Qak’aytesiiq qib’ chixb’aanunkil li us jo’ xcha’al li qawanjik

Xb’aan li Elder Rafael E. Pino

Re li Setenta

Wi laa’o junelik xaqxooko ut ink’a’ naqakanab’ xb’aanunkil li k’a’ru chaab’il, li k’a’ru k’aynaqo chixb’aanunkil tooxtenq’a chi kanaak sa’ xb’ehileb’ li sumwank.

Junelik tinb’antioxi li k’anjel ninb’aanu sa’ li Iglees li xinixk’am chi wank sa’ jalan jalanq chi tenamit. Sa’ li junjunq chi tenamit a’an xqataw jalanil na’leb’ ut eb’ li xninqal chaab’il kristiaan jalan jalanqeb’ xwanjik.

Chiqajunilo wan jalan jalanq qana’leb’, li na’el chaq sa’ li qajunkab’al malaj li na’el chaq sa’ li na’ajej b’ar wi’ xook’i chaq, ut naqoyb’eni naq te’kanaq qik’in li na’leb’ naxk’am rib’ rik’ineb’ li na’leb’ re li evangelio. Eb’ li chaab’il na’leb’ a’aneb’ aajel ru re naq taqayal qaq’e chi kanaak sa’ lix b’ehileb’ li sumwank, ut eb’ li neke’ramok qe, tento naq te’qatz’eqtaana.

Jun li na’leb’ a’an li k’a’ru naxk’oxla rajlal jun kristiaan, li na’leb’ kanab’anb’il chaq xb’aaneb’ lix xe’toon. Rajlal, li k’a’ru naqak’oxla ut naqab’aanu junelik, naqaye naq a’an li k’aynaqo chixb’aanunkil.

Nawaj xch’olob’ankil cheru jun na’leb’: Li xPatricia, lin raarookil ixaqil, k’a’jo’ naq nawulak chiru ruk’b’al lix ha’il li coco, chirix a’an naxk’ux xtib’el li coco. Sa’ li xb’eenil qab’eenik sa’ li tenamit Puebla, Mexico, xoowulak sa’ jun na’ajej b’ar wi’ xqaloq’ jun li coco. Chirix ruk’b’al lix ha’il, li wixaqil xpatz’ naq te’xjor li coco ut naq te’xk’am chaq re lix tib’el re tixk’ux. Naq ke’xk’am chaq re, kaq lix b’onol. Ke’xk’e chaq li ik sa’ xb’een! Ki’il coco rik’in ik! A’an jalan b’ayaq choq’ qe. A’b’an chirix a’an xqak’e reetal naq laa’o li jalano, li wixaqil ut laa’in, li ink’a’ naqatzeka li coco rik’in ik. Aran Mexico moko jalan ta a’an; k’aynaqeb’ rik’in a’an.

Sa’ jun chik kutan yooko chi wa’ak aran Brasil rik’ineb’ li qamiiw, ut ke’xk’e chaq qe li o. Naq ok qe chixk’eeb’al ratz’amil li qa’o, eb’ li qamiiw ke’xye: “K’a’ru yookex? Ak xqak’e li azucar chi sa’ li o!” Li o rik’in azucar! Maajun sut qilom a’an. Chirix a’an xqanaw naq eb’ li jalaneb’ a’ano laa’o, naq ink’a’ naqatzeka li o rik’in azucar. Aran Brasil, xk’eeb’al azucar sa’ li o, moko jalan ta, k’aynaqeb’ rik’in a’an.

Li k’a’ru k’aynaq chixb’aanunkil junaq maare anchal jalan choq’ re junaq chik, a’ yaal chan ru lix wanjikeb’.

K’a’ru chi na’leb’ ak k’aynaqo chixb’aanunkil sa’ li qayu’am?

Li Awa’b’ej Russell M. Nelson kixye: “Anajwan naqab’i rajlal chirix “jun li ak’ wanjik.” Wi chi yaal teeraj ok sa’ jun li ak’ wanjik, nink’e eeb’oqb’al naq teesutq’isi lee ch’ool, lee k’a’uxl, ut lee raam rik’in li qaChoxahil Yuwa’, ut li Jesukristo, li Ralal. Chiwanq a’in choq’ lee ak’ wanjik” (“Jun ak’ wanjik,” Jolomil ch’utub’aj-ib’ re octubre 2020).

Li b’oqom a’in, qe chiqajunilo. Maak’a’ naxye ma neb’a’o malaj b’ihomo, ma wan qatzolb’al malaj ink’a’, ma tiixo malaj saajo, ma yajo malaj kawo. A’an nokoxb’oq naq eb’ li k’a’aq re ru ak k’aynaqo chixb’aanunkil sa’ li qayu’am a’anaq li te’tenq’anq qe chi kanaak sa’ xb’ehileb’ li sumwank.

Maajun tenamit wan wi’ chi tz’aqal tz’aqal li k’a’ru us malaj li nasachok ch’oolej. Jo’ ke’xk’ut laj Pablo ut li profeet aj Jose Smith:

“Wi wan kʼaʼruhaq li saq ru, li chaqʼal ru, li chaabʼil esil yeebʼil chirix malaj nimajel ru, naqasikʼ li kʼaʼaq re ru aʼin” (Ebʼ lix Raqalil li Paabʼaal 1:13).

“Ut wi wan k’a’ru xk’ulub’ nimaak ru, a’an chiwanq sa’ eech’ool” (Filipenses 4:8).

K’e reetal naq a’in, a’an jun elajink, moko ka’aj ta wi’ jun aatin.

Nawaj raj naq chiqajunil taqak’e qahoonal re xk’oxlankil sa’ qach’ool li qana’leb’ ut chan ru naq na’oken sa’ li qajunkab’al.

