hom etu hom gyedzi na awerɛhyɛmu mpon.
Odzi Kan, sũa adze. Bɛyɛ obi a ɔdze noho hyɛ adzesũa mu. Fa woho hyɛ kyerɛwsɛm no mu ama aatse Christ no ndwuma na no som dwuma no ase yie. Hu Christ ne nkyerɛkyerɛ no ama aatse no tum ase wɔ w’abrabɔ mu. Fa Jesus Christ No Werdambɔ mu nokwar no dɛ ɔfa wo ho no hyɛ wo mu. Ɔfaa wo awerɛhow, wo mfom, wo mberɛwyɛ, na wo bɔn nyina too No ho do. Otuaa mpata sika no na ɔmaa tum no ho kwan dɛ ebotutu mbepɔw biara a ibehyia biara. Edze wo gyedzi, awerɛhyɛmu, na ɔpɛ dɛ ibɛka no do na edze nya dɛm tum no.
Erututu wo mbepɔw bia obehia anwanwadze. Sũa anwanwadze ho asɛm. Ɔnam hɛn gyedzi wɔ Ewuradze no mu na anwanwadze dua ba. Dza ɔkã gyedzi no ho nye irinya awerɛhyɛmu wɔ Ne pɛ na mber nhyehyɛɛ mu—mbrɛ obesi na ber a Ɔdze anwanwadze mboa a erohwehwɛ no bɛba. Gyedɛ w’ ekyingye nko na obesiw Nyame kwan efi Ɔdze anwanwadze ho nhyira a edze botutu mbepɔw a ɔwɔ w’abrabɔ mu no kwan ama wo.10
Erusũa mbordo afa Agyenkwa ho no, ma ɔyɛ mberɛw dɛ ebɔtwer N’ehumbɔbɔr, No dɔ na Ne dzenhyɛ, ayarsa, na ɔpon tum. Agyenkwa no bɛn wo yie ber a irihyia anaa erofow bepɔw a edze gyedzi.
Otsia ebien, san mu yi dɛ ebɛgye Jesus Christ edzi. Sɛ ewɔ ekyingye bi fa Nyankopɔn Egya no na No Dɔba ho, anaa Nsanananmu no nokwar anaa Joseph Smith no krɔnkrɔn ɔfrɛ dɛ nkɔnhyɛnyi a, san mu yi dɛ ebɛgye edzi11 na tsena nokwar mu. Fa wo nsɛmbisa no kɔ Ewuradze nye nokwar fibea horow hɔ. Sũa adze a iwɔ pɛ dɛ ebɛgye edzi kyɛn dɛ edze enyidado bɔhwehwɛ sintɔ bi wɔ nkɔnhyɛnyi n’abrabɔ mu anaa kyerɛwsɛm mu mfomdo bi. Gyaa dɛ enye ekyingyefo binom so rekã w’ekyingyesɛm dze atow w’ekyingye mu. Ma Ewuradze ndzi wo Kan wɔ wo sunsum mu nhwehwɛe mu.
Otsĩa ebiasa, fa gyedzi dzi dwuma. Ebɛnadze na ibɛyɛ sɛ iwɔ gyedzi mbordo a? Dwen ho. Kyerɛw no ho asɛm. Nkyii gye gyedzi mbordo ber a ereyɛ biribi a ohia gyedzi mbordo no.
Otsĩa anan, yɛ ayɛdze krɔnkrɔn emudzi mu. Ayɛdze horow bue Nyankopɔn no tum ma w’abrabɔ.12
Na otsĩa enum, bisa wo Sor Egya, wɔ Jesus Christ ne dzin mu, fa gye mboa.
Gyedzi gye edwumayɛ. Irinya nyikyerɛ gye edwumayɛ. Mbom “obiara a obisa no onya; na nyia ɔhwehwɛ no ohu; na nyia ɔbɔ mu no wobobue no.”13 Nyame nyim dza ɔbɔboa wo gyedzi ma oenyin. Bisa, na nkyii bisa no bio.
