Rilb’al li Jesukristo sa’ li qayu’am
Li Kolonel nokoxb’oq chirilb’al li qayu’am rik’in a’an re naq taqil a’an chi yo’onsa’ li qayu’am.
Ex was wiitz’in, natuulano’ inch’ool chi aatinak eerik’in chiru li eq’la a’in. Naxjunaji rib’ li qach’ool rik’in b’antioxink naq ch’utch’uuko, a’ yaal b’ar wankex sa’ chixjunil li ruchich’och’, re rab’inkileb’ li profeet, li apostol, aj ilol na’leb’, aj k’utb’esinel, ut eb’ laj jolominel sa’ li rawa’b’ejihom li Dios. Jo’ jun eetalil, chanchano lix tenamit li rey aj Benjamin, chixyiib’ankil li qamuheb’aal t’ikr rik’in li rokeb’aal sa’ xjayal lix profeet li Dios sa’ xb’een li ruchich’och’,1 a’ li Awa’b’ej Russell M. Nelson.
Ink’a’ jwal us nikin’ilok chiru chixjunil lin yu’am ut junelik kiwoksi li lem re ilok chi chaab’il. Naq ninte li wu rajlal eq’la, li ruchich’och’ chanchan naq poqlenb’il. Chixjunil po’b’il, juch’inb’il, ut poqlenb’il. Jo’kan ajwi’ lin raarookil b’eelom chanchan jun jalam-uuch ch’uluk ru, sa’ xna’aj tz’aqal li xchaq’al ru jalam-uuch! Li k’a’ru nawaj ru sa’ xtiklajik lin kutan xb’een wa chiru yalaq chik k’a’ru, a’an xsik’b’al lin lem re intenq’ankil chixtawb’al ru lin sutam ut chixyalb’al xsahil li k’a’aq re ru chiru li kutan.
Chiruheb’ li chihab’ ke’nume’, kinwulak xk’eeb’al reetal naq a’in naxk’ut wiib’ li na’leb’ aajeleb’ ru choq’ we: xb’een, jun li k’anjeleb’aal li nikinxtenq’a chixsaqenob’resinkil, chixtuqub’ankil, ut chixk’ojob’ankil lin sutam; ut xkab’, jun laj b’eresihom we rajlal chiru li chaab’il b’e. Li na’leb’ a’in naxk’e inna’leb’ chirix xk’eeb’al reetal li qawanjik rik’in li qaKolonel Jesukristo.
Sa’ li qayu’am b’ar wi’ wan naab’al li patz’om, k’a’uxl, xminb’al qu, ut qak’anjel, lix rahom li Kolonel choq’ qe sa’ junesal ut jo’ ralal xk’ajol sa’ li sumwank, jo’eb’ ajwi’ lix k’utum ut chaq’rab’, wankeb’ re naq tooruuq chiroksinkil wulaj wulaj re wulak jo’ jun “saqen li nalemtz’un, … nakutanobʼresink re lix naqʼ qu [ut] nakʼehok xyuʼam li qakʼaʼuxl.”2 Sa’ xsik’b’al li osob’tesink re li Santil Musiq’ej sa’ li qayu’am, tooruuq, jo’ kixk’ut laj Jakob, chirilb’al “li k’a’aq re ru joʼ chanru tzʼaqal wan ut … joʼ chanru tzʼaqal taawanq.”3
Jo’ ralal li Dios re li sumwank, osob’tesinb’ilo rik’in naab’al li choxahil k’anjeleb’aal re xchaab’ilob’resinkil li qilob’aal sa’ musiq’ej. Li raatin ut lix k’utum li Jesukristo jo’ tz’iib’anb’ileb’ sa’eb’ li loq’laj hu ut li esil neke’xwotz lix profeet sik’b’ileb’ ru, ut lix Musiq’ li naqak’ul rik’in li tijok wulaj wulaj, li wulak rajlal sa’ li santil ochoch, ut li k’ojob’anb’il k’anjel re li loq’laj wa’ak naru neke’tenq’an chixk’ojob’ankil li tuqtuukilal ut chixk’eeb’al li qamaatan re li tz’ilok-ix li naxk’am chaq lix saqen li Kristo ut lix nawom choq’ re li qayu’am ut choq’ re li ruchich’och’ moymoy ru. Li Kolonel naru naq a’anaq jun kʼutlebʼaal qabʼe ut aj b’eresihom qe naq yooqo chi xik chiru li ha’ re li yu’am a’in. A’an naru naxk’ut chi tz’aqal li b’e li nak’amok qe sa’ li qajunelikil na’aj. Jo’kan b’i, k’a’ru naraj a’an naq taqil, ut b’ar naraj naq tooxik?
