Reetalil li tzolomil
Tzolok chirix li Kristo ut lix b’e nokoxk’am chixnawb’al ru ut chixraab’al.
Reetalil li paab’aal
Chiru li eq’la a’in wiib’eb’ li qalal ut oxib’eb’ li qi sa’ Norteamerica ut lix yiijach li ruchich’och’ xe’ril li saq’e chi elk chaq sa’ li releb’aal. Eb’ li oxib’ chik qalal ut wuqub’eb’ li qi xe’ril aran Africa ut lix yiijach chik li ruchich’och’ xe’ril chan ru naq li q’ojyin yoo chi nume’k sa’ xb’eeneb’ naq li saq’e x’ok sa’ li rokeb’aal.
Lix tiklajik li kutan ut li q’ojyin a’an jun xjultikankil qe naq wan k’a’ru najolomink re li qayu’am ut ink’a’ naru naqajal. Naq naqoxloq’i ut naqatus ru li naqab’aanu rik’ineb’ li junelikil wank a’an, naqeek’a tuqtuukilal ut junajil. Naq ink’a’ naqab’aanu, ink’a’ sa li qach’ool ut li qab’aanuhom ink’a’ na’el jo’ naqaj.
Li kutan ut li q’ojyin a’an jun reetalil li naxk’e li Dios choq’ qe li yo’yooko sa’ xb’een li ruchich’och’, li k’a’aq re ru jo’ chanru wankeb’. Tz’aqal yaal naq li qawanjik sa’ xb’een li ruchich’och’ ink’a’ naru naqajal jo’ chanru raj naqaj ut eelelik chiru. Nanaq sa’ inch’ool a’in naq yookin chi xik aran Africa chi tz’aqonk sa’ li jolomil ch’utub’aj-ib’, ninsutq’i laajeb’ hoor chirix chiru li kutan.
Rajlal naq noko’ok chi k’ehok eetal, naqil naq li qaChoxahil Yuwa’ kixk’e naab’aleb’ laj yehol yaal re xb’eresinkil li qayu’am re naq tooruuq chixnawb’al ru ut re naq wanqeb’ li qosob’tesinkil re tuqtuukilal ut sahil ch’oolej.
Rik’in xtz’uumal re li profeet aj Jose Smith, lix Santil Musiq’ li Qaawa’ kixye, “Ut joʼkan wiʼchik, tinkʼe eere jun kʼutbʼil eetalil saʼ chixjunil li kʼaʼaq re ru, re naq inkʼaʼ texwanq chi bʼalaqʼinbʼil; xbʼaan naq laj Satanas xikenaq saʼ li chʼochʼ, ut naxik chixbʼalaqʼinkilebʼ li tenamit.”1
Laj Korihor, aj xikʼ ilonel re li Kristo, kit’ane’ xb’aan li b’alaq’, ink’a’ kixpaab’ naq wan jun li Dios ut naq taachalq li Kristo. Li profeet aj Alma kixch’olob’ xyaalal chiru, “Chixjunil li kʼaʼaq re ru naxkʼut naq wan jun li Dios; relik chi yaal, joʼkan ajwiʼ li ruchichʼochʼ, ut chixjunil li kʼaʼaq re ru wan chiru lix bʼeen, relik chi yaal, ut lix xikik, relik chi yaal, ut joʼkan ajwiʼ chixjunilebʼ li kokʼ tʼortʼookil chahim li nekeʼbʼeek chiru tzʼaqal xbʼehebʼ, nekeʼxkʼut xyaalal naq wan jun aj Yoʼobʼtesinel li nataqlan re chixjunil.”2
Naq laj Korihor kirelaji naq taak’utmanq jun li eetalil chiru re naq taapaab’anq, laj Alma kixk’e chi memo’k. Tz’eqtaananb’il xb’aan lix majelal, laj Korihor kixye chi maak’a’ xxutaan naq kib’alaq’iik xb’aan laj tza.
Ink’a’ aajel ru naq toob’alaq’iiq. Li sachb’a-ch’oolej re li chaab’il yu’am wan chiqu rajlal. Ut jun ch’ina ilok ut k’oxlak chirix lix ch’ina-usil li choxa, nujenaq rik’ineb’ li chahim ut eb’ li t’ort’ookil chahim, naxtoch’ li raam qach’ool li napaab’an chixyaab’asinkil, “At inDios, jwal nim aawu!”3
Relik chi yaal, li Dios li qaChoxahil Yuwa’ yo’yo, ut a’an naxk’ut rib’ chiqu sa’ jalan jalanq li k’a’aq re ru.