Nyia a ɔnngye nndzl botum akã dɛ gyedzi wɔ hɔ ma hɔn a wɔyɛ mberɛw no. Mbom asɛm kã yi bu enyi gu gyedzi no tum no do. Ana Agyenkwa N’Asomafo no bɔkɔ do akyerɛkyerɛ Ne nkyerɛkyerɛ no wɔ No wu ekyir, a hɔn nkwa wɔ esian mu, sɛ wonyaa ekyingye wɔ No mu a?14 Ana Joseph na Hyrum Smith bowu wɔ hɔn gyedzi ntsi ber a worigyina pintsinn ama Ewuradze N’Asɔr ne Nsanananmu, gyedɛ wonyim ampaara dɛ ɔyɛ nokwar? Ana Ahotseweefo 2,000 bowu wɔ edzikamfo kwan no do24 sɛ nna wɔwɔ ekyingye biara dɛ Jesus Christ asɛmpa no wɔdze asan ananmu aba? Nokwar, gyedzi nye tum no a ɔma kwan ma nyia a ɔnnsɛ no yɛ dza wɔdwen dɛ ɔnnkɛyɛ yie
Mma nntsew gyedzi no a iwɔ no dada no do. Ɔgye gyedzi ana abaka Asɔr yi ho na atsena nokwar mu. Ɔgye gyedzi ana aka nkɔnhyɛfo do kyɛn kaberkyefo na nsusui a wɔayɛ atsenkã. Ɔgye gyedzi ana asom asɛmpakã wɔ wiadze nsan yarba ber mu. Ɔgye gyedzi ana abɔ ahosie abrabɔ ber a wiadze no tsẽatsẽa mu dɛ ahosan bra apa ho. Ɔgye gyedzi dze akyerɛkyerɛ mbofra asɛmpa no wiadze a nyamesom ayew. Ɔgye gyedzi dze atotɔ aserɛ ama dɔfo no nkwa, na gyedzi mbordo mpo ma edze agye mbuae a ɔyɛ abagura.
Mfe ebien a abɛsen no, emi na Akyerɛbaa Nelson kɛseraa Samoa, Tonga, Fiji, na Tahiti. Nna nsupruw aman yinom kor biara no nsu atɔ dzendzen nda pii mu. Asɔrmba no faa akɔnkye na wɔbɔɔ mpaa dɛ hɔn nhyiamu a wɔbɛyɛ no abowano no nsu no nnkɔtɔ.
Samoa, Fiji na Tahiti no, ɔkã kakra ma wɔahyɛ nhyiamu ase no ara na nsu no tsewee. Mbom Tonga dze, nsu no enngyaa tɔ. Naaso, Ahotseweefo 13,000 baa ntsɛm dɔnhwer pii bɛgyee egua na wɔtweɔn nsu no a ɔrotɔ no mu, na wɔdze abotar tsenaa ase dɔnhwer ebien nhyiamu a hɔn ho afow.
Yehun gyedzi a ɔbɔ hyew a ɔreyɛ edwuma wɔ nsupruwfo nyina mu—gyedzi a ɔma nsu gyaa tɔ na gyedzi a wɔdze tsim sɛ nsu no engyaa tɔ a.
Hɛn abrabɔ mu mbepɔw no nntutu wɔ kwan anaa mber a yɛbɛpɛ. Naaso daa hɛn gyedzi begya hɛn ma yɛatow akɔ kan. Daa gyedzi ma kwan ma hɛn nsa kã nyametum no mbordo.
Yɛserɛ hom nhu iyi: sɛ biribiara na obiara a ɔwɔ wiadze yi mu a hom twer no bɛpa wo a, Jesus Christ na N’Asɔr remmpa wo dabiara da. Ewuradze Ɔronntɔ nkom, eso Ɔrennda.16 “Ɔtse dɛm ndeda, ndɛ na [ɔkyena]”17 Ewuradze ronntwe N’ahyɛmu,18 N’anohoba, anaa No dɔ mmfi No nkorɔfo do. Ɔyɛ anwanwadze ndɛ na Ɔbɛyɛ anwanwadze ɔkyena.19
Gyedzi wɔ Jesus Christ mu nye tum kɛse koraa ɔwɔ hɔ ma hɛn wɔ abrabɔ yi mu. Ndzɛmba nyina botum ayɛ hɔ ama hɔn a wɔgye dzi no.20
Hom gyedzi a orinyin wɔ No mu no botutu mbepɔw—nnyɛ ɔbo mbepɔw no a ɔma asaase yɛ fɛɛfɛw no mbom awerɛhow mbepɔw a ɔwɔ hom abrabɔ mu no. Hom gyedzi a wɔayɛ frɔmfrɔm no bɔboa hom ma adan ɔhaw ma wɔayɛ kwan pa na nyinii a ne nsaso nnyi.
Easter Kwesida anapa yi, medze ɔdɔ na enyisɔ atsenkã mapã no, mepaa mu gye dase dɛ: “Jesus Christ asoɛr ampaara.” Ɔasoɛr dɛ Oribedzi N’Asɔr ne kan. Ɔasoɛr dɛ Oribehyira Nyame ne mba hɔn abrabɔ, beebiara a wɔtse biara. Yɛdze gyedzi wɔ No mu, yebotum etutu mbepɔw biara wɔ hɛn abrabɔ mu. Megye ho dase wɔ Jesus Christ ne dzin krɔnkrɔn no mu, amen.