Li eechej re waklesink ch’oolej
Ninwaklesi eech’ool naq teeyal eeq’e chixtawb’al eek’ulub’ chi sutq’iik rik’in li qaChoxahil Yuwa’ ut li Jesukristo.
Ex was wiitz’in, nasaho’ inch’ool chi ch’utlaak eerik’in sa’ li jolomil ch’utub’aj-ib’ a’in re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Naqeek’a lee paab’aal ut lee rahom yalaq ta b’ar wankex. Xoomusiq’aak xb’aaneb’ li musiq’anb’il na’leb’, eb’ li xnawom xch’oolej ninqeb’ xwankil, ut eb’ li xchaq’al ruhil b’ich.
Ninwaklesi eech’ool naq teeyal eeq’e chixtawb’al eek’ulub’ chi sutq’iik rik’in li qaChoxahil Yuwa’ ut li Jesukristo. Yalaq ta b’ar wankex sa’ xb’ehileb’ li sumwank, teetaweb’ lee ch’a’ajkilal re li yu’am a’in ut lee pleetinkil xb’aan laj Satanas.
Jo’ kixye lin na’ we naq kinwech’ok chirixeb’ li ch’a’ajkilal, “Ah, Hal, yaal naq ch’a’aj. Ak re naq ch’a’aj. Li yu’am a’an re yale’k.”
Kiru chixyeeb’al a’an chi maak’a’ xjosq’il, chi se’se ajwi’ ru, xb’aan naq kixtaw ru wiib’ li na’leb’. Maak’a’ naxye k’a’ru nach’a’ajko’ wi’, li jwal aajel ru a’an naq taasutq’iiq rik’in lix Choxahil Yuwa’. Ut kixnaw naq truuq taasutq’iiq sa’ xk’ab’a’ lix paab’aal chirix laj Kolol re.
Kireek’a naq nach’ wan rik’in. Sa’eb’ li kutan naq naxnaw naq kamk re, ki’aatinak wik’in chirix li Kolonel naq yokyo sa’ xch’aat. Wan rokeb’aal jun chik li na’ajej chixk’atq lix ch’aat. Kise’ek ut kixka’ya li okeb’aal naq yoo chi aatinak chirix rilb’al li Kolonel sa’ junpaat chik. Toj najultiko’ we naq kinka’ya li okeb’aal ut kink’oxla li na’ajej wan chirix.
Wan chik anajwan sa’ li ruchich’och’ reheb’ li musiq’ej. Kiru chixjayalinkil rib’ rik’in li maatan kiraj xk’ulb’al chiru xnumikeb’ li chihab’ re ch’a’ajkilal ut yale’k-ix.
Li eechej re waklesink ch’oolej li kixkanab’ choq’ qe ch’olob’anb’il chi us sa’ Moroni 7, b’ar wi’ laj Mormon naxwaklesi xch’ool laj Moroni, li ralal, ut lix tenamit. A’an jun eechej re waklesink ch’oolej choq’ reheb’ li ralal xk’ajol, jo’ chanru ajwi’ li kixk’e lin na’ re lix junkab’al. Laj Mormon kixk’e li eechej a’an reheb’ chixjunil li neke’raj xk’ulb’al, chiru chixjunil lix yalb’aleb’ rix sa’ ruchich’och’, li junelik yu’am.
Laj Mormon kixtikib’ sa’ xtiklajik li ch’ol Moroni 7 rik’in xnawom xch’ool chirix li Jesukristo, eb’ li anjel, ut lix Musiq’ li Kristo, li nokoxtenq’a chixtz’ilb’al rix b’ar wan li us ut li ink’a’ us re naq tooruuq chixsik’b’al ru li us.