Li qaraarookil profeet kixk’ut naq “li qilob’aal tento naq k’ojk’ooq rik’in li Kolonel ut sa’ lix evangelio” ut naq tento “taqayal qaq’e chi ilok rik’in a’an sa’ chixjunil li qak’a’uxl.”4 Li Awa’b’ej Nelson jo’kan ajwi’ kixyeechi’i naq “maak’a’aq raj chik nab’oqok re li Musiq’ej jo’ xjayalankil qib’ rik’in li Jesukristo. … A’an texxb’eresi ut tixk’am eeb’e sa’ lee yu’am, wi teek’e xhoonal a’an sa’ lee yu’am—wulaj wulaj.”5 Ex wamiiw, li Jesukristo a’an tz’aqal li rajom li qilob’aal jo’ ajwi’ li qoyb’enihom b’ar toowulaq. Re qatenq’ankil chi wank chi tiik ut re toob’eeq sa’ li chaab’il b’e, li Kolonel nokoxb’oq chirilb’al li qayu’am rik’in a’an re naq taqil a’an chi yo’on sa’ li qayu’am. Naab’al li k’a’ru xintzol chirix li b’oqom a’in sa’ xtzolb’al li Najter Chaq’rab’.
Lix chaq’rab’ laj Moises kik’eeman reheb’ li xb’eenileb’ laj Israelita jo’ jun li evangelio re kawresink, yiib’anb’il choq’ re xkawresinkil li tenamit re jun li taqenaqil sumwank rik’in li Dios sa’ xk’ab’a’ li Jesukristo.6 Li chaq’rab’, numtajenaq rik’in eetalil li naxk’ut chiruheb’ laj paab’anel li “royb’eninkil lix k’ulunik” ut lix tojb’al rix li maak xb’aan li Jesukristo,7 li rajom a’an xtenq’ankil lix tenamit laj Israel chi wank rik’in li Kolonel naq te’wanq xpaab’aal chirix a’an, lix mayej, ut eb’ lix chaq’rab’ ut taqlahom sa’ lix yu’ameb’8—li rajom, a’an xk’amb’aleb’ chi wank xnimal xnawomeb’ chirix laj Tojol rixeb’.
Jo’ laa’o anajwan, lix najter tenamit li Qaawa’ ke’b’oqe’ chirilb’aleb’ lix yu’am rik’in a’an re naq te’ril lix b’aanuhom sa’ lix yu’ameb’. A’b’anan naq ki’ok chi k’anjelak li Kolonel, eb’ laj Israelita ak sachenaq sa’ xch’ooleb’ li Kristo sa’ chixjunil li ke’xb’aanu, ke’risi ut ke’xk’e xkomon li chaq’rab’ li moko us ta li maak’a’ chaab’il eetalil li naxk’ut li yaal ut li jun ajw’ chi b’e re kolb’a-ib’ ut tojb’a-ix—a’ li Jesukristo.9
Lix yu’ameb’ laj Israelita kisutq’i choq’ sachso ut q’ojyin ru. Eb’ li ralal laj Israel, sa’ li na’ajej a’an, ke’xpaab’ naq lix b’aanuhomeb’ rik’ineb’ li chaq’rab’ a’an lix b’ehil li kolb’a-ib’ sa’ junesal ut jo’kan ajwi’ ke’xjeb’ lix chaq’rab’ laj Moises jo’ jun ch’uut chi na’leb’ re taqlank sa’ xb’eeneb’ li tenamit.10 Jo’kan naq li Kolonel kixk’ojob’ wi’chik lix jayalihom ut lix tz’aqalil ru lix evangelio.
Toj reetal naq jun ch’uut reheb’ laj Israelita ke’xtz’eqtaana lix k’utum, toj reetal naq ke’xq’aab’a li Kolonel—a’an li kik’ehok re li chaq’rab’ ut kiyehok re naq a’an “li chaq’rab’ ut li saqen”11—ke’xye naq a’an yoo chixq’etb’al. A’b’anan li Jesus sa’ li raatin kixjultika sa’ xb’een li tzuul, yoo chi aatinak chirix lix chaq’rab’ laj Moises, kixye, “Meek’oxla naq xinchal chixsachb’al li chaq’rab’ ut eb’ li profeet; ink’a’ xinchal chixsachb’al a’an, xinchal b’al re naq tz’aqloq ru.”12 Jo’kan b’i li Kolonel, rik’in lix junelikil tojb’al rix li maak, kixraq chixjunil li na’leb’ ut k’anjel re k’atok mayej neke’xb’aanu chaq lix tenamit laj Israel sa’ li kutankil a’an. Lix mayej kixk’am chaq xjalb’al li k’atb’il mayej rik’in “jun yot’b’il ch’oolej ut jun tuulanil Musiq’ej,”13 li k’ojob’anb’il k’anjel re li mayejak kiwulak jo’ li k’ojob’anb’il k’anjel re li loq’laj wa’ak.
Li Awa’b’ej M. Russell Ballard, ki’aatinak chirix li na’leb’ a’in, ut kixye, “Sa’ jun chik aatin, li mayejak kixjal li mayej rik’in li nak’ehok re.”14 Naq naqak’am li qamayej chiru li Kolonel, nokob’oqe’ chirilb’al li Kolonel sa’ li qayu’am, naq naqak’e li qajom rik’in a’an sa’ xnawb’al ut xtawb’al ru naq lix tz’aqal ajom a’an xb’aanunkil li rajom li Yuwa’b’ej. Naq naqak’e li qilob’aal rik’in li Jesukristo, naqak’e reetal ut naqataw ru naq ka’ajwi’ sa’ xk’ab’a’ a’an naru naqak’ul lix kuyb’al li qamaak ut xtojb’al qix, toj reetal naq taqak’ul li yu’am chi junelik ut li taqenaqil loq’al.
