Lix sumenkileb’ a’an li Jesus
Maak’a’ naxye chan ru xch’a’ajkil malaj xmoymoyil li ch’a’ajkilal, junelik naru nanaq sa’ eech’ool naq lee sumenkil moko ch’a’aj ta: junelik a’an li Jesus.
K’a’jo’ naq oxloq’inb’il chi aatinak eerik’in sa’ li ch’utam a’in re li ch’utub’aj-ib’. Anajwan texwaatina jo’ li wamiiw. Sa’ lix evangelio laj Jwan, li Kolonel kixk’ut naq laa’o li ramiiw wi naqab’aanu li naxpatz’ a’an.1
A’an li qarahom chi junjunqal ut sa’ komonil choq’ re li Kolonel, ut eb’ li qasumwank rik’in a’an li neke’junajink qe. Jo’ kixk’ut li Awa’b’ej Henry B. Eyring: “Nawaj xyeeb’al eere naq q’axal nekexxra li Qaawa’ ut nim li royb’enihom eerik’in. Ut nawaj ajwi’ xyeeb’al eere naq a’an k’a’jo’ naq naraj ru lee k’anjel.”2
Naq li Awa’b’ej Russell M. Nelson kinixb’oq jo’ Jolominel aj B’eresinel, ke’tam li week’ahom. K’a’jo’ naq kine’xnujob’resi. Li wixaqil, xJulie, ut laa’in yooko chiroyb’eninkil li ch’utam re sabado ewu re li jolomil ch’utub’aj-ib’. K’a’jo’ xtuulanil naq kink’ojob’aak. Kiwajla chi ch’olch’o ru lin yokb’ toj sa’ lin chunleb’aal re naq ink’a’ tinsachq sa’ xb’eenil lin k’anjel.
Sa’ xraqik li ch’utam, kik’ulman jun na’leb’ li kixtoch’ tz’aqal inyu’am. Eb’ li komon sa’ li molam ke’xtusub’ rib’ ut ke’xk’e li ruq’ reheb’ li ak’ Jolomil aj B’eresinel. Sa’ junjunqal ke’xwotz lix rahom ut lix tenq’. Rik’in jun q’alunk maak’a’ xb’alaq’ ke’xye, “Mexk’oxlak—k’ulb’ilex.”
Sa’ li qawanjik rik’in li Kolonel, a’an naril li aamej ut “maawa’ aj tihonelebʼ ru li winq.”3 K’oxlahomaq chan ru naq kixsik’eb’ ru lix apostol. Ink’a’ kiril ma ninqeb’ roq malaj ma wankeb’ xtumin. A’an nokoxb’oq chixtaaqenkil, ut nink’oxla naq a’an naxye naq k’ulb’ilo rik’in a’an.
Li aatin a’in k’awresinb’il choq’ reheb’ li saaj re li Iglees. Nawil eerik’in li k’a’ru naril li Awa’b’ej Nelson. A’an xye naq “wan jun chaab’ilal xchaq’al ru rik’ineb’ li tasal tenamit a’in re li saaj. K’a’jo’ xkawilal xch’ool lee Choxahil Yuwa’ cherix xb’aan naq xexxtaqla chaq sa’ li ruchich’och’ sa’ li kutankil a’in. Xexyo’la choq’ re li k’a’ru q’axal nim!”4
Ninb’antioxi li k’a’ru nintzol rik’ineb’ li saaj. Ninb’antioxi li k’a’ru neke’xk’ut chiwu lin kok’al, li k’a’ru neke’xk’ut chiwu li misioneer, ut li k’a’ru neke’xk’ut chiwu li wikan.
Toje’, yookin chaq chi trab’ajik sa’ li qach’och’ wochb’een lin ch’ina ikan laj Nash. Waqib’ chihab’ wan re ut q’axal saq ru li raam. A’an li wikan li sik’b’il ru inb’aan aj Nash xk’ab’a’, ut nink’oxla naq laa’in ajwi’ li rikan sik’b’il ru xb’aan a’an li yoo chi aatinak sa’ li jolomil ch’utub’aj-ib’ anajwan.