A’an naxk’e li Jesukristo sa’ xb’eenil na’ajej, jo’ neke’xb’aanu chixjunil li neke’xwaklesi chi chaab’il xch’ooleb’ li neke’ch’a’ajko’ sa’ xb’ehileb’ re sutq’iik sa’ choxa:
“Xbʼaan naq maajun winq naru chi koleʼk, joʼ chanru li raatin li Kristo, kaʼajwiʼ wi teʼxpaabʼ lix kʼabʼaʼ; joʼkan ut, wi osoʼjenaq li kʼaʼaq re ru aʼin, osoʼjenaq ajwiʼ li paabʼaal; ut ra chik lix wanjik li winq, xbʼaan naq wankebʼ chanchan naq maajun tojbʼal-ix kiʼuxman.
“Aʼbʼan kʼehomaq reetal, ex was wiitzʼin raarookex inbʼaan, chaabʼil wiʼchik li ninkʼoxla cherix laaʼex, xbʼaan naq ninkʼoxla naq wan eepaabʼaal chirix li Kristo, saʼ xkʼabʼaʼ eetuulanil; xbʼaan naq wi ta maakʼaʼ eepaabʼaal chirix, rikʼin aʼan moko eekʼulubʼ ta re texkʼeheʼq saʼ ajl saʼ xyanq li tenamit re lix iglees.”1
Laj Mormon kiril li tuulanil jo’ reetalil lix kawilaleb’ lix paab’aal. Kixk’e reetal naq ke’xkanab’ rib’ sa’ ruq’ li Kolonel. Kixwaklesi xch’ooleb’ rik’in xjultikankil li paab’aal a’an. Laj Mormon toj kixwaklesi xch’ooleb’ rik’in xtenq’ankileb’ chixk’eeb’al reetal naq lix paab’aal ut lix tuulanil xch’ooleb’ tixk’ojob’ ut tixkawresi xch’ooleb’ chirix li elk chi uub’ej sa’ xyi lix ch’a’ajkilaleb’:
“Ut joʼkan wiʼchik, ex was wiitzʼin raarookex inbʼaan, nawaj eeraatinankil chirix li yoʼonink. Chan ru naru neketaw li paabʼaal, wi maakʼaʼ eeyoʼonihom?
“Ut kʼaʼru li teeyoʼoni? Kʼehomaq reetal, ninye eere naq teeyoʼoni saʼ xkʼabʼaʼ lix tojbʼal rix li maak xbʼaan li Kristo ut lix wankil lix waklijik chi yoʼyo, naq texwaklesiiq saʼ li yuʼam chi junelik, ut aʼin xbʼaan eepaabʼaal chirix aʼan, joʼ chanru li yeechiʼinbʼil.
“Joʼkan ut, wi jun winq wan xpaabʼaal, tento taawanq xyoʼonihom; xbʼaan naq wi maakʼaʼ li paabʼaal inkʼaʼ naru nawan li yoʼonink.
“Ut joʼkan wiʼchik, kʼehomaq reetal, ninye eere naq inkʼaʼ naru nawan xpaabʼaal ut xyoʼonihom, kaʼajwiʼ wi tuulan, ut kubʼenaq xchʼool.”2
Chirix a’an laj Mormon kixwaklesi xch’ooleb’ rik’in xch’olob’ankil chiruheb’ naq yooqeb’ chixk’ulb’al li maatan re te’nujob’resiiq xch’ool xb’aan lix saq ruhil rahom li Kristo. Naxk’ut chiruheb’ chan ru neke’xk’am rib’ li paab’aal chirix li Jesukristo, li tuulanil ut kub’enaqil ch’oolej, li Santil Musiq’ej, ut li kawil yo’onihom re xk’ulb’al li junelik yu’am. A’an kixwaklesi xch’ooleb’ chi jo’ka’in:
“Wi ta joʼkan, maakʼaʼ xyaalal lix paabʼaal ut lix yoʼonihom, xbʼaan naq maajun kʼulubʼanbʼil chiru li Dios, kaʼajwiʼ li tuulan ut kubʼenaq xchʼool; ut wi junaq winq tuulan ut kubʼenaq xchʼool, ut naxchʼolobʼ rikʼin xwankil li Santil Musiqʼej naq li Jesus aʼan li Kristo, tento taawanq ajwiʼ li rahok rikʼin; xbʼaan naq wi maakʼaʼ li rahok rikʼin, aʼan maakʼaʼ naʼok wiʼ; joʼkan naq tento taawanq rahok rikʼin.”3
Anajwan, nink’e reetal chan ru naq li maatan re li tz’aqal rahok—li saq ruhil rahok narahok wi’ li Kristo—kixkawob’resi, kixb’eresi, kixch’olani, ut kixjal lin na’ chiruheb’ lix ch’a’ajkilal sa’ xb’ehil chi sutq’iik sa’ rochoch.
