K’a’ru li yaal?

Xb’aan li Awa’b’ej Russell M. Nelson

Awaʼbʼej re Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan

Li Dios a’an lix yo’leb’aal chixjunil li yaal. Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naxk’ulub’a chixjunil li yaal naxk’e li Dios reheb’ li ralal xk’ajol.

Ex was wiitz’in, b’antiox eere chejunilex xb’aan li musiq’anb’il ch’utam a’in! Chalen chaq li qach’utub’aj-ib’ sa’ abril, neke’qil chi k’ulmank naab’al li k’a’aq re ru, eb’ li jwal ra jo’eb’ ajwi’ li jwal sa.

Nasaho’ qach’ool naq naqab’i resileb’ li ninqi ch’utub’aj-ib’ choq’ reheb’ li saaj yookeb’ chi b’aanumank chiru li ruchich’och’.¹ Sa’eb’ li ch’utub’aj-ib’ a’an, eb’ li qachaab’il saaj neke’xtzol naq maak’a’ naxye li te’xk’ul sa’ xyu’ameb’, nachal lix metz’eweb’ q’axal nim rik’in li Qaawa’.²

Nasaho’ qach’ool naq yookeb’ chi k’ablamank k’iila santil ochoch chiru li ruchich’och’. Rik’in li rosob’tesinkil li junjunq chi santil ochoch, nachal xkomon chik lix wankil li choxa sa’ ruchich’och’ re qakawob’resinkil ut re xka’ch’inob’resinkil lix wankilal laj tza.

Li muxuk a’an xk’anjel laj tza. Nimla maak a’an.³ Jo’ Awa’b’ej re li Iglees, ninka’suti li k’a’ru naxye li Jesukristo chirix a’in. Ab’ihomaqin: yalaq k’a’ chi muxuk sa’ xb’eeneb’ li ixq, kok’al, malaj yalaq chik ani a’an tzʼeqbʼeetalil chiru li Qaawa’. A’an naraho’ xch’ool ut laa’in naraho’ inch’ool naq yalaq ani rahob’tesinb’il. A’an naraho’ xch’ool ut chiqajunilo naraho’ qach’ool chirix yalaq ani li muxb’il chi k’iila paay ru. Eb’ li neke’b’aanunk re li nimla maa’usilal a’in teneb’anb’ilaqeb’ chiru xchaq’rab’il li winq jo’ ajwi’ chiru lix josq’il li Nimajwal Dios.

Chalen chaq k’iila chihab’, li Iglees naxb’aanu li jo’k’ihal naru chiru re xkolb’aleb’ rix—chi tz’aqal wi’chik—li kok’al chiru li muxe’k. Wankeb’ naab’al li tenq’ sa’ li perel web re li Iglees. Nekexinb’oq chixtz’ilb’aleb’ rix.⁴ Eb’ li chaq’rab’ a’an wankeb’ re xkolb’aleb’ rix li maak’a’eb’ xmaak. Nintz’aama cheru naq aj ajaq eeru chirix yalaq ani maare tixk’ul li muxe’k ut naq teeb’aanu sa’ junpaat li na’ajman ru re xkolb’aleb’ rix. Li Kolonel maak’a’ xkuyum chirix li muxuk, ut jo’ xtzolom, laa’o maak’a’aq ajwi’ qakuyum chirix a’an.

Wankeb’ chik lix xuwajelil na’leb’ laj tza. A’an naxsik’ xmoymoyinkil ru li k’a’ru yaal sa’ xyanq li k’a’ru tik’ti’. Xb’aan naq k’a’jo’ xk’ihal li na’leb’ naru naqataw sa’ junpaat, jwal ch’a’aj anajwan xnawb’al k’a’ru li yaal.

Li ch’a’ajkilal a’in naxk’e chinjultika naq li Hermana Nelson ut laa’in kiqula’ani jun aj jolominel sa’ jun tenamit b’ar wi’ lix k’ihaleb’ li kristiaan ink’a’ neke’xnaw ani li Jesukristo. Li qachaab’il amiiw a’in tiix ut toje’ kiwan xyajel. Kixye qe naq chiruheb’ li k’iila kutan naq yokyo chiru xch’aat, rajal ki’ilok chi taqe’q ut kixpatz’ rib’, “K’a’ru li yaal?”

Wankeb’ naab’al sa’ ruchich’och’ “rambʼil li yaal chiruhebʼ yal xbʼaan naq inkʼaʼ nekeʼxnaw bʼar teʼxtaw.”⁵ Wankeb’ li neke’xye naq li yaal naru najala—naq li junjunq chi kristiaan tixtz’il rix xjunes rib’ k’a’ru yaal ut k’a’ru ink’a’. Li na’leb’ a’an yal royb’enihomeb’ li neke’xk’oxla naq ink’a’ teneb’anb’ilaqeb’ rib’ chiru li Dios.

Ex was wiitz’in, li Dios a’an lix yo’leb’aal chixjunil li yaal. Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naxk’ulub’a chixjunil li yaal naxk’e li Dios reheb’ li ralal xk’ajol, ma chi tzolb’il sa’ jun li laboratorio malaj chi k’utb’esinb’il tz’aqal xb’aan a’an.

Sa’ li xaqleb’aal a’in anajwan ut wulaj teerab’i xkomon li yaal. Tz’iib’ahomaqeb’ li na’leb’ li te’chalq sa’ lee k’a’uxl ut li te’kanaaq sa’ lee raam. Patz’omaq re li Qaawa’ naq tixch’olob’ cheru naq yaal li xerab’i.

Nekexinra, ex was wiitz’in. Nintz’aama naq li ch’utub’aj-ib’ a’in a’anaq li musiq’ejil wa’ak yookex chixsik’b’al. Sa’ lix loq’laj k’ab’a’ li Jesukristo, amen.