Sa’ xyanqeb’ li k’a’ru chaab’il k’aytesinb’ilaqeb’ raj wi’ li komon re li Iglees wankeb’ li kaahib’ a’in:

Xtzolb’aleb’ li loq’laj hu sa’ junesal ut jo’ junkab’al. Re jalaak chiru li Jesukristo, li junjunq chi kristiaan teneb’anb’il sa’ xb’een xtzolb’al li evangelio. Eb’ li na’b’ej yuwa’b’ej tento sa’ xb’eeneb’ xk’utb’al li evangelio chiruheb’ li ralal xk’ajol (chi’ilmanq Tzol’leb’ ut Sumwank 68:25; 93:40).
Tijok sa’ junesal ut jo’ junkab’al. Li Qaawa’ nokoxtaqla chi tijok junelik (chi’ilmanq Tzol’leb’ ut Sumwank 19:38). Li tijok nokoxtenq’a chi aatinak rik’in li qaChoxahil Yuwa’ sa’ xk’ab’a’ li Ralal, a’ li Jesukristo.
Wulak sa’ li ch’utam re li loq’laj wa’ak rajlal xamaan (chi’ilmanq 3 Nefi 18:1–12; Moroni 6:5–6). Naqab’aanu a’an re xjultikankil li Jesukristo ut re xk’ulb’al li loq’laj wa’ak. Sa’ li k’ojob’anb’il k’anjel a’an eb’ li komon re li Iglees neke’x’ak’ob’resi li sumwank re xk’ulb’al sa’ xb’eeneb’ lix k’ab’a’ li Kolonel, re junelik xjultikankil ut xpaab’ankil lix taqlahom (chi’ilmanq Tzol’leb’ ut Sumwank 20:77, 79).
Tz’aqonk chi kok’ aj xsa’ sa’ li k’anjel re li santil ochoch ut li junkab’al. Li k’anjel a’in naxjunajiheb’ ut naxtz’apeb’ sa’ junajil li junkab’al chi junelik (chi’ilmanq Tzol’leb’ ut Sumwank 128:15).

K’a’ru naqeek’a naq naqapaab’eb’ li kaahib’ chi taqlahom a’in? Ma a’aneb’ xcha’al li qawanjik?

Wan naab’aleb’ chik li na’leb’ li taaruuq raj teewanq jo’ xcha’al li qawanjik, ut chi jo’kan xkanab’ankil naq li Dios taawanq chi junelik sa’ li qayu’am.

Chan ru tooruuq chixnawb’al k’a’ruheb’ li k’a’aq re ru neke’kana qik’in sa’ li qayu’am ut rik’ineb’ li qajunkab’al? Sa’ li loq’laj hu naqataw jun eetalil; sa’ Mosiah 5:15 naxye, “Tinwaj raj naq junelik xaqxooqex ut ink’a’ chex’eek’anq, junelik chinumtaaq eerik’in li chaab’il k’anjel.”

K’a’jo’ naq nawulak chiwu li aatin a’in xb’aan naq naqanaw naq li k’a’aq re ru li neke’kana sa’ li qayu’am a’aneb’ li neke’qab’aanu chi k’iila sut. Wi laa’o junelik xaqxooko ut ink’a’ naqakanab’ xb’aanunkil li k’a’ru chaab’il, li k’a’ru k’aynaqo chixb’aanunkil tixk’am rib’ rik’in li na’leb’ re li evangelio ut tooxtenq’a chi kanaak sa’ xb’ehileb’ li sumwank.

Li Awa’b’ej Nelson kixk’e ajwi’ qana’leb’: “Chex’ok sa’ lee ak’ wanjik rik’in xjalb’al eek’a’uxl wulaj wulaj. Chesik’ wank chi saq eeru eena’leb’, eeraatin, ut eeb’aanuhom. Chexk’anjelaq chiruheb’ lee ras eeriitz’in. Rajlal chiwanq sa’ eech’ool li junelik q’e kutan. Cheyal eeq’e sa’ lee b’oqb’al. Ut maak’a’ naxye ma wankeb’ eech’a’ajkilal, ex was wiitz’in, chexwanq sa’ li junjunq kutan re naq laa’ex kawresinb’ilex chixk’ulb’al li ani kiyo’ob’tesink eere” (“Jun ak’ wanjik”).

Anajwan moko jalan ta naq li wixaqil xPatricia ut laa’in naqatzeka li coco rik’in ik ut li azucar—us b’i’ a’an, nawulak chiqu. A’b’anan, li taqenaqil loq’al jwal aajel wi’chik ru chiru li k’a’ru sa naqeek’a xtzekankil; a’an jun na’leb’ chirix li k’a’ru nakana chi junelik.

Nintz’aama naq li k’a’ru k’aynaqo chixb’aanunkil tooxkanab’ chireek’ankil li “sahil ch’oolejil maak’a’ roso’jik” (Mosiah 2:41) li yeechi’inb’il choq’ reheb’ li neke’paab’ank re lix taqlahom li Dios ut naq taqab’aanu, tooruuq chixyeeb’al, “Ut kik’ulman naq koowan jo’ chanru li sahil ch’oolejil” (2 Nefi 5:27).

Ex was wiitz’in, ninch’olob’ xyaalaleb’ li o’laju chi winq li neke’qaxaqab’ jo’ profeet, aj ilol na’leb’, ut aj k’utb’esinel na’leb’, jo’ ajwi’ li qaraarookil profeet, Awa’b’ej Russell M. Nelson. Ninch’olob’ xyaalal naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an yaal. Ninch’olob’ xyaalal q’axal wi’chik chirix li Jesukristo, laj Kolol qe ut aj Tojol qix, sa’ xk’ab’a’ li Jesukristo, amen.