“Ut li rahok najt naʼoybʼenin, ut chaabʼil xchʼool, ut inkʼaʼ nakaqalin, ut inkʼaʼ nimobʼresinbʼil ribʼ, inkʼaʼ naxsikʼ li kʼaʼru re, inkʼaʼ saʼ junpaat najosqʼoʼ, maajun maaʼusilal naxkʼoxla, ut moko nasahoʼ ta xchʼool rikʼin li maaʼusilal; rikʼin bʼan li yaal nasahoʼ xchʼool, chixjunil naxkuy, chixjunil naxpaabʼ, chixjunil naxyoʼoni, chixjunil naxkuy xnumsinkil.
“Joʼkan ut, ex was wiitzʼin raarookex inbʼaan, wi maakʼaʼ li rahok eerikʼin, maakʼaʼ nekexʼok wiʼ, xbʼaan naq li rahok maajoʼqʼe naʼosoʼ. Joʼkan ut, chexjiloq rikʼin li rahok, aʼan li qʼaxal nim wiʼchik chiru chixjunil, xbʼaan naq chixjunil li kʼaʼaq re ru tento taaʼosoʼq—
“Aʼbʼanan li tzʼaqal rahok aʼan li saq ruhil rahok narahok wiʼ li Kristo, ut junelik nawan; ut ani natawman chi wank rikʼin saʼ rosoʼjik li kutan, usaq choqʼ re aʼan.
“Joʼkan ut, ex was wiitzʼin raarookex inbʼaan, tijonqex chiru li Yuwaʼbʼej chi anchal xmetzʼew eechʼool, re texnujaq rikʼin li rahok aʼin, li naxkʼe saʼ xbʼeenebʼ chixjunil li tzʼaqal nekeʼtaaqenk re li Jesukristo, li Ralal, re naq taaruuq texʼok choqʼ ralal li Dios; re naq joʼqʼe tixkʼut ribʼ toowanq chanchan aʼan, xbʼaan naq taqil aʼan joʼ chanru naq wan; re taawanq qikʼin li yoʼonihom aʼin; re taasaqobʼresiiq qu joʼ chanru ajwiʼ naq saq ru aʼan.”4
Ninb’antioxi lix waklesinkil inch’ool xb’aan lix b’aanuhom ut li raatin laj Mormon. Nin’osob’tesiik ajwi’ xb’aan li eechej kixk’e inna’. Eb’ li profeet chalen chaq laj Adan toj sa’ li kutankil a’in, rik’in aatin ut rik’in b’aanuhom, nikine’xkawob’resi.
Re xk’eeb’al roxloq’eb’ li kristiaan ninnaweb’ ru ut eb’ lix junkab’al, ink’a’ xinsik’ xnawb’al ru li junjunq xraqalil lix ch’a’ajkilaleb’ chi moko tinyaab’asiheb’ lix ninqi maatan. A’ut li wilom xwaklesi inch’ool ut xinixjal chi chaab’il.
Ink’a’ nawaj xseraq’inkil resil lix yu’am chi ink’a’ naraj, a’b’an tinwotz jun ch’ina na’leb’ chirix li waklesink ch’oolej naxb’aanu li wixaqil. Tinb’aanu chi eek’anb’il. A’an ink’a’ mas naraj nawe’k ru ut ink’a’ naxsik’ chi moko naraj xnimankil ru.