Reetalil li tuulanil
A’b’anan re xk’eeb’al reetal, xpaab’ankil, ut wank rik’in li Dios, li qach’ool tento naq wanq re li Musiq’ej re li yaal. Laj Alma kixk’ut naq li paab’aal naxk’am chaq li tuulanil.4 Laj Mormon kixye naq ink’a’ naru junaq li kristiaan li ink’a’ “q’un ut tuulan xch’ool” chi wank xpaab’aal ut royb’enihom ut tixk’ul lix Musiq’ li Dios.5 Li rey aj Benjamin kixye naq wi junaq naxk’e xna’aj lix loq’al li ruchich’och’ a’an “moko raamiiw ta li Dios.”6
Naq kikub’e xha’ re xtz’aqob’resinkil ru chixjunil li tiikilal, us ta sant, li Jesukristo kixk’ut naq li tuulanil chiru li Dios aajel ru choq’ reheb’ lix tzolom.7
Chixjunilebʼ li akʼ tzolom tento teʼxkʼut naq tuulanebʼ xchʼool chiru li Dios rikʼin xkʼulbʼal li kʼojobʼanbʼil kʼanjel re li kubʼihaʼ. Chi joʼkan, “chixjunilebʼ li teʼxtuulanobʼresi ribʼ chiru li Dios, ut teʼajoq re kubʼeek xhaʼ, ut teʼchalq chi ubʼej chi yotʼbʼilebʼ xchʼool ut tuulanebʼ xmusiqʼ … teʼkʼuleʼq rikʼin kubʼihaʼ saʼ lix iglees.”8
Li tuulanil naxk’am lix ch’ool li tzolom sa’ li jalb’a-k’a’uxlej ut sa’ li ab’ink. Ut chi jo’kan lix Musiq’ li Dios naru naxk’am li yaal sa’ li ch’oolej a’an, ut tixtaw rokeb’aal.9
Lix maak’a’il tuulanil naxtenq’a chi tz’aqlok ru li kixye li apostol aj Pablo sa’eb’ li qakutankil:
“Eb’ li winq junes reheb’ te’raj, te’xrahi ru li tumin, te’xnimob’resihatq xwankileb’, te’xq’etq’eti rib’eb’, aj majewanelaqeb’, aj q’etolaqeb’ raatin xna’ xyuwa’, maak’a’ chik te’xnaw xb’antioxinkil ut te’xtz’eqtaana li paab’ank.
“Ink’a’ chik te’xrahatq rib’, maak’a’aq chik usilal rik’ineb’, aj yoob’anelaqeb’ aatin, ink’a’ te’xkuy rib’, q’axal josq’aqeb’, xik’ te’ril li chaab’ilal.”10
Lix b’oqom li Kolonel chi tzolok chirix a’an, a’an jun b’oqom re xkanab’ankil li ruchich’och’ ut wulak jo’ a’an—tuulan ut kub’enaq xch’ool. Chi jo’kan naru taqak’ul lix iiqleb’ ut taqil naq moko ch’a’aj ta—naq li tzolomil maawa’ a’an jun li iiq a’an b’an jun sahil ch’oolejil, jo’ xk’utum chiqu li Awa’b’ej Russell M. Nelson naab’al sut.
Reetalil li rahok
Tzolok chirix li Kristo ut lix b’e nokoxk’am chixnawb’al ru ut chixraab’al.
A’an kixk’ut chiqu rik’in eetalil naq rik’in tuulanil naru naqanaw ru ut naqara li Dios li Yuwa’b’ej rik’in x’anchalil li qaam ut xraab’aleb’ li qas qiitz’ineb’ jo’ naqara qib’, chi tz’aqal re ru. Lix k’anjel sa’ ruchich’och’, b’ar wi’ kixk’e li rajom ut lix junxaqalil sa’ xb’een li artal, kiwan jo’ jun eetalil re xyu’aminkileb’ li raqal a’an, li k’ojk’o wi’ li evangelio. Eb’ li raqal a’in neke’xk’ut chan ru nokowan rik’ineb’ li qas qiitz’in, maawa’ re xsik’b’al qasahilal chi moko qaloq’al.
Li sachb’a-ch’oolejil a’in a’an naq naqayal qaq’e chixraab’al li Dios ut eb’ li qas q’iitz’in, nokoru chixk’eeb’al reetal li qachoxahil loq’al, jo’ ralal ut xrab’in li Dios, rik’in li tuqtuukilal ut sahil ch’oolej li naxk’e li k’ulb’il na’leb’ a’an.