Jo’ jun xb’eenil komon re li evangelio, kintaweb’ naab’al li kristiaan li ke’xk’e reetal li jalaak sa’ lin wanjik, sa’ lin b’aanuhom, ut li ninsik’ ru chirix naq xin’ok sa’ li Iglees. Ke’ok xk’a’uxl chirix “k’a’ut” rik’in li yookeb’ chirilb’al—k’a’ut naq xkub’e inha’ sa’ li ch’uut a’in sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan; k’a’ut naq ink’a’ ninb’aanu jalaneb’ chik li k’anjel chiru li hilob’aal kutan; k’a’ut naq tiik inch’ool chixpaab’ankil li Aatin re Chaab’il Na’leb’; k’a’ut naq kiwil ru lix Hu laj Mormon; k’a’ut naq ninpaab’eb’ li raatineb’ li profeet ut li apostol li wankeb’ anajwan; k’a’ut naq nintz’aqon rajlal xamaan sa’ li Iglees; k’a’ut naq ninb’oqeb’ li kristiaan chi “chalk ut chirilb’al, chi chalk ut chi tenq’ank, … chi chalk ut chi kanaak,”15 ut “chi chalk ut chi tz’aqonk.”16
Sa’ li hoonal a’an, eb’ li patz’om a’an ch’a’ajeb’ tz’aqal ut, jo’kan ajwi’ wan naq neke’q’aab’an. A’b’anan sa’ xnumsinkil chixjunil a’in, xinru chixk’eeb’al reetal naq lix patz’omeb’, a’an lix b’eenil inb’oqom re naq tinxk’e lin musiq’ejil lem re xsaqenob’resinkil, xjayalinkil, ut xk’ojob’ankil li kitenq’ank we chixyu’aminkil li evangelio. K’a’ru xyo’ob’tesin lix nawom inch’ool? Ma ka’ajwi’ yookin chixb’aanunkil “li kʼutbʼil bʼaanuhom” ut ink’a’ ninkanab’ naq li k’a’aq re ru re lix chaq’rab’ li Dios “tixkawob’resi lin paab’aal chirix li Kristo,”17 malaj tixk’ut naq li Jesukristo a’an li jun ajwi’ yo’leb’aal re kawilal sa’eb’ lin b’aanuhom?
Rik’in xyalb’al inq’e sa’ rilb’al ut xsik’b’al li Jesukristo sa’ li nink’oxla ut sa’ li ninb’aanu, kitehe’ xsa’ li wu ut kitehe’ lin k’auxl naq xinnaw naq li Jesukristo yoo chinb’oqb’al chi “chalk rik’in” a’an.18 Sa’ lin saajilal jo’ tzolom, nanaq sa’ inch’ool jun li b’oqom ke’xb’aanu li misioneer naq tintz’aqonq rik’ineb’ sa’ jun li k’utuk yookeb’ chirix li evangelio choq’ reheb’ jun ch’uut chi saaj ixq. Sa’ jun li q’ojyin, naq wanko sa’ rochoch jun reheb’ li saaj, lix patz’om “k’a’ut naq ninpaab’” kixtoch’ inch’ool ut kixb’aanu naq tinch’olob’ chi chaab’il chirix li rajom li Qaawa’ chirix li ninb’aanu sa’ Musiq’ej re lin tzolomil, ut kixchaab’ilob’resi lin nawom.
Jo’kan ut, kintzol, jo’ ninnaw anajwan, naq li qaKolonel Jesukristo naxb’eresiheb’ li qoq rajlal xamaan re xik sa’eb’ li ch’utleb’aal kab’l re tz’aqonk rik’in li loq’laj wa’ak, sa’ li rochoch li Qaawa’ re xb’aanunkileb’ li sumwank rik’in a’an, eb’ li loq’laj hu ut lix k’utumeb’ li profeet re xtzolb’al li raatin. A’an naxte lix tz’uumal qe re ch’olob’ank chirix a’an, li quq’ re k’anjelak jo’ tixb’aanu raj a’an, sa’ li qu re rilb’al li ruchich’och’ ut li junjunq chi kristiaan jo’ naxb’aanu a’an—“jo’ chanru wankeb’, ut … jo’ chanru tz’aqal naq te’wanq.”19 Ut naq naqakanab’ naq a’an tooxb’eresi sa’ chixjunil li ka’a’q re ru, naqak’ul xnawom qach’ool rik’in “chixjunil li k’a’aq re ru neke’xk’ut naq wan jun li Dios,”20 xb’aan naq b’ar naqasik’ taqataw21—wulaj wulaj. Ninch’olob’ xyaalal a’in sa’ lix loq’laj k’ab’a’ li Jesukristo, amen.