Numenaq 60 chihab’ naq koosumla chaq. B’antiox re a’an naq anajwan nintaw ruheb’ li loq’laj aatin a’in: paab’aal, yo’onink, tuulanil, aj kuyunel, ink’a’ xsik’b’al li k’a’ru qe, saho’k rik’in li yaal, ink’a’ xk’oxlankil li maa’usilal, ut sa’ xb’een chixjunil, li tz’aqal rahok.5 Xb’aan a’an naq naru ninch’olob’ xyaalal naq eb’ li kristiaan neke’ru chixyu’aminkileb’ li chaab’il na’leb’ a’an wulaj wulaj naq yookeb’ chi nume’k sa’ xb’eeneb’ lix toch’om li yu’am.
Wankeb’ k’iila millon eere li nekenaweb’ ru kristiaan jo’ a’an. K’iheb’ eere laa’ex li kristiaan a’an. Chiqajunilo neke’qaj ru li ani neke’xwaklesi qach’ool ut nokohe’xra.
Naq nekexchunla chixk’atq junaq eekomon jo’ aj ilol komon winq malaj ixq, laa’ex ruuchilex li Qaawa’. K’oxlahomaq k’a’ raj ru tixb’aanu malaj tixye a’an. Tixb’oqeb’ raj chi chalk rik’in. Tixwaklesi raj xch’ooleb’. Tixk’e raj reetal ut tixnima raj ru lix tiklajikeb’ li jalaak li tento tixb’aanu. Ut a’anaq raj li tz’aqal eetalil te’iloq wi’.
Maji’ nokoru chixb’aanukil chixjunil a’an, a’b’an rik’in rab’inkil li yeeb’il sa’ li jolomil ch’utub’aj-ib’ a’in, naru teenaw naq wankex sa’ li b’e. Li Kolonel naxnaw chixjunileb’ lee ch’a’ajkilal chi tz’aqal. Naxnaw lee wankilal chi k’iik sa’ paab’aal, yo’onihom, ut tz’aqal rahok.
Eb’ li taqlahom ut sumwank naxyeechi’i eere moko k’eeb’ileb’ ta re xminb’al eeru. A’aneb’ b’an jun maatan re eewaklesinkil re xk’ulb’al chixjunileb’ lix maatan li Dios ut sutq’iik rik’in lee Choxahil Yuwa’ ut li Qaawa’, li nekexxra.
Li Jesukristo kixtoj xtz’aq li qamaak. Naru taqak’ul li junelik yu’am wi wanq qapaab’aal chirix a’an li tooxk’e chixjalb’al qak’a’uxl ut chi wulak jo’ jun ch’ina al, li saq ru xch’ool ut yo’on wan re xk’ulb’aleb’ li xninqal ru maatan naxk’e li Dios.
Nintz’aama naq teek’ulub’a lix b’oqom ut naq teeq’axtesi re xkomoneb’ chik li ralal xk’ajol li qaChoxahil Yuwa’.
Nintijok chirixeb’ li qamisioneer chiru li ruchich’och’. Che’musiq’aaq chixwaklesinkil xch’ool li junjunq chi kristiaan chirajb’al ut chixpaab’ankil naq a’an li Jesukristo li nab’oqok rik’in xtz’uumal reheb’ lix moos li neke’xk’ul sa’ xb’eeneb’ lix k’ab’a’ a’an.
Ninch’olob xyaalal naq yo’yo a’an ut naq naxb’eresi lix Iglees. Laa’in aj k’ehol eetal chirix. Li Awa’b’ej Russell M. Nelson a’an lix yo’yookil profeet li Dios choq’ re chixjunil li ruchich’och’. Ninnaw naq yaal a’an. Sa’ lix loq’laj k’ab’a’ li Jesukristo, amen.