Nokowulak chi jun rik’in li Dios ut chi jun rik’ineb’ li qas qiitz’in rik’in li rahok ut li k’anjelak. Jo’kan b’i, tooruuq chixk’ulb’al li qanawom rik’in li Santil Musiq’ej chirix li tiikil rahom, li ruchinihom li kixye laj Lehi naq “q’axal ki’, chiru chixjunil li ak xyalom.”11
Li koroon kixk’ul li Kristo sa’ xk’eeb’al ut xb’aanunkil chixjunil, re xk’utb’al chan ru xraab’al li Yuwa’b’ej ut qaraab’al laa’o a’an xk’ulb’al chixjunil li wankilal, hehe’, chixjunil li wan re li Yuwa’b’ej, li taqenaqil loq’al.12
Li qahoonal re xch’olaninkil sa’ li qaam jun rahok chi junelik chirix li Dios ut choq’ reheb’ li qas qiitz’in natikla sa’ qochoch rik’ineb’ li k’a’aq re ru sant jo’ li aatinak rik’in li Yuwa’b’ej rik’in li tijok sa’ junesal ut sa’ junkab’al sa’ xk’ab’a’ li Ralal Jun Chirib’il, tzolok sa’ junesal malaj sa’ komonil sa’eb’ li loq’laj hu, xpaab’ankil li hilob’aal kutan, ut sa’ junesal wanq li qarecomendacion re ok sa’ li santil ochoch, roksinkil a’an chi kok’ aj xsa’ jo’ chanru naru chiqu.
Jo’ chanru yooq chi k’iik li qanawom sa’ junesal ut qarahom chirix li Yuwa’b’ej ut li Alalb’ej, nak’i li qarahom chirixeb’ li qas qiitz’in. Li qarahom ut li qajom re k’anjelak chiruheb’ li qas qiitz’in yoo chi usaak chi naab’al.
Li naqab’aanu sa’ li qajunkab’al a’an tz’aqal xb’ehil li junelikil tzolomil. Eb’ li sahil osob’tesink re li evangelio li k’ojob’anb’il wi’chik naqayal, li wixaqil xGladys ut laa’in, neke’chal chirix xtzolb’al xnawb’al ru ut xloq’oninkil li Dios sa’ li qochoch ut xwotzb’al lix rahom rik’ineb’ li qajunkab’al.
Retalil li k’anjelak
Li rahom chirix li Dios ut li k’anjelak chiqib’il qib’ kawresinb’il sa’ li qochoch ut li k’anjelak chiruheb’ li qas qiitz’in nawulak jo’ li seeb’al re li tz’aqal rahok.
A’in chanchan reetalil li loq’laj k’anjel sa’ li rawa’b’ejihom li Dios li neke’xk’ut chiqu li profeet ut apostol re li Qaawa’. Nokowulak chi jun rik’ineb’ a’an.
Jo’kan ut naru naqil li Qaawa’ “sa’ chixjunil k’a’uxl,” re naq ink’a’ “taa’ok qak’a’uxl” chi moko “tooxuwaq.”13
Jo’eb’ lix yo’yookil profeet ut x’apostol li Qaawa’, naru tooxik chi uub’ej “rik’in xnimal ru rahok choq’ reheb’ li winq, ut … choq’ re li rochochil li paab’aal ut li saq ruhil na’leb’ uutz’u’ujinb’il rajlal laa k’oxlahom, … toja’ ut naq taanimanq xmetz’ew lix kawilal aach’ool chiru li Dios; ut li tzol’leb’ re li tijonelil taanaq chiru laa waam chanchan li k’ajob’ chalen chaq sa’ choxa.”
Rik’ineb’ lix yo’yookil profeet ut x’apostol li Qaawa’, laa’o ajwi’ tooruuq chi tz’aqonk sa’ li paab’aal kawresinb’il xb’aan li loq’laj k’anjel b’ar wi’ naq li “Santil Musiq’ej taa’ochb’eeninq qe rajlal, ut li qaxuq’ a’anaq jun xuq’ re tiikilal ut yaal li ink’a’ naxjal rib’, ut li qa’awa’b’ejil a’anaq jun awa’b’ejil li junelik nakana ut chi moko minb’il ta taanume’q qik’in chi junelik q’e kutan.”14 Xbʼaan naq aʼin lix yeechiʼihom lix k’uub’anb’il na’leb’ li Yuwaʼbʼej. Sa’ xk’ab’a’ li Jesukristo, amen.