Naq yoo chintenq’ankil chixtawb’al qana’leb’ chirix li yooko chixb’aanunkil, kinye re, “A’an jun chaab’il na’leb’, Nash. Chan ru naq jwal seeb’ aak’a’uxl?” Kinril ut kiwil xsa’ ru chanchan naq yoo chixk’oxlankil, “At Ryan, chan ru naq ink’a’ nakanaw xsumenkil li patz’om a’an?”
Ka’ajwi’ kireek’asi lix tel, kise’ek, ut kixye chi kaw xch’ool, “Jesus.”
Laj Nash kixjultika we sa’ li kutan a’an jun na’leb’ moko ch’a’aj ta a’b’an nim xloq’al. Lix sumenkileb’ li patz’om moko ch’a’ajeb’ ta ut eb’ li ch’a’ajkilal jwal ch’a’ajeb’ jun ajwi’. Lix sumenkileb’ a’an li Jesukristo. Chixjunil xyiib’ankil k’a’aq re ru natawman rik’in a’an.
Sa’ lix evangelio laj Jwan, li Kolonel kixye reheb’ lix tzolom naq a’an tixkawresi jun na’ajej choq’ reheb’. Laj Tomas kisach xch’ool ut kixye re li Kolonel:
“Qaawa’, ink’a’ naqanaw b’ar xik aawe; chan put ru naq taqanaw li b’e?
“Kixye li Jesus re: Laa’in li b’e, li yaal ut li yu’am. Maa’ani naxik rik’in li Yuwa’b’ej, wi ink’a’ ta sa’ ink’ab’a’.”5
Li Kolonel kixk’ut chiruheb’ lix tzolom naq a’an “li b’e, li yaal, ut li yu’am.” A’an xsumenkil li patz’om, chan ru naq tooxik rik’in li qaChoxahil Yuwa’. Xsik’b’al jun xnawom qach’ool chirix lix choxahil k’anjel a’an jun na’leb’ xintzol naq toj saajin chaq.
Naq yookin chaq chi k’anjelak jo’ misioneer aran Argentina, li Awa’b’ej Howard W. Hunter kooxb’oq chixb’aanunkil junaq na’leb’ li tixtoch’ tz’aqal lin yu’am. A’an kixye, “Tento taqanaw ru li Kristo chi chaab’il wi’chik chiru li naqanaw anajwan; tento taqajultika wi’chik chi kok’ aj xsa’ chiru li naqajultika anajwan; tento took’anjelaq chi kaw wi’chik chiru li nokok’anjelak anajwan.”6
Sa’ li hoonal a’an, kinyal inq’e chi wank jo’ jun chaab’il misioneer. A’an lix sumenkil: xnawb’al ru li Kristo, xjultikankil a’an, ut k’anjelak chiru. Eb’ li misioneer sa’ chixjunil li ruchich’och’ junajeb’ ru sa’ li k’anjel a’in: “xb’oqb’aleb’ li kristiaan chi chalk rik’in li Kristo rik’in xtenq’ankileb’ chixk’ulb’al li evangelio k’ojob’anb’il wi’chik rik’in li paab’aal chirix a’an ut chirix lix tojb’al rix li maak” ut rik’in “li jalb’a-k’a’uxlej, li kub’iha’, xk’ulb’al li maatan re li Santil Musiq’ej, ut li kuyuk toj sa’ roso’jik”7 Reheb’ li qamiiw yookeb’ chirab’inkileb’ li misioneer, nink’e lin b’oqom choq’ reheb’ naq che’chalq rik’in li Kristo. Sa’ junajil taqayal qaq’e chixnawb’al ru, chixjultikankil, ut chi k’anjelak chiru.
Lin k’anjel sa’ jun li mision a’an jun loq’laj hoonal sa’ lin yu’am. Naq kin’aatinak rik’in a’an sa’ xraqik lin mision, li Awa’b’ej Blair Pincock kinraatina chirix li jalok taa’uxmanq rik’ineb’ laj jolominel sa’ li mision, xb’aan naq a’aneb’ ajwi’ yookeb’ chi raqe’k sa’ lix mision. Kiraho’ qach’ool chixkanab’ankil li k’a’ru jwal naqara. Kixk’e reetal naq yoo ink’a’uxl chirix k’a’ru tinb’aanu naq moko laa’aqin ta chik misioneer. A’an jun winq li nim xpaab’aal ut kixk’e inna’leb’ rik’in rahok jo’ ak xb’aanuhom chiru wiib’ chihab’. Kixk’ut chi ruq’ lix jalam-uuch li Jesukristo li wan chiru lix meex ut kixye, “Elder Olsen, chaab’il twanq chixjunil xb’aan naq a’in lix k’anjel a’an.” Kik’ojla inch’ool chixnawb’al naq li Kolonel tooxtenq’a, moko ka’aj ta wi’ naq wanko sa’ li mision, junelik b’an—wi naqak’e xna’aj.
Li Hermana Pincock kooxtzol rik’in li k’a’ru na’el chaq sa’ xchamal li raam rik’in aatin moko ch’a’aj ta sa’ Kastiiy. Naq kixye, “Jesucristo vive,” kinnaw naq yaal a’an ut naq yo’yo tz’aqal a’an. Naq kixye, “Elderes ut hermanas, nekexinra,” kinnaw naq nokoxra ut naq naraj naq junelik taqataaqe li Kolonel.
Toje’, li wixaqil ut laa’in koo’osob’tesiik chi k’anjelak jo’ aj jolominel re mision re k’anjelak rik’ineb’ li chaab’il misioneer aran Uruguay. Laa’in ninye naq a’aneb’ li q’axal chaab’il misioner sa’ chixjunil li ruchich’och’, ut nawoyb’eni naq chixjunileb’ laj jolominel re junaq mision te’reek’a ajwi’ a’an. Eb’ li tzolom a’an rajlal kutan ke’xk’ut chiqu chan ru xtaaqenkil li Kolonel.
Sa’eb’ li aatinak rik’ineb’ li qamisioneer, jun reheb’ li q’axal chaab’il misioneer ki’ok sa’ lin oficiin. Q’axal chaab’il xk’anjel li misioneer a’an, jun chaab’il aj tzolonel ut aj jolominel. Jwal raab’il xb’aaneb’ li rochb’een ut jwal raab’il xb’aaneb’ li kristiaan. Jwal na’ab’in, tuulan xch’ool, ut tuqtu ru xch’ool. K’aynaqo chi aatinak chirixeb’ li na’ajej wan wi’ ut eb’ li kristiaan li yoo chaq xtzolb’aleb’. A’b’an jalan b’ayaq li aatinak a’in. Naq kinpatz’ re chan ru wan, kink’e reetal naq sachso b’ayaq xch’ool. A’an kixye, “Awa’b’ej Olsen, ink’a’ ninnaw ma tinruuq chixb’aanunkil a’in. Ink’a’ ninnaw ma tinchaab’ilo’q jun sutaq. Ink’a’ ninnaw ma tinruuq chi wulak jo’ li misioneer naroyb’eni li Qaawa’.”
K’a’jo’ xchaab’ilal jo’ misioneer. K’a’jo’ xchaab’ilal sa’ chixjunil. A’an jo’ li naraj jun awa’b’ej re mision. Maajun wa kiwan ink’a’uxl chirix lix seeb’al jo’ misioneer.
Naq yookin chirab’inkil, ink’a’ kintaw k’a’ raj ru tinye. Kintijok sa’ inch’ool: “At inChoxahil Yuwa’, k’a’jo’ xchaab’ilal li misioneer a’in. A’an aawe laa’at. Chaab’il naxb’aanu chixjunil. Ink’a’ nawaj xch’ikb’al wib’ sa’ ch’a’ajkilal. B’aanu usilal, tenq’ahin chixnawb’al k’a’ru tinye.”
Li aatin ke’wulak sa’ inch’ool. Kinye re, “Hermana, ra naweek’a naq nakaweek’a a’an. Nawaj xpatz’b’al jun na’leb’ aawe. Wi wanq raj junaq aawamiiw li nakatzol ut taareek’a raj li nakaweek’a laa’at, k’a’ raj ru taaye re?”
Kinril ut kise’ek. Sa’ li musiq’ej a’an re misioneer ut chi kaw xch’ool kixye, “Awa’b’ej, moko ch’a’aj ta a’an. Tinye raj re naq nanawe’ ru xb’aan li Kolonel. Tinye raj re naq a’an yo’yo. A’an nakatxra. K’a’jo’ aachaab’ilal ut yalaq k’a’ru naru nakab’aanu!”
Kise’ek b’ayaq ut kixye, “Nink’oxla naq wi nak’anjelak a’an rik’ineb’ li qamiiw, nak’anjelak ajwi’ choq’ we.”
Naq neke’wan qapatz’om ut xkab’ rix qach’ool, naru naqeek’a naq jwal ch’a’ajeb’ a’an malaj naq jwal ch’a’aj xtawb’aleb’ xsumenkil. Jultikaq qe naq li xik’ na’ilok, hehe’, lix yuwa’ chixjunil li tik’ti’, a’an laj yoob’anel re li sachk.8
Li Kolonel a’an laj K’utunel re li moko ch’a’aj ta.
Li Awa’b’ej Nelson kixye:
“Seeb’ xch’ool laj tza. Chiru k’iila mil chihab’ naxk’e li chaab’ilal chi k’utunk jo’ maa’usilal, ut li maa’usilal jo’ chaab’ilal. Li raatin a’an yeeb’il rik’in kawilal ut q’etq’etil.
“A’b’anan jwal jalan li aatin nachal rik’in li qaChoxahil Yuwa’. A’an na’aatinak chi q’un, chi ch’anch’o, ut chi ch’olch’o ru re naq moko naru ta naq ink’a’ taqataw ru.”9
K’a’jo’ naq naqab’antioxi naq li Dios kooxra chi numtajenaq xb’aan naq kixtaqla chaq li Ralal. A’an lix sumenkileb’.
Li Awa’b’ej Nelson toje’ kixye:
“Jo’ maajun wa chaq, ajb’il ru lix evangelio li Jesukristo. …
“… A’in naxk’ut naq jwal aajel ru naq taqapaab’ lix taqlahom li Qaawa’ reheb’ lix tzolom naq “te’xik sa’ chixjunil li ruchich’och’, ut te’xjultika li evangelio chiru li junjunq li yo’ob’tesinb’il.””10
Reheb’ li neke’xsik’ ru k’anjelak, ninch’olob’ xyaalal li osob’tesihom teek’ul naq teek’ulub’a lix b’oqom jun profeet. Li k’anjelak moko wan ta rilom qik’in laa’o; wan b’an rilom rik’in li Kolonel. Texb’oqe’q sa’ junaq na’ajej, a’b’an li jwal aajel ru a’an naq texb’oqe’q chi xik sa’ xyanqeb’ li kristiaan. Teneb’anb’ilaq sa’ eeb’een ut osob’tesinb’ilaqex chixtenq’ankileb’ lee ak’ amiiw chixtawb’al ru naq lix sumenkileb’ a’an li Jesus.
A’an a’in Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ut arin wan li qana’aj. Chixjunil li nokoxb’oq rik’in rahok li Awa’b’ej Nelson chixb’aanunkil tooxnach’ob’resi rik’in li Kolonel.
Ex q’axal chaab’il saaj—jo’ ajwi’ lin ch’ina ikan aj Nash—chiru lee yu’am, maak’a’ naxye chan ru xch’a’ajkil malaj xmoymoyil li ch’a’ajkilal, junelik naru nanaq sa’ eech’ool naq lee sumenkil moko ch’a’aj ta: junelik a’an li Jesus.
Jo’ wab’ihomeb’ chixyeeb’al k’iila sut li neke’qaxaqab’ xwankil jo’ profeet aj ilol na’leb’ ut aj k’utb’esinel na’leb’, laa’in ajwi’ ninye eere naq nekexqara, nokob’antioxin cherix, ut naqaj eeru. Arin wan lee na’aj.
Ninra li Kolonel. Ninch’olob’ xyaalal lix k’ab’a’, hehe’, a’ li Jesukristo. Ninch’olob’ xyaalal naq a’an “aj yoob’anel ut aj choyonel re li qapaab’aal,”11 ut naq a’an laj K’utunel re li k’a’ru ink’a’ ch’a’aj. Lix sumenkileb’ a’an li Jesus. Sa’ xk’ab’a’ li Jesukristo, amen.